လူ ၁ ဦး သေဆုံး

February 24, 2017

ဟားခါးမြို့တွင် မီးလောင်မှုကြောင့် လူ ၁ ဦး သေဆုံး

ချင်းပြည်နယ်၊ ဟားခါးမြို့၊ ဈေးသစ်ရပ်ကွက်၊ ချယ်ရီလမ်းနဲ့  အ.ထ.က (၁) ဝန်ထမ်း အိမ်ရာကြားရှိ ဦးလျန်တီလ်ရဲ့နေအိမ်မှာ  ဖေဖော်ဝါရီ ၂၃ ရက် ည ၁၂ နာရီကျော်လောက်က မီးလောင်မှု ဖြစ်ပွားခဲ့ပါတယ်။ ဦးလျန်တီလ်နေအိမ်အပေါ်ထပ်မှာ အိမ်ငှားနေထိုင်တဲ့ ဦးရန်အောင်ကျော် (ခ) မောင်မောင်က မီးပျက်နေလို့ အိမ်အောက်ထပ်မှာ ငှားရမ်းနေထိုင်တဲ့ ဒေါ်ဆုန်သန်းထံက ဖယောင်းတိုင် တောင်းယူပြီး အိပ်ခန်းတွင်းထွန်းညှိထားရာမှ မီးစတင်လောင်ကျွမ်းခဲ့တယ်လို့ သိရပါတယ်။ မီးလောင်မှုကို အိမ်ငှားနေသူ ဦးရန်အောင်ကျော် (ခ) မောင်မောင်က တယောက်တည်း ငြှိမ်းသတ်နေရာမှ မီးအရှိန်ပြင်းပြီး ခန္ဓာကိုယ်မီးကူးကာ မီးလောင်သေဆုံးသွားခဲ့တာ ဖြစ်ပါတယ်။ အိမ်အောက်ထပ်မှာ ငှားရမ်းနေတဲ့ ဒေါ်ဆုန်သန်းတို့ မိသားစုကတော့ မီးလောင်တာ သိသိချင်း အိမ်ပြင်ထွက်ပြေးလို့ လွတ်မြောက်ခဲ့ပါတယ်။ မီးလောင်ကျွမ်းမှုကို မီးသတ်ယာဉ် ၆ စီး၊ အုပ်ချုပ်ယာဉ် ၁ စီး၊ မီးတပ်အင်အား ၃၀ ဦး၊ ရဲတပ်ဖွဲ့ဝင် ၁၅ ဦးနဲ့ ရပ်ကွက်နေပြည်သူတွေ ဝိုင်းဝန်းငြှိမ်းသတ်ခဲ့ရတယ်လို့ သိရပါတယ်။ မီးလောင်မှုကြောင့် ဦးလျန်တီလ်ရဲ့နေအိမ်အပါအဝင် ပတ်ဝန်းကျင်က သွပ်မိုးပျဉ်ကာ နှစ်ထပ်အိမ် ၂ လုံး၊ ဆိုင်ကယ် ၃ စီးတို့ကို မီးကူးစက်လောင်ကျွမ်းခဲ့ရာ စုစုပေါင်းငွေကျပ်သိန်း ၄၀ကျော် ဆုံးရှုံးခဲ့ပါတယ်။ မီးလောင်မှုနဲ့ပတ်သက်ပြီး မီးပေါ့ဆစွာ သုံးစွဲလို့ သေဆုံးခဲ့သူ ဦးရန်အောင်ကျော် (ခ) မောင်မောင်ကို ရာဇသတ်ကြီးဥပဒေပုဒ်မ ၃၀၄-က/၂၈၅ အရ ဟားခါးမြို့မရဲစခန်းက အမှုဖွင့် အရေးယူဆောင်ရွက်နေတယ်လို့ သိရပါတယ်။ သတင်း - အောင်ကိုလတ်
5 years Ago

January 15, 2017

လက်ပံတန်းတွင် ရေခဲစက် ဂက်စ်ပိုက်ပေါက်ကွဲ၍ လူ ၁ ဦး သေဆုံး

ပဲခူးတိုင်းဒေသကြီး၊ လက်ပံတန်းမြို့၊ မအူကုန်ရပ်ကွက် ကန်ကြီးလမ်းမှာရှိတဲ့ ဦးဇော်မင်းနိုင် ရေခဲစက်မှာအသုံးပြုတဲ့ ဂက်စ်ပိုက်  ဇန်နဝါရီ ၁၄ ရက် ညနေပိုင်းက ပေါက်ကွဲမှုကြောင့် စက်ပြင်ဆရာ ဦးဝင်းထိန် သေဆုံးခဲ့ရပါတယ်။ စက်ပြင်ဆရာသေဆုံးရတာနဲ့ ပတ်သတ်ပြီး လက်ပံတန်းမြို့မရဲစခန်းက သွားရောက်စစ်ဆေးရာ စက်ပြင်လုပ်သား ကိုအောင်ကိုဦးမှ မော်တာဖွင့်ပြီး အချင်း ၃ လက်မအကျယ်ရှိတဲ့ ပိုက်အတွင်းကို လေပို့လွှတ်ရာမှ လေဖိအားများသွားကာ လေဘာကွဲပြီး အချင်း ၆ လက်မရှိတဲ့ သံဘားကွင်းပြတ်ထွက်ကာ စက်ပြင်ဆရာရဲ့ ဘယ်ဘက်နားထင်ကို ထိမှန်ပြီး အခင်းဖြစ်နေရာမှာ သေဆုံးသွားတာလို့ တာဝန်ရှိသူတဦးက ပြောပါတယ်။ ဒီအမှုနဲ့ ပတ်သက်ပြီး စက်ပြင်လုပ်သား ကိုအောင်ကိုဦးကို လက်ပံတန်းမြို့မရဲစခန်းက (ပ)၄၆/၂၀၁၇ နဲ့ အမှုဖွင့်ပြီး ရာဇသတ်ကြီးပုဒ်မ ၃၀၄-(က) နဲ့ အရေးယူဆောင်ရွက်နေတယ်လို့ ဆိုပါတယ်။ သတင်းဓာတ်ပုံ - ၀ဏ္ဏထွန်း
5 years Ago
Up