ဝက်တုပ်ကွေး

June 29, 2019

အာဖရိကဝက်တုပ်ကွေး သတိထားရမည့်အခြေအနေရှိ၊ စနစ်တကျပညာပေးရန် အတိုင်ပင်ခံ တိုက်တွန်း

အာဖရိက ဝက်တုပ်ကွေးရောဂါဟာ သတိထားရမယ့် အခြေအနေမှာ ရှိနေတာကြောင့် ၀န်ကြီးဌာနနဲ့ တိုင်းဒေသကြီးအစိုးရက တောင်သူလယ်သမားတွေကို စနစ်တကျ ပညာပေးဖို့နဲ့ နိုင်ငံဖြတ်ကျော် ကူးစက်မှုမဖြစ်အောင် ကြိုတင်သတိပေးချက်တွေ မြန်မြန်ဆန်ဆန်  ထုတ်ပေးဖို့ နိုင်ငံတော်အတိုင်ပင်ခံပုဂ္ဂိုလ်က တိုက်တွန်းလိုက်ပါတယ်။ ဇွန် ၂၈ ရက်နေ့ ဓနုဖြူမြို့နယ်မှာ ပြုလုပ်တဲ့ တောင်သူလယ်သမားတွေနဲ့တွေ့ဆုံပွဲမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားလိုက်ပါတယ်။ “မွေးမြူရေးနဲ့ ပတ်သက်ရင် အာဖရိက ဝက်တုပ်ကွေးရောဂါ (Africa Swine Flu)ကို သတိထားရဖို့ အခြေအနေမှာ ရှိနေပါတယ်။ အာဆီယံနိုင်ငံအချို့မှာ ဒီကပ်ဘေးဟာ ထိခိုက်မှု အလွန်ပဲ ကျယ်ပြန့်နေပါတယ်။ ကျမတို့ရဲ့ တောင်သူလယ်သမားကြီးတွေ အနေနဲ့လည်း ဝက်မွေးမြူရေးကို အများအပြား လုပ်နေကြတော့ ဒီကိစ္စအပေါ်မှာ အထူးသတိထားပြီး ကာကွယ်မှုတွေ ကြိုတင်လုပ်ဆောင်ထားဖို့ အရေးကြီးပါတယ်။ ဝန်ကြီးဌာနနဲ့ တိုင်းဒေသကြီး အစိုးရကလည်း ကျွန်မတို့ရဲ့ တောင်သူလယ်သမားကြီးတွေကို စနစ်တကျ ပညာပေးဖို့နဲ့ လိုအပ်တာတွေ ပြင်ဆင်ဆောင်ရွက်ထားဖို့ အရေးကြီးတဲ့အတွက် အထူးမှာကြားလိုပါတယ်။ ဒီလိုမျိုးနိုင်ငံဖြတ်ကျော်ပြီး ကူးစက်မှုတွေ မဖြစ်အောင် ကြိုတင်သတိပေးချက်တွေ မြန်မြန်ဆန်ဆန် ထုတ်ပေးဖို့၊ သတိပြုသင့်တဲ့ အခြေအနေတွေကို မျှဝေပေးဖို့ လိုအပ်ပါတယ်။ စိုက်ပျိုးရေးကဏ္ဍတွေမှာ ဓာတုဆေးဝါးတွေ အလွန်အကျွံမသုံးစွဲကြဖို့လည်း အတိုင်ပင်ခံက ပြောပါတယ်။ “မလိုအပ်ဘဲ ဓာတုဆေးဝါးတွေ အလွန်အကျွံသုံးစွဲရင် ကျွန်မနိုင်ငံက လယ်ယာ ထွက်ကုန်တွေဟာ ပြည်တွင်း၊ ပြည်ပဈေးကွက်မှာနာမည် ဂုဏ်သတင်းထိခိုက်စေမှာ ဖြစ်ပါတယ်။ ကုန်သွယ်မှုမှာပဲ ဖြစ်ဖြစ်၊ စီးပွားရေးလုပ်ငန်းတွေကို လုပ်ကိုင်ရာမှာပဲ ဖြစ်ဖြစ် ယုံကြည်မှုနဲ့ စိတ်ချနိုင်မှုက အထူးပဲ အရေးကြီးပါတယ်။ ယုံကြည်မှု ပျက်စီးသွားပြီ၊ စိတ်ချ နိုင်မှုမရှိတော့ဘူးဆိုရင် ပျက်စီးသွားတဲ့ နာမည်၊ ဂုဏ်သတင်းကို ပြန်ပြီး တည်ဆောက်ရတာ အင်မတန်ခက်ခဲပါတယ်။ ကျမတို့ စားသုံးသူတွေရဲ့ မျှော်မှန်းချက်၊ စားသုံးသူ တွေရဲ့ ကျန်းမာရေးကိုလည်း ထုတ်လုပ်သူဖြစ်တဲ့ ကျမတို့ရဲ့ တောင်သူလယ်သမားကြီး တွေက တာဝန်ယူ၊ တာဝန်ခံပေးဖို့ လိုအပ်ပါတယ်။” ကျေးလက်ဒေသ တောင်သူလယ်သမားအများစုဟာ စိုက်ပျိုးရေးနဲ့ မွေးမြူရေးကို ဒွန်တွဲပြီး လုပ်ဆောင်နေကြတာကြောင့် ကျေးလက်တောင်သူတွေ စုပေါင်းလုပ်ဆောင်နိုင်မယ့် ၂၁ ရာစုနဲ့ ကိုက်ညီတဲ့ သမ၀ါယမစနစ်ကို စနစ်တကျ လုပ်ဆောင်သွားရမယ်လို့ ဆိုပါတယ်။ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုနဲ့ ဓနုဖြူမြို့နယ်  တောင်သူလယ်သမားတွေ တွေ့ဆုံပွဲမှာ ဆန်စပါးလုပ်ငန်းရှင်တွေ၊ တောင်သူလယ်သမားတွေ ထောင်ချီ တက်ရောက်ခဲ့ကြပါတယ်။ တရုတ်နိုင်ငံရှိ ပြည်နယ်အနှံ့မှာ အာဖရိက ဝက်တုပ်ကွေးရောဂါ (Africa Swine Flu) ကြောင့် ၀က်အကောင်ရေ ၁ သန်းကျော် ဖျက်ဆီးခဲ့ရပါတယ်။
2 years Ago

