လေထုညစ်ညမ်းမှု

November 18, 2021

အိန္ဒိယတွင် လေထုညစ်ညမ်းမှုတိုက်ဖျက်ရန် ကားအသုံးပြုမှုနှင့်ကျောက်မီးသွေးစက်ရုံများပိတ်

အိန္ဒိယအစိုးရဟာ နယူးဒေလီမြို့တော်နဲ့ အနားက ဒေသတွေမှာနေကြတဲ့ ဒေသခံတွေကို ခြိမ်းခြောက်နေတဲ့ လေထုညစ်ညမ်းမှုကို တိုက်ဖျက်ရေး နိုဝင်ဘာ ၁၇ ရက်က ပိုတိုး ကြိုးစားနေပါတယ်။

မရှိမဖြစ် မဟုတ်တဲ့ ကားတွေကို သွားလာခွင့် တားမြစ်ပိတ်ပင်ပြီး ကျောက်မီးသွေးသုံး လျှပ်စစ်ဓာတ်အားပေးစက်ရုံ ငါးခုကိုလည်း ရပ်ထားဖို့ ပြည်ထောင်စု သဘာဝပတ်ဝန်းကျင် ဝန်ကြီးဌာနက အမိန့်ထုတ်ခဲ့ပါတယ်။

ကမ္ဘာ့အညစ်ညမ်းဆုံး မြို့တော်တွေထဲက တခုဖြစ်တဲ့ နယူးဒေလီဟာ နှစ်တိုင်း ဆောင်းရာသီမှာ မီးခိုးမြူထူတွေရဲ့ ဒဏ်ကို ခံနေရတာ ကြာပါပြီ။

ဗုဒ္ဓဟူးနေ့က လေထုအရည်အသွေး ညွှန်းကိန်းဟာ အဆင့် ၅၀၀ အနက် ၃၈၆ မှာ ရပ်တည်နေပြီး အင်မတန် ညံ့ဖျင်းတဲ့ အဆင့်မှာ ရှိနေပါတယ်။

ဒီအဆင့်ဟာ ကာလကြာရှည် ရှိနေခဲ့ရင် အသက်ရှူလမ်းကြောင်း မကျန်းမာတာတွေ ဖြစ်စေနိုင်ပါတယ်။

ဒေလီအစိုးရကလည်း မြို့တော်အတွင်း ကုန်ကားတွေ မဝင်ဖို့ တားမြစ်ပိတ်ပင်ခဲ့ပြီး ပုဂ္ဂလိက ကားတွေကနေ ထွက်လာတဲ့ လေထုညစ်ညမ်းမှုကို ထိန်းချုပ်ဖို့ အများပြည်သူသုံး ဘတ်စ်ကား အစီးရေ တထောင်ကို ငှားရမ်းခဲ့ပါတယ်။

မရှိမဖြစ် ဝန်ဆောင်မှုတွေက လွဲလို့ ဒေလီမြို့ထဲ ကားအားလုံး ဝင်ခွင့် တားမြစ်ပိတ်ပင်ဖို့ ညွှန်ကြားချက် ပေးခဲ့တယ်လို့ သဘာဝပတ်ဝန်းကျင် ဝန်ကြီး ဂိုပယ်ရိုင်က သတင်းထောက်တွေကို ပြောပါတယ်။

စိုက်ပျိုးရေး ရာသီအသစ် မတိုင်ခင် လယ်သမားတွေက စိုက်ပျိုးရေး စွန့်ပစ်ပစ္စည်းတွေ ရိုးပြတ်တွေကို မီးရှို့နေတာကြောင့် လေထဲ အမှုန်ပါဝင်နှုန်း မြင့်တက်နေလို့ နိုဝင်ဘာလဟာ လေထုညစ်ညမ်းမှု ပိုဆိုးရွားတဲ့လ ဖြစ်လေ့ ရှိပါတယ်။

2 months Ago

November 14, 2021

လေထုညစ်ညမ်းမှုကြောင့် နယူးဒေလီတွင် ကျောင်းနှင့်ဆောက်လုပ်ရေးလုပ်ငန်းများ ပိတ်မည်

အိန္ဒိယနိုင်ငံ နယူးဒေလီမြို့မှာ ကျောင်းတွေကို သီတင်းပတ် တပတ်နဲ့ ဆောက်လုပ်ရေး လုပ်ငန်းခွင်တွေကို လေးရက်ကြာ ပိတ်မယ်လို့ မြို့တော် ဝန်ကြီးချုပ်က နိုဝင်ဘာ ၁၃ ရက်မှာ ပြောပါတယ်။

နယူးဒေလီဟာ လေထုညစ်ညမ်းမှု အကြပ်အတည်း ပိုဆိုးလာနေလို့ ပြည်သူတွေကို ကာကွယ်ဖို့ ကြိုးစားနေတာပါ။

မြို့တော်အတွင်း အသွားအလာ လုံးဝ တားမြစ်ပိတ်ပင်မယ့် အလားအလာကို ဆက်လုပ်နေပြီး ဒါပေမယ့် ဗဟိုအစိုးရနဲ့ တိုင်ပင်အကြံယူပြီးမှ ဘယ်လိုဆုံးဖြတ်ချက်ကိုမဆို ချမှတ်မယ်လို့လည်း သူက ပြောပါတယ်။

မြို့တော်ပတ်လည်က လယ်မြေတွေမှာ ရိုးပြတ်တွေကို မီးရှို့နေလို့ မြို့တော်မှာ အဆိပ်သင့် မီးခိုး မြူထူတွေ ထူထပ်သိပ်သည်း နေတာပါ။

အိန္ဒိယရဲ့ ဂျုံခင်းလို့ ခေါ်တဲ့ ပန်ဂျပ်ပြည်နယ်က လယ်သမားတွေက သူတို့ကို အစိုးရက ဘယ်လိုလုပ်ရမလဲဆိုတဲ့ အဖြေကိုရော တခြားရွေးချယ်စရာကိုပါ မပေးဘဲ အမှိုက်တွေကို မီးရှို့ခိုင်းနေတယ်လို့ ပြောပါတယ်။

မြို့တော် နယူးဒေလီနဲ့ နယ်နမိတ် ထိစပ်နေတဲ့ လယ်မြေအများစုရှိရာ ပန်ဂျပ်နဲ့ ဟာယန ပြည်နယ်တွေက အမှိုက်မီးရှို့တဲ့ လုပ်ရပ်ဟာ အောက်တိုဘာနဲ့ နိုဝင်ဘာလတွေအတွင်း လေထု ညစ်ညမ်းမှုရဲ့ ၄၀ ရာခိုင်နှုန်းအထိ ဖြစ်စေတဲ့ ရင်းမြစ်လို့ လေထုအရည်အသွေး စောင့်ကြည့်ရေးဌာန ဆာဖှာကို ကိုးကားပြီး ရိုက်တာသတင်းဌာနက ဖော်ပြပါတယ်။

2 months Ago
More News
Up