လေကြောင်းတိုက်ခိုက်မှု

December 6, 2022

လေကြောင်းတိုက်ခိုက်မှုကြောင့် ညောင်လေးပင်ခရိုင်အတွင်း ပြည်သူ ၂၀,၀၀၀ ကျော်ထွက်ပြေး တိမ်းရှောင်

ကေအန်ယူနယ်မြေ ညောင်လေးပင်ခရိုင်အတွင်းက စစ်ကောင်စီတပ်စခန်း ၃ ခု အတိုက်ခံရပြီးနောက်ပိုင်း လေကြောင်းတိုက်ခိုက်မှုတွေပါ ထပ်မံလုပ်ဆောင်လာတဲ့အတွက် ရွှေကျင်နဲ့ ကျောက်ကြီးမြို့နယ်တွေက ဒေသခံပြည်သူတွေ ၂၀,၀၀၀ ကျော်ဟာ ဘေးလွတ်ရာ ထွက်ပြေးတိမ်းရှောင်နေရပါတယ်။

ကရင်အမျိုးသားအစည်းအရုံး(ကေအန်ယူ) တပ်မဟာ ၃ နယ်မြေ၊ ညောင်လေးပင်ခရိုင် အတွင်းမှာ ပြီးခဲ့တဲ့ နိုဝင်ဘာ ၁၂ ရက်က စစ်ကောင်စီရဲ့ သံဆိပ်စခန်း၊ ဘောကထာစခန်းနဲ့ တုံးတံတားစခန်းတွေကို တရက်တည်း ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း ၇၊ တပ်ရင်း ၉၊ Federal wings drone ပူးပေါင်းတပ်ဖွဲ့တွေက တိုက်ခိုက် ဖျက်ဆီးခဲ့ပါတယ်။

အဲဒီနောက်ပိုင်း ဒီဇင်ဘာ ၂ ရက်မှာ စစ်ကောင်စီတပ်တွေဟာ ညောင်လေးပင်ခရိုင်အတွင်းက မြို့နယ် ၃ ခုမှာ လေကြောင်းတိုက်ခိုက်မှု ၄ ကြိမ် ထပ်မံပြုလုပ်ခဲ့ပါတယ်။

လေကြောင်းကနေ ရွှေကျင် (ဆောထိ) မြို့နယ် စော်သဲခီးကျေးရွာအုပ်စု ကဟီးဒေးကျေးရွာ အတွင်းကို ၂ ကြိမ်၊ လယ်ဝါးကျေးရွာအုပ်စု လယ်ဝါးကျေးရွာအတွင်းကို ၁ ကြိမ်၊ ကျောက်ကြီး (လယ်ဒို) မြို့နယ် ကွီးလားကျေးရွာအတွင်းကို ၁ ကြိမ် စုစုပေါင်း ဗုံး ၈ လုံး ကြဲချခဲ့ရာ ၅ လုံးသာ ပေါက်ကွဲခဲ့ပါတယ်။

စစ်ကောင်စီရဲ့ လေကြောင်းတိုက်ခိုက်မှုတွေကြောင့် အရပ်သားပြည်သူ ၂၀,၀၀၀ ကျော်ဟာ  ဘေးလွတ်ရာ ထွက်ပြေးတိမ်းရှောင်နေရလို့ အခက်အခဲတွေနဲ့ ကြုံနေရပြီး အကူအညီတွေ လိုအပ်နေတယ်လို့ ကရင်လူမှုရေးရာအဖွဲ့ တာဝန်ရှိသူက ပြောပါတယ်။

စစ်ကောင်စီတပ်က လေကြောင်းတိုက်ခိုက်ပြီးနောက် ည ၈ နာရီခွဲလောက်မှာ ခမရ ၅၉၈ တပ်ရင်းကနေ ရွှေကျင် (ဆောထိ) မြို့နယ် ဇလုပ်ကြီးကျေးရွာအတွင်းကို လက်နက်ကြီး လက်နက်ငယ်တွေနဲ့ ထပ်မံပစ်ခတ်ခဲ့သလို ဒီဇင်ဘာ ၃ ရက် မနက် ၂ နာရီကျော်လောက်က ကျေးရွာအတွင်းကို လက်နက်ကြီးတွေနဲ့ ထပ်မံပစ်ခတ်ခဲ့ပါတယ်။

တပ်မဟာ ၃ နယ်မြေ၊ ညောင်လေးပင်ခရိုင်အတွင်းက မြို့နယ် ၃ မြို့နယ်က အရပ်သားပြည်သူ ၁ သိန်းကျော်ဟာ စစ်ကောင်စီရဲ့ လေကြောင်းတိုက်ခိုက်မှု အပါအဝင် အကြမ်းဖက်တာတွေ ဆက်လက်လုပ်ဆောင်လာမှာကို နေ့စဉ် စိုးရိမ်ထိတ်လန့်နေပါတယ်။

အာဏာသိမ်းစစ်ကောင်စီဟာ သူတို့ရဲ့အာဏာ ဆက်လက်တည်မြဲရေးအတွက် ကိုယ်ကျိုးစီးပွား မဆုံးရှုံးရအောင် လက်ရှိလုပ်နိုင်သမျှ အကုန်လုပ်နေမှာပဲလို့  ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၅ ပြောရေးဆိုခွင့်ရှိသူ  ဗိုလ်မှူးကြီးစောကလယ်ဒိုက ဒီဗွီဘီကို ပြောပါတယ်။

