တနိုင်ငံလုံးက ပတ်စ်ပို့ရုံးတွေကို အချိန် ၁ လကျော်ကြာ ပိတ်ခဲ့ပြီးနောက် စစ်ကောင်စီက ဖေဖော်ဝါရီ ၂၄ ရက်မှာ ပြန်ဖွင့်လိုက်ပါတယ်။
ရန်ကုန်မြို့ နိုင်ငံကူးလက်မှတ်ရုံးမှာ ပတ်စ်ပို့လုပ်မယ့်သူတွေဟာ အွန်လိုင်းကတဆင့် လျှောက်နိုင်ပြီး ပထမဆုံး ဖွင့်နေ့မှာပဲ လျှောက်တဲ့သူ များတာကြောင့် ဝက်ဘ်ဆိုက်ဝင်မရတဲ့ အခြေအနေတွေ ကြုံနေရပါတယ်။
အွန်လိုင်းကတဆင့် ကိုယ်တိုင် လျှောက်ထားသူ တဦးကတော့ မနက် ၇ နာရီလောက်ကတည်းက ပတ်စ်ပို့ရုံး ဝက်ဘ်ဆိုက်မှာ လျှောက်ဖို့ စောင့်ဆိုင်းခဲ့ပြီး၊ လျှောက်တဲ့သူ များတာကြောင့် မနက် ၁၀ နာရီလောက်မှာ ဝင်လို့ ရတယ်လို့ ပတ်စ်ပို့ လျှောက်ထားသူတဦးက ပြောပါတယ်။
"ခက်တယ်ဆိုတာ တော်တော်ဝင်ရတယ်။ အကြာကြီး ထိုင်စောင့်ပြီးတော့ Refresh ထိုင်နှိပ်နေရတာ သူ့ ပေ့ချ်ကို။ ကျနော်တို့ နာမည်နဲ့ အီးမေးလ် ဝင်ပြီးတော့ ဟိုဘက်ကို ထပ်သွားဖို့ တော်တော်ကြာတာ စောင့်ရတာ။ ကိုယ်ရေးအချက်အလက်က ၃ ဆင့်လောက် ဖြည့်ရတယ်။ အကုန်ဖြည့်စရာ မလိုဘူး။ ပြီးရင် Application Form လေးဖြည့်ပြီး ယူသွားရုံပဲ။ လိုအပ်တာတွေပဲ ဖြည့်ပေါ့။ ငွေက ၃ သောင်းခွဲ၊ အပြီးအစီး ချေပြီးတာ။ ထပ်ပေးစရာ မလိုဘူး။ အရင်ကလည်း QR တင်တာ ခက်တယ်။ ဒီနေ့က လျှောက်တဲ့လူ တအားများတော့ ဝင်ရတာ တအားကျပ်နေတာ။ ကျနော်တောင် မနက် ၇ နာရီလောက်က ဝင်တာ။ ၁၀ နာရီလောက်မှ ရတယ်။"
Online Booking စနစ်အသစ်ကို ရန်ကုန်မြို့ ပတ်စ်ပို့ရုံးမှာပဲ ခွင့်ပြုထားပြီး ကျန်တဲ့ ပြည်နယ်နဲ့ တိုင်းဒေသကြီး ရုံးခွဲတွေမှာတော့ အရင် လျှောက်နေကျ ပုံစံအတိုင်း တိုကင်ယူ၊ ရက်ချိန်းအတိုင်း လာရောက် လုပ်တဲ့ ပုံစံနဲ့ ပြုလုပ်ရမှာပါ။
ဘွတ်ကင် စနစ်သစ်ကို အချိန် အကန့်အသတ်မရှိ လျှောက်ထားနိုင်ပြီး ကုန်ကျစရိတ်ကို သတ်မှတ် နှုန်းထားအတိုင်း တပါတည်း ပေးချေရမယ်လို့ ထုတ်ပြန်ထားပါတယ်။
ငွေပေးချေစနစ်ကိုတော့ KBZ Pay, MPU ဘဏ်ကတ်တို့နဲ့ ပေးချေနိုင်ပြီး ကုန်ကျစရိတ်အနေနဲ့ စာအုပ်အသစ်နဲ့ သက်တမ်းတိုးအတွက် ၃၅,၀၀၀ ကျပ်၊ ပျောက်ဆုံး ပျက်စီးအတွက် ၇၅,၀၀၀ ကျပ် သတ်မှတ်ထားပါတယ်။
"ဝက်ဆိုက်က ဝင်တဲ့သူများတဲ့အတွက် ကျပ်နေပုံရတယ်။ ဘယ်လိုမှ အဆင်မပြေဘူး။ Refresh ခဏခဏ ပြန်လုပ်ရတယ်။ အဲဒီအပေါ်မှာ တော်တော်လေး စိတ်ညစ်ရတယ်။ အရင်တခေါက် QR စနစ်တုန်းကတော့ QR ကုန်တာတွေ များတယ်။ QR ရတယ်ဆိုတာ ရှားတယ်။ ပွဲစားတွေကို အပ်ရတယ်။ အွန်လိုင်းစနစ်သစ် ပြောင်းလိုက်တဲ့အပေါ် အဆင်ပြေတဲ့သူကတော့ ပြေတာ ကြားတယ်။ ဒါပေမဲ့ ရာခိုင်နှုန်းအားဖြင့်တော့ မပြေတဲ့သူများတယ်။ ကျနော်တို့ကသာ စိတ်ချစွာ ငွေလွှဲလိုက်ပေမယ့် မဖြစ်မနေ ငွေလွှဲလျှောက်တဲ့သူတိုင်း၊ ရက်ချိန်းရတဲ့သူတိုင်း သူတို့ စာအုပ် ထုတ်ပေးနိုင်မလားဆိုတဲ့ စိုးရိမ်စိတ်တော့ ရှိတာပေါ့။ တကယ် ပတ်စ်ပို့ရုံးကို သွားလုပ်တဲ့အချိန် အားလုံး အဆင်ပြေပြေဖြစ်ဖို့ မျှော်လင့်ပါတယ်"လို့ ပတ်စ်ပို့ လျှောက်ထားသူ ကိုပြည့်ဖြိုး (အမည်လွှဲ)က ဒီဗွီဘီကို ပြောပါတယ်။
