လူ့အခွင့်အရေးချိုးဖောက်

April 8, 2021

စစ်တပ်ကျူးလွန်ထားသည့် လူ့အခွင့်အရေးချိုးဖောက်မှုသက်သေ ၂၇၀,၀၀၀ ကျော်ရှိဟု CRPH ထုတ်ပြန်

မြန်မာနိုင်ငံမှာ အာဏာသိမ်းစစ်တပ်နဲ့ရဲတပ်ဖွဲ့က ပြည်သူတွေအပေါ် လူ့အခွင့်အရေး ချိုးဖောက်မှု ကျူးလွန်ခဲ့တဲ့ သက်သေအထောက်အထားပေါင်း ၂၇၂,၂၀၉ ကျော်ကို လက်ခံရရှိထား တယ်လို့ ပြည်ထောင်စုလွှတ်တော်ကိုယ်စားပြုကော်မတီ(CRPH)က ထုတ်ပြန်ပါတယ်။

ဒီအထောက်အထားတွေအရ စစ်တပ်က အရပ်သား ပြည်သူလူထုကို နိုင်ငံအနှံ့ အ စီအစဉ်ချမှတ်ပြီး ကျယ်ကျယ်ပြန့်ပြန့် ပစ်မှတ်ထား တိုက်ခိုက်နေကြောင်း ပြသနေတယ် လို့ ထုတ်ပြန်ချက်ထဲမှာ ဖော်ပြပါတယ်။

ဧပြီ ၇ ရက်က မြန်မာနိုင်ငံ ဥပဒေရေးရာကိုယ်စားလှယ်တွေနဲ့ မြန်မာနိုင်ငံအတွက် လွတ်လပ်တဲ့ စုံစမ်းစစ်ဆေးမှု ဆိုင်ရာယန္တယား IIMM အဖွဲ့ အကြီးအကဲတွေ ပထမအ ကြိမ် တွေ့ဆုံမှု အပြီးမှာ ခုလိုထုတ်ပြန်ထားတာဖြစ်ပြီး ၂၀၂၁ ခုနှစ် ဖေဖော်ဝါရီ ၁ ရက်နေ့ နဲ့ အဲဒီနောက်ပိုင်း ကာလတွေမှာ စစ်တပ်က ကျူးလွန်တဲ့ ရက်စက်ကြမ်းကြုတ်မှုတွေနဲ့ ပတ်သက်ပြီး အပြန်အလှန် ဆွေးနွေးတာတွေ ပူးပေါင်းဆောင်ရွက်မှု နည်းလမ်းတွေကို ပြောဆိုခဲ့ကြတယ်လို့ ဆိုပါတယ်။

          ဒီလိုတွေ့ဆုံမှုကို တရားဝင် ပါလီမန်က ခန့်အပ်ထားတဲ့  ပြည်ထောင်စု လွှတ်တော် ကိုယ်စားပြုကော်မတီ(CRPH)ကတဆင့် ဆောင်ရွက်တာဖြစ်ပြီး ဆက်လက်ပြီးတော့ တွေ့ဆုံဆွေးနွေးမှုတွေအတွက်လည်း လာမယ့် ရက်တွေထဲ စီစဉ်ထားတယ်လို့ ဆိုပါ တယ်။

          ကုလသမဂ္ဂရဲ့ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှုယန္တရား (IIMM) ဟာ စစ်အာဏာသိမ်းတဲ့ ဖေဖော်ဝါရီ ၁ ရက်နေ့ကစတင်ပြီး မြန်မာနိုင်ငံမှာ ဖြစ်ပွားနေတဲ့ ဖြစ်ရပ်တွေကို အနီးကပ် စောင့်ကြည့်နေတာ ဖြစ်ပါတယ်။

