ဝက်လက်

January 26, 2023

ဝက်လက်မြို့နယ်ရှိ ကျေးရွာများကို စစ်တပ်က မီးရှို့၊ စစ်ကိုင်းနှင့် ကနီတွင် စစ်ကောင်စီတပ် တိုက်ခိုက်ခံရ

စစ်ကိုင်းတိုင်း၊ ဝက်လက်မြို့နယ်အတွင်း ကျေးရွာ ၅ ရွာကို ဇန်နဝါရီ ၂၃ ရက် မနက် ၇ နာရီကနေ ဒီနေ့ ဇန်နဝါရီ ၂၆ ရက်အထိ ၄ ရက်ဆက်တိုက် မီးရှို့နေတယ်လို့ ဒေသခံတွေက ပြောပါတယ်။

မီးရှို့ခံနေရတဲ့ ကျေးရွာအများစုဟာ မန္တလေး - ရွှေဘို - ဝက်လက် ကားလမ်းတလျှောက် ကျေးရွာအများစု ဖြစ်တယ်လို့ ဆိုပါတယ်။

ဒေသခံရွာသားတဦးက “ဇန်နဝါရီ ၂၃ ရက်ကနေစပြီး ရွာတွေကို မီးရှို့နေတာဗျ။ ၂၃ ရက်နေ့က မကျီးတုံကို စရှို့တယ်ဗျ။ အဲ့ရွာက ၆၅ အိမ် လောင်တယ်ဗျ။ အဲ့ရွာပြီးတော့ ပင်ဇင်းရွာကို ထပ်ရှို့တယ်ဗျ။ အဲ့ရွာက ၁၁၅ အိမ်ပါသွားတယ်။ အဲဒါပြီးတော့ မူးကြီး ထပ်ရှို့တယ်ဗျ။ မူးကြီးကတော့ အိမ်ခြေ ၁၀၀ ကျော် ပါသွားတယ်ဗျ။ အဲ့ရွာက အခုအကြိမ်နဲ့ဆိုရင် ဒုတိယအကြိမ်ရှို့တာဗျ။ မနေ့ညနေက ခေါ်တောရွာကို ရှို့တယ်ဗျ။ ဒီနေ့ ဇန်နဝါရီ ၂၆ ရက်နေ့ မနက်ခင်းမှာ လိန်ပင်ရွာကို မီးရှို့နေတယ်ဗျ။ စစ်ကောင်စီက ရွာထဲက မထွက်သေးတော့ အသေးစိတ် အတိအကျ မသိရသေးဘူး” လို့ ပြောပါတယ်။

စစ်ကောင်စီတပ်ဟာ လှတောရွာကနေ ခရီးသည်တင်ကားတွေနဲ့ လိုက်ပါလာပြီး ကျေးရွာတွေကို အခုလို မီးရှို့နေတာလို့ သိရပါတယ်။

စစ်ကောင်စီက ကျေးရွာတွေကို မီးရှို့သလို ဒေသခံအရပ်သား ၂ ဦးနဲ့ ရပ်‌ကျေးပအဖ ၄ ဦးကို ရက်ရက်စက်စက် သတ်ဖြတ်ထားခဲ့တယ်လို့ ဒေသခံတွေက ပြောပါတယ်။

စစ်ကောင်စီက လက်နက်အားကိုးနဲ့ ပြည်သူတွေအပေါ်မှာ အနိုင်ကျင့် သတ်ဖြတ်နေတာကြောင့် ဒေသခံကာကွယ်ရေးအဖွဲ့တွေနဲ့  စစ်ရေးအခြေအနေ တင်းမာနေဆဲ ဖြစ်တယ်လို့ သိရပါတယ်။

စစ်ကိုင်းတိုင်း၊ စစ်ကိုင်းမြို့နယ်၊ လယ်ကြီးရွာနဲ့ နတ်ခရိုင်ရွာကြားမှာ ဇန်နဝါရီ ၂၅ ရက် ညနေ ၅ နာရီလောက်က မိုင်းရှင်းဖို့လာတဲ့ စစ်ကောင်စီကားတစီး မိုင်းဆွဲခံရတယ်လို့ ဒေသခံတွေက ပြောပါတယ်။

