လေဖိအားနည်းရပ်ဝန်း

May 6, 2022

ဘင်္ဂလားပင်လယ်အော်တွင် ၄၈ နာရီအတွင်း မုန်တိုင်းငယ် ဖြစ်လာနိုင်ဟု မိုးဇလခန့်မှန်း

ဘင်္ဂလားပင်လယ်အော်မှာ လေဖိအားနည်းရပ်ဝန်းတခု ဖြစ်ပေါ်နေပြီး နောက် ၄၈ နာရီအတွင်း မုန်တိုင်းငယ်အဖြစ် အားကောင်းလာနိုင်တယ်လို့ မိုးဇလဌာနက မေ ၆ ရက်မှာ ခန့်မှန်းထုတ်ပြန်ထားပါတယ်။

ဒီနေ့ မြန်မာစံတော်ချိန် မနက် ၁၁ နာရီ တိုင်းထွာချက်အရ ကပ္ပလီပင်လယ်ပြင် တောင်ပိုင်းနဲ့ ဆက်စပ်နေတဲ့ ဘင်္ဂလားပင်လယ်အော် အရှေ့တောင်ပိုင်းမှာ လေဖိအားနည်းရပ်ဝန်းတခု ဖြစ်ပေါ်နေတယ်လို့ ဆိုပါတယ်။

အဆိုပါ လေဖိအားနည်းရပ်ဝန်းဟာ အနောက်မြောက်ဘက်သို့ ရွေ့လျားနိုင်ပြီး နောက် ၄၈ နာရီအတွင်း မုန်တိုင်းငယ်အဖြစ်သို့ အားကောင်းလာနိုင်တယ်လို့ မိုးဇလ ထုတ်ပြန်ချက်မှာ ဖော်ပြပါတယ်။

ရန်ကုန်မှ တနင်္သာရီကမ်းရိုးတန်းတလျှောက် ပင်လယ်ပြင်ခရီးအတွက် မိုးလေဝသ ခန့်မှန်းချက်ကတော့ ဒီနေ့ မွန်းတည့် ၁၂ နာရီကနေ နောက် ၂၄ နာရီအတွင်း နေရာစိပ်စိပ် မိုးထစ်ချုန်းရွာပြီး လှိုင်းအသင့်အတင့်ရှိမှာဖြစ်ပြီး လှိုင်းအမြင့်က ၅ ပေမှ ၈ ပေလောက်အထိ ရှိနိုင်တယ်လို့လည်း ခန့်မှန်းထားပါတယ်။

9 months Ago

March 23, 2022

မုန်တိုင်းငယ် လေဖိအားနည်းရပ်ဝန်းအဖြစ် အားပျော့ကာ သံတွဲမြို့အနီးမှ ဖြတ်သွားနေ

ရခိုင်ကမ်းရိုးတန်းတောင်ပိုင်းကို ဂွမြို့အနီးမှ ရွေ့လျားခဲ့တဲ့ မုန်တိုင်းငယ်(Depression)ဟာ အားကောင်းသော လေဖိအားနည်းရပ်ဝန်းအဖြစ် အားလျော့သွားပြီလို့  မိုးဇလဌာနက  မတ်လ ၂၃ ရက်  ဒီကနေ့မနက် ထုတ်ပြန်ပါတယ်။

အားကောင်းသောလေဖိအားနည်းရပ်ဝန်းရဲ့ လက်ရှိအခြေအနေမှာ ရခိုင်ပြည်နယ်၊ သံတွဲမြို့အနီးမှ မြောက်-အရှေ့မြောက်ဘက်သို့ ဆက်လက်ရွေ့လျားနေလို့  အညိုရောင်အဆင့် သတ်မှတ်တယ်လို့လည်း ဆိုပါတယ်။

သံတွဲမြို့အနီးမှ ဆက်လက်ရွေ့လျားနေစဉ် ရခိုင်ပြည်နယ်မှာ အမြင့်ဆုံးလေတိုက်နှုန်းမှာ တစ်နာရီလျှင် မိုင် ၃၀ မှ ၃၅ မိုင်ခန့်နဲ့ ဧရာဝတီတိုင်းမှာ အမြင့်ဆုံးလေတိုက်နှုန်း တစ်နာရီလျှင် ၂၅ မိုင်မှ မိုင် ၃၀ ခန့်အထိ တိုက်ခတ်နိုင်တယ်လို့ ခန့်မှန်းပါတယ်။

အဆိုပါ အားကောင်းသော လေဖိအားနည်းရပ်ဝန်းဟာ မြောက်-အရှေ့မြောက်ဘက်သို့ ဆက်လက်ရွေ့လျားနိုင်ပြီး၊ လေဖိအားနည်းရပ်ဝန်း (Low Pressure Area)အဖြစ်သို့ တဖြည်းဖြည်း အားလျော့သွားမယ်လို့ ခန့်မှန်းထားပါတယ်။

လေဖိအားနည်းရပ်ဝန်းကြောင့် နေပြည်တော်၊ စစ်ကိုင်းတိုင်းအောက်ပိုင်း၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ တချို့ဒေသတွေမှာ ဒေသအလိုက်နှင့် နေရာကွက်၍ မိုးကြီးနိုင်ပါတယ်။

မြစ်ဝကျွန်းပေါ်၊ ရခိုင်ကမ်းရိုးတန်းတလျှောက်နဲ့ ကမ်းလွန်ပင်လယ်ပြင်မှာ ရံဖန်ရံခါ မိုးသက်လေပြင်းများ ကျရောက်ပြီး လှိုင်းကြီးနိုင်ကာ မိုးသက်လေပြင်းကျစဉ် ရေပြင်၊ မြေပြင်လေ တစ်နာရီလျှင် မိုင် ၄၀ အထိ တိုက်ခတ်နိုင်ပါတယ်။

လှိုင်းအမြင့်မှာ မြစ်ဝကျွန်းပေါ်၊ ရခိုင်ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့မှာ ၈ ပေမှ ၁၂ ပေခန့်နဲ့ မုတ္တမကွေ့၊ မွန်-တနင်္သာရီကမ်းရိုးတန်းတလျှောက်နဲ့ ကမ်းလွန်ပင်လယ်ပြင်တို့မှာ ၇ ပေမှ ၉ ပေခန့် ရှိနိုင်တယ်လို့ မိုးဇလက ထုတ်ပြန်ပါတယ်။

11 months Ago
More News
Up