လောင်းလုံးမြို့နယ်

November 21, 2021

လောင်းလုံးတွင် စစ်ကောင်စီတပ်ကို LPDF အဖွဲ့က မိုင်းခွဲတိုက်ခိုက်၊ အပြန်အလှန်ပစ်ခတ်မှုဖြစ်

တနင်္သာရီတိုင်း ထားဝယ်ခရိုင် လောင်းလုံးမြို့နယ် အောက်ပိုင်းကို  ဒီနေ့မနက် ၈ နာရီခွဲလောက်က  ဆင်းလာတဲ့  စစ်ကောင်စီ ကားတစ်စီးအား လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့ (LPDF)  နဲ့ အင်အားစု ပြောက်ကျားတပ်ဖွဲ့တို့က မိုင်းခွဲတိုက်ခဲ့တယ်လို့ သိရပါတယ်။

စစ်ကောင်စီတပ်ဖွဲ့ဝင် ၁၀ ဦးလောက် လိုက်ပါလာတဲ့ကားကို  မိုင်းခွဲတိုက်ခိုက်ခဲ့ပြီးနောက် နှစ်ဖက် အပြန်လှန်ပစ်ခတ်မှု ဖြစ်ပွားခဲ့တယ်လို့ LPDF အဖွဲ့က ထုတ်ပြန်ထားပါတယ်။

ဒါ့အပြင် စစ်ကောင်စီဘက်က စစ်ကူ ၁၀ ယောက်လောက်ပါ  Vigo   ကားတစ်စီး ထပ်မံရောက်လာလို့ နှစ်ဖက်တိုက်ပွဲဖြစ်ပွားခဲ့ကြပြီး LPDF တပ်က ဆုတ်ခွာနိုင်ခဲ့တယ်လို့ ဆိုပါတယ်။

နှစ်ဖက် တိုက်ခိုက်မှုဖြစ်စဉ်အတွင်း စစ်ကောင်စီဘက်   ၆  ဦးကျဆုံး၊ ဒဏ်ရာရသူ  ၃  ဦးထဲက စခန်းမှူးတစ်ယောက်ဒဏ်ရာ ပြင်းထန်ကြောင်း PDF  ဘက်ကတော့ ၁ ဦး ကျဆုံးခဲ့တယ်လို့ ဖော်ပြထားပါတယ်။ တိုက်ပွဲအတွင်း စစ်ကောင်စီဘက်က သေဆုံးဒဏ်ရာရမှုအခြေအနေနဲ့ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။

လက်ရှိမှာ PDF တပ်သားတွေ လွတ်မြောက်နေရာကို ရောက်ရှိနေပြီဖြစ်ပြီး  အခုပစ်ခတ်မှုဖြစ်စဉ် ရွာသားတွေနဲ့ လုံးဝ မသက်ဆိုင်ကြောင်းလည်း LPDF အဖွဲ့ အသိပေးထားပါတယ်။

စစ်ကောင်စီဘက်က သေဆုံး ဒဏ်ရာရသူတွေကိုတော့ ထားဝယ် တပ်ဆေးရုံကို  ပို့ဆောင်လိုက်တယ်လို့ ဒေသခံတွေရဲ့ ပြောကြားချက်အရသိရပါတယ်။

2 weeks Ago

November 2, 2021

လောင်းလုံးမြို့နယ်က နယ်ထိန်းရဲတစ်ဦး ပစ်သတ်ခံရ

တနင်္သာရီတိုင်း လောင်းလုံးမြို့နယ်က နယ်ထိန်း ရဲတပ်ဖွဲ့ဝင်တစ်ဦး နိုဝင်ဘာ ၁ ရက် နေ့လယ်ပိုင်းမှာ သေနတ်နဲ့ ပစ်သတ်ခံခဲ့ရလို့ သေဆုံးခဲ့ကြောင်း သိရပါတယ်။

ရဲတပ်သား နေမျိုးအောင် ခေါ် ရဲမဲဆိုသူဟာ လောင်းလုံး-စစ်ပြဲ တောလမ်းတနေရာ တောင်ဇင်းလမ်းမှာ ပစ်သတ်ခံခဲ့ရတာလို့ ဒေသခံတွေက ပြောပါတယ်။

“ပစ်သတ်ခံရတဲ့နေရာက လူ သွားလူလာနည်းတယ် တောလမ်း၊ အခုတော့ ကွန်ကရစ်လမ်း ဖောက်နေတယ်။ အဲ့လမ်းမှာ ရဲတစ်ယောက်သေနေတယ် ပြောလို့ သွားကြည့်တော့၊ ရဲမဲ သေနတ်နဲ့ ပစ်သတ်ခံရတာ။ ဘယ်သူပစ်လဲတော့ ကျနော်လည်း မသိဘူး" လို့ ဒေသခံတစ်ဦးက ပြောပါတယ်။

စစ်ကောင်စီရဲ့လက်ကိုင်တုတ်ဖြစ်တဲ့ ရဲတပ်သား  နယ်ထိန်း နေမျိုးအောင်(ခ)ရဲမဲ ဆိုသူကို Nway Oo Guerrilla Force အဖွဲ့က သုတ်သင်ခဲ့တာဖြစ်ကြောင်း ထုတ်ပြန်ထားပါတယ်။

လောင်းလုံးမြို့နယ်မှာ ပထမဆုံးအကြိမ် နယ်ထိန်း ရဲတပ်ဖွဲ့ဝင်တစ်ဦး ပစ်သတ်ခံရတာဖြစ်ပြီး ညပိုင်းမှာ စစ်ပြဲရွာနဲ့ ပြင်းထိန်ရွာက ဒေသခံတွေရဲ့ နေအိမ်တွေကို စစ်ကောင်စီတပ်ဖွဲ့ဝင်တွေက လိုက်လံစစ်ဆေးခဲ့တယ်လို့ သိရပါတယ်။

Nway Oo Guerrilla Force အဖွဲ့ဟာ ပြီးခဲ့တဲ့ အောက်တိုဘာ ၂၀ ရက်ကလည်း လောင်းလုံးမြို့နယ်အတွင်းက မိုင်တဲလ်တာဝါတိုင် ၅ တိုင်ကို ဖျက်ဆီးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

1 month Ago
More News
Up