စစ်ကောင်စီတပ်တွေဟာ တပ်မဟာ ၃ နယ်မြေအတွင်းမှာ အထိနာလာတဲ့အတွက်  အရပ်သား ပြည်သူတွေကိုပါ ပစ်မှတ်ထားပြီး ကျေးရွာတွေအတွင်းကို အင်အားတိုး စစ်ကြောင်းထိုးတာ၊ ဒရုန်းနဲ့ ကင်းထောက်လှမ်းပြီး ဗုံးကြဲတာ၊ လေယာဉ်နဲ့ ဗုံးကြဲတိုက်ခိုက်တာ၊ လက်နက်ကြီး ပစ်ခတ်တာ ဆက်တိုက်လုပ်ဆောင်နေပါတယ်။

တိုက်ပွဲတွေကြောင့် ညောင်လေးပင်ခရိုင် ကျောက်ကြီးမြို့နယ်မှာ စစ်ဘေးရှောင်ပြည်သူ ၁၇,၀၀၀ ကျော်ရှိပြီး မုန်းမြို့နယ်မှာ စစ်ဘေးရှောင်ပြည်သူ ၁၈,၀၀၀ ကျော်အထိရှိနေရာက အခုဆိုရင် စစ်ဘေးရှောင် ၂၀,၀၀၀ ကျော်ထပ်တိုးလာတယ်လို့ စစ်ဘေးရှောင်အရေး ကူညီပေးနေသူတွေဆီက သိရပါတယ်။

4 days Ago

December 1, 2022

ထီးချိုင့်မြို့နယ်တွင် စစ်ကောင်စီတပ်က ကျေးရွာများကို လေကြောင်းမှတိုက်ခိုက်

စစ်ကိုင်းတိုင်း၊ ထီးချိုင့်မြိုနယ်အတွင်းရှိ ကျေးရွာတွေကို စစ်ကောင်စီတပ်က  နိုဝင်ဘာ ၃၀ ရက် ည ၉ နာရီကျော်လောက်က လေကြောင်းတိုက်ခိုက်ခဲ့တယ်လို့ ဒေသခံတွေက ပြောပါတယ်။

လေသာ၊ အလယ်တော၊ အင်းတိမ်၊ အင်ကြင်းကုန်းရွာတွေတဝိုက်ကို လေယာဉ်နဲ့ ပစ်ခတ်ခဲ့ပြီး လေသာရွာခေါင်းရင်းကို ဗုံးတလုံးချခဲ့တယ်လို့ ဒေသခံက  ဆိုပါတယ်။

ဒါ့အပြင် ဒီဇင်ဘာ ၁ ရက် ဒီနေ့မနက် ၉ နာရီလောက်မှာ စစ်ကောင်စီတပ် အင်အား ၂၀၀ ကျော်က လေသာကုန်းကို ထပ်မံ မီးရှို့ခဲ့တယ်လို့ ဒေသခံတဦးက ပြောပါတယ်။

“မနေ့က ညနေ သုံးနာရီကျော်ခန့်မှာ လေသာကို မီးစရှို့ပြီး ညဦးပိုင်းမှာ ဗုံးတလုံး ချသွားတယ်ဗျ။ ဗုံးက လေသာရွာထိပ်ကို ကျသွားတယ်ဗျ။ အခုက မနေ့က တခါရှို့ပြီးတာကိုမှ နောက်တခါ ရှို့နေပြန်ပြီဗျ။”

ပြီးခဲ့တဲ့ရက်ပိုင်းကစလို့ သခွပ်ရှောင်၊ ကျက်သရေချောင်း၊ ဆူးပုတ်ချောင်း၊ အင်ကြင်းကုန်း၊ အလယ်တော၊ အင်းတိမ်ရွာတို့ကို ဆက်တိုက်မီးရှို့ခဲ့ပြီး အခုရက်ပိုင်း မီးရှို့ခံရတာကြောင့် အလယ်တောက နေအိမ် ၈၆ လုံး၊ ဆူးပုတ်ချောင်က နေအိမ် ၄၀ လုံး၊ ကျက်သရေချောင်းက နေအိမ် ၁၅ လုံးအပြင် ကျွဲနွားတွေနဲ့ စပါးတင်းထောင်ချီ လောင်ကျွမ်းခဲ့တယ်လို့ Tigyaing Revolution က သတင်းထုတ်ပါတယ်။

လက်ရှိအချိန်ထိ ပတ်ပတ်လည်ကျေးရွာတွေမှာ စစ်ကြောင်းမရှိတော့ဘဲ လေသာကုန်းမှာပဲ အင်အားအလုံးအရင်း ကျန်ရှိနေပြီး လေသာရွာနဲ့ အနီးပတ်ဝန်းကျင်မှာရှိတဲ့ ဒေသခံထောင်နဲ့ချီ ဘေးလွတ်ရာကို ရှောင်တိမ်းနေကြရပါတယ်။

ပြီးခဲ့တဲ့ နိုဝင်ဘာ ၂၇ ရက်နဲ့ ၂၈ ရက်ကလည်း ဒေသခံ ကာကွယ်ရေးတပ်ဖွဲ့တွေနဲ့ တိုက်ပွဲဖြစ်ပွားခဲ့တာကြောင့် အလယ်တော၊ အင်ကြင်းကုန်း၊ အရှေ့တောကျေးရွာတွေကို လေကြောင်းက တိုက်ခိုက်ခဲ့ပါသေးတယ်။

1 week Ago
More News
Up