လျှပ်စစ်နှင့်စွမ်းအင်ဝန်ကြီးဌာန

May 18, 2020

မီတာဖတ်စာရေးများ မီတာဖတ်ရာတွင် တိကျမှန်ကန်စေရန် လျှပ်စစ်နှင့်စွမ်းအင်ဝန်ကြီး တိုက်တွန်း 

မီတာဖတ်စာရေးတွေအနေနဲ့ မီတာဖတ်ရာမှာ တိကျမှန်ကန်စနစ်ကျစေဖို့၊ လျှပ်စစ်မီး သုံးစွဲသူတွေရဲ့ အခက်အခဲတွေတိုင်ကြားနိုင်မယ့် ဖုန်းနံပါတ်တွေကို လူသွားလူလာများတဲ့ နေရာတွေမှာ ချိတ်ဆွဲဖို့နဲ့ မီတာဖတ်ဖို့ ခက်ခဲတဲ့နေရာတွေမှာပြည်သူတွေနဲ့ ပူးပေါင်းဖို့ လျှပ်စစ်နဲ့ စွမ်းအင်ဝန်ကြီးက တိုက်တွန်း ပြောပါတယ်။ မေလ ၁၇ ရက်က ပြုလုပ်တဲ့  ၂၀၁၉-၂၀ ဘဏ္ဍာရေးနှစ် လျှပ်စစ်ကဏ္ဍနဲ့ပတ်သက်တဲ့ ဒုတိယသုံးလပတ် လုပ်ငန်းညှိနှိုင်းအစည်းအဝေးမှာ ပြည်ထောင်စုဝန်ကြီး ဦးဝင်းခိုင်က ပြောခဲ့တာဖြစ်ပါတယ်။ ဓာတ်အားခကျသင့်ငွေတွေ ပေးဆောင်ရာမှာ လူစုလူဝေးဖြစ်တာကို အထိုက်အလျောက် လျော့နည်းစေဖို့ မတ်လအတွက် ကျသင့်မီတာခတွေကို ရက်လွန်ကြေး၊ ဒဏ်ကြေးတွေ မပေးဆောင်စေဘဲ မေလ ရက် ၂၀ အထိ ပေးဆောင်နိုင်ဖို့ ဖြေလျှော့ပေးခဲ့သလို လာရောက် ပေးသွင်းရာမှာ အခက်အခဲဖြစ်တာလျော့နည်းစေဖို့အတွက် ရပ်ကွက်တွေထဲမှာ ကောက်ပေးတာ ကိုလည်း လုပ်စေလိုတယ်လို့ ပြောပါတယ်။ မြို့နယ် လျှပ်စစ်အင်ဂျင်နီယာရုံးတွေမှာ သုံးစွဲသူတွေက အခက်အခဲတွေကို ဆက်သွယ် တိုင်ကြားနိုင်တဲ့ ဖုန်းနံပါတ်တွေကို ဗီနိုင်းတွေနဲ့ ချိတ်ဆွဲထားပြီး ရန်ကုန်လျှပ်စစ်ဓာတ်အားပေးရေး ကော်ပိုရေးရှင်း Call Center 1717 နဲ့ မန္တလေးလျှပ်စစ်ဓာတ်အားပေးရေးကော်ပိုရေးရှင်း Call Center 1616 တို့နဲ့ ဖြေရှင်းပေးနေပေမယ့် ပိုပြီး ကျယ်ကျယ်ပြန့်ပြန့်ဆောင်ရွက်နိုင်ဖို့ အများပြည်သူ ဖြတ်သန်းသွားလာနိုင်တဲ့ ကားဂိတ်၊ ဘူတာရုံ၊ သင်္ဘောဆိပ်၊ ဈေးနဲ့ လမ်းဆုံလမ်းခွနေရာတွေမှာ ထပ်မံချိတ်ဆွဲဖို့လည်း ဝန်ကြီးက