ဘွတ်ကင် စနစ်သစ်ကို ၂၄ နာရီ အချိန်မရွေး ပြုလုပ်နိုင်ပြီး လတ်တလောမှာတော့ ပတ်စ်ပို့ရုံး ဝက်ဆိုက်ကို ဝင်ရောက်သူများတာကြောင့် ရှေ့ဆက်မရဘဲ ငွေသွင်းတဲ့အဆင့်မှာ ကြန့်ကြာနေတယ်လို့ ကိုယ်တိုင် လျှောက်ထားသူတွေက ပြောပါတယ်။
အွန်လိုင်း ဘွတ်ကင် စနစ်သစ်ဟာ အချိန်ကုန် သက်သာအောင်နဲ့ ငွေကုန်ကြေးကျ နည်းပါးအောင် စီစဉ်ထားတယ်လို့ စစ်ကောင်စီက ကြေညာထားပေမယ့် လက်တွေ့မှာတော့ လျှောက်တဲ့သူ များတာကြောင့် ဝက်ဆိုက်ဝင်မရတဲ့ အခက်အခဲအပြင် နည်းပညာ မကျွမ်းကျင်သူတွေဟာ ပွဲစားတွေကတဆင့် ဝယ်ယူရတဲ့ အခြေအနေတွေ ရှိနေပါတယ်။
သတင်းမှားတွေ၊ အကြမ်းဖက်အဖွဲ့အစည်းတွေနဲ့ ပတ်သက်နေပြီး အီရန်ရေဒီယိုနဲ့ ရုပ်သံဌာနတွေက သုံးနေတဲ့ အီရန်အင်တာနက်စာမျက်နှာဝက်ဘက်ဆိုက် ၃၆ ခုကို အမေရိကန်အစိုးရက သိမ်းလိုက်တယ်လို့ အမေရိကန် တရားရေးဝန်ကြီးဌာနကပြောပါတယ်။
ဇွန်လ ၂၂ရက်နေ့ တရားရုံးရဲ့ အမိန့်အရ အီရန် အစ္စလာမစ်ရေဒီယိုနဲ့ ရုပ်သံသမဂ္ဂ IRTVU က သုံးနေတဲ့ ဝက်ဘ်ဆိုက် ၃၃ ခုနဲ့ ခါတစ်ဘ်ဟဇ်ဘာလာ KH ဌာနက ဖြန့်ချိတဲ့ ဝက်ဘ်ဆိုက် ၃ခုကို အမေရိကန် ဒဏ်ခတ်မှုချိုးဖောက်တဲ့အတွက် အမေရိကန် အစိုးရက သိမ်းခဲ့တယ် လို့ တရားရေးဌာနက ကြေညာချက် ထုတ်ပြန်ခဲ့တာပါ။
ဒါပေမဲ့ ဝက်ဘ်ဆိုက်တော်များများဟာ နာမည် လိပ်စာအသစ်တွေနဲ့အတူ နာရီပိုင်းအတွင်း အွန်လိုင်းပေါ် ပြန်ရောက်လာခဲ့ကြပါတယ်။ IRTVU ကို အမေရိကန် ကုမ္ပဏီ တခုက ပိုင်ပြီး ဝက်ဘ်ဆိုက်လိပ်စာနဲ့ နာမည်အတွက် အမေရိကန်ဘဏ္ဍာရေးဝန်ကြီးဌာန နိုင်ငံခြား ပိုင်ဆိုင်မှု ထိန်းချုပ်ရေးရုံးကနေ လိုင်စင်ရမထားဘူးလို့ တရားရေး ဝန်ကြီးဌာနက ပြောပါတယ်။
KH ကတော့ အီရန်နဲ့ မဟာမိတ် အီရတ်ပြည်သူ့စစ်အုပ်စုတွေထဲက တခုဖြစ်ပြီး အဲဒီအဖွဲ့ကို အမေရိကန်က နိုင်ငံခြားအကြမ်းဖက်အဖွဲ့ အစည်းအဖြစ် သတ်မှတ်ထားပါတယ်။
KH ကလည်း လိုင်စင်မရှိဘဲ လုပ်ငန်းလည်ပတ်နေတာလို့ ရိုက်တာသတင်းဌာနက အစီရင်ခံပါတယ်။ အမေရိကန်အစိုးရဟာ ယီမင်နိုင်ငံက ဟူသီလှုပ်ရှားမှုလိုမျိုး အီရန်နဲ့ ပတ်သက်နေတဲ့ အုပ်စုတွေပိုင်တဲ့ အင်တာနက် ဝက်ဘ်ဆိုက်တွေနဲ့ မီဒီယာဝက်ဆိုက် အတော်များများကို သိမ်းခဲ့တယ်လို့ အီရန် သတင်းဌာနကတွေကလည်း ကြေညာပါတယ်။
