ဝက်လက်

November 20, 2021

ဝက်လက်မြို့နယ်တွင် စစ်ကောင်စီတပ် မိုင်းဆွဲခံရ၊ ၃၀ ကျော်သေဆုံး

စစ်ကိုင်းတိုင်း၊ ဝက်လက်နယ်၊ တည်တောရွာစာသင်ကျောင်းမှာ တပ်စွဲဖို့ပြင်ဆင်နေတဲ့ ပျူစောထီးတွေအပါအဝင် အင်အား ၁၀၀ လောက်ရှိ စစ်ကောင်စီစစ်ကြောင်းကို နိုဝင်ဘာ ၁၉ ရက် မနက်ပိုင်းမှာ ဒေသခံပြည်သူ့ကာကွယ်ရေးတပ်ဖွဲ့တွေက စာသင်ကျောင်းအနီး မိုင်းဆွဲတိုက်ခိုက်ခဲ့တာကြောင့် ၃၀ ကျော်သေဆုံးတယ်လို့ ဒေသခံတွေက အတည်ပြုပြောပါတယ်။

“တိုက်ပွဲကတော့ မနက် ၉ နာရီလောက်ကနေ နေ့လယ် ၂ နာရီလောက်အထိဖြစ်တာပဲ။ တအုန်းအုန်းနဲ့၊ ရွာထဲကနေအိမ်အချို့ကိုလည်း မီးရှို့တယ်။ စစ်တပ်ဘက်က မိုင်းမိသေတဲ့ အလောင်းတွေကို ခဲရောင် ပေါင်မုန့်ကားနဲ့ ဝက်လက်ဆေးရုံသယ်ပို့နေတာမြင်တယ်။ စာ သင်ကျောင်းအ‌နီးမှာ အစုလိုက် အပြုံလိုက် မိုင်းမိတဲ့အလောင်းတွေကတော့ မသယ်ရသေးဘူးလို့ သိရတယ်၊ အားလုံး ၃၀ ကျော်လောက်ရှိတယ်တဲ့” လို့ ဒေသခံတစ်ဦးက ပြောပါတယ်။

ဝက်လက်မြို့နယ်အနောက်ခြမ်း မူးမြစ်ကမ်းဘေးကကျေးရွာတွေကို စီးနင်းတပ်စွဲဖို့ လာရောက်တဲ့ အကြမ်းဖက်စစ်တပ်ကို ဒေသခံပြည်သူ့ကာကွယ်ရေးတပ်ဖွဲ့က ထိပ်တိုက်ခုခံရင်း မိုင်းဆွဲတိုက်ခိုက် ခဲ့ရာမှာ PDF ဘက်က ၁ ဦး ကျဆုံးတယ်လို့ တပ်ဖွဲ့ဝင်တစ်ဦးက ပြောပါတယ်။

“စစ်ခွေးတွေက လမ်းကျောအတိုင်းမဝင်ပဲနဲ့လယ်တောတွေဘက်ကနေ ဒလစပ် ပစ်ပြီးတည်တောရွာကို တန်းဝင်လာတာ၊ ကျနော်တို့ကပြန်ပြီး ခုခံပစ်ခတ်ရင်း စစ်ခွေတွေက လက်နက်ကြီးနဲ့ ပစ်နေလို့ ဆုတ်ပေးလိုက်ရတယ်။ အထိခိုက်ကတော့ ကိုယ်ဘက်က နှစ်ယောက်ထိတယ်၊ တစ်ယောက်ကတော့ အတည်ပြုလို့ရတယ်။ လွယ်အိပ်ထဲ လက်လုပ်မိုင်းတစ်လုံးနဲ့ သမ္မရိုးတံတားပေါ်မှာမိလို့ စစ်ခွေးတွေက ပစ်သတ်ပြီး ရေထဲမြောပစ်လိုက်ကြတယ်။ တစ်ယောက်ကတော့ အတည်ပြုလို့မရသေးဘူး။” 

အကြမ်းဖက်စစ်တပ်ဟာ တည်တောကျေးရွာက နေအိမ် ၂ လုံး၊ ဆိုင်ကယ် ၁၁ စီးနဲ့ လယ်တောတဲတခုလုံးကို မီးရှို့ဖျက်ဆီးခဲ့ပြီး ကျေးရွာစာသင်ကျောင်းအတွင်းက ပစ္စည်းအချို့ကိုလည်း မီးရှို့သွားတယ်လို့ ဒေသခံတွေဆီက သိရပါတယ်။

တိုက်ပွဲအတွင်း စစ်ကောင်စီဘက်က သေဆုံးဒဏ်ရာရတာနဲ့ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။

စက်တင်ဘာ ၉ ရက်နေ့ကလည်း ဝက်လက်မြို့နယ်အနောက်ခြမ်းက ရွှေပန်းကုန်းရဲကင်းစခန်းကို ပြည်သူ့ကာကွယ်ရေးတပ်ဖွဲ့တွေက စီးနင်းတိုက်ခိုက်ခဲ့တာကြောင့် ရဲ ၂ ဦး သေးဆုံးခဲ့တယ်လို့ သိရပါတယ်။

