လျှပ်စစ်ဝန်ထမ်း

November 2, 2021

စလင်းမြို့ Mytel တာဝါတိုင်အနီး လျှပ်စစ်ဝန်ထမ်း ၂ ဦး မိုင်းနင်းမိ၊ ၁ ဦးခြေထောက်ဖြတ်ရ

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့၊ စေတီလှဝင်းထဲ Mytel တာဝါတိုင်မှာရှိတဲ့ လျှပ်စစ်မီတာယူနစ်ဖတ်တဲ့ လျှပ်စစ်ဝန်ထမ်း ၂ ဦး နိုဝင်ဘာ ၂ ရက် မနက် ၈ နာရီလောက်က စစ်ကောင်စီတပ်သားတွေ ထောင်ထားတဲ့ မိုင်းနင်းမိပြီး ၁ ဦးခြေထောက်ဖြတ်ရကာ ဒဏ်ရာပြင်းထန်ကြတယ်လို့ သိရပါတယ်။

လျှပ်စစ်ဝန်ထမ်း ၂ ဦးဟာ ကိုအောင်ဝင်းနဲ့ နေ့စားဝန်ထမ်း ကိုကျော်သူရတို့ ဖြစ်ကြတယ်လို့ သိရပါတယ်။

ဒေသခံတဦးက “ဗုံးကွဲသံကြားရပြီး အကူအညီလှမ်းတောင်းလို့သွားကြည့်တော့ လျှပ်စစ်ဝန်ထမ်းတွေ ဖြစ်နေတယ်။ ဒဏ်ရာပြင်းထန်ကြတယ်။ ကျော်သူရ ဆိုတဲ့ ဝန်ထမ်းလေးက မိုင်းနင်းမိပြီး ကျန်တယောက်ကတော့ မျက်လုံးထိသွားတယ်။ သနားပါတယ်ဗျာ” လို့ ပြောပါတယ်။

မိုင်းနင်းမိတဲ့ ကိုကျော်သူရကိုတော့ မကွေးဆေးရုံ ပို့ဆောင်လိုက်ရပြီး ခြေထောက်ဖြတ်လိုက်ရတယ်လို့ သိရပါတယ်။

ပြီးခဲ့တဲ့လကထဲကလည်း မကွေးတိုင်းအတွင်း မြို့နယ်အချို့က Mytel တာဝါတိုင်အနီး အကြမ်းဖက်စစ်ကောင်စီတပ်သားတွေ ထောင်ထားတဲ့ မိုင်းတွေတက်နင်းမိလို့ လူနဲ့တိရစ္ဆာန်တွေ ထိခိုက်ဒဏ်ရာရရှိမှုတွေ ဖြစ်ခဲ့တယ်လို့ သိရပါတယ်။

4 weeks Ago

March 8, 2021

လျှပ်စစ်ရုံးဝန်ထမ်းများကို ရဲနှင့်စစ်တပ်က အကြမ်းဖက်ရိုက်နှက်ပြီး ကျောပိုးအိတ်နှင့်ဖိနပ်ယူသွား

ရန်ကုန် မင်္ဂလာတောင်ညွန့်မြို့နယ်မှာ သပိတ်ကို ဖြိုခွင်းဖို့လာတဲ့ ရဲနဲ့စစ်တပ်တွေက EPC လျှပ်စစ်ရုံးဝန်ထမ်းတွေကို အကြမ်းဖက်ရိုက်နှက်ပြီး ဝန်ထမ်းတွေရဲ့ ကျောပိုးအိတ်နဲ့ ဖိနပ်ကို ယူသွားခဲ့ပါတယ်။

မတ်လ ၈ ရက် ဒီနေ့ နေ့လယ်ပိုင်းမှာ သိမ်ဖြူလမ်းက သပိတ်ကို ဖြိုခွင်းဖို့လာတဲ့ ရဲတွေဟာ EPC ရုံးထဲကိုဝင်ပြီး ဝန်ထမ်းတွေကို ရိုက်နှက်ခဲ့တာပါ။

“ဝန်ထမ်းတွေက ရုံးရှေ့မှာ ထိုင်နေတယ်။ ရဲတွေရောက်လာတော့ ဆန္ဒပြနေတဲ့ ကလေးတချို့က ရုံးရှေ့လမ်းထဲ ပြေးဝင်တယ်။ ဝန်ထမ်းတွေက ရုံးထဲပြေးဝင်ပြီး တံခါးပိတ်လိုက်တယ်။ အဲဒါ ရဲ အယောက် ၂၀ လောက်က တံခါးကို အတင်းဖွင့်ခိုင်းတယ်။ ဝန်ထမ်းတွေပါလို့ ပြောတာလည်း မရဘူး။ အဲဒါနဲ့ တံခါးဖွင့်ပေးတော့ ဝန်ထမ်းတွေကို ထိုင်ထားခိုင်းပြီး ရိုက်တယ်။ လက်သီးနဲ့ထိုးတယ်။ ခြေထောက်နဲ့ ကန်တယ်” လို့ မျက်မြင်တွေ့သူတယောက်က ပြောပါတယ်။

ဝန်ထမ်းတွေထဲမှာ ယူနီဖောင်းဝတ်ထားသူတွေလည်းပါပြီး လျှပ်စစ်ဝန်ထမ်း ဦးထုပ်အဝါ ဆောင်းထားသူကို ပိုပြီး ရိုက်ခဲ့တယ်လို့ ဆိုပါတယ်။

ရိုက်ခံရသူဝန်ထမ်း ၁၀ ယောက်လောက်ရှိပြီး မြို့နယ်အင်ဂျင်နီယာ ရောက်လာချိန်မှာလည်း ရဲတွေဟာ မချေမငံပြောခဲ့တယ်လို့ ဆိုပါတယ်။ 

“ရဲဝတ်စုံတော့ ဝတ်ထားတာပဲ။ အားလုံးက ရဲမဖြစ်နိုင်ဘူး။ သူတို့က အပေါ်ထပ်က ရုံးခန်းတွေကိုလည်း ကန်ဖွင့်ကြတယ်။ နောက်တော့ မြို့နယ်အင်ဂျင်နီယာနဲ့ ပြောလို့ အဆင်ပြေတယ် ထင်ပါတယ်။ သူတို့မှားတာပါဆိုပြီး ပြန်ထွက်သွားတယ်” လို့ မျက်မြင်က ဆိုပါတယ်။

ရဲတွေဟာ ဝန်ထမ်းတွေရဲ့ ကျောပိုးအိတ်တွေကို ယူစစ်ပြီး ကျောပိုးအိတ် ၂ လုံးကို ယူသွားခဲ့သလို ရုံးရှေ့မှာ နေလှန်းထားတဲ့ ဘွတ်ဖိနပ်တရန်ကိုလည်း ယူသွားခဲ့ပါတယ်။

9 months Ago
Up