ဝင်တိုက်သဖြင့် ဆိုင်ကယ်မောင်းသူ သေဆုံး

January 3, 2018

မိုးညှင်းတွင် ၁၂ ဘီးယာဉ်မှ ဆိုင်ကယ်အား ဝင်တိုက်သဖြင့် ဆိုင်ကယ်မောင်းသူ သေဆုံး

ကချင်ပြည်နယ်၊ မိုးညှင်းမြို့နယ် ဆယ်မိုက်ရွာသစ်ကျေးရွာမှာ မနေ့ မနက်ပိုင်းက ၁၂ ဘီးယာဉ်တစီးက ဆိုင်ကယ်ကို တိုက်မိပြီး ယာဉ်မောင်းသူ ထွက်ပြေး တိမ်းရှောင်သွားတယ်လို့ မိုးညှင်းရဲစခန်းမှ သိရပါတယ်။ ဇန်နဝါရီ ၂ ရက်နေ့ မနက် ၈ နာရီ ၂၀ မိနစ်လောက်က မိုးညှင်းဘက်မှ မော်ဟန်ကျေးရွာဘက်ကို ယာဉ်မောင်း (အမည်၊ နေရပ်လိပ်စာ စုံစမ်းဆဲ) မောင်းနှင်လာတဲ့ ၁၂ ဘီးယာဉ်ဟာ နန့်ရင်းချောင်းတံတား အရောက်မှာ အရှိန်မထိန်းနိုင်ဘဲ တဖက်ယာဉ်ကြောကို ရောက်ရှိကာ မျက်နှာချင်းဆိုင်မှ အင်းတော်မြို့ ပေကုန်းကျေးရွာနေ ထွန်းထွန်းဦး (၃၅-နှစ်) မောင်းနှင်လာတဲ့ ဆိုင်ကယ်ကို ဝင်တိုက်မိတဲ့အတွက် ထွန်းထွန်းဦးကို မိုးညှင်းဆေးရုံကြီးသို့ တင်ပို့ပြီး ဆေးကုသမှု ခံယူနေချိန် ညနေပိုင်းမှာ သေဆုံးသွားခဲ့တာပါ။ ယာဉ်ထိန်းတပ်ကြပ်ကြီး ဦးမျိုးလွင်က “ဆိုင်ကယ်က လမ်းမှန်တယ်။ ကားက တဖက်ယာဉ်ကြောထဲ ရောက်ပြီး ဝင်တိုက်တာပါ။ ဆိုင်ကယ်သမားကို ဆေးရုံပို့တော့ ပုဒ်မက ၃၃၇/၃၃၈ အပြင်းအထန် ဒဏ်ရာရစေမှုနဲ့ ကျနော်တို့ ယာဉ်ထိန်းရဲက အမှုဖွင့်တယ်။ ဆေးရုံရောက်ပြီး လူနာက ညနေပိုင်းလောက်မှာ သေဆုံးသွားတော့ ပုဒ်မပြောင်းပြီး တရားစွဲရတယ်။ ၃၀၄-က/၂၀၂ လူကို သေဆုံးအောင် ယာဉ်မဆင်မခြင် မောင်းနှင်မှုနဲ့ ယာဉ်မောင်း ထွက်ပြေးမှုပါ” လို့ ပြောပါတယ်။ ယာဉ်တိုက်မှုနဲ့ပတ်သက်ပြီး ထွက်ပြေးတိမ်းရှောင်နေတဲ့ ယာဉ်မောင်းကို တရားလို ယာဉ်ထိန်း ရဲအုပ်ရဲဝင်းက မိုးညှင်းမြို့မရဲစခန်းမှာ ယာဉ်(ပ)၁/၁၈ ရာဇသတ်ကြီးပုဒ်မ ၃၃၇/၃၃၈/၂၀၂ အပြင်းအထန် နာကျင်ဒဏ်ရာရစေမှုမှ လူသေစေမှု ထွက်ပြေးတိမ်းရှောင်မှု ၃၀၄-က/၂၀၂ သို့  ပြောင်းလဲစစ်ဆေး ဆောင်ရွက်နေကြောင်း သိရပါတယ်။ သတင်း - မုန်းမုန်းမင်း
4 years Ago
Up