လေပြင်း

May 2, 2022

နမ့်စန်မြို့နယ်၌ လေပြင်းတိုက်ခတ်သဖြင့် နေအိမ် ၃၀ ကျော်ပျက်စီး

ရှမ်းပြည်နယ်တောင်ပိုင်း၊ နမ့်စန်မြို့နယ်မှာ မေ ၁ ရက်နေ့က မိုးသည်းထန်စွာရွာသွန်းပြီး လေပြင်းတိုက်ခတ်တာကြောင့် ဟိုးနားကြီးနဲ့ နမ့်လစ်ကျေးရွာအုပ်စုအတွင်းက လူနေအိမ် ၃၃ လုံး အမိုးလန် ပျက်စီးခဲ့တယ်လို့ သိရပါတယ်။

ဒေသခံတစ်ဦးက “လေကော မိုးကော တော်တော်ကြမ်းတယ်။ ကျနော်တို့ရွာက လူအိမ်တွေ တော်တော်များများ အမိုးတွေ လန်ကုန်တယ်" လို့ ပြောပါတယ်။

ဒါ့အပြင် ဧပြီ ၂၈ ရက်နေ့ကလည်း ရှမ်းပြည်နယ်မြောက်ပိုင်း၊ သီပေါမြို့နယ်မှာ မိုးသည်းထန်စွာ ရွာသွန်းပြီး လေပြင်းတိုက်ခတ်မှုကြောင့် နားမခေါ်ကျေးရွာက ကျေးလက်ဆေးခန်းဆိုင်းဘုတ်နဲ့ လူနေအိမ်တချို့ ပျက်စီးခဲ့ပါတယ်။

ဧပြီလ နောက်ဆုံးပတ်က စတင်ပြီး ရှမ်းနဲ့ ကယားပြည်နယ်အတွင်းမှာ  မိုးနဲ့အတူ လေပြင်းလည်း တိုက်ခတ်လာတာကြောင့် လူနေအိမ်တချို့နဲ့ စစ်ဘေးရှောင်စခန်းက မိုးကာတဲတွေ  ထိခိုက်ပျက်စီးတာတွေ ဖြစ်ခဲ့တယ်လို့ ဒေသခံတွေက ပြောပါတယ်။

မိုးလေဝသနဲ့ဇလဗေဒဦးစီးဌာနရဲ့ မေ ၂ ရက်နေ့ ထုတ်ပြန်ချက်မှာတော့ နေပြည်တော်၊ စစ်ကိုင်းတိုင်း၊ မန္တလေးတိုင်း၊ ပဲခူးတိုင်း၊ ရန်ကုန်တိုင်း၊ ကချင်၊ ရှမ်းနဲ့ ကယားပြည်နယ်တွေမှာ နေရာကျဲကျဲ မိုးထစ်ချုန်းရွာနိုင်တယ်လို့ ဖော်ပြထားပါတယ်။

7 months Ago

October 1, 2021

ချင်းမိုင်တွင် လေပြင်းကြောင့် သက်တမ်းရင့် ကညင်ပင် ၇ ပင်လဲပြို၊ ဓာတ်တိုင်နှင့်အိမ်များ ပျက်စီး

ထိုင်းမြောက်ပိုင်း ချင်းမိုင်ခရိုင် ဆာရဖီးမြို့နယ်ထဲမှာ ဒီကနေ့ ညနေ ၃ နာရီကျော်လောက်က မိုးသက်လေပြင်းကျတဲ့အတွက် သက်တမ်းရင့်ကညင်ပင် ၇ ပင်လဲပြိုပြီး ဓာတ်မီးတိုင် နဲ့ လူနေ အိမ်ခြေပေါ်ပိကျတဲ့အတွက် ပျက်စီးမှုတွေရှိခဲ့ပါတယ်။ 

အဆိုပါ ကညင်ပင်တွေဟာ ချင်းမိုင်-ဆာရဖီး- လမ်းပွန်းမြို့နယ်သွား ကားလမ်းဘေးတဘက်တချက်မှာ အစီအရီတည်ရှိပြီး လွန်ခဲ့တဲ့ နှစ်ပေါင်း ၁၀၀ ကျော်က စိုက်ထားခဲ့တာပါ ။ 

ဒီကနေ့ မိုးသက်လေပြင်းကျတာကြောင့် ဆာရဖီးမြို့နယ်အပိုင်းမှာရှိတဲ့ အပင်ကြီး ၇ ပင်လဲပြိုသွားတာဖြစ်ပြီး လမ်းဘေးဓာတ်မီးတိုင် နဲ့ လမ်းဘေးတဘက်တချက်က နေအိမ်တွေပေါ်လဲကျတာကြောင့် ဓာတ်မီးတိုင်ပေါင်း အတိုင် ၂၀ လဲကျသွားပြီး နေအိမ်နဲ့ လမ်းဘေးဆိုင်တချို့ ပျက်စီးသွားခဲ့တာပါ။ 

လျှပ်စစ်မီးတွေလည်းပြတ်တောက်သွားပြီး လမ်းတွေပိတ်ဆို့နေတာကြောင့် သက်ဆိုင်ရာက အဆိုပါလမ်းကို ယာယီပိတ်ထားပြီး  အပူတပြင်းလမ်း ပြန်ရှင်းလင်းနေပါတယ်။   

1 year Ago
More News
Up