ဝက်မှေးရွာဟောင်း ရုန်းရင်းဆန်ခတ်ဖြစ်မှုကိစ

April 2, 2018

ဝက်မှေးရွာဟောင်း ရုန်းရင်းဆန်ခတ်ဖြစ်မှု ဒေသခံများရှင်းလင်း

  စစ်ကိုင်းတိုင်းဒေသကြီး လက်ပံတောင်းတောင်ဒေသရှိ ဝက်မှေးရွာဟောင်းက ရွာသားတွေ နေအိမ်ပြောင်းရွှေ့မှုဖြစ်စဉ်မှာ ရဲတပ်ဖွဲ့ရဲ့လုပ်ဆောင်ချက်တွေနဲ့ ပတ်သက်လို့ တရားရုံးမှာ ဥပဒေနဲ့အညီပြန်လည်ဖြေရှင်းသွားမယ်လို့  ဒေသခံတွေက သတင်းစာရှင်းလင်းပြောပါတယ်။ ပြီးခဲ့တဲ့ မတ်လ ၂၉ ရက်က ဝက်မှေးရွာဟောင်းရှိ နေအိမ်တချို့ပြောင်းရွှေ့ရာမှာ ရဲတပ်ဖွဲ့နဲ့ ဒေသခံတချို့ ရုန်းရင်းဆန်ခတ်ဖြစ်ပွားခဲ့ပြီး ဝက်မှေးရွာသူ ၂ ဦး ဖမ်းဆီးအမှုဖွင့်ခံခဲ့ရပါတယ်။ ဒီကိစ္စနဲ့ပတ်သက်လို့ ဒေသခံတွေက ကျေနပ်မှုမရှိတဲ့အတွက် ဧပြီ ၂ ရက်နေ့က ၀က်မှေးရွာမှာ သတင်းစာရှင်းလင်းပွဲပြုလုပ်ခဲ့တာဖြစ်ပြီး  အခုလို မတရားအမှုဖွင့် တရားစွဲဆိုခံရတာနဲ့ပတ်သက်လို့  တရားရုံးမှာ သက်သေ အပြည့်အစုံနဲ့ ပြန်လည်ခုခံဖြေရှင်းသွားမယ်လို့  ဖမ်းဆီးအမှုဖွင့်ခံခဲ့ရတဲ့   မသွဲ့သွဲ့ဝင်းကပြောပါတယ်။ ရုန်းရင်းဆန်ခတ်ဖြစ်ပွားခဲ့တဲ့နေ့က ရဲတပ်ဖွဲ့တွေဝက်မှေးရွာကို လာရောက်ရာမှာ သုံးစွဲခဲ့တဲ့ RLG နံပါတ် အဝါတပ်ထားတဲ့ကားကို အသုံးပြုခဲ့တာနဲ့ အများပိုင်လမ်းကို ပိတ်ဆို့ခဲ့တာတွေဟာ ဥပဒေနဲ့ညီညွတ်မှုရှိရဲ့လားလို့  ဒေသခံတွေက ကိုအောင်ဇော်ဦးပြောပါတယ်။ စစ်ကိုင်းတိုင်းဒေသကြီး နယ်လုံဝန်ကြီး ဗိုလ်မှူးကြီး  ကျော်သန့်နိုင်ကတော့ ဝက်မှေးရွာဖြစ်စဉ်မှာ ရဲတပ်ဖွဲ့က အင်အား ၁၈၀ ကိုသုံးစွဲခဲ့တာဟာ ပြည်သူတွေရဲ့အခွင့်အရေးကာကွယ်ဖို့အတွက် အကူအညီပေးအပ်ခဲ့တာဖြစ်ပြီး ဥပဒေနဲ့အညီ အင်အားသုံး လုပ်ဆောင်ခဲ့တာဖြစ်တယ်လို့ တိုင်းအစိုးရရဲ့သတင်းစာရှင်းလင်းပွဲမှာ လုံ/နယ်ဝန်ကြီးက ပြောဆိုခဲ့ပါတယ်။ လက်ပံတောင်းဒေသ ဝက်မှေးဖြစ်စဉ်မှာ ဖမ်းဆီးခံခဲ့ရတဲ့ ဝက်မှေးရွာသူ မသွဲ့သွဲ့ဝင်း၊ မစန်းလှတို့ကိုတော့ တိုင်းအစိုးရက သတင်းစာရှင်းလင်းပွဲအပြီး မတ်လ ၃၁ ရက်ညနေပိုင်းက ပုဒ်မ ၃၃၃ အစား ၃၃၂ သို့ပြောင်းကာ အာမခံနဲ့ပြန်လွှတ်ပေးခဲ့ပါတယ်။
3 years Ago

