လျော်ကြေး

December 2, 2022

အလုပ်နားခံရသည့် မြန်မာနှင့်ထိုင်း အလုပ်သမား ၁၀၀ ကျော်အတွက် လျော်ကြေး ဘတ် ၁ သန်းကျော်ရ

ထိုင်းနိုင်ငံအလယ်ပိုင်း နခွန်းပထုန်ခရိုင်ရှိ  မြန်မာနဲ့ ထိုင်း အလုပ်သမားပေါင်း ၁၀၀ ကျော်အတွက် အလုပ်ကရပ်နားခံရလို့ အလုပ်ရှင်က လျော်ကြေးငွေ ဘတ် ၁ သန်းကျော်ပေးအပ်ခဲ့ပါတယ်။ 

အဆိုပါစက်ရုံဟာ နခွန်းပထုန်မြို့  လိုက်ခင်ရပ်ကွက်ရှိ NST ဆေးဆိုးပန်းရိုက်စက်ရုံဖြစ်ပြီး အလုပ် ရှင်က လုပ်ငန်းပိတ်သိမ်းကာ တခြားလုပ်ငန်းတစ်ခုပြန်စမှာမို့  အလုပ်သမားတွေဟာ ပြီးခဲ့တဲ့ နို ဝင်ဘာ ၂၈ ရက်က အလုပ်မှ ရပ်နားခဲ့ရတယ်လို့  အလုပ်သမားတွေလျော်ကြေးငွေပြန်ရရေး ကူညီဆောင်ရွက်ပေးခဲ့တဲ့ AAC-မဟာမိတ်အဖွဲ့ ဒါရိုက်တာ ဦးခိုင်ကြီးက ဒီဗွီဘီကို ပြောပါတယ်။ 

“အလုပ်ရှင်က လက်ရှိအလုပ်ကနေ ရပ်နားပြီး ဒိပြင်အလုပ်တစ်ခုပြောင်းလုပ်တယ်။ အဲဒီမှာလိုက်ပြောင်းသွားချင်လည်းရတယ်ပေါ့။  ဒါပေမဲ့ အလုပ်သမားအများစုက မလိုက်ချင်ဘူး။ ဒါကြောင့် လျော်ကြေးပေးမယ်လို့ပြောထားတယ်တဲ့၊ ထိုင်းအလုပ်သမားတွေကို အရင်ပေးပြီး မြန်မာအလုပ်သမားတွေမရသေးတော့  အလုပ်သမားတွေက မရမှာစိုးလို့ ကျနော်တို့အဖွဲ့ဆီ လှမ်းပြီးအကူအညီတောင်းပါတယ်။ ကျနော်တို့ကလည်း မနေ့တုန်းက ( ဒီဇင်ဘာ ၁ ရက် ) သက်ဆိုင်ရာအလုပ်သမားကာကွယ်စောင့်ရှောက်ရေးရုံးကိုသွားတိုင်ပေးတယ်။ ရုံးက အလုပ်ရှင်ကို အကြောင်းကြားတော့ အလုပ်ရှင်ချက်ချင်းလိုက်လာပါတယ်။ သူလည်းပေး မလို့ပါဘဲ။ အလုပ်သမားတွေ နားလည်မှုလွဲနေတယ်ထင်တယ်လို့ပြောပြီး တခါတည်း ညှိနှိုင်းဆောင်ရွက်ပေးလိုက်တယ်ခင်ဗျ။”

ထိုင်းအလုပ်သမားဥပဒေအရ အလုပ်သမားတွေဟာ အပြစ်မရှိဘဲ အလုပ်ရပ်နားခံရတယ်ဆိုရင် သာမန်လခအပြင် နောက်ထပ်လုပ်သက်ကိုလိုက်ပြီး နစ်နာကြေးရခွင့်ရှိကြောင်း၊ လုပ်သက် ၁ နှစ်ဆိုရင် ၁ လစာ ၁၀ နှစ်ဆိုရင် ၁၀ လစာနစ်နာကြေးရရမှာဖြစ်တယ်လို့ ဆိုပါတယ်။ 

