ဝန်ထမ်း

June 21, 2019

စစ်ကိုင်းတိုင်းတွင် ဝန်ထမ်းစည်းကမ်းဖြင့်မညီသည့် ထွေအုပ် ၂၅ ဦးကို အရေးယူထား

အန်အယ်လ်ဒီ အစိုးရလက်ထက် ၂၀၁၆ ခုနှစ်ကနေ ၂၀၁၉ ခုနှစ်၊ မေလကုန်အထိ စစ်ကိုင်းတိုင်းအတွင်း အထွေထွေအုပ်ချုပ်ရေးဦးစီးဌာနက အကျင့်ပျက်ဝန်ထမ်းတွေကို ရာထူးက ထုတ်ပယ်တာ၊ ဝန်ထမ်းအဖြစ်ကနေ ထုတ်ပစ်တာတွေကို ၂၅ ဦးထိ ပြုလုပ်ထားတယ်လို့ သိရပါတယ်။ အရေးယူခံရတဲ့ ဝန်ထမ်းတွေထဲမှာ အောက်ခြေ စာပို့၊ ရုံးအကူ၊ ရပ်ကျေးစာရေးကနေ ဒုတိယညွှန်ကြားရေးမှုးရာထူးအထိ ပါဝင်တယ်လို့ သိရပါတယ်။ “ဝန်ထမ်းစည်းမျဉ်းစည်းကမ်း ဥပဒေကို မလိုက်နာနိုင်ရင် အရေးယူတာတွေ ရှိပါတယ်။ အဂတိလိုက်စားမှုကို တိုင်တန်းခံရတာတွေလည်း ရှိပြီးတော့ ဝန်ထမ်းစည်းမျဉ်းအရ အရေးယူပါဆိုတာတွေလည်း ရှိပါတယ်” လို့ တိုင်းဒေသကြီးအစိုးရအဖွဲ့ အတွင်းရေးမှုး ဦးတင်မောင်ဆွေက တိုင်းအစိုးရပြုလုပ်တဲ့ သတင်းစာရှင်းလင်းပွဲမှာ ဖြေကြားခဲ့ပါတယ်။ အထွေထွေအုပ်ချုပ်ရေးဦးစီးဌာန ဝန်ထမ်းပြုန်းတီးမှုစာရင်းတွေအရ ၂၀၁၆ ခုနှစ်အတွင်း ပင်လည်ဘူး၊ ဖောင်းပြင်၊ ကနီ၊ ကသာ၊ ရေဦး၊ ကလေး စတဲ့မြို့နယ်တွေက ထွေအုပ်ဝန်ထမ်း ၇ ဦးကို ရာထူးမှထုတ်ပယ်ခဲ့ပါတယ်။ ၂၀၁၇ ခုနှစ်မှာတော့ တိုင်းဒေသကြီးရုံး၊ ကျွန်းလှမြို့နယ်၊ ရွှေဘိုခရိုင်၊ ယင်းမာပင်မြို့နယ်၊ နန်းယွန်းမြို့နယ်၊ စစ်ကိုင်းခရိုင် စတဲ့ရုံးတွေက ဝန်ထမ်း ၆ ဦးကို ရာထူးက ထုတ်ပယ်ခဲ့သလို မော်လိုက်ခရိုင်ရုံးနဲ့ မိုပိုင်းလွတ်မြို့ရုံးတို့က ဝန်ထမ်း ၂ ဦးကိုတော့ ဝန်ထမ်းအဖြစ်ကနေ ထုတ်ပယ်ခဲ့ပါတယ်။ ၂၀၁၈ ခုနှစ်အတွင်း တိုင်းဒေသကြီးရုံးက ၂ ဦးအပါအဝင် ကသာ၊ မော်လိုက်မြို့နယ်တွေက ၁ ဦးစီတို့ကို ရာထူးက ထုတ်ပယ်ခဲ့ပြီး အင်းတော်၊ စစ်ကိုင်းမြို့နယ်တွေက ဝန်ထမ်း ၂ ဦးကိုတော့ ဝန်ထမ်းအဖြစ်ကနေ ထုတ်ပယ်ခဲ့ပါတယ်။ ၂၀၁၉ ခုနှစ်အတွင်း မေလကုန်အထိ ဘုတလင်၊ ချောင်းဦးမြို့နယ်တွေက ၁ ဦးစီကို ရာထူးက ထုတ်ပယ်ကာ ချောင်းဦး၊ နန်းယွန်းမြို့နယ်က ၁ ဦးစီကိုလည်း ဝန်ထမ်းအဖြစ်က ထုတ်ပယ်ခဲ့ပါတယ်။ စုစုပေါင်းအနေနဲ့ ရာထူးကနေ ထုတ်ပယ်ခံရသူ ၁၉ ဦးနဲ့ ဝန်ထမ်းအဖြစ်က ထုတ်ပစ်ခံရသူ ၆ ဦး စုစုပေါင်း ၂၅ ဦးရှိခဲ့ပါတယ်။ အရေးယူခံရသူတွေထဲမှာ အဂတိကိစ္စကြောင့် တိုင်တန်းခံရတာတွေလည်း ပါတယ်လို့ သိရပါတယ်။ စစ်ကိုင်းတိုင်းမှာ အထွေထွေအုပ်ချုပ်ရေးဦးစီးဌာနက ညွှန်ကြားရေးမှုးချုပ်ကနေ စာပို့အဆင့်အထိ ဝန်ထမ်းအင်အား ၄၃၆၀ ဦးကို ခွင့်ပြုထားပြီး ၃၉၃၃ ဦးကို ခန့်ထားကာ ၄၂၇ ဦး လစ်လပ်နေတယ်လို့လည်း သိရပါတယ်။ ဝန်ထမ်းခန့်ထားမှုအနေနဲ့ ၈၀ ရာခိုင်နှုန်းကျော်ထိ ရှိပါတယ်။ ဒါ့အပြင် အထွေထွေအုပ်ချုပ်ရေးဦးစီးဌာန လက်အောက်ရှိ ရပ်ကျေးအုပ်ချုပ်ရေးမှူး တွေကိုလည်း ၂၀၁၇ ခုနှစ် တတိယအကြိမ်ပြင်ဆင်တဲ့ ရပ်ကျေးအုပ်ချုပ်ရေးမှူး ဥပဒေအရ အစားထိုးပြင်ဆင်ပြောင်းလဲတာတွေ ပြုလုပ်ခဲ့ပါသေးတယ်။ ၂၀၁၇ ခုနှစ်မှာ ၂၀၁၀ ဦးခန့်ထားခဲ့ပြီး ၁၁ ဦးကို တာဝန်က ရပ်စဲတာ၊ မှတ်တမ်းတင်တာ၊ နှုတ်နဲ့သတိပေးတာ စတဲ့ အပြစ်ပေးအရေးယူတာတွေပြုလုပ်ခဲ့ပါတယ်။ ၂၀၁၈ ခုနှစ်မှာတော့ ၂၀၂၆ ဦးခန့်ထားကာ ၃ ဦးကို အရေးယူခဲ့ပြီး ၂၀၁၉ ခုနှစ်အတွင်းမှာတော့ လက်ရှိအချိန်ထိ ၇ ဦးကို အရေးယူထားတယ်လို့ သိရပါတယ်။ “လစ်လပ်ကတော့ အမြဲတမ်းရှိနေမှာပဲ။ မှုခင်းဖြစ်တာ၊ သေဆုံးတာ၊ မှုခင်းဖြစ်ပြီး အရေးယူခံရတာ၊ နုတ်ထွက်တာတွေ ရှိနေတဲ့အတွက် အားလုံးခန့်ထားပြီးဖြစ်ပေမယ့် လစ်လပ်တာတွေရှိနေမှာပါ။ ဒါကိုလည်း ရပ်ကျေးဥပဒေအတိုင်းပဲ ရွေးကောက်ပွဲလုပ်ပြီး