လောင်းကစားရုံ

August 15, 2022

ရှမ်းမြောက်တွင် ငါးမန်းဂိမ်းနှင့်လောင်းကစားရုံများ ပေါများလာ

ရှမ်းပြည်နယ်မြောက်ပိုင်းက မြို့နယ်အသီးသီးမှာ ငါးမန်းဂိမ်းဆိုင်၊ ခြောက်ကောင်ဂျင်ဝိုင်းနဲ့ လောင်းကစားဝိုင်းတွေ ပေါများလာပြီး လူစည်ကားတဲ့နေရာတွေမှာ ပေါ်ပေါ်တင်တင် ဖွင့်လှစ်လာတာကြောင့် အိမ်ထောင်ရှင် အမျိုးသားတွေ စာရိတ္တပျက်စီးလာကာ အိမ်တွင်းရေး ပြဿနာတွေ ဖြစ်ပွားမှု မြင့်တက်လာနေတယ်လို့ ကာယကံရှင် မိသားစုဝင်တွေက ပြောပါတယ်။

“လားရှိုးအောက်ဂိတ်လို့ခေါ်တဲ့ ကားလေးကွင်းနားမှာ ငါးမန်းဂိမ်းဆိုင် လာဖွင့်တော့ ကျမ အမျိုးသားက ခရီးသည်စောင့်ရင်း အပျင်းပြေပါဆိုပြီး သွားကစားရာကနေ အခုဆိုရင် အဲဒီဂိမ်းဆိုင်ကကို မထတော့ဘူး။ ဟို့နေက အိမ်က ဆိုင်ကယ်ကို ခုနစ်သိန်းနဲ့ ပေါင်ပြီး ကစားပစ်တာ ရှုံးသွားပြီ။ အခုဆို နေ့တိုင်း ရန်ဖြစ်နေရတယ်။ လောင်းကစားကလွဲပြီး သူဘာမှ စိတ်မဝင်စားတော့ဘူး” လို့ မူဆယ်-လားရှိုး ကားလေးပြေးဆွဲနေတဲ့ ကားဆရာတဦးရဲ့ ဇနီးဖြစ်သူက ပြောပါတယ်။

ငါးမန်းဂိမ်းရုံတွေအပြင် ခြောက်ကောင်ဂျင်နဲ့ အခြားလောင်းကစားဝိုင်းတွေကြောင့်လည်း အိမ်ထောင်သည်တွေနဲ့ လူငယ်လူရွယ်တွေမှာ စာရိတ္တပျက်စီးလာပြီး အိမ်တွင်းခိုးမှုတွေပါ ဖြစ်ပေါ်နေတယ်လို့ မိခင်တဦးက ပြောပါတယ်။

“ကိုဗစ်နဲ့ အာဏာသိမ်းတာနဲ့ဆိုတော့ အိမ်က ကလေးက ပညာရေး တပိုင်းတစဖြစ်ပြီး အိမ်မကပ်တော့ဘူး။ အလုပ်လုပ်ရမယ့်အရွယ်လည်း မဟုတ်သေးတော့ လမ်းပဲထွက်နေတယ်။ ခြောက်ကောင်ဂျင်ဝိုင်းက ရပ်ကွက်နဲ့လည်းနီး၊ လူကလည်းစည်တော့ အပေါင်းအသင်းတွေနဲ့ သွားရင်း ကစားတတ်လာတယ်။ လောင်းကစားလုပ်ဖို့လည်း အိမ်ကနေ ပိုက်ဆံခိုးတတ်လာတယ်။” 

ရှမ်းပြည်နယ်မြောက်ပိုင်း၊ ကိုးကန့်ကိုယ်ပိုင်အုပ်ချုပ်ခွင့်ရဒေသ၊ စစ်ကောင်စီ ထိန်းချုပ်နယ်မြေ လောင်ကိုင်မြို့မှာ ကာစီနိုလောင်း ကစားရုံကြီးတွေ ဖွင့်လှစ်ထားသလို မူဆယ်မြို့နဲ့ အခြား မြို့နယ်တွေမှာ စစ်ကောင်စီလက်အောက်ခံ ပြည်သူ့စစ်တပ်ဖွဲ့တွေနဲ့ အာဏာပိုင်တွေပေါင်းပြီး လောင်ကစားအမျိုးမျိုးကို ဖွင့်လှစ်ထားတလို့ ဒေခံတွေက ပြောပါတယ်။

“လောက်ကိုင်မှာဆို ကာစီနိုရုံတွေ အများကြီးဖွင့်ထားတယ်။ အဲဒီလိုပဲ မူဆယ်မြို့မှာလည်း လောင်ကစားရုံတွေ ပေါမှပေါပဲ။ ပြည်သူ့စစ်တွေက တပ်နဲ့ပေါင်းပြီး ဖွင့်ကြတာ များတယ်။ မူဆယ်မှာဆို လောင်းကစားဘေးမှာကို အပေါင်ဆိုင်တန်းဖွင့်ထားရတဲ့အထိကို စည်ကားတယ်။ အိမ်ကပစ္စည်းတွေ မိသားစု မသိအောင်​ ပေါင်နှံပြီး ကစားကြလို့ ရန်ဖြစ်စကားများတဲ့ပွဲ နေ့တိုင်းရှိတယ်” လို့ မူဆယ်မြို့ခံတဦးက ပြောပါတယ်။

