ဝက်သက်

June 13, 2019

ကွန်ဂိုတွင် ဝက်သက်ရောဂါဖြစ်ပွားမှု မြင့်တက်၊ သေဆုံးသူ အယောက် ၁၅၀၀ ကျော်ရှိ

ကွန်ဂိုနိုင်ငံမှာ ဝက်သက်ရောဂါဖြစ်ပွားမှု မြင့်တက်နေပြီး ကျန်းမာရေးဝန်ကြီးဌာနရဲ့ နောက်ဆုံး အချက်အလက်တွေအရ ဝက်သက်ရောဂါကြောင့် သေဆုံးသူ အယောက် ၁၅၀၀ ကျော်လာပြီလို့ အစိုးရက ဇွန်လ ၁၀ ရက်နေ့မှာ ကြေညာခဲ့ပါတယ်။ ဒါဟာ အခုနှစ် ပထမငါးလအတွင်း သေဆုံးတဲ့ပမာဏ ဖြစ်တယ်လို့ နယ်စည်းမခြား ဆရာဝန်များအဖွဲ့ကလည်း ပြောပါတယ်။ ကာကွယ်ဆေးထိုးတဲ့ စီမံကိန်းတွေ ကျယ်ကျယ်ပြန့်ပြန့်လုပ်တာက ဝက်သက်ရောဂါ ကူးစက်ပြန့်ပွားမှုကို ထိန်းချုပ်ဖို့ တခုတည်းသောနည်းလမ်း ဖြစ်တယ်လို့ ကျန်းမာရေး တာဝန်ရှိသူတွေက ပြောပါတယ်။ ဒါပေမယ့် တချို့မိဘတွေက ကာကွယ်ဆေးထိုးဖို့ အတိုက်အခံလုပ်ရင် စီမံကိန်း နှောင့်နှေးနိုင်တယ်လို့ တာဝန်ရှိသူတွေက ဆက်ပြောပါတယ်။ ကွန်ဂိုတနိုင်ငံလုံးမှာ ဝက်သက်ရောဂါ သံသယရှိလူနာ ခြောက်သောင်းခွဲကျော် ရှိတယ်လို့ ရိုက်တာသတင်းက ဖော်ပြပါတယ်။ နိုင်ငံအရှေ့ပိုင်းမှာလည်း အီဘိုလာရောဂါကြောင့် သေဆုံးသူ ၁၃၀၀ ကျော်ရှိလာပြီး ရောဂါပြန့်ပွားမှု ထိန်းချုပ်ဖို့ ကျန်းမာရေးဝန်ထမ်းတွေက အားစိုက်လုပ်ဆောင်နေကြပါတယ်။
3 years Ago

February 19, 2019

ပေါ့ဆမှုနဲ့ ဗဟုသုတ နည်းမှုတွေကြောင့် အဖြစ်များလာတဲ့ ဝက်သက်ရောဂါ

အခုတလော ဆက်တိုက်ဆိုသလို ကြားနေရတဲ့ အကြောင်းအရာကတော့ ဝက်သက်ပါ။ ဝက်သက်ဟာ အရမ်းကို ပြန့်ပွားလွယ်တဲ့ ရောဂါတစ်ခုဖြစ်ပြီး ကလေးရော လူကြီးတွေပါ ကူးစက်ဖြစ်ပွားနိုင်ပါတယ်။ ဒီရောဂါက လျှော့တွက်လို့ရတဲ့ရောဂါတစ်ခု လုံးဝမဟုတ်ဘူး။ အသက်သေဆုံးတဲ့အထိ ဆိုးရွားနိုင်တဲ့ ပြင်းထန်တဲ့ ရောဂါတစ်ခု ဖြစ်ပါတယ်။ ကာကွယ်ဆေးထိုးထားမယ်ဆိုရင် အလွယ်တကူ ကာကွယ်နိုင်တဲ့ ဒီရောဂါဆိုးကြီးက ကာကွယ်ဆေးထိုးဖို့ တာဝန်ရှိတဲ့ မိဘတွေနဲ့ အုပ်ထိန်းသူတွေရဲ့ ပေါ့ဆမှုနဲ့ ဗဟုသုတနည်းမှု အယုံလွယ်မှုတွေကြောင့် ကာကွယ်ဆေးမထိုးဖြစ်ဘဲ တကျော့ပြန်ခေါင်းထောင်လာပြီး ဆိုးရွားတဲ့ ပြန့်ပွားမှုတစ်ခုအဖြစ်ကို ရောက်ရှိပြန်လာပါတယ်။ ဒီဆောင်းပါးဟာ ဝက်သက်ရောဂါရဲ့ ပြင်းထန်ဆိုးရွားတဲ့ နောက်ဆက်တွဲတွေအကြောင်းနဲ့ ဘယ်လိုကာကွယ်ရမလဲ၊ အယုံမလွယ်သင့်တဲ့ ကာကွယ်ဆေးနဲ့ပတ်သက်တဲ့ ကောလာဟလတွေကြောင့် ဘယ်လိုတွေ ပြဿနာရှိနိုင်လဲဆိုတာကို သေချာရှင်းပြထားပါတယ်။ ဝက်သက်ဆိုတာဘာလဲ။ နာမည်မှာ ဝက်ပါနေတာကြောင့် ဝက်ကနေတစ်ဆင့် ကူးစက်တဲ့ရောဂါလို့ မထင်လိုက်ပါနဲ့။ ဝက်သက်ဆိုတာ လေထဲကနေတဆင့် အလွန်လျင်မြန်စွာ ကူးစက်ပြန့်ပွားတတ်တဲ့ ရောဂါတစ်ခုပါ။ ကာကွယ်ဆေး တစ်ခါမှ ထိုးထားဖူးခြင်း မရှိတဲ့သူဆီ ဒီဗိုင်းရပ်စ်ပိုးဝင်သွားလို့ကတော့ အခြား ကာကွယ်ဆေးမထိုးထားတဲ့ သူတွေဆီကိုပါ လျင်လျင်မြန်မြန် ပြန့်သွားနိုင်တဲ့ ဆိုးကျိုးများတဲ့ ကူးစက်မြန် ကြောက်စရာ ရောဂါတစ်ခုပါ။ ဝက်သက်ရဲ့ ရောဂါလက္ခဏာတွေက ဘာတွေလဲ။ ဝက်သက်လို့ ဆိုလိုက်တာနဲ့ အဖျားကြီးပြီး ကိုယ်ပူမှာ အပြင် ခုပြောပြမယ့် ရောဂါလက္ခဏာတွေထဲက တစ်ချက်ဖြစ်စေ အားလုံးဖြစ်စေ ပါကိုပါရပါမယ်။ သူတို့ကတော့
  • ချောင်းခြောက်ဆိုးမယ်
  • နှာစေး နှာပိတ်ဖြစ်မယ်
  • မျက်သားရောင်ရမ်းမယ်
အဲဒါတွေအပြင်
  • လည်ချောင်းနာမယ်
  • Koplik’s spots လို့ ဆရာဝန်တွေခေါ်ကြတဲ့ အဖြူရောင်အစက်လေးတွေရဲ့ အလယ်မှာ အပြာရောင် အလယ်ဗဟိုရှိတဲ့ အစက်လေးတွေ ပါးစောင်မှာဖြစ်နိုင်တယ်။ ဒါက ဝက်သက်လို့ ခေါင်းစဉ်တပ်နိုင်တဲ့ သေချာတဲ့ အရာတစ်ခုပါ။
  • Measle Rash လို့ခေါ်တဲ့ အနီကွက်တွေ ကိုယ့်ခန္ဓာပေါ်မှာ ပေါက်နေတတ်ပြီး
  • တစ်ကိုယ်လုံး ကိုက်ခဲနေတတ်ပါတယ်။
