လျှပ်စစ်ရုံးဝန်ထမ်းများ

November 10, 2019

ဆိုင်ကယ်စီးဦးထုပ်ဆောင်းပြီး အလုပ်လုပ်နေရသည့် အိန္ဒိယ လျှပ်စစ်ရုံးဝန်ထမ်းများ

ဆိုင်ကယ်စီးဦးထုပ်တွေ ဆောင်းပြီး အလုပ်လုပ်နေတဲ့ လျှပ်စစ်ရုံးတခုက ဝန်ထမ်းတွေအကြောင်းဟာ သတင်းမီဒီယာတွေထက်မှာ အခုတလော ရေပန်းစားလို့နေပါတယ်‌။ ဒီရုံးဟာ အူတရာပရာဒတ်ရှ်ပြည်နယ် ဘန်ဒါမြို့မှာ တည်ရှိပြီး အဲဒီရုံးကိုသွားရင် ရုံးဝန်ထမ်းတိုင်းဟာ ဆိုင်ကယ်စီး ဦးထုပ်ဆောင်းပြီး အလုပ်လုပ်နေတာကို မြင်တွေ့ရမှာပဲ ဖြစ်ပါတယ်။ ဒီလိုမျိုး အလုပ်ချိန်မှာတောင် ဦးထုပ်ကြီးတွေ ဆောင်းထားလို့ ဒီလူတွေဟာ ဆိုင်ကယ်စီးတာကို အမှန်တကယ် ကြိုက်နှစ်သက်သူတွေလို့ ထင်စရာရှိပါတယ်။ တကယ်တော့ ဒီလို မဟုတ်ပါဘူး။ သူတို့ရုံးရဲ့အမိုးဟာ အချိန်မရွေး ပြိုကျနိုင်လို့ ဒီဝန်ထမ်းတွေဟာ ဦးထုပ်ဆောင်းပြီး အလုပ်လုပ်နေရတာပဲ ဖြစ်ပါတယ်။ ဒီရုံးရဲ့ အမိုးဟာ လုံးဝကို ယိုယွင်းနေပြီး အချိန်မရွေး ပြိုကျနိုင်ပါတယ်။ ဒါကြောင့် အမိုးပြိုကျခဲ့ရင် ထိခိုက်ဒဏ်ရာရရှိမှုနည်းအောင် ဝန်ထမ်းတွေက ဆိုင်ကယ်စီးဦးထုပ် ဆောင်းထားရတာလို့ ANI သတင်းမှာ ဖော်ပြပါတယ်။ ရုံးအခြေအနေနဲ့ပတ်သက်လို့ သက်ဆိုင်ရာ တာဝန်ရှိသူတွေကို ဟိုးအရင်နှစ်တွေကတည်းက အကြောင်းကြားခဲ့ပေမယ့်လည်း အခုချိန်ထိ တစုံတရာ ပြောင်းလဲသွားတာမျိုး မရှိဘူးလို့ ရုံးဝန်ထမ်းတွေက သတင်းထောက်ကို ပြောပါတယ်။ “ကျနော် အလုပ်စဝင်တဲ့ ပြီးခဲ့တဲ့ နှစ်နှစ်ကတည်းက ဒီအတိုင်းပါပဲ။ ဒီအကြောင်းကို အာဏာပိုင်တွေဆီ အကြောင်းကြားခဲ့ပေမယ့် ဘာမှ ပြန်မပြောခဲ့ပါဘူး” လို့ အမည်မဖော်လိုတဲ့ ဝန်ထမ်းတဦးက ပြောပါတယ်။ ANI ရဲ့ သတင်းထုတ်လွှင့်မှုမှာလည်း ဝန်ထမ်းတွေရဲ့ စကားဟာ မှန်ကန်တယ်ဆိုတာ သက်သေပြနေပါတယ်။ ရုံးရဲ့အမိုးဟာ အပေါက်တွေ ပေါက်နေပြီးတော့ အမိုးကို အလယ်ကနေ ထောက်ပေးထားတဲ့ တိုင်ဟာလည်း တဖြည်းဖြည်း အောက်ကို ပိုကျနေပါတယ်။” ဒီရုံးရဲ့အခြေအနေနဲ့ ရုံးဝန်ထမ်းတွေရဲ့ ဒုက္ခကို ANI သတင်းဌာနက အွန်လိုင်းမှာ ရိုက်ကူးမျှဝေခဲ့ပြီး ဒီဗွီဒီယိုဟာ အချိန်တိုအတွင်းမှာပဲ လူမှုကွန်ရက်ပေါ်မှာ ပျံ့နှံ့သွားခဲ့တယ်လို့ သိရပါတယ်။ Ref: OC
2 years Ago
Up