ပြောပါတယ်။ လျှပ်စစ်ဝန်ကြီးဌာနဟာ ပြည်သူကို ဝန်ဆောင်မှုပေးနေရတဲ့ဌာနဖြစ်သလို ပြည်သူလူထုနဲ့ တိုက်ရိုက်ထိတွေ့ဆက်ဆံပြီး ၂၄ နာရီ အချိန်ပြည့် ဝန်ဆောင်ပေးနေရတဲ့အတွက် ဝန်ဆောင်မှု အပိုင်းမှာ သိသိသာသာ တိုးတက်ကောင်းမွန်လာအောင် ရည်မှန်းချက်ထား ဆောင်ရွက်ဖို့ လည်း ဝန်ကြီးက တိုက်တွန်းပြောတယ်။ အခု ဘဏ္ဍာရေးနှစ်ဟာ အရင်နှစ်တွေနဲ့တူဘဲ လျှပ်စစ်လုပ်ငန်းပိုင်းဆောင်ရွက်နိုင်ဖို့ အဓိကထားသတ်မှတ်ထားတဲ့ ဘဏ္ဍာရေးနှစ်ဖြစ်ပြီး လျှပ်စစ်ကဏ္ဍတဆင့်မြင့် တိုးတက်ဖွံ့ဖြိုးလာစေဖို့ အရေးကြီးတဲ့နှစ်ဖြစ်တယ်လို့ ပြောပါတယ်။ ဓာတ်အား ထုတ်လုပ်မှုအပိုင်းမှာ အခု နွေရာသီကာလအတွက် မဂ္ဂါဝပ် ၁၁၆၆ တိုးတက် ထုတ်လုပ်နိုင်ရေး ရည်မှန်းဆောင်ရွက်ခဲ့ပြီး မကွေး ၆၆ မဂ္ဂါဝပ် ဓာတ်အားပေးစက်ရုံစီမံကိန်းပြီးစီးလို့ ၂၀၁၉ ခုနှစ်၊ ဒီဇင်ဘာမှာ နိုင်ငံတော်ဓာတ်အားစနစ်ကို ချိတ်ဆက်ပြီး ဓာတ်အားပို့လွှတ် ဖြန့်ဖြူးပေးနိုင်ခဲ့တယ်လို့ ဆိုပါတယ်။  ကျန်တဲ့ စီမံကိန်းတွေထဲကလည်း အလုံ ၁၅၁ ဒသမ ၅၄ မဂ္ဂါဝပ် ဓာတ်အားပေးစက်ရုံစီမံကိန်းက ၁၀၀ မဂ္ဂါဝပ်နဲ့ ကျွန်းချောင်း ၂၀ ဒသမ ၅၄ မဂ္ဂါဝပ် ဓာတ်အားပေးစက်ရုံ စီမံကိန်းကနေ ၁၅ မဂ္ဂါဝပ်တို့ကို စတင်ထုတ်လုပ်နေပြီး ကျန်တဲ့ ဓာတ်အားထုတ်လုပ်တာကိုလည်း အဆင့်လိုက်ထုတ်လုပ်သွားနိုင်ရေး ဆောင်ရွက်နေသလို မကြာခင် LNG to Power သာကေတ ၄၀၀ မဂ္ဂါဝပ် ဓာတ်အားပေး စက်ရုံစီမံကိန်းကလည်း လျှပ်စစ်ဓာတ်အားတွေ ထုတ်လုပ်ဖြန့်ဖြူးပေး နိုင်တော့မယ်လို့ ဆိုပါတယ်။ COVID-19 ကပ်ဘေးကာလမှာ ဓာတ်အားသုံးသူတွေ အထိုက်အလျောက်သက်သာစေဖို့ ၂၀၂၀ ပြည့်နှစ်၊ ဧပြီလအတွက် အိမ်သုံးအမျိုးအစား လျှပ်စစ်ဓာတ်အားသုံးစွဲတာကို ယူနစ် ၁၅၀ အထိ အခမဲ့ပေးခဲ့ပြီး မေလအတွက်ကိုလည်း မေ ၁၅ ရက်အထိ အိမ်သုံးအမျိုးအစားတွေအတွက် ၇၅ ယူနစ်အထိ အခမဲ့ ထပ်ပေးခဲ့တယ်လို့ ဆိုပါတယ်။ ဓာတ်ပုံ-MOEE