မိုင်းရှင်းလင်းဖို့လာတဲ့ စစ်ကောင်စီကားဟာ စစ်ကိုင်းမြို့ တပ်မ ၃၃ ကနေ စစ်ကိုင်း-မုံရွာသွား ကားလမ်းကို မိုင်းရှာဖွေရင်း အခုလို မိုင်းဆွဲခံရတာလို့ ဆိုပါတယ်။

အခုလိုမိုင်းဆွဲတာကို သရဲနီ၊ 3D၊ စွန်ရဲ၊ Zero ပြောက်ကျားတပ်ဖွဲ့နဲ့ ဒေသခံ ပြည်သူ့ကာကွယ်ရေးအဖွဲ့တွေ ပူးပေါင်းလုပ်ဆောင်ခဲ့တာဖြစ်တယ်လို့ Zero ပြောက်ကျားတပ်ဖွဲ့ တာဝန်ရှိသူ ကိုသက်ကြီးက ပြောပါတယ်။

“မိုင်းဆွဲခဲ့တာ ကျနော်တို့အဖွဲ့တွေ လုပ်ခဲ့တာ ဟုတ်ပါတယ်ဗျ။ ပထမ သူတို့က စစ်ကိုင်းကနေ မြင်းမူမြို့ဘက်ကို (--)အင်အားအများအပြားနဲ့ စစ်ကိုင်း-မုံရွာသွား ကားလမ်းမဘေးက ကျနော်တို့မိုင်းတွေ လိုက်ဖြုတ်သိမ်းတယ်။ မိုင်းပဒေသာမိုင်း ၅ လုံး သူတို့ဖြုတ်သိမ်းသွားတယ်။ အဲဒီကနေ ညောင်ပင်ဝန်းရဲစခန်းထဲ ဝင်သွားတယ်။ ညနေကြတော့ စစ်ကိုင်းမြို့ဘက်ကို ပြန်ထွက်လာတာကို ကျနော်တို့အဖွဲ့တွေ စောင့်ပြီး မိုင်းဆွဲလိုက်တယ်။ လယ်ကြီးရွာနဲ့ နတ်ခရိုင်ကြားမှာ ထပ်ထောင်ပြီး ပြန်ဆွဲခဲ့တာဗျ။ (--)၂ကောင် သေတယ်။ အထိအခိုက်လည်းရှိတယ်။”

စစ်ကောင်စီတပ်တွေဟာ စစ်ကိုင်း-မုံရွာသွား ကားလမ်းပိုင်းကို စစ်ကောင်စီလူကြီးတွေ ခရီးစဉ်ရှိတဲ့အခါတိုင်း အခုလို မိုင်းရှင်းလင်းရေးတွေ လုပ်ဆောင်လေ့ရှိပြီး သူတို့လုပ်ဆောင်တဲ့အခါတိုင်း ပြည်သူ့ကာကွယ်ရေးအဖွဲ့တွေက မိုင်းဆွဲတာကို အကြိမ်ကြိမ် ခံရကာ အထိအခိုက် အကျအဆုံးတွေနဲ့ ရင်ဆိုင်နေရတာလို့ ဒေသခံ‌တွေက ပြောပါတယ်။

စစ်ကိုင်းတိုင်း၊ ကနီမြို့နယ်ထဲက ပျူစောထီးအင်အား ၃၀၀ ဝန်းကျင်နေထိုင်တဲ့ အလယ်ကျွန်းရွာကို ဇန်နဝါရီ ၂၄ ရက် မနက်ပိုင်းက ဒေသကာကွယ်ရေးတပ်တွေက ၆၀ မမ လက်နက်ကြီးတွေနဲ့ ပစ်‌ခတ်တိုက်ခိုက်ခဲ့တယ်လို့ အာဏာရှင်တော်လှန်ရေး ပြည်သူ့တပ်မတော်-DRPA ရဲ့ ပြန်ကြားရေးတာဝန်ခံက ပြောပါတယ်။