ဝက်သက်ရောဂါဟာ အဆင့်လိုက်ဖြစ်တဲ့ ရောဂါတစ်ခုပါ။ နေရာယူခြင်း – ဝက်သက်ရောဂါပိုးနဲ့ ထိတွေ့ပြီး ၁၀ ရက်ကနေ ၁၄ ရက်အတွင်းမှာ ဗိုင်းရပ်စ်ပိုးက ကိုယ်တွင်းကို ကျူးကျော်ဖို့ အရင်ဆုံး ကိုယ်တွင်း ခုခံအားစနစ်နဲ့ တိုက်နေရတာကြောင့် လက္ခဏာတွေ မပြတတ်သေးပါဘူး။ လက္ခဏာ စပြတဲ့အဆင့် – စစ်ပွဲမှာ ဝက်သက်အနိုင်ရသွားပြီဆိုတာနဲ့ လက္ခဏာတွေ စပြလာပါပြီ။ အဓိက လက္ခဏာဖြစ်တဲ့ အဖျားတက်တာ (အဖျားငွေ့ငွေ့လေးလည်း ဖြစ်နိုင်သလို အဖျားကြီးတာ (အပူချိန် ၄၁ ဒီဂရီ စင်တီဂရိတ်) မျိုးလည်း ဖြစ်နိုင်ပါတယ်) အဖျားက တက်လိုက်ကျလိုက် ဖြစ်နေတတ်ပြီး အနီကွက်တွေ ပေါ်တဲ့အချိန်မှာတော့ အဖျားပြန်တက်တတ်ပါတယ်။ ဒါ့အပြင် ချောင်းခြောက်ဆိုးတာ၊ နှာစေးတာ၊ မျက်စိနာတာနဲ့ လည်ချောင်းနာတာတွေ ဖြစ်တတ်ပါတယ်။ ဒီလက္ခဏာတွေက ၃ ရက်ကနေ ၄ ရက်လောက်အတွင်း ရှိနေတတ်ပါတယ်။ အနီကွက်တွေပေါ်တဲ့ အဆင့် – ဝက်သက်လို့ ဆိုလိုက်တာနဲ့ အရေပြားပေါ်မှာပေါက်တဲ့ အနီကွက်တွေကို ချန်ခဲ့လို့ မရပါဘူး။ အကွက်တွေလည်း ဖြစ်သလို အဖုလေးတွေလည်း ဖြစ်တတ်ပြီး အစုလိုက်ရှိနေတတ်ပါတယ်။ အဲဒီအကွက်တွေ အဖုတွေဟာ စစချင်း မျက်မှာပေါ်မှာ အရင်ပေါ်တာပါ။ တဖြည်းဖြည်းနဲ့ ကိုယ်ခန္ဓာ အောက်ပိုင်းဖြစ်တဲ့ လက်တွေ၊ ရင်ဘတ်တွေ၊ ခြေထောက်တွေ၊ ခြေဖဝါးတွေဆီ ပြန့်သွားတတ်ပါတယ်။ အဲဒီအကွက်တွေ ပေါ်ပြီဆိုတာနဲ့ ကိုယ်ပြန်ပူလာတတ်ပါတယ်။ အကွက်တွေ ပျောက်တော့မယ်ဆိုရင်လည်း သူပေါက်ခဲ့တဲ့အတိုင်း မျက်နှာကနေ အရင်စပျောက်ပြီး ခြေထောက်က နောက်ဆုံးမှ ပျောက်တာပါ။ ကူးစက်နိုင်တဲ့အဆင့် – ဝက်သက် အနီကွက်တွေ မပေါ်ခင် ၄ ရက်နဲ့ အနီကွက်ပေါ်ပြီး ၄ ရက် ဒီ ၈ ရက်ဟာ လူတစ်ယောက်ကနေ နောက်တစ်ယောက်ဆီကို ဝက်သက် ကူးစက် အပျံ့နှံ့နိုင်ဆုံး အချိန်ပါ။ ဝက်သက်ရဲ့ နောက်ဆက်တွဲဆိုးကျိုးများ။ သေချာကုသတဲ့ နည်းလမ်းမရှိဘဲ ခုခံအားကိုသာ အားထားပြီး တိုက်ထုတ်ရတဲ့ ရောဂါတစ်ခုဖြစ်တာကြောင့် ဝက်သက်ရောဂါဟာ နောက်ဆက်တွဲဆိုးကျိုးတွေ အများကြီးရှိတဲ့ ရောဂါတစ်ခုပါ။ အဖြစ်များဆုံး နောက်ဆက်တွဲ ဆိုးကျိုးတွေကတော့ ဝမ်းလျှောတာနဲ့ နားပြည်ယို ပိုးဝင်တာပဲ ဖြစ်ပါတယ်။ အဖြစ်နည်းပြီး ပြင်းထန်တဲ့ နောက်ဆက်တွဲ ဆိုးကျိုးတွေလည်း ရှိပါသေးတယ်။ ဒါတွေကတော့
  • အဆုတ်ပိုးဝင်ပြီး အဆုတ်ရောင်တာ (အခုနောက်ပိုင်းဖြစ်တဲ့ ဝက်သက်တွေမှာ ဒါက အရမ်းအဖြစ်များနေပါတယ်)
  • ဦးနှောက်ပိုးဝင်တာတွေနဲ့
  • အသက်သေဆုံးတာတွေ ဖြစ်နိုင်ပါတယ်။
ဒီလို ကုသနည်းလည်း သေချာမရှိဘဲ ခုခံအားကိုပဲ မူတည်ပြီး တိုက်ထုတ်ရတဲ့ ရောဂါတစ်ခုဖြစ်တာကြောင့် ကြိုတင်ကာကွယ်ထားနိုင်မှ တော်ရုံကျမှာနော်။ ဒီအတွက် စိတ်မပူပါနဲ့။ ဝက်သက်ကို ကာကွယ်နိုင်တဲ့ ကာကွယ်ဆေးတွေ ရှိနေပါပြီ။ ကာကွယ်ဆေးအောင်သွားရင် ဝက်သက်ဆိုတာ လုံးဝကို ကြောက်စရာ မလိုလောက်တော့အောင် ကာကွယ်ဆေးက အစွမ်းထက်ပါတယ်။ အချုပ်အနေနဲ့ ဝက်သက်နဲ့ပတ်သက်လို့ သိထားသင့်တဲ့ အချက်တွေက
  • ဝက်သက်ရောဂါဆိုတာ လူတစ်ယောက်ကနေ အခြားတစ်ယောက်ဆီကို ကူးစက်ပြန့်လွယ်တတ်တဲ့ ရောဂါတစ်မျိုးပါ။
  • ဝက်သက်ဖြစ်စေတဲ့ ဗိုင်းရပ်စ်မှာ မျိုးစိတ်ပေါင်း ၂၁ မျိုး ရှိပါတယ်။
  • ဝက်သက်ဟာ ဗိုင်းရပ်စ်ပိုးဖြစ်တာကြောင့် ဗိုင်းရပ်စ်ပိုးတို့ ထုံးစံအတိုင်း သူတို့ကို သေချာကုသနိုင်တဲ့ ဆေးနည်းတွေ မရှိသေးတာကြောင့် ကာကွယ်ခြင်းက ကုသခြင်းထက် အကောင်းဆုံးပါ။ ဒီတော့ ဝက်သက်ကာကွယ်ဆေးကို လူတိုင်း ထိုးထားသင့်ပါတယ်။ အထူးသဖြင့် အသက် ကိုးလကနေ ငါးနှစ်အတွင်း ကလေးတွေ အနည်းဆုံး ဝက်သက်ကာကွယ်ဆေး နှစ်ကြိမ်ထိုးဖို့ လိုအပ်ပါတယ်။
  • ကာကွယ်ဆေးဆိုတာ ဖန်တီးထားတဲ့ ဗိုင်းရပ်စ်ပိုး အနုစားလေးတွေကို ကိုယ်တွင်းကို ထည့်ပေးပြီး အဲဒီ ဗိုင်းရပ်စ်ပိုးကို တိုက်တဲ့ ပဋိပစ္စည်းထွက်အောင် လုပ်လိုက်တာဖြစ်လို့ လူတိုင်းထိုးလို့ရပေမယ့် ရင်သွေးလေးတွေရှိတဲ့ ကိုယ်ဝန်သည်တွေ ကိုယ်ဝန်ဆောင်နေစဉ်တော့ ထိုးလို့မရပါဘူး။