မနေ့ကတော့ လုပ်သက် ၆  လ ကနေ ၁ နှစ်မပြည့်သူအတွက် တစ်ဦးလျှင် ဘတ် ၄၅၀၀ ၊ ၂ နှစ် နဲ့ ၃ နှစ်ကြားလုပ်သက်ရှိအတွက် ၁ ဦးလျှင် ၁၉၀၀၀ ဘတ် ၊ ၃ နှစ်နဲ့ ၄ နှစ်ကြားကလူတွေအတွက် ၁ ဦးလျှင် ၃၁၀၀၀ ၊ ၄ နှစ်မှ ၅ နှစ်ကြားအတွက် ၄၃၀၀၀ ဘတ် ၊ ၆ နှစ်နဲ့ ၇ နှစ်ကြား လုပ်သက်ရှိသူအတွက် ၁ ဦးလျှင် ဘတ် ၄၅၀၀၀ ရရှိခဲ့တယ်လို့ ဆိုပါတယ်။ 

ဥပဒေအတိုင်းရာနှုန်းပြည့်မရပေမဲ့ အလုပ်ရှင်က အချိန်တိုအတွင်း ချက်ချင်း ဆောင်ရွက် ပေးတာကြောင့် အလုပ်သမားတွေအားလုံး ကျေနပ်မှုရခဲ့ကြတယ်လို့ ဆိုပါတယ်။ 

အေအေစီအနေနဲ့ အလုပ်သမားအရေးတွေ လိုက်လံဆောင်ရွက်ပေးတဲ့ထဲမှာ အလုပ်ရှင်က အခုလို မြန်မြန်ဆန်ဆန် ရှောရှောရှူရှူ ညှိနှိုင်းပေးတာဟာ ကြုံတောင့်ကြုံခဲပဲလို့ AAC ဒါရိုက်တာ ဦးခိုင်ကြီးက ပြောပါတယ်။

5 days Ago

September 15, 2022

ဆန္ဒပြ မြန်မာလုပ်သား ၂၇၀ လျော်ကြေး ဘတ် ၄ သန်းကျော်ရရှိ

ထိုင်းနိုင်ငံအလယ်ပိုင်း ပထုန်ဌာနီခရိုင် နဝနခွန်နယ်မြေရှိ အီလက်ထရောနစ် လျှပ်စစ်ပစ္စည်းစက်ရုံတရုံက မြန်မာအလုပ်သမား ၂၇၀ ဟာ ပြီးခဲ့တဲ့ စက်တင်ဘာ ၁၃ ရက်နေ့က  ရုတ်တရက် အလုပ်ထုတ်ခံခဲ့ကြရပါတယ်။ 

အဲဒီနေ့မနက် ၈ နာရီကစ အလုပ်ဆင်းလာသူတိုင်းကို စက်ရုံမန်နေဂျာက ပစ္စည်းတွေ အော်ဒါမလာလို့ အလုပ်မခန့်နိုင်တော့ကြောင်း ပြောပြီး  ရုတ်တရက် အလုပ်ဖြုတ်လိုက်တာကြောင့်  အလုပ်သမားတွေ မကျေနပ်ဖြစ်ပြီး ဆန္ဒပြခဲ့ကြတာလို့  အလုပ်သမား ကူညီစောင့်ရှောက်ရေးမဟာမိတ်အဖွဲ့ AAC  ခေါင်းဆောင် ကိုရဲမင်းက ဒီဗွီဘီကို ပြောပါတယ်။ 