စစ်အာဏာသိမ်းပြီးနောက်ပိုင်း ရှမ်းပြည်နယ်မြောက်ပိုင်းအပြင် တောင်ပိုင်းက မြို့ကြီးတချို့မှာပါ လောင်ကစားရုံတွေ ပေါ်ပေါ်တင်တင် ဖွင့်လှစ်လာနေတယ်လို့ ဒေသခံတွေက ဆိုပါတယ်။

2 months Ago

July 7, 2022

ဗန်းမော်ရှိ တရားမဝင် ရွှေတူးလုပ်ငန်းများ၌ တရုတ်လူမျိုးများ လောင်းကစားရုံ ဖွင့်လှစ်လုပ်ကိုင်

ကချင်ပြည်နယ်၊ ဗန်းမော်မြို့နယ်အတွင်း ဧရာဝတီမြစ်အနောက်ဘက် ကျေးရွာတွေမှာရှိတဲ့ တရားမဝင် ရွှေတူးဖော်လုပ်ငန်းတွေမှာ  မြန်မာစကားမတတ်တဲ့ တရုတ်လူမျိုးတွေက လောင်းကစားဝိုင်းတွေ လာရောက်ဖွင့်လှစ်လုပ်ကိုင်နေကြတယ်လို့ ဒေသခံတွေထံက သိရပါတယ်။

လောင်းကစားရုံတွေဟာ ရွာထဲမှာ မဟုတ်ဘဲ ရွာအနီးနေရာတွေမှာ ဆောက်လုပ်ထားတာဖြစ်ပြီး လေးကောင်ဂျင်၊ ခြောက်ကောင်ဂျင်၊ ဂုန်းကလုံး၊ ဖဲအမျိုးမျိုး၊ ငါးမန်းပစ်ဂိမ်းတွေနဲ့ တခြားလောင်းကစားတွေကိုတနေရာတည်း ဆော့လို့ရအောင်ပြုလုပ်ထားတာဖြစ်ပါတယ်။

ဒေသခံတဦးက “မြန်မာစကားလည်း မတတ်တဲ့ တရုတ်တွေ လာဖွင့်တယ်။ မှတ်ပုံတင်လဲရှိမယ်ပုံ မပေါ်ဘူး၊ ဘယ်သူတွေ ခေါ်လာတယ်ဆိုတာတော့ မသိဘူး၊ ကာစီနိုပုံစံ ရုံတွေ လာလုပ်ပြီး ဖွင့်နေတယ်” လို့ ပြောပါတယ်။

အကြီးစား လောင်းကစာရုံတွေအနေနဲ့ ငှက်ပျောတောမှာ နှစ်ရုံ၊ မိုင်းသာမှာ တရုံ၊ ကျွန်းစုမှာတရုံ ရှိသလို အသေးစားလောင်းကစားဝိုင်းတွေလည်း ရွှေဖောင်နဲ့ နီးတဲ့ ပတ်ဝန်းကျင်ရွာတွေမှာ ရှိနေပါတယ်။

လောင်းကစားရုံတွေ အခုလို ဖွင့်လှစ်  လူစည်ကားနေရတာဟာ တရားမဝင် ရွှေတူးဖော်ကြတဲ့ ရွှေဖောင်တွေ အလုပ်ဖြစ်ထွန်းမှုနဲ့လည်း သက်ဆိုင်နေတယ်လို ဒေသခံရွာသားတွေက ပြောပါတယ်။

ငှက်ပျောတောကျေးရွာ အနီးနားပတ်ဝန်းကျင်ရွာတွေမှာ တရားမဝင် ရွှေတူးဖော်မှုတွေနဲ့ လောင်းကစားရုံတွေ လာရောက်ဖွင့်လှစ်နေတာနဲ့ပတ်သက်ပြီး ကျေးရွာနေပြည်သူတွေက လက်မခံတာကြောင့် သက်ဆိုင်ရာ အုပ်ချုပ်ရေးအဖွဲ့တွေကို အကြောင်းအကြား အကူအညီ တောင်းထားပေမဲ့ အရေးယူတာ မရှိဘူးလို့ ကျေးရွာနေပြည်သူတဦးက ပြောပါတယ်။

ဒေသခံအုပ်ချုပ်ရေးဆောင်ရွက်နေတဲ့ စစ်ကောင်စီလက်အောက်က ဌာနဆိုင်ရာတွေနဲ့ ကေအိုင်အို အုပ်ချုပ်ရေးပိုင်းဆိုင်ရာတွေကို ဒီကိစ္စဖြေရှင်းပေးဖို့ ကန့်ကွက်စာတင်ထားပေမဲ့ ဘာမှထူးခြားတာမရှိဘူးလို့  ငှက်ပျောတောကျေးရွာနေ ပြည်သူတဦးက ပြောပါတယ်။