June 22, 2019

ဝက်တုပ်ကွေးအကြောင်း သင် ဘာတွေမေးမလဲ

ဝက်တုပ်ကွေးဆိုတဲ့ H1N1 အကြောင်း ကြားတာနဲ့ လူတိုင်းကြောက်ကြမှာပါပဲ။ ဒါပေမယ့် ကြောက်နေတာနဲ့ပဲ မပြီးပါဘူးနော်။ ငါတော့ ဝက်သားမစားဘူးဆိုတော့ မကူးနိုင်လောက်ဘူးဆိုတာတွေ၊ ကပ်ဘေးမသင့်အောင် ဟိုယတြာလေးချေ ဒီယတြာလေးချေ ဆိုတာတွေ တွေးနေမယ့်အစား ရောဂါအကြောင်းကို ဗဟုသုတလေ့လာပါ၊ ဖတ်ပါ၊ မှတ်ပါနော်။ ဒါမှ ရောဂါကို ကြောက်နည်းမှန်ပါတယ်။
ရောဂါကိုကြောက်ပြီးလေ့လာမှ မကူးစက်ခံရအောင် ဆောင်ရန်ရှောင်ရန်တွေကို ကြိုသိထားပြီး ကိုယ့်ကိုယ်ကိုယ်ရော မိသားစုနဲ့ချစ်သူခင်သူတွေကိုပါ ကာကွယ်စောင့်ရှောက်နိုင်မှာပါ။ ကဲ..ဝက်တုပ်ကွေးလို့ပြောလိုက်တာနဲ့ သင်ဘာတွေ မေးချင်နေမလဲ။ Hello ဆရာဝန်က အကြားအမြင်နဲ့ ကြိုတွေးပြီး ဖြေပေးလိုက်ပါမယ်နော်။