March 31, 2018

ဝက်မှေးရွာဟောင်း ရုန်းရင်းဆန်ခတ်ဖြစ်မှုကိစ္စ အစိုးရတာဝန်ရှိသူများ ရှင်းလင်း

  မတ်လ ၂၉ ရက်နေ့ ဝက်မှေးရွာဟောင်းက နေအိမ် ၇ လုံးပြောင်းရွှေ့ရာမှာ လုံခြုံရေးရဲတပ်ဖွဲ့နှင့် ဒေသခံအချို့ ရုန်းရင်းဆန်ခတ်ဖြစ်ပွားခဲ့ပြီး ဒေသခံခေါင်းဆောင်အမျိုးသမီး ၂ ဦး ဖမ်းဆီးခံထားရပါတယ်။ ဒီကိစ္စနဲ့ပတ်သက်ပြီး မတ်လ ၃၁ ရက်နေ့မနက်ပိုင်းက တိုင်းဒေသကြီးအစိုးရအဖွဲ့ တာဝန်ရှိသူတွေဦးဆောင်ပြီး ဒေသခံတွေ၊ တိုင်း၊ ခရိုင်၊ မြို့နယ် ဌာနဆိုင်ရာတွေနဲ့ပူးပေါင်းကာ သတင်းစာရှင်းလင်းပွဲတစ်ရပ်ကို ပြုလုပ်ခဲ့ပါတယ်။ ဆားလင်းကြီးမြို့နယ် မဲဆန္ဒနယ်အမှတ် ၁ လွှတ်တော်ကိုယ်စားလှယ် ဒေါက်တာသိန်းနိုင်က “အချင်းချင်းပြေလည်သွားရင် အစိုးရက ဝင်စရာအကြောင်းမရှိဘူး။ မပြေလည်လို့ ရောက်လာတာ။ ရဲတပ်ဖွဲ့ရော အစိုးရရောက ပြည်သူလူထုကို ဥပဒေနဲ့အညီ အကာကွယ်ပေးရတယ်။ ဒါ ဗမာပြည် (မြန်မာပြည်)တင်မဟုတ်ဘူး။ ဘယ်တိုင်းပြည်နေနေ လုပ်ရမယ့်အလုပ်။ ဒါကြောင့် ကျနော်အတတ်နိုင်ဆုံးပြောပါတယ်။ သူတို့အနေနဲ့ ဘယ်နည်းနဲ့ဖြစ်ဖြစ် အဝင်မခံနိုင်ဘူး။ ဒါဆို တဖက်က ညှိမရတော့ဘူး။ အဲဒါဆိုရင် တဖက်ကရွှေ့ပြောင်းမယ့် သူတွေကို ရဲတပ်ဖွဲ့အရပ်ဝတ်နဲ့ ထမ်းသယ်ပေးပါ့မယ်ပြောတယ်။ ထိပ်တိုက်မတွေ့ချင်ဘူး။ ရဲတပ်ဖွဲ့ရဲ့သဘောထားက ပြောင်းရွှေ့မယ်သူတွေကို အဲလိုထုတ်ပေးရင် ရမလားမေးတော့ သူတို့ကလည်း မြန်မာနိုင်ငံအတွင်းမှာ ကိုယ့်အိမ်ကိုယ် အများပိုင်လမ်းကနေ ကိုယ့်အိမ်ရှေ့မှ ဝင်ခွင့်မရှိတဲ့ နိုင်ငံသားဖြစ်ရမလား သေရော။ အစိုးရက ဘာလုပ်ပေးမလဲ။ ဘယ်လိုအကာအကွယ် ပေးမလဲ။ အစိုးရမရှိတော့ဘူးလား။ အဲဒီတော့ နိုင်ငံသားတယောက်ရဲ့ အခွင့်အရေးကလည်း သူ့အိမ်သူ့လမ်းအတိုင်းဝင်တာကို အကာကွယ်ပေးရမှာ အစိုးရရဲ့တာဝန်ပဲ” လို ပြောပါတယ်။ အစိုးရအဖွဲ့က ဦးဆောင်ပြုလုပ်တဲ့ သတင်းစာရှင်းလင်းပွဲမှာ စည်ပင်ဝန်ကြီး၊ လယ်/ဆည်ဝန်ကြီး၊ လုံ/နယ်ဝန်ကြီးတို့တက်ရောက် ရှင်းလင်းခဲ့တာပါ။ ဒီရှင်းလင်းပွဲမှာ ရွှေ့ပြောင်းနေအိမ်က ရွာသားတွေကို ဖိတ်ကြားခဲ့ပေမယ့် ကျန်တဲ့ ရွာသားတွေကိုတော့ ဖိတ်ကြားတာမရှိခဲ့ပါဘူး။ အဲဒီကိစ္စနဲ့ပတ်သက်ပြီးတော့လည်း ဒီသတင်းစာရှင်းလင်းပွဲက မျှတမှုမရှိဘူးလို့ ဆိုပါတယ်။ ဝက်မှေးရွာဖြစ်စဉ်နဲ့ပတ်သက်ပြီး ရဲတပ်ဖွဲ့အနေနဲ့ ဥပဒေအရသာ ဆောင်ရွက်ခဲ့တာ ဖြစ်တယ်လို့လည်း ဆိုပါတယ်။ လက်ရှိတရားစွဲဆို ဖမ်းဆီးခံထားရတဲ့ မသွဲ့သွဲ့ဝင်းနှင့် မစန်းလှ တို့ ၂ဦးကို အမှုဖွင့်ထားတာနဲ့ပတ်သက်ပြီး ဖြေလျော့မပေးနိုင်တော့ဘူးလားလို့ ဆားလင်းကြီး တိုင်း ၂ လွှတ်တော်ကိုယ်စားလှယ် ဦးစောမောင်က မေးမြန်းရာမှာတော့ တိုင်းရဲတပ်ဖွဲ့မှုးက ဒါထက်ကြီးလေးတဲ့ ပြစ်ဒဏ်နဲ့တရားစွဲလို့ ရပေမယ့် သက်သာတဲ့ ဥပဒေနဲ့စွဲတာဖြစ်ကြောင်း၊ ပြည်သူအချင်းချင်းဖြစ်တာမဟုတ်ဘဲ ဝန်ထမ်းနဲ့ဖြစ်တာဖြစ်လို့ မရကြောင်းကိုလည်း ပြောဆိုခဲ့ပါသေးတယ်။ လက်ရှိမှာတော့ မသွဲ့သွဲ့ဝင်း၊ မစန်းလှတို့ကို ဆားလင်းကြီးမြို့မရဲစခန်းမှာ ဖမ်းဆီးထားပြီး မဖြူဖြူဝင်းကိုတော့ ဖမ်းဆီးရမိဖို့ လုပ်ဆောင်နေတယ်လို့ ဆိုပါတယ်။ သူတို့ ၃ ဦးစလုံးကိုတော့ ဆားလင်းကြီးမြို့မရဲစခန်း (ပ) ၆၁/၂၀၁၈၊ ရာဇသတ်ကြီးပုဒ်မ ၃၄၂/၃၃၃ နဲ့အမှုဖွင့်ထားပါတယ်။
3 years Ago
Up