“ဒီ‌ရွှေတူးတဲ့ အလုပ်တွေက လွန်ခဲ့တဲ့နှစ် အာဏာသိမ်းပြီးနောက်ပိုင်း ရွှေဖောင်တွေ ပိုများလာတယ်။ ရွှေဖောင်တွေ များလာတော့ ဒီရွှေဖောင်တွေကို ဦးတည်ပြီး လောင်းကစားဝိုင်းတွေ ပေါ်လာတယ်။ အခုနောက်ပိုင်း တစ်လကျော်‌ကျော်ရှိပြီ၊ တရုတ်တွေ လာပြီး ကာစီနိုပုံစံ လောင်းကစားရုံ ပုံစံလုပ်ပြီး ဖွင့်လာတွေရှိလာတယ်။ အဲလိုဖြစ်လို့ နှစ်ဖက်စလုံးကို ဒီလုပ်ငန်းတွေ ပိတ်ပင်ပေးဖို့ ကန့်ကွက်စာတင်တာတွေ လုပ်တယ်၊ အခုထိတော့ ဘာမှထူးမလာဘူး။”

လတ်တလော ငှက်ပျောတော ကျေးရွာမှာတော့ ရာသီဥတုအခြေအနေကြောင့် ရွှေတူးဖော်မှုကို ရပ်နားထားပေမဲ့ တခြားရွားတွေမှာတော့ ဆက်လက်တူးဖော်တာတွေပြုလုပ်နေတယ်လို့ သိရပါတယ်။

လောင်းစကားဝိုင်းတွေကို လာရောက်ဖွင့်လှစ်သူတွေဟာ လေလံပေးတဲ့အဖွဲ့တွေကို ငွေကြေး ပေးဆောင်ပြီး ဖွင့်လှစ်ကြတာဖြစ်သလို လောင်းကစားရုံ လေလံတွေကို ကေအိုင်အို လက်အောက်က အောက်ခြေ ဒေသအုပ်ချုပ်ရေးအဖွဲ့တွေ ပါဝင်နေတာတယ်လို့ ဒေသခံရွာသား တဦးက ပြောပါတယ်။

“အခုလောင်းကစားရုံတွေဖွင့်ဖို့က လေလံပေးရတယ်၊ ဒီဘက်မှာ ထွေအုပ်တွေလည်း မရောက်နိုင်ဘူး၊ လာလည်းမလာဘူး၊ ဒီမှာရှိတဲ့အဖွဲ့က  ကေအိုင်အေက ဆလန်ကဘာ(အုပ်ချုပ်‌ရေးမှူး)တွေပဲ ရှိတယ်၊ ဒီလိုဆိုတော့ ဒီလေလံအဖွဲ့တွေကို ဆလန်ကဘာတွေရဲ့  ခွင့်နဲ့ လုပ်ကြတာ ဖြစ်တယ်။”

ဒီကိစ္စနဲ့ပတ်သက်ပြီး ကေအိုင်အို/ကေအိုင်အေဘက်က တာဝန်ရှိသူတွေကိုတော့ ဆက်သွယ် မေးမြန်းနိုင်ခြင်း မရှိသေးပါဘူး။

ဧရာဝတီမြစ်ကြောင်းပေါ်မှာ ရွှေတူးဖော်မှုတွေကြောင့် မိုးများလို့ ရေကြီးလာတဲ့အခါ မြစ်ကြောင်းတလျှောက်က ‌ကျေးရွာပတ်ဝန်းကျင်တွေမှာ ရေလမ်းကြောင်းပြောင်းတာ၊ စိုက်ပျိုးခင်းတွေ ရေတိုက်စားခံရတာနဲ့ မြစ်ကမ်းဘေးမှာ ဆောက်လုပ်ထားတဲ့ တာဘောင်တွေ ပျက်စီးနေပြီး ရွာကိုရေတိုက်စားကုန်တယ်လို့ ငှက်ပျောတောကျေးရွာက ပြည်သူတစ်ဦးက ပြောပါတယ်။

ကချင်ပြည်နယ်မှာ  ရွှေတူးဖော်မှုတွေကို ပူတာအိုမြို့နယ်၊ မြစ်ဆုံပတ်ဝန်းကျင်တွေနဲ့ ဧရာဝတီမြစ်ကြောင်းတလျှောက်တွေမှာ တူး‌ဖော်နေတာအပြင် မြစ်ကြီးနား-ဗန်းမော်လမ်း တချို့နေရာတွေမှာ တရားဝင်းရွှေတူး‌ဖော်မှုတွေကို စစ်ကောင်စီ အာဏာသိမ်းပြီးနောက်ပိုင်း သိသိသာသာ ပေါများလာတာဖြစ်ပါတယ်။

3 months Ago
More News
Up