1 week Ago

November 12, 2021

ဝက်လက်၌ စစ်တပ်က နွားကျောင်းသား ၁ ဦးကို ရိုက်နှက်ဖမ်းဆီးပြီး လူနေအိမ် ၅ လုံးကို ဖျက်ဆီး

စစ်ကိုင်းတိုင်း၊ ဝက်လက်မြို့နယ်အတွင်း စစ်ကောင်စီတပ်က နိုဝင်ဘာ ၁၁ ရက်နေ့မှာ နွားကျောင်းသားတဦးအား ရိုက်နှက်ဖမ်းဆီးပြီး နေအိမ် ၅ လုံးကို ဖျက်ဆီးသွားတယ်လို့ ဒေသခံတွေက ပြောပါတယ်။

စစ်အင်အားတိုးချဲ့လာတဲ့ အကြမ်းဖက်စစ်တပ်ဟာ နိုဝင်ဘာ ၉ ရက်နေ့က မြို့နယ်အရှေ့ခြမ်း အနောက်ခြမ်းက ကျေးရွာတွေမှာ စတင်တပ်စွဲပြီး ပိတ်ဆို့စစ်ဆေးတာ၊ ရွာတွေအတွင်း ဝင်ရောက်စီးနင်း ပစ်ခတ်ဖမ်းဆီးတာတွေ ပြုလုပ်နေပြီး နေအိမ်တွေကိုပါ ဖျက်ဆီးနေတာဖြစ်တယ်လို့ ဆိုပါတယ်။

ရွာခံတစ်ဦးက “စစ်အင်အား ၁၅၀ လောက်လာပြီး ဝင်မွှေတယ်။ နေအိမ် ၅ လုံးကိုလည်း အတွင်း ပရိဘောဂ ပစ္စည်းပါမကျန် ရိုက်ခွဲဖျက်ဆီးသွားတယ်။ ဗွက်နစ်နေတဲ့ သူတို့ ကား ကို ပြစ်ထားခဲ့ပြီး ရွာဘုန်းကြီးဆီက သိန်း ၄၈၀ ပေးထားရတဲ့ ကားကိုယူသွားကြတယ်”လို့ ပြောတယ်။

ဒါ့အပြင် စစ်ကောင်စီတပ်ဟာ မင်းကုန်းကျေးရွာက နွားကျောင်းတဲ့ လူငယ်တစ်ဦးကိုလည်း    ရိုက်နှက်ဖမ်းဆီးသွားတယ်လို့ မျက်မြင်တဦးက ပြောပါတယ်။

“တောက နွားကျောင်းပြီး ပြန်လာတာ၊ စစ်တပ် စစ်ဆေးရေးနဲ့တိုးတော့ ဖုန်းအစစ်ခံရတာ။ ဖုန်းထဲမှာ NLD သီချင်းတွေပါလို့ဆိုပြီး ဝမ်းလျားမှောက်ခိုင်းပြီး စစ်ဖိနပ်နဲ့ နင်းပေါက် ရိုက်နှက် ဖမ်းဆီးသွားတယ်။”

အကြမ်းဖက်စစ်တပ်ဟာ မြို့နယ်အရှေ့ခြမ်းမြစ်ရိုးတတန်းက သစ်ဆိမ့်၊ ကူကြီး၊ အင်ဒေါင်း၊ ရှိမ်းမကား စတဲ့ကျေးရွာတွေကို တပ်စွဲပြီး လက်နက်ကြီးတွေနဲ့တောတွေထဲ ရမ်းသမ်းပစ်ခတ်နေ တာကြောင့် နှမ်းရိတ်နေတဲ့တောင်သူတွေ မရိတ်ရဲလို့ပြန်လာကြရကာ အခက်အခဲဖြစ်နေ ရတယ်လို့ သိရပါတယ်။ 

မြို့နယ်အနောက်ခြမ်းမှာရှိတဲ့ ရွှေအိုးရ၊ ရွှေပန်းကုန်း၊ ရွာတော်၊ နဘဲလှ၊ သမရိုး စတဲ့ ရွာတွေဆီကိုလည်း တပ်ဖြန့်ဆင်းပြီး နေအိမ်အချို့ ဖျက်ဆီးနေတာလို့ သိရပါတယ်။

ဝက်လက်မြို့နယ်၊ ရွှေအိုးရကျေးရွာကို ဇွန်လ ၂၃/၂၄ ရက်တွေကလည်း စစ်ကောင်စီတပ်တွေက နှစ်ရက်ဆက်တိုက် ဝင်ရောက်ပြီး ပစ်ခတ်ဖမ်းဆီးတာတွေပြုလုပ်ပြီး ဆိုင်ကယ်နဲ့ ရွှေငွေအချို့ကို လုယက်ယူငင်သွားကြကာ၊ အခု သုံးကြိမ်မြောက် ဝင်ရောက်ဖျက်ဆီးတာလည်း ဖြစ်ပါတယ်။

2 weeks Ago
More News
Up