“အလုပ်သမားတွေက ဆက်သွယ်လာလို့ ကျနော်တို့လည်း သက်ဆိုင်ရာ အလုပ်သမားကာကွယ် စောင့်ရှောက်ရေးရုံး၊ အလုပ်သမားရုံး၊ လဝက ရဲတွေနဲ့အတူ သွားပြီးညှိနှိုင်းဖြေရှင်းပေးခဲ့ပါတယ်။ ကျနော်တို့မရောက်ခင် မနက်ပိုင်းမှာ လုံးဝအဆင်မပြေပါဘူး၊ အလုပ်ရှင်က နစ်နာကြေးတွေ မပေးချင်ဘူးပေါ့။ အဲဒါနဲ့ အလုပ်သမားကိုယ်စားလှယ်၊ စက်ရုံကိုယ်စားလှယ်၊ အလုပ်သမားရုံး တာဝန်ရှိသူတွေရယ်၊ ပြီးတော့ ကျနော်တို့ အေအေစီအဖွဲ့ ၄ ပွင့်ဆိုင် ဆွေးနွေးညှိနှိုင်းကြပါတယ်။ ညနေ ၄ နာရီလောက်မှာ အားလုံး ပြေလည်မှုရခဲ့ကြတယ်ခင်ဗျ။”

ညှိနှိုင်းချက်အရ အလုပ်ရှင်ကနေပြီး အလုပ်သမား ၂၇၀ ဦးစလုံးရဲ့ ရသင့်ရထိုက်တဲ့ ၁ လစာ လုပ်အားခကိုရော၊ ကြိုတင်အကြောင်းမကြားဘဲ ရုတ်တရက်အလုပ်ထုတ်ပစ်လို့ နစ်နာကြေးအနေနဲ့ ၁၅ ရက်စာ လုပ်အားခတွေရော စုစုပေါင်း ဘတ် ၄ သန်းကျော်ကို ပေးဖို့နဲ့ အလုပ်သမားတွေရဲ့ စာရွက်စာတမ်း သက်သေအထောက်အထားဆိုင်ရာကိစ္စတွေလည်း ဒီလ ၁၉ ရက်နေ့အပြီး ဆောင်ရွက်ပေးဖို့  သဘောတူလိုက်တယ်လို့ ဆိုပါတယ်။

အဆိုပါစက်ရုံမှာ မြန်မာနဲ့ထိုင်းလုပ်သား ရာနဲ့ချီရှိပြီး ရုတ်တရက် အလုပ်ထုတ်ခံရတဲ့ထဲမှာ ထိုင်းအလုပ်သမားတွေလည်း ပါဝင်ကြောင်း၊ သူတို့လည်း သူတို့အစီအစဉ်နဲ့ ညှိနှိုင်းတောင်းဆိုလိမ့်မယ်လို့ ဆိုပါတယ်။ 

ဒီမတိုင်ခင် ပြီးခဲ့တဲ့ ၁၀ ရက်နေ့ကလည်း နခွန်းပထုံခရိုင် အုန်းယိုင်မြို့ရှိ အထည်ချုပ်စက်ရုံ ၁ ရုံမှာ မြန်မာလုပ်သား ၂၀၀ ကျော် အကြောင်းမဲ့အလုပ်ထုတ်ခံရပါသေးတယ်။ 

အဆိုပါကိစ္စကို သွားရောက်ဖြေရှင်းပေးရာမှာ  အလုပ်သမားကတ် စာရွက်စာတမ်းတွေ အဆင်ပြေပေမယ့် နစ်နာကြေးကိစ္စတွေမှာ အဆင်မပြေလို့ ရဲစခန်းမှာ အမှုဖွင့်ထားကြောင်း၊ မနေ့ကတော့ စက်ရုံဘက်က တရားမစွဲဖို့လာပြောလို့ အလုပ်သမားတွေဘက်က ရသင့်ရထိုက်တာတွေ အကုန်ရဖို့ ပြန်ပြီးညှိနှိုင်းနေတယ်လို့ ကိုရဲမင်း AAC က ပြောသွားပါတယ်။

3 months Ago
More News
Up