လွိုင်ကော်အကျဉ်းထောင်

October 14, 2022

လွိုင်ကော်အကျဉ်းထောင်တွင် နိုင်ငံရေးအကျဉ်းသား ၁ ဦး ဆေးကုသခွင့်မရသဖြင့် သေဆုံး

ကရင်နီ(ကယား)ပြည်နယ်၊ လွိုင်ကော်အကျဉ်းထောင်မှာ အကြမ်းဖက်မှုတိုက်ဖျက်ရေးဥပဒေ ပုဒ်မ ၅၂ နဲ့ ဖမ်းဆီးထောင်ချခံရတဲ့ အသက် ၂၁ နှစ်အရွယ် မောင်ငယ်ဟာ လုံလောက်တဲ့ ကျန်းမာရေး ဆေးကုသခွင့် မရတဲ့အတွက် ထောင်တွင်းမှာ သေဆုံးသွားပါတယ်။

မနေ့ အောက်တိုဘာ ၁၃ ရက်က သေဆုံးခဲ့တာဖြစ်ပေမဲ့ ဒီနေ့အထိ အလောင်းပြန်မရသေးဘူးလို့ တိုးတက်သော ကရင်နီပြည်သူအင်အားစု (PKPF) ပြောခွင့်ရသူက ပြောပါတယ်။

“သူက ပြီးခဲ့တဲ့နှစ်ကတည်းက အဖမ်းခံရတယ်ပြောတယ်။ PDF တပ်ဖွဲ့ ဖွဲ့တဲ့ထဲမှာ သူပါပြီးတော့ လွိုင်ကော်စစ်ဆေးရေးဂိတ် တနေရာမှာ ဖုန်းထဲမှာ စစ်ဆေးလိုက်တော့ PDF ပုံတွေတွေ့တော့ စစ်သားက သူ့ကိုဖမ်းပြီး ပုဒ်မ ၅၂ နဲ့ တရားကောက်စွဲလိုက်တယ် ပြောတယ်။ နောက်ပြီး ထောင် ၅ နှစ်ကျခံရတယ် ပြောတယ်။ ထောင် ၅ နှစ်ကျပြီးတော့ ပြီးခဲ့တဲ့ မနေ့ညကပဲ ရောဂါတခုနဲ့ ထောင်ထဲမှာ ဆုံးသွားတာပေါ့နော်။”

မောင်ငယ်ဟာ အရင်ကတည်းက အဆုတ်ရောဂါအခံရှိသူဖြစ်ပြီး အကျဉ်းထောင်ထဲမှာ လုံလောက်တဲ့ ဆေးကုသမှု မရရှိတဲ့အတွက် သေဆုံးရတာဖြစ်တယ်လို့ သူ့မိသားစုဝင်တွေက ပြောတယ်လို့ ဆိုပါတယ်။

“သူ့အစ်ကိုဝမ်းကွဲတို့ ဦးလေးတို့ ပြောတဲ့ ပုံစံအရ သူ အရင်ကတည်းက အဆုတ်တီဘီလားမသိ ရောဂါအခံတော့ ရှိတယ်။ ဒါပေမဲ့ သိထားသလောက် ထောင်ထဲကလည်း ဒီကျန်းမာရေးနဲ့ ပတ်သက်ပြီး ဆေးဝါးကုသမှုတွေ လုံလုံလောက်လောက် သေသေချာချာ မလုပ်ခဲ့တော့ ဆုံးသွားတဲ့ အခြေအနေထိ ဖြစ်သွားတယ်ဆိုတဲ့ဟာမျိုး ဖြစ်သွားတယ်လို့ ကျနော်တို့က သိရတယ်။ သူ့ရဲ့အသုဘမှာ ကျနော် သွားပြီး သိသလောက်ပေါ့။”

မောင်ငယ်ဟာ ပြီးခဲ့တဲ့ ၂၀၂၁ ခုနှစ်အတွင်း လွိုင်ကော်မြို့ စစ်ဆေးရေးဂိတ်မှာ စစ်ဆေးခံရပြီး PDF နဲ့ ဆက်နွယ်မှုရှိတယ်ဆိုတဲ့ စွပ်စွဲချက်နဲ့ စစ်ကောင်စီက ဖမ်းဆီးခဲ့တာဖြစ်ပါတယ်။