11 months Ago

May 15, 2020

မီတာဖတ်သူများ အမှားအယွင်းရှိကောင်းရှိနိုင်သည်ဟု  ဒုအမြဲတမ်းအတွင်းဝန်ပြော

ဧပြီလရဲ့ မီတာခနဲ့ပတ်သက်ပြီး  အများပြည်သူတွေအကြား ဝေဖန်မှုတွေမြင့်တက်နေရာမှာ မီတာဖတ်သူတွေမှာလည်း အမှားအယွင်းရှိကောင်းရှိနိုင်တယ်လို့ လျှပ်စစ်နှင့်စွမ်းအင်ဝန်ကြီးဌာန ဒုတိယအမြဲတမ်းအတွင်းဝန် ဦးစိုးမြင့်က ဒီကနေ့ နေပြည်တော် သတင်းစာရှင်းလင်းပွဲမှာ ဝန်ခံပြောကြားလိုက် ပါတယ်။ COVID-19 ရောဂါကပ်ဘေးကာလမှာ ပြည်သူတွေ၊ ဘာသာရေးအဖွဲ့အစည်းတွေနဲ့ ပြည်တွင်းလူမှုရေး အဖွဲ့အစည်းတွေအတွက် အိမ်သုံးလျှပ်စစ်မီးသုံးစွဲမှု ယူနစ် ၁၅၀ အထိကို ဧပြီလမှာ အခဲ့ပေးသွားမှာဖြစ်တယ်လို့ အစိုးရက ကြေညာထားတာဖြစ်ပါတယ်။  မီတာခကျသင့်ငွေတောင်းခံလွှာတွေ ထွက်ပေါ်လာချိန်မှာတော့ ကြေညာထားတဲ့အတိုင်း ယူနစ် ၁၅၀ အောက်သုံးစွဲတဲ့ ပြည်သူတွေက မီတာခ ပေးဆောင်စရာမလိုတော့တာရှိသလို တချို့ကတော့ အရင်လတွေကထက် မီတာခ ပိုမိုကျသင့်နေတယ်ဆိုပြီး  ဝေဖန်မှုတွေ မြင့်တက်နေတာပါ။ ဒါနဲ့ ပတ်သက်လို့ လျှပ်စစ်နဲ့စွမ်းအင်ဝန်ကြီးဌာနက မေလ ၁၅ ရက်က နေပြည်တော်မှာ သတင်းစာရှင်းလင်းပွဲပြုလုပ်ခဲ့ရာမှာ ဒုတိယအမြဲတမ်း အတွင်းဝန်က အစိုးရကို ကန့်လန့်တိုက်လုပ်ဆောင်တာ မဟုတ်ဘူးလို့ ရှင်းလင်း ပြောကြားခဲ့ပါတယ်။ "မီတာဖတ်တဲ့အချိန်မှာ အရင်လက သူလျှော့ဖတ်ခဲ့တယ်။ မှန်းဖတ်ခဲ့တယ်ပေါ့ဗျာ။ ဒါပေမယ့် အဲ့အိမ်ကတော့ ပိုသုံးနေတယ်။ မှန်းမှန်းပြီး ဖတ်ခဲ့တယ်။ ဒီတစ်ကြိမ်ကတော့ ယူနစ် ၁၂၀ ရှိတယ်။ ရာသီဥတုပူတာ၊ မပူတာသူမသိတော့ဘူး။ ၁၂၀လို့မှန်းထည့်တယ်။ တကယ်က ၁၆၀ ယူနစ်လောက်ရှိနေတယ်။ နောက်ဆုံးလ ဒီဧပြီလလည်း ရောက်ရော