ကနီမြို့က စစ်ကောင်စီတပ်သား ၂၀ ခန့်က အလယ်ကျွန်းရွာကို ရိက္ခာပို့ဖို့ ပြင်ဆင်နေတာကြောင့် ဒေသကာကွယ်ရေးတပ်ဖွဲ့အနေနဲ့ လမ်းလယ်ကနေ ဖြတ်တိုက်ဖို့ ပြင်ဆင်ခဲ့တာဖြစ်ပြီး စစ်ကောင်စီတပ်သားတွေက လမ်းမှာတင် ပြန်လှည့်ပြေးတာကြောင့် အခုလို ပျူစောထီးရွာကို တိုက်ခိုက်ခဲ့တာလို့ ဆိုပါတယ်။

အခုလိုတိုက်ခိုက်မှုနဲ့ပတ်သက်ပြီး ပျူစောထီးရွာဘက်က အကျအဆုံးကိုတော့ မသိရသေးပေမဲ့ DRPA က ပစ်ခတ်လိုက်တဲ့ လက်နက်ကြီးတွေက အလယ်ကျွန်းရွာရဲ့ မုခ်ဦးနားကိုကျပြီး ကင်းစောင့်နေတဲ့ ပျူစောထီးတွေတော့ ထိခိုက်ဒဏ်ရာရရှိခဲ့တယ်လို့ ပြောပါတယ်။

အခုတိုက်ပွဲက စစ်ရေးမျှော်မှန်းချက် အပြည့်အဝ မအောင်မြင်ပေမဲ့ ရိက္ခာပို့တဲ့ လမ်းကြောင်းကိုတော့ အပြည့်အဝ တားမြစ်နိုင်တယ်လို့ DRPA ရဲ့ ပြန်ကြားရေးတာဝန်ခံက ဆိုပါတယ်။

ဒါ့အပြင် စစ်ကောင်စီတပ်သားတွေရဲ့ ရိက္ခာပို့အင်အားဟာ အရင်ကထက် ၂ ဆဝန်းကျင်လောက် ‌ေလျာ့နည်းသွားပြီး ပြည်သူ့ကာကွယ်ရေးတပ်ဖွဲ့ဝင်တွေရဲ့ တန်ပြန် တိုက်စစ်ဆင်မှုတွေကြောင့် အရင်လို ပေါ်ပေါ်ထင်ထင် သွားလာနိုင်တာ မရှိတော့ဘူးလို့ သိရပါတယ်။

3 days Ago

January 11, 2023

ချင်းတွင်းမြစ်၌ စစ်ကောင်စီရေယာဉ်ပစ်ခတ်ခံရ၊ ဝက်လက်နှင့် ဂန့်ဂေါတွင် စစ်ကောင်စီတပ် တိုက်ခိုက်ခံရ

စစ်ကိုင်းတိုင်းအတွင်း ချင်းတွင်းမြစ်ကနေ အလုံမြို့၊ မင်းဒေါင့်ဆိပ်ကမ်းဆီကို ဆိုက်ကပ်ဖို့လာတဲ့ စစ်ကောင်စီရေယာဉ်ကို ဇန်နဝါရီ ၁၀ ရက် ညနေ ၄ နာရီက ပစ်ခတ်တိုက်ခိုက်ခဲ့တယ်လို့ ဒေသခံ ပြည်သူ့ကာကွယ်ရေးခေါင်းဆောင်တွေက ပြောပါတယ်။

အဆိုပါ စစ်ကောင်စီရေယာဉ်ဟာ မုံရွာမြို့နယ်၊ အမြင့်အောက်ဘက်ရွာတွေကို မီးရှို့ပြီး အပြန်မှာ အခုလို ပစ်ခတ်တိုက်ခိုက်ခဲ့တာ ဖြစ်တယ်လို့လည်း သိရပါတယ်။

ယင်းမာပင်ခရိုင် တပ်ရင်း-၁၆၊ တပ်ခွဲ-၁ တာဝန်ခံရာမက “(--)မော်တော်က တစီးတည်းပါဗျ။ ဆန်တက်လာတာကို ကျနော်တို့ ကာကွယ်ရေးအဖွဲ့တွေက စောင့်ကြိုတိုက်ခိုက်ခဲ့တာဗျ။ ပစ်တဲ့လက်နက်တွေက လက်နက်ကြီး ပြောင်းတိုက်တွေနဲ့ အလုံးအရေအတွက် အများအပြားနဲ့ ပစ်ခဲ့တယ်ဗျ။ စစ်(--)တွေဘက်က ၂ ယောက် ငရဲကို ပို့နိုင်ခဲ့ပြီး ၄ ယောက် ထိခိုက်ဒဏ်ရာရတယ်လို့ သိထားရတယ်” လို့ပြောပါတယ်။