အသားချင်းထိတွေ့မှ မဟုတ်ဘဲ လေထဲကနေတောင် ကူးစက်တဲ့အထိ ပြင်းထန်တဲ့ ဝက်သက်ရောဂါကို ခပ်ပေါပေါ့လေး သဘောမထားသင့်တာကတော့ အမှန်ပါ။ ဒီရောဂါက ကလေးတွေမှာတင်မဟုတ် လူကြီးတွေမှာလည်း ဖြစ်ပွားနိုင်ပါတယ်။ ဒီရောဂါကို မေမေတို့အနေနဲ့ အမှုမဲ့အမှတ်မဲ့ မထားစေချင်ပါဘူး။ အကြောင်းကတော့ ကိုယ်ခံအားစနစ်က ဖွံ့ဖြိုးဆဲဖြစ်ပြီး နုနယ်လွန်းတဲ့ ကလေးငယ်လေးတွေမှာ ဝက်သက်ရောဂါကြောင့် အသက်သေဆုံးတာမျိုးအထိ ဖြစ်နိုင်ပါတယ်။ ကိုယ့်ရဲ့ အဖိုးမဖြတ်နိုင်တဲ့ သားသမီးလေးတွေကို ဒီရောဂါဆိုးကြီးကနေ ကာကွယ်ပေးကြဖို့ တိုက်တွန်းပါရစေ။ ရောဂါရှိတာကို ဘယ်လိုသိနိုင်မလဲ။ ဝက်သက်ရောဂါပိုးက လေထုထဲကနေတဆင့် ကူးစက်နိုင်သလို ပြင်ပလေထုထဲမှာ နာရီတော်တေ်ာကြာ ကြာတဲ့အထိ ရှင်သန်နေနိုင်ပါတယ်။ ရောဂါပိုး ကူးစက်ခံထားရပြီး ၁၀ ရက်ကနေ ၁၄ ရက်ကြာမှ ရောဂါလက္ခဏာ ပြတတ်တာပါ။ များသောအားဖြင့်ကတော့ အရေပြားမှာ အနီရောင် အဖုအပိန့်လေးတွေ ထွက်လာတာပါ။ ပါးစပ်ထဲမှာလည်း အဖုငယ်လေးတွေ ဖြစ်လာနိုင်ပါတယ်။ ဒီအခြေအနေတွေကို စစ်ဆေးပြီးမှ ဆရာဝန်က ကလေးမှာ ဝက်သက်ဖြစ်နေပြီဆိုတာကို ဆုံးဖြတ်ပေးတာပါ။ အတိကျဆုံး အဖြေထွက်ဖို့အတွက်ကတော့ သွေးစစ်တာ၊ ဆီးစစ်တာတွေလုပ်ပြီး စစ်ဆေးတာမျိုး ရှိနိုင်ပါတယ်။ ဘယ်လိုကုသမလဲ။ ဝက်သက်ရောဂါပိုး ကူးစက်ခံရမှုအတွက် ကုသမှုရယ်လို့ တိတိကျကျ မရှိပါဘူး။ အကောင်းဆုံးနည်းလမ်းကတော့ ကာကွယ်ဆေးထိုးတာ ဒါမှမဟုတ် ရောဂါပိုး ကူးစက်မခံရအောင် ကာကွယ်ထားတာပါ။ ကိုယ်နေထိုင်တဲ့ ပတ်ဝန်းကျင် အနီးအနားတွေမှာ ဝက်သက်ဖြစ်တယ်ဆိုရင် ကာကွယ်ဆေး မဖြစ်မနေထိုးဖို့ လိုအပ်ပါတယ်။ အဖျားကျဆေးတွေပေးနိုင်တယ် – ဝက်သက်ဖြစ်တဲ့အခါ အဖျားကြီးတာမျိုး ဖြစ်နိုင်ပါတယ်။ ဒီလိုအခြေအနေမှာ ဆရာဝန်က ကလေးကို အဖျားကျစေတဲ့ဆေးတွေပေးပြီး ဝက်သက်ကြောင့် အဖျားကြီးတာကို သက်သာအောင် လုပ်ဆောင်ပေးနိုင်ပါတယ်။ ပဋိဇီဝဆေးဝါးတွေ ပေးနိုင်တယ် – ဝက်သက်နဲ့အတူ ကလေးငယ်မှာ အဆုတ်ရောင်တာ၊ နားပိုးဝင်ကူးစက်တာလိုမျိုး ဘက်တီးရီးယား ကူးစက်ခံရတာမျိုး ဖြစ်လာမယ်ဆိုရင် ဆရာဝန်က ပဋိဇီဝဆေးတွေ တိုက်ကျွေးနိုင်ပါတယ်။ ဗီတာမင် A – ကလေးတွေမှာ ဗီတာမင် A နည်းတဲ့အခါ ဝက်သက်ရောဂါကို ခံစားရနိုင်ပါတယ်။ ဗီတာမင် A ဖြည့်စွက်ပေးတာကြောင့် ကလေးမှာ ဝက်သက်ကြောင့်ဖြစ်တဲ့ လက္ခဏာတွေ ပြင်းပြင်းထန်ထန် ခံစားရနိုင်ခြေ နည်းသွားမှာပါ။ ကာကွယ်ခြင်းက အကောင်းဆုံးနည်းလမ်းပါ။ ကာကွယ်ခြင်းက ကုသခြင်းထက် ပိုကောင်းပါတယ်။ ဝက်သက်လိုမျိုး ရောဂါမှာဆိုရင် ပိုပြီးတောင် မှန်နေပါတယ်နော်။ ဝက်သက်က ခံစားရဆိုးသလို နောက်ဆက်တွဲပြဿနာတွေကလည်း ပြင်းထန်ပါတယ်။ ကြောက်စရာအကောင်းဆုံး အချက်တစ်ခုက ဝက်သက်ရောဂါက အဆိုးဆုံးနောက်ဆက်တွဲအနေနဲ့ အသက်သေဆုံးတာမျိုးအထိ ဖြစ်စေနိုင်တာပါ။ ဝက်သက်ကို ကာကွယ်ဖို့ အကောင်းဆုံးသော နည်းလမ်းကတော့ ကာကွယ်ဆေးထိုးတာပါပဲ။ ကလေးက အရမ်းငယ်သေးရင်တော့ ကာကွယ်ဆေးထိုးလို့ မရသေးပါဘူး။ ကလေးရဲ့ ကိုယ်ခံအားစနစ်က အပြည့်အဝ မဖွံ့ဖြိုးသေးတာကြောင့်ပါ။ ကလေးလေးတွေကို အသက် ကိုးလကနေစပြီး ကာကွယ်ဆေး ထိုးနိုင်တယ်။ မဖြစ်မနေ ထိုးပေးထားဖို့ လိုအပ်တယ်။ အနည်းဆုံး နှစ်ကြိမ်ထိုးရမယ်။ ကာကွယ်ဆေးထိုးပေးတာကြောင့် ကလေးငယ်မှာ ထိခိုက်သွားတာမျိုး မရှိပါဘူး။ မေမေတို့တွေ ထင်နေသလို ဝက်သက်ကာကွယ်ဆေးကြောင့် ကလေးမှာ အော်တစ်ဇင်ရောဂါလိုမျိုး ရောဂါတွေ ခံစားရနိုင်တယ်ဆိုတဲ့ အထောက်အထား လေ့လာချက် တစ်စုံတစ်ရာ မရှိပါဘူး။ ဒီနေရာမှာ ပြင်းပြင်းထန်ထန် သတိပေးချင်တာက ဝက်သက်ကာကွယ်ဆေးထိုးလို့ ထိခိုက်မှု တစ်စုံတရာ မဖြစ်နိုင်ပါဘူး။ ကာကွယ်ဆေးမထိုးရင်သာ ကလေးမှာ အကြီးအကျယ် ထိခိုက်နိုင်တယ်။ ကံအကြောင်းမသင့်ရင် ဆုံးရှုံးနိုင်တယ်ဆိုတာ သတိထားစေချင်တယ်။ ကလေးယူဖို့ ဆန္ဒရှိတဲ့ မေမေလောင်းလျာတွေအနေနဲ့လည်း ကာကွယ်ဆေးကို ကြိုတင်ထိုးနှံထားတာက အကောင်းဆုံးဖြစ်မှာပါ။ ကိုယ်ဝန်ဆောင်နေချိန်မှာ ဝက်သက်ကာကွယ်ဆေး ထိုးလို့မရသလို ကိုယ်ဝန်ဆောင်ချိန် ဝက်သက်ရောဂါပိုး ကူးစက်ခံရမယ်ဆိုရင် သန္ဓေသားအတွက် ထိခိုက်မှုက ကြီးပါတယ်။ ဝက်သက်ဖြစ်တဲ့အခါ အသုံးတည့်မယ့် နည်းလမ်းအချို့။ ကလေးငယ်တွေမှာ ဝက်သက်ဖြစ်လာပြီဆိုရင် အကောင်းဆုံးကတော့ ဆရာဝန်ဆီ အမြန်ဆုံး သွားရောက်ပြသတာပါပဲ။ ကလေးက ဝက်သက်ပေါက်နေတဲ့အခါ မေမေတို့အနေနဲ့ ကလေးကို သက်တောင့်သက်သာဖြစ်စေဖို့ ဒီအချက်လေးတွေ ဂရုစိုက်ပေးသင့်ပါတယ်။ သက်တောင့်သက်သာထားပါ – ကလေးကို လှုပ်လှုပ်ရှားရှား မနေခိုင်းပါနဲ့။ တတ်နိုင်သမျှ သက်တောင့်သက်သာ နေခိုင်းပါ။ ရေဓာတ်ပြည့်ဝအောင် ဂရုစိုက်ပါ – ကလေးကို နို့များများတိုက်ပါ၊ ရေတိုက်ပေးပါ။ ရေဓာတ်ပြည့်ဝနေအောင် သေချာလေး ဂရုစိုက်ပေးပါ။ အစိုဓာတ်ထိန်းစက်လေး ဖွင့်ပေးပါ – ဝက်သက်ကြောင့် လည်ချောင်းနာတာမျိုး ဖြစ်နိုင်တဲ့အတွက် လည်ချောင်းနာတာကို သက်သာစေဖို့ အခန်းထဲမှာ အစိုဓာတ်ထိန်းစက်လေး ဖွင့်ပေးထားပါ။ မျက်လုံးလေးတွေကို အနားပေးပါ – ကလေးရဲ့ မျက်လုံးတွေက အလင်းဒဏ်ကို မခံနိုင်ဘဲ ကျိန်းစပ်နေတာမျိုးတွေ ဖြစ်နိုင်ပါတယ်။ ဒါကြောင့် အခန်းမီးကို ခပ်မှိန်မှိန်လေးပဲ ထွန်းပေးပါ။ ကလေးရဲ့ မျက်လုံးလေးတွေကို အနားပေးနိုင်အောင် ကူညီပေးပါ။ နိဂုံးချုပ်အနေနဲ့ ပြောချင်တာကတော့ ဒီလိုမျိုး ကြောက်စရာကောင်းတဲ့ ဝက်သက်ရောဂါကို အကောင်းဆုံး ကာကွယ်ပေးနိုင်မယ့် နည်းလမ်းက ကာကွယ်ဆေးထိုးနှံတာ ဖြစ်တာကြောင့် မိမိတို့ရဲ့ ရင်သွေးလေးကို ဝက်သက်ကာကွယ်ဆေး မပျက်မကွက် ထိုးနှံပေးကြဖို့ ပြောပါရစေ။ ကာကွယ်ဆေးကြောင့် ဆိုးရွားတဲ့ ထိခိုက်မှု မရှိနိုင်ပါဘူးနော်။ ကာကွယ်ဆေးမထိုးရင်သာ ထိခိုက်မှု ဖြစ်လာနိုင်တာပါ။ ကာကွယ်ဆေးထိုးမယ်ဆိုရင် လက်ရှိ ဝက်သက်ရောဂါဖြစ်ပွားမှု မြင့်မားနေတဲ့ ရန်ကုန်မြို့ ၇ မြို့နယ်မှာ ဝက်သက်ကာကွယ်ဆေး ထိုးနှံပေးနေပါတယ်။ ဖေဖော်ဝါရီလ ၁၇ ရက်နေ့ကနေ ၂၈ ရက်နေ့အထိ မနက် ၈ နာရီကနေ ၄ နာရီအထိ သွားရောက်ထိုးနှံနိုင်ပါတယ်။ အသက် ၉ လကနေ ၁၅ နှစ်အတွင်း ကလေးလူငယ်တွေအားလုံး ထိုးဖူးသည်ဖြစ်စေ မထိုးဖူးသည်ဖြစ်စေ အခမဲ့ သွားရောက်ထိုးနိုင်ပါတယ်။ နဂိုထိုးပြီးသားလား မထိုးရသေးလား မသေချာလည်း ထိုးလို့ရပါတယ်။ ထိုးပြီးသား ဆက်ထိုးလို့ ဘာမှ ပြဿနာ မရှိနိုင်ပါဘူး။ ထိုးနှံနိုင်တဲ့ နေရာတွေကတော့
  • လှိုင်သာယာ
  • အင်းစိန်
  • မင်္ဂလာဒုံ
  • ရွှေပြည်သာ
  • ဒဂုံမြို့သစ် (တောင်ပိုင်း၊ အရှေ့ပိုင်း)
  • ဒဂုံဆိပ်ကမ်းမြို့နယ် စုရပ်တွေမှာ ထိုးနှံပေးမှာပါ။ နေရာအတိအကျကို ရပ်ကွက်အုပ်ချုပ်ရေးမှူးရုံးနဲ့ ကျန်းမာရေးဝန်ထမ်းတွေကို မေးမြန်းနိုင်ပါတယ်။
ကာကွယ်ဆေးထိုးပြီးရင် ဘာတွေဖြစ်နိုင်မလဲ။
  • ထိုးထားတဲ့နေရာမှာ ရောင်ရမ်းနေတာ
  • အဖျားအနည်းငယ်တက်တာ
  • ချမ်းတုန်တာ
  • ခေါင်းကိုက်တာ
  • ကြွက်သားနဲ့ အဆစ်အမြစ်တွေနာတာ
ဒါတွေက ကာကွယ်ဆေးထိုးတာကြောင့်ဖြစ်တဲ့ နောက်ဆက်တွဲ အပျော့စားဆိုးကျိုးတွေ ဖြစ်ပါတယ်။ ရေရှည်မှာ ဘေးထွက်ဆိုးကျိုး မရှိပါဘူး။ ပြဿနာကြီးကြီးမားမား မရှိတတ်ပါဘူး။ ကာကွယ်ဆေး မဖြစ်မနေထိုးပါ။ ကိုယ့်ပေါ့ဆမှုနဲ့ ယုံလွယ်မှုကြောင့် တန်ဖိုးရှိတဲ့ အသက်တွေ မဆုံးရှုံးပါစေနဲ့။      ။ ရေးသားသူ ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win ဤဆောင်းပါးကို DVB ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ကူးယူဖော်ပြပါသည်။
3 years Ago
Up