ပြန်ပြီးရွေးချယ်နေပါတယ်။” လို့ တိုင်းအတွင်းရေးမှူးက ပြောပါတယ်။ စစ်ကိုင်းတိုင်းဒေသကြီးမှာ ကိုယ်ပိုင်အုပ်ချုပ်ခွင့်ရဒေသ ၁ ခု၊ ခရိုင် ၁၀ ခရိုင်၊ မြို့နယ် ၃၇ မြို့နယ်၊ မြို့ ၁၃ မြို့၊ ရပ်ကွက် ၂၇၀၊ ကျေးရွာအုပ်စု ၁၇၅၆ အုပ်စု၊ ကျေးရွာ ၅၉၉၃ ရွာ၊ အိမ်ခြေ ၁၀၀၈၂၁၆ အိမ်နဲ့ လူဦးရေ ၅၄၄၀၆၆၈ ဦးရှိတယ်လို့ တိုင်းအစိုးရအဖွဲ့သတင်းတွေအရ သိရပါတယ်။
2 years Ago

April 13, 2019

ရန်ကုန်ဆေးရုံကြီး အရေးပေါ်ဌာနတွင် သင်္ကြန်ကာလ ဝန်ထမ်းအင်အား နှစ်ဆ တိုးမြှင့်ချထား

မဟာသင်္ကြန်ကာလအတွင်း ရန်ကုန်ပြည်သူ့ဆေးရုံကြီး အရေးပေါ်ဌာနမှာ ဝန်ထမ်းအင်အားကို ပုံမှန်ထက် နှစ်ဆ တိုးမြှင့်ချထားတယ်လို့ ရန်ကုန်ပြည်သူ့ဆေးရုံကြီး ဆေးရုံအုပ် ဒေါက်တာခင်သိင်္ဂီမြင့်က ပြောပါတယ်။ ဆေးရုံကြီးအရေးပေါ်ဌာနအနေနဲ့ ပုံမှန်ရက်တွေမှာ ဝန်ထမ်းအင်အားကို ၈၀ ကနေ ၁၀၀ အထိ ချထားပေမယ့် သင်္ကြန်ကာလမှာတော့ ဝန်ထမ်းဦးရေ ၁၅၀ ကနေ ၂၀၀ လောက် အထိ ချထားမယ်လို့ သိရပါတယ်။ သင်္ကြန်တွင်းမှာ အပျော်လွန်ပြီး ထိခိုက်ဒဏ်ရာရတာတွေ များတဲ့အတွက် အရေးပေါ်ဌာနမှာ ဝန်ထမ်းအင်အားကို လောက်ငအောင် နှစ်ဆ တိုးပြီးချထားသလို  ထိခိုက်ဒဏ်ရာရပြီး အရေးပေါ်ဌာနကို ရောက်လာတဲ့ လူနာတွေကို ကောင်းမွန်တဲ့ ကုသပေးမှုပေးနိုင်ဖို့ ဌာနအတွင်း အကြိုဇာတ်တိုက် လေ့ကျင့်ထားတယ်လို့ ဆေးရုံအုပ်ကြီးက ပြောပါတယ်။ ဒါ့အပြင်သင်္ကြန်မှာ အရေးပေါ်လူနာတွေ ဆေးရုံကြီးကို ရောက်ရှိလာပါက ဆေးဝါးပြတ်လပ်တာမရှိရအောင် ဆေးပစ္စည်းကိရိယာတွေ ကြိုတင်စုဆောင်းထားတယ်လို့ လည်းဆိုပါတယ်။ ရန်ကုန်ဆေးရုံကြီးမှာ ဖွင့်လှစ်ထားတဲ့ အထူးကု ပြင်ပလူနာဌာနတွေကိုတော့ သင်္ကြန်ပိတ်ရက်ကာလမှာ ပိတ်ထားမှာဖြစ်ပါတယ်။ သင်္ကြန်ကာလအတွင်း ရန်ကုန်တိုင်းအတွင်း ၂၉ မြို့နယ်မှာ မတော်တဆ ထိခိုက်မှုရှိရင် အရေးပေါ်ကုသပြီး အခမဲ့ ကူညီစောင့်ရှောက်နိုင်ဖို့အတွက် လုပ်ဆောင်သွားမယ်လို့ ရန်ကုန်တိုင်း လူမှုကယ်ဆယ်ရေးအဖွဲ့ချုပ် ဥက္ကဋ္ဌ ဦးထွန်းထွန်းဦးကလည်း ပြောပါတယ်။ ရန်ကုန်တိုင်း လူမှုကယ်ဆယ်ရေးအဖွဲ့ချုပ်က သင်္ကြန်ကာလအတွင်း ရန်ကုန်တောင်ပိုင်းခရိုင်ကလွဲလို့ မြို့နယ် ၂၉ နေရာမှာ ဝန်ထမ်းအင်အား ၇၀၀၀ လောက်နဲ့ ကျန်းမာရေး စောင့်ရှောက်မှုပေးဖို့ စီစဉ်ထားတာပါ။ ဒါ့အပြင် အင်းလျားကန်ဘောင်၊ ကန်တော်ကြီးနဲ့ မြို့တော်ခန်းမအပါအဝင် ပြည်သူတွေ အများဆုံးသွားရောက် ရေကစားကြမယ့် ၁၈ နေရာကို  အရေးကြီးနေရာတွေအဖြစ် သတ်မှတ်ပြီး အရေပေါ်ကျန်းမာရေး စောင့်ရှောက်မှုတွေလုပ်သွားမယ်လို့ ဦးထွန်းထွန်းဦးက ပြောပါတယ်။ သင်္ကြန်ကာလအတွင်း မတော်တဆ ထိခိုက်မှုတွေ ဖြစ်ပေါ်လာရင် အရေးပေါ်ကုသနိုင်ဖို့ လူနာတင်ယာဉ် အစီး ၁၀၀ ကို အသင့်ပြင်ဆင်ထားတယ်လို့လည်း ဆိုပါတယ်။ ဒါ့အပြင် အရေးပေါ်လူနာတွေကို ကုသနိုင်ဖို့အတွက်လည်း ရန်ကုန်ပြည်သူ့ဆေးရုံကြီးနဲ့ ပူးပေါင်းပြီး အရေးပေါ်ဌာမှာ ကျန်းမာရေးစောင့်ရှောက်တာတွေကို ကူညီလုပ်ဆောင်သွားမယ်လို့ လူမှုကူညီကယ်ဆယ်ရေးအဖွဲ့ချုပ် (ရန်ကုန်) သင်တန်းရေးရာဌာန တွဲဖက်အတွင်းရေးမှူး ဒေါ်လဲ့ရည်သူက ပြောပါတယ်။ မနှစ်က မဟာသင်္ကြန်ကာလမှာတော့ ရန်ကုန်ဆေးရုံကြီး အရေးပေါ်ဌာနကို ရောက်ရှိလာတဲ့  လူနာ ၈၃၀ ရှိပြီး သေဆုံးသူ ၁၂ ယောက်ရှိခဲ့ပါတယ်။ အရေးပေါ်ဌာနကို ရောက်ရှိလာတဲ့လူနာ အရေအတွက်ရဲ့ သုံးပုံတပုံကတော့ ယာဉ်မတော်တဆမှုကြောင့် ဖြစ်ပါတယ်။ သတင်း- ဆုဆုသွယ်၊ သူဇာလင်း ဓာတ်ပုံ- YGH
2 years Ago
Up