မေး- ဝက်သားစားတဲ့လူပဲ ကူးမှာလား

ဖြေ – ဝက်တုပ်ကွေးဗိုင်းရပ်စ်က သန္ဓေပြောင်းပြီး လူတွေကိုကူးစက်တယ်၊ လူကနေလူကို ပြန့်ပွားတယ်။ ပြောရရင် ဝက်တွေနဲ့ တိုက်ရိုက်ထိတွေ့မှုရှိတဲ့သူတွေကို ကူးစက်ရာက အစပြုခဲ့တာဖြစ်ပေမယ့် နောက်ပိုင်းမှာ လူကနေလူကိုပဲ တဆင့်တဆင့် ကူးစက်ပြန့်ပွားစေတာမို့ ဝက်သားစားစား၊ မစားစား သက်သတ်လွတ်သမားတောင် ကူးစက်ခံရနိုင်ပါတယ်။

မေး – ဝက်သားပါသမျှ အကုန်ရှောင်ရမှာလား

ဝက်တုပ်ကွေးက အစားအစာကနေကူးတာမဟုတ်ပါဘူး။ ရောဂါရှိနေတဲ့သူရဲ့ ချောင်းဆိုး၊ နှာချေလိုက်တဲ့ လေထုတွင်းအမှုန်တွေကတဆင့် ပုံမှန်တုပ်ကွေးရောဂါလိုပဲ ကူးစက်ပြန့်ပွားတာပါ။ ဝက်သားကို ကိုင်တွယ်၊ ပြင်ဆင်ချက်ပြုတ်နည်းမှန်ကန်နေသရွေ့ ဘေးကင်းပါတယ်။ အပူချိန် ၁၆၀ ဒီဂရီဖာရင်ဟိုက်မှာ ဗိုင်းရပ်စ်တွေအကုန်သေနိုင်ပါတယ်။ ဒါပေမယ့် ရောဂါရှိလို့သေတဲ့ဝက်ရဲ့အသားဆိုရင်တော့  swine flu ဗိုင်းရပ်စ်မကူးနိုင်ပေမယ့် တခြားရောဂါပိုးတွေအများကြီးပါလာနိုင်လို့ သတိထားရမှာတော့ဖြစ်ပါတယ်။ ဝက်သားစားမယ်ဆို အရည်အသွေးနဲ့လတ်ဆတ်မှု၊ ရောဂါကင်းမှုကို ထည့်စဉ်းစားပါ။

မေး – ဒါဆို လူလူချင်း ဘယ်လိုနည်းနဲ့ ကူးစက်နိုင်လဲ

ရောဂါရှိနေသူက ချောင်းဆိုး၊ နှာချေလိုက်တဲ့အခါ လေထုထဲရောက်လာတဲ့အမှုန်တွေကနေ ကူးတာပါ။ တုပ်ကွေးဗိုင်းရပ်စ်ပါတဲ့လေတွေကို ရှူရှိုက်မိတဲ့အခါ ဒါမှမဟုတ် ဗိုင်းရပ်စ်ကပ်ငြိကျန်နေတဲ့ မျက်နှာပြင်တစ်ခုခုဆီကနေ မျက်လုံး၊နှာခေါင်းနဲ့ ပါးစပ် စတာတွေဆီကို ကူးစက်ရရှိနိင်ပါတယ်။

မေး – စားပွဲ၊ကြမ်းပြင်၊နံရံ စတဲ့မျက်နှာပြင်တွေမှာ ပိုးကဘယ်လောက်ကြာကြာအသက်ရှင်နိုင်လဲ

ဖြေ – ဗိုင်းရပ်စ်ပိုးက သက်မဲ့အရာဝတ္ထုတွေမှာ ဒါမှမဟုတ် လက်မှာ ကပ်ငြိရင် မိနစ်ပိုင်းလေးပဲ အသက်ရှင်နိုင်တယ်။ ဒါပေမယ့် ဆက်ပြန့်ပွားဖို့ လုံလောက်တဲ့အချိန်အတိုင်းအတာဖြစ်နေတယ်။ ဥပမာ ကိုယ့်ရုံးခန်းထဲက တစ်ယောက်ယောက်နှာချေလိုက်တယ်၊ချောင်းဆိုးလိုက်တယ်ဆိုပါစို့။ စားပွဲ သို့မဟုတ် မျက်နှာပြင်တနေရာရာမှာ နှာရည် သို့မဟုတ် တံတွေးတွေစင်မယ်၊ ဒါကိုထိတွေ့မိရာက လွယ်လွယ်ကူးစက်နိုင်ပါတယ်။ လက်ဆွဲနှုတ်ဆက်ရာကနေလည်း ကိုယ့်လက်ကို ရောဂါပိုးရရှိနိုင်တယ်၊ ကိုယ့်မျက်လုံးပွတ်မိမယ်ဆိုရင် ပြီးပြီပဲ။ အကောင်းဆုံးက လက်ဆေးပါ။

မေး – ပုံမှန်တုပ်ကွေးနဲ့ လက္ခဏာ တူတူပဲလား

ဖြေ – အများအားဖြင့်ဆင်တူပါတယ်။ ဝက်တုပ်ကွေးကတော့ အသက်ရှူလမ်းကြောင်းလက္ခဏာတွေအပြင် ဝမ်းလျှောတာနဲ့ ပျို့အန်တာတွေ ပါဖြစ်နိုင်ပါတယ်။ H1N1 ဝက်တုပ်ကွေးက ရိုးရိုးရာသီတုပ်ကွေးထက် အဆုတ်ထဲကို ပိုနက်ရှိုင်းစွာကူးစက်ရောက်ရှိနိုင်ပါတယ်။ ဝက်တုပ်ကွေးလက္ခဏာတွေက –
  • ချမ်းတုန်ခြင်း
  • ချောင်းဆိုးခြင်း
  • မောပန်းအားကုန်ခြင်း
  • ဝမ်းလျှောခြင်း
  • ဖျားခြင်း
  • ခေါင်းကိုက်ခြင်းနဲ့ ခန္ဓာကိုယ်နာကျင်ကိုက်ခဲခြင်း
  • လည်ချောင်းနာခြင်း
  • နှာစေးနှာပိတ်ခြင်း တို့ဖြစ်ပါတယ်။

မေး – ဝက်တုပ်ကွေးဖြစ်နေပြီလို့ ဘယ်လိုသိနိုင်မလဲ

H1N1 ဗိုင်းရပ်စ်က တခြားအသက်ရှူလမ်းကြောင်းဗိုင်းရပ်စ်တွေနဲ့ လက္ခဏာဆင်တူပေမယ့် သူကပိုပြင်းထန်ပြီး ရောဂါအစပျိုးချိန်ကလည်း ရုတ်တရက်ကြီးဖြစ်ပါတယ်။ အအေးမိတုပ်ကွေးတွေက နှာချေလိုက်၊နှာရည်ကျလိုက်နဲ့ အရှိန်ယူပြီး ရက်ပိုင်းအတွင်း တဖြည်းဖြည်းချင်းစလာပေမယ့် သူကတော့ နုံးချိခြင်း၊ အဖျားတက်ခြင်း၊ ကြွက်သားနာကျင်ကိုက်ခဲခြင်းစတဲ့ အပြင်းစားလက္ခဏာတွေနဲ့ တစ်စုတည်းပေါ်လာတတ်ပါတယ်။

မေး – ကူးစက်ခံရတာနဲ့ သေမှာလား

ဖြေ-  ကိုယ်ခံအားကောင်းတဲ့သူတွေ မှာ ကုသမှုခံယူပြီး သက်သာသွားသူတွေရှိပေမယ့် ပြင်းထန်ရင်တော့ အသက်ဆုံးရှုံးနိုင်ပါတယ်။ ကုသတဲ့အခါ ဗိုင်းရပ်ဆန့်ကျင်ဆေး oseltamivir (Tamiflu) and zanamivirကို အကြံပေးထောက်ခံထားပါတယ်။ ရောဂါပိုးက ဆေးယဉ်သွားနိုင်တဲ့ အကြောင်းပြချက်ကြောင့် တုပ်ကွေးနောက်ဆက်တွဲတွေရနိုင်ချေများသူတွေမှာပဲ သုံးလေ့ရှိပါတယ်။ ကျန်းမာရေးကောင်းတဲ့လူအနေနဲ့တော့ ၀က်တုပ်ကွေးကူးခဲ့ရင်တော့ ခုခံအားနဲ့ပြန်တိုက်နိုင်မှာဖြစ်ပါတယ်။

မေး – ဘယ်လိုကာကွယ်မလဲ

ဖြေ – ဝက်တုပ်ကွေးကူးစက်ပြန့်ပွားမှုကို ကာကွယ်ဖို့ အကောင်းဆုံး ကျန်းမာရေးအကြံပြုချက်တွေကတော့ –
  • နေမကောင်းဖြစ်ရင် အိမ်မှာပဲနေပါ။ နေမကောင်းဖြစ်တဲ့အခါ ၂၄ နာရီအတွင်းတော့ အိမ်မှာပဲနားနေပြီး တခြားသူကိုမကူးအောင် ဂရုစိုက်ပါ။
  • လက်မကြာခဏဆေးပါ။ ရောဂါပိုးတွေရန်က ကာကွယ်နိုင်ဖို့အလွယ်ဆုံးနည်းလမ်းပါ။ ဆပ်ပြာနဲ့ဆေးပါ ဒါမှမဟုတ်ရင် လက်သန့်ဆေးရည်သုံးပါ။ကြမ်းပြင်၊ မျက်နှာပြင်နဲ့ အသုံးအဆောင်တွေမှာ ရောဂါရှိသူဆီက နှာချေ ချောင်းဆိုးရာကနေထွက်လာတဲ့ ဗိုင်းရပ်စ်တွေကပ်နေနိုင်တယ်။
  • နှာချေချောင်းဆိုးတာ ထိန်းပါ။ နှာချေချောင်းဆိုးတိုင်း အဝတ်နဲ့အုပ်ဆိုးတဲ့အကျင့်ကိုလုပ်ပါ။ နှာခေါင်းစည်းသုံးလည်းရပါတယ်။ လုံးဝလက်မအားရင် တံတောင်ဆစ်နဲ့ပဲဖြစ်ဖြစ် ကာပြီးဆိုးပါ။
  • သုံးပြီးသားတစ်ရှူးတွေ သေချာစွန့်ပစ်ပါ။ 
  • လူများလွန်းတဲ့နေရာတွေ မလိုအပ်ဘဲမသွားပါနဲ့။ ကိုယ့်မှာကိုယ်ခံအားနည်းနေတဲ့အခါမျိုးဆို ကူးစက်ခံရလွယ်နိုင်ပါတယ်။ အသက် ၅ နှစ်အောက်ကလေးတွေ၊ ၆၅ နှစ်အထက် သက်ကြီးပိုင်းတွေ၊ နာတာရှည်မကျန်းမာသူတွေ၊ ကိုယ်ဝန်ဆောင်တွေ၊ ပန်းနာရင်ကျပ်၊နှလုံးတို့လို ရောဂါရှိသူတွေဟာ ဘယ်တုပ်ကွေးကိုမဆို ကူးစက်ခံရလွယ်တဲ့သူတွေဖြစ်လို့ ပိုသတိထားသင့်ပါတယ်။
ရေးသားသူ Yun Sandi Nan Mon ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win ဤဆောင်းပါးကို DVB ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ကူးယူဖော်ပြပါသည်။
2 years Ago
More News
Up