ပေါင်းထည့်လိုက်တယ်။ ဆိုလိုတာက အဲ့ဒီလကျ အတိအကျဖတ်လိုက်တယ်။ လျှော့ပေးရတော့မယ့် ကာလရောက်တော့ ယူနစ်ကိုအပြည့်အဝဖတ်လိုက်တယ်။ အဲ့လိုဖြစ်နိုင်ပါတယ်လို့ ကျနော် ဝန်ခံပါတယ်" လို့ ဦးစိုးမြင့်က ပြောပါတယ်။ ခုလိုလုပ်ဆောင်တာဟာ ဝန်ကြီးဌာနမှာ မီတာဖတ်သူ လုံလုံလောက်လောက်မရှိတာကြောင့် ဖြစ်ပြီး အခုချိန်မှာတော့ ဝန်ထမ်းတွေ ထပ်မံဖြည့်တင်းနိုင်ဖို့ ဆောင်ရွက်နေပြီလို့ဆိုပါတယ်။ တချိန်တည်းမှာပဲ မီတာကို လူကဖတ်တဲ့ စနစ်ကနေ ဖုန်းကနေ အချိန်မရွေးကြည့်ရှုနိုင်ပြီး အွန်လိုင်းကတဆင့် ကျသင့်ငွေပေးဆောင်နိုင်တဲ့ ဝန်ဆောင်မှုကို ဆောင်ရွက်ဖို့လည်း ဆောင်ရွက်နေပြီလို့ ပြောပါတယ်။ "လူတွေကဖတ်တဲ့စနစ်က ပျောက်သွားပြီးတော့ အချိန်မရွေး ဖုန်းကကြည့်လို့ရတဲ့ စနစ်ဖြစ်လာမယ်။ ဖုန်းကနေ အခွန်ဆောင်လို့ရတဲ့ စနစ်ဖြစ်မယ်။ ကျနော်တို့ သွားဖို့လုပ်နေပါပြီ။ အဖွဲ့အစည်းတွေအသီးသီးကို ဖိတ်ခေါ်ပြီးတော့မှ သူတို့ရဲ့ အကြံပြုချက်တွေယူတယ်။ ကျနော်တို့ရဲ့ လိုလားချက်က ပြည်သူက ကိုယ်ထိလက်ရောက် မလာရအောင် ဝန်ဆောင်မှုပေးနိုင်အောင် လုပ်တာပါ။ ဖတ်ရုံနဲ့မပြီးသေးဘူး။ ဖုန်းနဲ့ ဘေလ်ဆောင်လို့ရတဲ့ စနစ်ကိုပါ ကျနော်တို့ ဆက်လုပ်မယ်။ အခုကျနော်တို့ဘဏ်တွေနဲ့ ဆွေးနွေးနေပြီ။  ပညာရှင်တွေဆီကနေ နည်းပညာတွေကိုကျနော်တို့ ဆွေးနွေးပြီးပြီ။"လို့ ဒုမြဲတမ်းအတွင်းဝန်ဦးစိုးမြင့်က‌ ပြောပါတယ်။ တဖက်မှာ ပြည်သူတွေ အိမ်မှာနေတဲ့အချိန်ပိုများတာကြောင့် လျှပ်စစ်ဓါတ်အားသုံးစွဲမှုက မြင့်တက်ခဲ့ပြီး ဧပြီလအတွင်း တနိုင်ငံလုံးမှာ တနေ့ကို ၃၆၀၀ မဂ္ဂါဝပ်အထိ သုံးစွဲခဲ့ပါတယ်။ ဒါဟာ ဝန်ကြီးဌာနသမိုင်းမှာ အမြင့်ဆုံးစံချိန်ဖြစ်တယ်လို့ သိရပါတယ်။ သတင်း-ဖြိုးသက်ပိုင်မြင့်(နေပြည်တော်) PHOTO-MOEE
11 months Ago
Up