ဝန်ခြုံးရွာ

October 19, 2021

ဝန်ခြုံးရွာကို အကြမ်းဖက်စစ်တပ်က ၂ လကြာတပ်စွဲထား၊ ဒေသခံ ၁၀၀၀ ကျော် ထွက်ပြေးနေရ

မကွေးတိုင်းဒေသကြီး ပေါက်မြို့နယ် ဝန်ခြုံးရွာကို အကြမ်းဖက်စစ်တပ်က သြဂုတ်ကစပြီး အောက်တိုဘာ ၁၉ ရက်နေ့အထိ ၂ လကျော်ကြာတဲ့အထိ ဝင်ရောက်စီးနင်း တပ်စွဲထားတာကြောင့် ဒေသခံရွာသား ၁၀၀၀ ကျော် ထွက်ပြေးတိမ်းရှောင်နေကြရတယ်လို့ ဒေသခံတွေက ပြောပါတယ်။

ဝန်ခြုံးကျေးရွာကို သြဂုတ်လအတွင်းမှာ အကြမ်းဖက်စစ်တပ်က လက်နက်ကြီး၊ လက်နက်ငယ်တွေနဲ့ ပစ်ခတ်ပြီး ပထမကြိမ် ဝင်ရောက်စီးနင်းတာကြောင့် ပြည်သူတစ်ယောက် သေနတ်ကျည်ထိမှန် ဒဏ်ရာရရှိကာ နေအိမ် ၁ လုံး မီးရှို့ဖျက်ဆီးသွားတယ်လို့ ဆိုပါတယ်။

ဒါ့အပြင် အကြမ်းဖက်စစ်အုပ်စုတွေဟာ ရွာထဲက နေအိမ်တွေကို တစ်အိမ်ဝင်တစ်အိမ်ထွက်ဝင်ရောမွှေနှောက်ကာ ဖျက်ဆီးခဲ့ကြပြီး ပစ္စည်းတွေ ယူဆောင်သွားကြတယ်လို့ ဆိုပါတယ်။

အဲဒီလိုမွှေနှောက်ခံရပြီး ရွာထဲမှာ ၁၅ ရက်လောက်ပြန်နေပြီးတဲ့အချိန် စက်တင်ဘာ ၁ ရက်နေ့မှာ ပျူစောထီးအဖွဲ့တွေက အကြမ်းဖက်စစ်အုပ်စုကို ခေါ်တာကြောင့် အင်အား ၅၀ လောက်နဲ့ရောက်လာပြီးတော့ ဆိုင်ကယ် ၁၆ စီးနဲ့ တဲ ၂ လုံးကို မီးရှို့ဖျက်ဆီးသွားတယ်လို့ ပြောပါတယ်။

ဝန်ခြုံးရွာ ဘုန်ကြီးကျောင်းမှာလည်း အကြမ်းဖက်စစ်တပ်က ပြည်သူတွေ လှူဒါန်းထားတဲ့ ဆန်၊ ဆီ၊ ဆေးဝါးတွေကို ဖျက်ဆီးသွားသလို ဆန်တွေကိုတော့ အသုံးပြုလို့မရအောင် ရေနံတွေနဲ့လောင်းသွားတယ်လို့ ဆိုပါတယ်။

ဒါ့အပြင် ဝန်ခြုံးရွာက ပြည်သူတွေ တိမ်းရှောင်နေတဲ့ရွာတစ်ရွာကိုလည်း အကြမ်းဖက်စစ်တပ်ကဝင်ရောက်စီနင်းပြီး စစ်ဘေးရှောင်တွေရဲ့ ဆိုင်ကယ် ၂ စီးကို မီးရှို့ဖျက်ဆီးပြီး၊ ကားသုံးစီးနဲ့ ထွန်စက် တစ်စီးကို ရိုက်ခွဲဖျက်ဆီးကာ ဖောကား ၂ စီးနဲ့ ထွန်စက်တစ်စီးပေါ် ပစ္စည်းတွေနဲ့ ဆိုင်ကယ်တွေတင်ပြီး အဓမ္မသိမ်းဆည်းကာ ပင်ထောင်ရွာဘက်ကို သယ်သွားတယ်လို့ ပြောပါတယ်။