စစ်ကောင်စီဘက်က ၂ ဦး ကျဆုံးပြီး ၄ ဦး ဒဏ်ရာရရှိတယ်လို့ ပြည်သူ့ကာကွယ်ရေးအဖွဲ့တွေဘက်က ပြောဆိုပေမဲ့ စစ်ကောင်စီဘက်ကတော့ တစုံတရာ သတင်းထုတ်ပြန်ခြင်း မရှိသေးသလို သီးခြားအတည်ပြုနိုင်တာ မရှိသေးပါဘူး။

အဲဒီပစ်ခတ်တာကို ယင်းမာပင်ခရိုင် တပ်ရင်း-၁၆၊ တပ်ခွဲ-၁၊ Brother Defense Force အဖွဲ့နဲ့ Brother Defense Force တပ်စိတ်-၁၊ Naung Gyi People Defense Force အဖွဲ့တို့ ပူးပေါင်းပစ်ခတ်ခဲ့တာလို့လည်း သိရပါတယ်။

စစ်ကိုင်းတိုင်း၊ ဝက်လက်မြို့နယ်မှာတော့ မြို့မရဲစခန်းကို ဇန်နဝါရီ ၈ ရက်နေ့က  ဒေသကာကွယ်ရေးတပ်တွေ စုပေါင်းပြီး လက်နက်ကြီးတွေနဲ့ သွားရောက်ပစ်ခတ်ခဲ့ပြီးတဲ့နောက် မင်းစုရပ်ကွက်အစွန်ကို  ထွက်လာတဲ့ စစ်ကောင်စီ၊ ပျူစောထီး ပူးပေါင်းအဖွဲ့တွေနဲ့ ဒေသကာကွယ်ရေးတပ်ဖွဲ့တွေ အပြန်အလှန် ပစ်ခတ်မှု ဖြစ်ပွားခဲ့ပါတယ်။  

အဲဒီလိုပစ်ခတ်မှုတွေဖြစ်ပွားခဲ့ပြီးတဲ့နောက် စစ်ကောင်စီဘက်က တပ်ဖွဲ့ဝင်တစ်ဦး လမ်းမှာတင်သေဆုံးသွားပြီး နောက်ထပ် နှစ်ယောက်ကတော့ ဆေးရုံမှာ ဆေးကုသရင်း သေဆုံးသွားတာလို့ မျက်မြင်တွေ့ရှိသူ ဒေသခံတစ်ဦးက ပြောပါတယ်။ 

သေဆုံးသူတွေကို စစ်ကောင်စီတပ်ဖွဲ့ဝင်တွေက လမ်းတစ်လျှောက်‌ သေနတ်တွေပစ်ဖောက်ပြီး သင်္ချိုင်းကုန်းကို ပို့ဆောင်ပေးခဲ့တယ်လို့လည်း ဆိုပါတယ်။

အခုတိုက်ပွဲမှာ စစ်ကောင်စီနဲ့ ပျူစောထီးအင်အား ၂၀ လောက်ရှိပြီး ပြည်သူ့ကာကွယ်ရေးတပ်ဖွဲ့တွေက အနီးကပ်သွားပြီးပစ်ခတ်ခဲ့ကာ စစ်ကောင်စီဘက်ကလည်း အပြင်းအထန် ပြန်လည်ပစ်ခတ်ခဲ့တယ်လို့  ပြည်သူ့တော်လှန်ရေးတပ်ဦး(ဝက်လက်)ရဲ့  စစ်ရေးတာဝန်ခံ ရဲဘော်လင်းညိုက ပြောပါတယ်။  

စစ်ကိုင်းတိုင်းထဲမှာ ဒေသကာကွယ်ရေးတပ်တွေနဲ့ အာဏာသိမ်းစစ်ကောင်စီတပ်တွေ မကြာခဏဆိုသလို ထိတွေ့တိုက်ပွဲ ဖြစ်ပွားနေပြီး ဇန်နဝါရီ ၅ ရက်နေ့ကလည်း စစ်ကောင်စီအထိုင်ချထားတဲ့ ဟံလင်းပျူမြို့ဟောင်းကို ဒေသကာကွယ်ရေးတပ်တွေက ပစ်ခတ်တိုက်ခိုက်ခဲ့ပါသေးတယ်။ 

