ရန်ကုန်တိုင်း၊ လှိုင်သာယာအရှေ့ပိုင်းမြို့နယ်၊ ၆ ရပ်ကွက်မှာ မတ်လ ၁၉ ရက် နေ့လယ်ပိုင်းက သမီးဖြစ်သူကို လိုက်လံနှောင့်ယှက်တဲ့အမျိုးသားတယောက်အား ဖခင်ဖြစ်သူက ဓားနဲ့ခုတ်သတ်ခဲ့တယ်လို့ ရပ်ကွက်နေသူတွေဆီက သိရပါတယ်။
မနေ့ နေလယ် ၁ နာရီခွဲက ၆ ရပ်ကွက်၊ ဖွံ့ဖြိုးအောင်အိမ်ရာ အဆောင်တစ်ခုမှာ နေတဲ့ အိမ်ထောင်ရှိ အမျိုးသား တယောက်က သမီးဖြစ်သူကို လိုက်လံနှောင့်ယှက်တဲ့အတွက် ဖခင် ဖြစ်သူက ဓားနဲ့ခုတ်သတ်ခဲ့တာလို့ ရပ်ကွက်နေသူ တဦးက ပြောပါတယ်။
"ဓားနဲ့အခုတ်ခံရတာက ရန်နိုင်စိုး။ အိမ်ထောင် ရှိတယ်။ ကျော်မင်းဌေးရဲ့ သမီးကို သွားစတယ်။ ရိသလို ပတ်သလို ပြောတယ်။ အဲဒီလို မလုပ်ဖို့ အဖေဖြစ်သူက လာပြောရင်း စကားများတာကနေ လူသတ်မှုအထိ ဖြစ်သွားတာ။”
သမီးဖြစ်သူကို နောက်နောင်မနှောင့်ယှက်ဖို့ လာပြောချိန် နားမထောင်တဲ့အပြင် ရန်စကားပြောတဲ့ အတွက် ရန်နိုင်စိုးကို ဦးကျော်မင်းဌေးက ဓားနဲ့ခုတ်ခဲ့ရာ ပြတ်ရှဒဏ်ရာ ၇ ချက်နဲ့ သေဆုံးခဲ့တာ ဖြစ်တယ်လို့ သိရပါတယ်။
အုပ်ချုပ်ရေးနဲ့နီးစပ်သူတစ်ဦးက "ဓားနဲ့အခုတ်ခံရသူက ပွဲချင်းပြီးသေတယ်။ ခုတ်တဲ့သူကိုလည်း ရေဥက္ကံဘက်မှာ မိတယ်"လို့ ပြောပါတယ်။
လူသတ်မှုနဲ့ပတ်သက်ပြီး ပြစ်မှုကျူးလွန်သူ ဦးကျော်မင်းဌေးကို လှိုင်သာယာအရှေပိုင်း မြို့မရဲစခန်းက (ပ)၄၅၃/၂၀၂၃၊ ပုဒ်မ-၃၀၂ နဲ့ အမှုဖွင့်စစ်ဆေးနေတယ်လို့ ရဲတပ်ဖွဲ့ထံက သိရပါတယ်။
ရန်ကုန်တိုင်း၊ လှိုင်သာယာမြို့နယ်၊ ရွှေလင်ပန်းစက်မှုဇုန်၊ တပင်ရွှေထီးလမ်းမကြီးပေါ်မှာ မတ်လ ၉ ရက် မနေ့ ည ၉ နာရီခွဲလောက်က တွဲကားနဲ့ ဖောကား(မြေသယ်ယာဉ်) နှစ်စီး တိုက်မိခဲ့ပြီး လူ ၁ ဦး သေဆုံးကာ ၇ ဦး ထိခိုက်ဒဏ်ရာရခဲ့တယ်လို့ ကယ်ဆယ်ရေးအဖွဲ့ကနေ သိရပါတယ်။
တပင်ရွှေထီးလမ်းမကြီး၊ မော်ဒန်ကေတီဗွီအနီးမှာ မတော်တဆယာဉ်တိုက်မှုဖြစ်ခဲ့ပြီး ဖောကားနောက်ခန်းမှာ လိုက်ပါလာတဲ့ အမျိုးသားတဦး သေဆုံးခဲ့တာလို့ ဆိုပါတယ်။
ကရုဏာတွဲလက် ကယ်ဆယ်ရေးအသင်း တာဝန်ခံက “ဘယ်လိုတိုက်လဲတော့မသိဘူး၊ တွဲကားခေါင်းဘက်ခြမ်းနဲ့ ဖောကားနောက်ပိုင်းကို တိုက်မိထားတာ၊ ဖောကားပေါ်မှာ အလုပ်သမားတွေပါတယ်၊ ကိုယ်ဝန်ဆောင်တယောက်လည်းပါတော့ အကြောင်းကြားတာနဲ့ အမြန်သွားရောက်ကူညီခဲ့ပါတယ်။ ဒဏ်ရာရရှိတဲ့သူတွေက စိုးရိမ်စရာ မရှိတော့ပါဘူး”လို့ ပြောပါတယ်။
ယာဉ်တိုက်မှုကြောင့် ထိခိုက်ဒဏ်ရာရရှိသူတွေကို လှိုင်သာယာဆေးရုံကြီး အရေးပေါ်ဌာန ပို့ဆောင်ပေးခဲ့ပြီး ဆေးရုံအရောက်မှာ တဦးသေဆုံးခဲ့တာလို့ ဆိုပါတယ်။
ယာဉ်တိုက်မှုကြောင့် သေဆုံးသူ ကိုကျော်နိုင် (အသက် ၄၀ နှစ်) ကို လှိုင်သာယာဆေးရုံကြီး ရင်ခွဲရုံ ပို့ဆောင်ထားပါတယ်။