အာဏာသိမ်းပြီးနောက် ကရင်နီ(ကယား)ပြည်နယ်မှာ  စစ်အာဏာရှင်ဆန့်ကျင်ရေး လှုပ်ရှားမှုအပြင် PDF နဲ့ ဆက်နွှယ်မှုရှိတယ်ဆိုတဲ့ စွပ်စွဲချက်နဲ့ စစ်ကောင်စီရဲ့ ဖမ်းဆီးခံရပြီးနောက် ရဲအချုပ်၊ စစ်ကြောရေး၊ အကျဉ်းထောင်တွေထဲမှာ နိုင်ငံရေးပုဒ်မနဲ့ ဖမ်းဆီးခံရပြီး သေဆုံးသူ ၇ ယောက်အထိ ရှိလာပြီလို့ PKPF က ထုတ်ပြန်ထားပါတယ်။တိုးတက်သော ကရင်နီပြည်သူ့အင်အားစု (PKPF) ရဲ့ ၂၀၂၂ ခုနှစ် ဇူလိုင် ၉ ရက်နေ့ ထုတ်ပြန်ချက်အရ အာဏာသိမ်းပြီးနောက် နိုင်ငံရေးပုဒ်မအသီးသီးနဲ့ ဖမ်းဆီးခံရပြီး အမိန့်ချခံရသူ အယောက် ၁၄၀ ရှိပြီး တရားရင်ဆိုင်ဆဲ ၁၀၇ ယောက်ရှိကာ အဲဒီထဲမှာ အမျိုးသမီး ၂၈ ယောက် ပါဝင်တယ်လို့ သိရပါတယ်။

4 months Ago

February 12, 2021

လွိုင်ကော်အကျဉ်းထောင်မှ အကျဉ်းသား ၂၂၄ ဦး လွတ်မြောက်

အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင်ရဲ့ ပြစ်ဒဏ်လွတ်ငြိမ်းခွင့် အမိန့်အမှတ် ၅၉/၂၀၂၁၊ ရာဇ၀တ်ကျင့်ထုံးဥပဒေပုဒ်မ-၄၀၁ ပုဒ်မခွဲ (၁) အရ လွိုင်ကော် အကျဉ်းထောင်ကနေ အကျဉ်းသား  ၂၂၄ ဦး လွတ်မြောက်လာပါတယ်။ 

ဒီကနေ့ မနက် ၁၁ နာရီက စလွှတ်ပေးနေတာဖြစ်ပြီး လွတ်မြောက်လာသူတွေထဲမှာ ကယားပြည်နယ်မှ ၁၁၉ ဦး၊ ရှမ်းပြည်နယ် ၇၇ ဦး၊ ရန်ကုန် ၈ ဦး၊ ပဲခူး ၃ ဦး၊ မိတ္ထီလာ ၅ ဦး၊ စစ်ကိုင်း ၅ ဦး၊ ကချင် ၁ ဦး၊ ဧရာ၀တီ ၅ ဦး၊ မကွေး ၁ ဦး၊ စုစုပေါင်း ၂၂၄ ဦး ဖြစ်ပါတယ်။

ပြန်လွတ်လာတဲ့ လူငယ်တဦးက “ကျနော် အားလုံး ၁၆ နှစ်ကျခံပြီးတော့ ၅ နှစ်ကျခံပြီးမှ ပြန်လွတ်လာတာပါ။ မူးယစ်မှုရယ်၊ ဆိုင်ကယ်ခိုးမှုတွေနဲ့ဗျာ။ ပြန်လွတ်လာတဲ့သူ တော်တော်များများကလည်း မူးယစ်မှု များပါတယ်။ ကျန်တဲ့အမှုက နည်းပါတယ်။ ကျန်ခဲ့တဲ့သူအတွက်တော့ ဝမ်းနည်းတယ်ဗျာ။ ဘာလို့လဲဆိုတော့ ကျနော့်သူငယ်ချင်းတွေ ဘော်ဒါတွေ ကျန်ခဲ့တော့ ဝမ်းနည်းတယ်ဗျာ။ ကိုယ် လွတ်တာကတော့ ပျော်ပါတယ်” လို့ ပြောပါတယ်။

ဒီကနေ့ ဖေဖော်ဝါရီ ၁၂ ရက်နေ့မှာ နိုင်ငံတဝန်း အကျဉ်းသူအကျဉ်းသား ၂၃၃၀၀ ကျော် လွှတ်ပေးကြောင်း နိုင်ငံတော်စီမံအုပ်ချုပ်ရေးကောင်စီက ကြေညာပါတယ်။

နော်နိုရင်း

2 years Ago
Up