အကြမ်းဖက်စစ်အုပ်စုတွေဟာ အင်အား ၅၀ လောက်နဲ့ ပျူစောထီးအဖွဲ့တွေနဲ့ပူးပေါင်းကာ လက်ရှိအချိန်ထိ ဝန်ခြုံးရွာဘုန်းကြီးကျောင်းမှာ တပ်စွဲထားတာကြောင့် ဒေသခံရွာသား ၁၀၀၀ ကျော် ၂ လကျော်ကြာထွက်ပြေးတိမ်းရှောင်နေကြရပါတယ်။

စစ်ရှောင်တွေဟာ စားနပ်ရိက္ခာနဲ့ ဆေးဝါးတွေ အကူညီလိုအပ်နေတာကြောင့် ပေါက်တောင်ပိုင်း PDF တပ်ဖွဲ့ကနေတဆင့် လှူဒါန်းပေးကြဖို့ မေတ္တာရပ်ခံတောင်းဆိုထားပါတယ်။

2 months Ago

September 2, 2021

ပေါက်မြို့နယ်၊ ဝန်ခြုံးရွာက လူနေအိမ်များကို စစ်ကောင်စီတပ်က မီးရှို့

မကွေးတိုင်း၊ ပေါက်မြို့နယ်တောင်ပိုင်း ဝန်ခြုံးရွာရှိ လူနေအိမ်တွေကို စစ်ကောင်စီတပ်တွေ စက်တင်ဘာလ ၂ ရက်နေ့ နေ့လယ်ပိုင်းက မီးရှို့ပြီး၊ တောင်ဘက်ကျေးရွာအတွင်းရှိ လူနေအိမ်တံခါးတွေကို ဖျက်ဆီးကာ အသုံးအဆောင်ပစ္စည်းတွေ သယ်ယူနေတယ်လို့ သိရပါတယ်။

ဝန်ခြုံးကျေးရွာဒေသခံတဦးက ''အကြမ်းဖက်စစ်တပ်ကရွာမှာ တပ်စွဲထားတာကြာပြီ။ ရွာသားတွေကတော့ တောတောင်တွေထဲမှာပေါ့။ သူတို့က ရွာထဲမှာရှိနေတဲ့ အိမ်တွေက ရိက္ခာတွေ ယူစားတဲ့အပြင် ဒီနေ့ဆိုရင်လည်း ရွာကိုမီးရှို့ပြန်ပြီ။ တော်တော်လူသားမဆန်တဲ့လုပ်ရပ်တွေပါ'' လို့ ပြောပါတယ်။

ပေါက်မြို့နယ်အတွင်းက တောင်ဘက်ကျေးရွာကိုလည်း စစ်ကောင်စီတပ်တွေ ဝင်ရောက်ပြီး ပြည်သူတွေရဲ့ နေအိမ်တွေကို ဖျက်ဆီးနေတယ်လို့ သိရပါတယ်။

တောင်ဘက်ကျေးရွာ ဒေသခံတဦးက ''ဒီနေ့နေ့လယ်ကတည်းက ရွာကနေပြေးလာရတာ။ စစ်ကောင်စီတပ်တွေနဲ့ ပျူစောထီးတွေ ရွာထဲဝင်လာပြီး တူတွေ၊ ပေါက်ဆိန်တွေနဲ့ အိမ်တိုင်းလိုလို တံခါးတွေဖျက်ပြီး ပစ္စည်းတွေကို လူမှုကူညီရေးကားနဲ့ ခေါက်တုန့်ခေါက်ပြန် သယ်နေပါတယ်။ သေနတ်တွေနဲ့လည်း ရမ်းပစ်နေတယ်'' လို့ ပြောပါတယ်။

အကြမ်းဖက်စစ်ကောင်စီတပ်တွေဟာ ပေါက်မြို့နယ်ထဲက ဝန်ခြုံးကျေးရွာကို ဇူလိုင်လ ၃၁ ရက်နေ့က ကျေးရွာအတွင်းရှိ လူနေအိမ် ၃ လုံးကို မီးရှို့ဖျက်ဆီးခဲ့ပြီး အင်အား ၇၀ ဝန်းကျင်နဲ့ ကျေးရွာမှာ တပ်စွဲထားလို့ ဒေသခံတွေဟာ နေရပ်စွန့်ခွာပြီး တောတောင်တွေထဲမှာ ဒုက္ခမျိုးစုံနဲ့ စစ်ဘေးရှောင်နေကြရတယ်လို့ သိရပါတယ်။

3 months Ago
Up