ဝန်ကြီးဦးနိုင်ငံလင်း

March 8, 2021

အင်းစိန်ထောင်ရှေ့ လာစောင့်နေသူများပြား၊ ဝန်ကြီးဦးနိုင်ငံလင်းနှင့် ဒေါ်မိုးမိုးစုကြည်တို့ ထောင်ထဲရောက်နေ

ရန်ကုန် အင်းစိန်ထောင်ရှေ့မှာ အဖမ်းခံရသူတွေကို လာစောင့်နေကြသူတွေ မတ် ၈ ရက်နေ့က  အများအပြားရှိနေပြီး အခုရက်ပိုင်းဖမ်းဆီးခံရသူတွေကို ပြန်မလွှတ်ပေးတော့တဲ့အတွက် မိသားစုဝင်တွေက ပိုပြီးစိုးရိမ်နေကြပါတယ်။

ထောင်ဝန်ထမ်းတချို့ဆီက ကြားရတဲ့သတင်းကတော့ ဖမ်းဆီးခံရသူတွေကို အလွယ်ပြန်လွှတ်မပေးတော့ဘဲ ပုဒ်မတပ် တရားစွဲဖို့ စစ်တပ်က စီစဉ်နေတယ်လို့ဆိုပါတယ်။

မတ်လ ၇ ရက်နေ့က ရန်ကုန်တမြို့လုံး အတိုင်းအတာနဲ့ သပိတ်မှောက်လူငယ် ရာနဲ့ချီ အဖမ်းခံထားရတာပါ။ သတင်းတွေအရ ရွှေပြည်သာတမြို့နယ်တည်းမှာတင် လူတစ်ရာကျော် အဖမ်းခံထားရပါတယ်။ အဖမ်းခံထားရသူတွေထဲမှာ အမျိုးသမီးငယ်တွေလည်း အများအပြား ပါဝင်ခဲ့ပြီး မိသားစုဝင်တွေက စိုးရိမ်နေကြပါတယ်။

ဖေဖော်ဝါရီ ၁ ရက်နေ့  စစ်အာဏာသိမ်းကတည်းက အဖမ်းခံထားရတဲ့ ရန်ကုန်တိုင်းအစိုးရ လူမှုရေးဝန်ကြီး ဦးနိုင်ငံလင်းနဲ့ အလုပ်သမားဝန်ကြီး ဒေါ်မိုးမိုးစုကြည် တို့လည်း အင်းစိန်ထောင်ထဲ ရောက်နေတယ်လို့ ထောင်ရှေ့မှာ လာစောင့်နေတဲ့ မိသားစုဝင်တွေက ပြောပါတယ်။

ရန်ကုန်မြို့မှာ ဖေဖော်ဝါရီ ၂၇ ရက်နေ့ကစပြီး သပိတ်မှောက်ပြည်သူ ၃၀၀ ကျော်ကို ရဲတပ်ဖွဲ့က ဖမ်းဆီးခဲ့တာပါ။ ဖေဖော်ဝါရီ ၂၈ ရက်နေ့မှာလည်း သပိတ်တွေကို ရဲတပ်ဖွဲ့က အကြမ်းဖက်ခဲ့ပြီး ပြည်သူအများအပြားကို ထပ်မံဖမ်းဆီးခဲ့ပါတယ်။ အဲ့ဒီတုန်းကတော့ တစ်ရက်ခြား တစ်သုတ်ပြန်လွှတ်ပေးခဲ့ပေမယ့် အခု ရက်ပိုင်းမှာတော့ ပြန်မလွှတ်ပေးတော့ပါဘူး။

အဖမ်းခံရသူ ထောင်နဲ့ချီရှိနိုင်တယ်လို့ခန့်မှန်းကြပေမယ့် အခုအထိ သပိတ်မှောက်ပြည်သူ ဘယ်နှယောက်ကိုဖမ်းထားပြီး ဘယ်လောက်ကိုပြန်လွှတ်ပေးတယ်ဆိုတာကို အတည်မပြုနိုင်သေး ပါဘူး။

2 months Ago

September 28, 2020

သတင်းသမားများ မြို့နယ်ဖြတ်ကျော်သတင်းယူပါက အရေးယူခံရနိုင်ဟု ဝန်ကြီးဦးနိုင်ငံလင်းပြော