မကွေးတိုင်း၊ ဂန့်ဂေါမြို့နယ်မှာလည်း ဇန်နဝါရီ ၁၁ ရက် ဒီနေ့မနက်က စစ်ကောင်စီစစ်ကြောင်းနဲ့ ဒေသကာကွယ်ရေး ပူးပေါင်းတပ်ဖွဲ့တွေ တိုက်ပွဲဖြစ်ပွားပြီး စစ်ကောင်စီဘက်က ၅ ယောက်လောက် ထိခိုက်နိုင်တယ်လို့ PDF-ဂန့်ဂေါ တောင်ပိုင်းတပ်ဖွဲ့ကနေ သိရပါတယ်။

ဂန့်ဂေါမြို့နယ် ပျားရွာဘက်ကို ဇန်နဝါရီ ၁၀ ရက်က ရောက်ရှိနေတဲ့ ခလရ ၅၀ က အင်အား ၉၀ လောက်ပါတဲ့ စစ်ကောင်စီစစ်ကြောင်းဟာ ဒီနေ့ မနက် ၇ နာရီခွဲလောက်မှာ အောင်မြင်ရွာကို လက်နက်ကြီး လက်နက်ငယ်တွေနဲ့ ပစ်ခတ်ပြီးဝင်လာလို့ ရွာအဝင်မှာ ဒေသကာကွယ်ရေး ပူးပေါင်းတပ်ဖွဲ့တွေနဲ့ တိုက်ပွဲဖြစ်ပွားခဲ့တာလို့ PDF-ဂန့်ဂေါ တောင်ပိုင်းတပ်ဖွဲ့ရဲ့ ပြန်ကြားရေးတာဝန်ခံ ကိုတိုးကြီးက ဒီဗွီဘီကို ပြောပါတယ်။

“အဲဒီတိုက်ခိုက်မှုကို ဒေသကာကွယ်ရေးတပ်ဖွဲ့၊ CDF-KKG တို့နဲ့အတူ ပူးပေါင်းတိုက်ခိုက် ခဲ့တာဖြစ်ပြီး စစ်ကောင်စီဘက်က ၅ ယောက်လောက် ထိခိုက်နိုင်တယ်။ ကျနော်တို့ဘက်က အထိအခိုက်မရှိဘဲ ဆုတ်ခွာနိုင်ခဲ့ကြတယ်။”

စစ်ကောင်စီစစ်ကြောင်းနဲ့ ဒေသကာကွယ်ရေးတပ်ဖွဲ့တွေ အချိန်မရွေး ထိတွေ့တိုက်ပွဲ ဖြစ်လာနိုင်လို့ မိဘပြည်သူတွေအနေနဲ့ ဂန့်ဂေါ-မင်းရွာ ကားလမ်းကို လုံးဝအသုံးမပြုကြဖို့ သတိပေး တားမြစ်ထားပါတယ်။

ဂန့်ဂေါမြို့နယ်ထဲမှာ PDF စိုးမိုးထိန်းချုပ်နယ်မြေတွေ များပြားလာလို့ စစ်ကောင်စီတပ်က အင်အားအလုံးအရင်း အသုံးပြုပြီး ထိုးစစ်ဆင်ကာ နယ်မြေ ပြန်လည်ထိန်းချုပ်ဖို့ အသည်းအသန် ကြိုးစားလာသလို ကျေးရွာတွေကို မီးရှို့ဖျက်ဆီးတာတွေ၊ ပြည်သူတွေရဲ့ စားနပ်ရိက္ခာတွေနဲ့ အဖိုးတန်ပစ္စည်းတွေကို ခိုးယူတာတွေ၊ အပြစ်မဲ့ပြည်သူတွေကို ဖမ်းဆီးသတ်ဖြတ်တာတွေ ဆက်တိုက်ပြုလုပ်နေတယ်လို့ သိရပါတယ်။

3 weeks Ago
More News
Up