ရန်ကုန်တိုင်းဒေသကြီးအတွင်းမှာ သတင်းသမားတွေ မြို့နယ်ဖြတ်ကျော်သတင်းယူပါက အရေးယူခံရနိုင်တယ်လို့  တိုင်းအစိုးရအဖွဲ့ဝင် လူမှုရေးဝန်ကြီး ဦးနိုင်ငံလင်းက ပြောပါတယ်။  စက်တင်ဘာ ၂၇ ရက်နေ့ကစပြီး ရန်ကုန်မြို့အတွင်း ဖြတ်ကျော်သွားလာတာတွေကို လုံခြုံရေးကင်းလှည့် စစ်ဆေးရေးအဖွဲ့ဖွဲ့ပြီး  စတင်စစ်ဆေးဆောင်ရွက်နေတာပါ။ ရန်ကုန်တိုင်း ကိုဗစ်-၁၉ ကွယ်ထိန်းချုပ်ကုသရေးကော်မတီက မဖြစ်မနေလိုအပ်တဲ့ လုပ်ငန်းတွေဘဲ နယ်မြေဖြတ်ကျော်သွားလာခွင့်ပြုထားပါတယ်။ ဒီအခြေအနေမှာ ပြည်သူတွေကို သတင်းတင်ဆက်မယ့် သတင်းမီဒီယာသမားတွေ သွားလာခွင့်နဲ့ပတ်သက်ပြီး တိကျတဲ့ ညွှန်ကြားချက်၊ အမိန့်ထုတ်ပြန်တာမျိုး မတွေ့ရသေးပါဘူး။ ရန်ကုန်တိုင်း ကိုဗစ်ကာကွယ်ထိန်းချုပ်ကုသရေးကော်မတီ၊ လုပ်ငန်းကော်မတီ ဥက္ကဋ္ဌ ဦးနိုင်ငံလင်းကတော့  “Work From Home ပဲ။ အပြင်ထွက်သတင်းယူရင် အရေးယူခံရနိုင်တယ်။ အဲဒီလိုပဲထင်တယ်ဗျ” လို့ ပြောပါတယ်။ စက်တင်ဘာ ၂၇ ရက်နေ့ ရန်ကုန်မြို့တွင်း မြို့နယ်ဖြတ်ကျော်သွားလာတာတွေကို စစ်ဆေးနေတဲ့ မြို့နယ်အဆင့် အုပ်ချုပ်ရေးတာဝန်ရှိသူတွေနဲ့ ရဲတပ်ဖွဲ့တွေကတော့ သတင်းမီဒီယာသမားတွေကို လွတ်လပ်စွာသွားလာခွင့်ရှိမရှိ သေချာမသိဘူးလို့ ဆိုကြပါတယ်။ အင်းစိန်မြို့မရဲစခန်း၊ စခန်းမှူး၊ ဒုရဲမှူးတင်လတ်က “ဖြတ်သန်းသွားလာခွင့်က အဓိကကတော့ ကျနော်တို့က ပူးပေါင်းပါဝင်ဆောင်ရွက်ပေးရတာပေါ့။ မီဒီယာသမားတွေ သွားလာခွင့်နဲ့ ပတ်သက်လို့ကတော့ ကျနော်တို့လည်း မပြောတတ်ဘူးဗျ။ ဘယ်အဖွဲ့ကသွားစေ။ ဘယ်အဖွဲ့က လွတ်စေဆိုတာက ကျနော်တို့ဌာနက လုပ်တာမဟုတ်ဘူး။ သက်ဆိုင်ရာဌာနကို မေးမှရမှာဗျ” လို့ ပြောပါတယ်။ မြန်မာနိုင်ငံသတင်းမီဒီယာကောင်စီတာဝန်ရှိသူတွေကလည်း ကိုဗစ်ကာလမှာ သတင်းသမားတွေ သတင်းရယူခွင့်နဲ့ပတ်သက်ပြီး အုပ်ချုပ်ရေးတာဝန်ရှိသူတွေကို အကြံပြုစာပေးပို့ထားပေမယ့် အကျိုးအကြောင်း တုံ့ပြန်တာမရှိသေးပါဘူး။ တရားဝင်ခွင့်ပြုချက်မရသေးတဲ့အတွက် သတင်းသမားတွေ သတင်းရယူတဲ့နေရာမှာ သတိထားဖို့ လိုမယ်လို့ သတင်းမီဒီယာကောင်စီဝင်တွေက ပြောပါတယ်။  ဓာတ်ပုံ - ရွှေအင်းသားခင်မောင်ဝင်း
8 months Ago
Up