လွန်ခဲ့တဲ့ ၂၀၁၁ ခုနှစ်မှစတင်ပြီး မြန်မာနိုင်ငံမှာ ဖြစ်ပွားခဲ့တဲ့ အကြီးလေးဆုံး နိုင်ငံ တကာရာဇဝတ်မှုတွေနဲ့ နိုင်ငံတကာဥပဒေချိုးဖောက်မှုတွေ ကျူးလွန်တဲ့ အထောက်အထားတွေကို ထိန်းသိမ်းပြီး စိစစ်သုံးသပ်ဖို့ မြန်မာနိုင်ငံဆိုင်ရာယန္တရားကို ကုလသမဂ္ဂ လူ့အခွင့်အရေးကောင်စီက ၂၀၁၈ ခုနှစ်မှာ ဖွဲ့စည်းတည်ထောင်ခဲ့တာ ဖြစ်ပါတယ်။

ဒီယန္တရားက သက်သေအထောက်အထားတွေကို စိစစ်သုံးသပ်ဖို့နဲ့ နိုင်ငံအဆင့် ဒါမှမဟုတ် နိုင်ငံတကာတရားရုံးတွေမှာ ရာဇဝတ်မှုကျူးလွန်မှုအတွက် တာဝန်ရှိတဲ့ လူပုဂ္ဂိုလ်တွေကို တရားစွဲဆိုမှုတွေပြုလုပ်ရာမှာ လွယ်ကူချောမွေ့စေဖို့ အထောက်အကူပြုတဲ့ အမှုတွဲတွေကိုလည်း တည်ဆောက်ပိုင်ခွင့်ရှိတယ်လို့ ဆိုပါတယ်။

1 week Ago

April 7, 2021

မြန်မာစစ်အုပ်စုကို လူ့အခွင့်အရေးချိုးဖောက်သူများအဖြစ် ဂျပန်လွှတ်တော်အမတ်များသတ်မှတ်

ဂျပန်အနေနဲ့ နိုင်ငံရပ်ခြားမှာ လူ့အခွင့်အရေးချိုးဖောက်နေသူတွေကို အရေးယူအပြစ်ပေး နိုင်မယ့် ဥပဒေမူကြမ်းကို လွှတ်တော်မှာ အတည်ပြုနိုင်ရေးအတွက် အရေးယူပိတ်ဆို့နိုင်ရေး ဥပဒေကြမ်းတခုကို ရေးဆွဲတင်ပြ ကြားနာပွဲကို တိုကျိုမြို့ ချီယိုဒရှိ လွှတ်တော်အမတ်များ အဆောက်အုံအမှတ်(၁)မှာ ဧပြီလ ၆ ရက်နေ့က ပြုလုပ်ခဲ့ပါတယ်။

“ဂျပန်လွှတ်တော်အမတ်တွေအနေနဲ့  အာဏာသိမ်းမြန်မာစစ်အုပ်စုကို လူ့အခွင့်အရေး ချိုးဖောက်သူတွေအဖြစ် ပဲသတ်မှတ်ထားပြီး အစိုးရတရပ်အဖြစ်မသတ်မှတ်ဘူး။ ဒါကြောင့် ဒီဥပဒေ မူကြမ်းကိုလွှတ်တော်မှာ အတည်ပြုနိုင်ရေးအတွက်ဒီနေ့ ပါတီပေါင်းစုံ စုဝေးအတည်ပြုရယူ ကြတာမှာ မြန်မာနိုင်ငံမှာလည်း လူ့အခွင့်အရေးအကြီးအကျယ် ချိုးဖောက်နေတာတွေရှိတာကြောင့် ကျနော်တို့ကို သူတို့က ခေါ်ပြီးတင်ပြဆွေးနွေးစေတာပါ”လို တက်ရောက်တင်ပြခဲ့သူ ဦးသန်းဆွေက ဒီဗွီဘီကိုပြောပါတယ်။

ကြားနာပွဲကို CRPH အထောက်အကူပြုကော်မတီ (ဂျပန်)အဖွဲဝင်နဲ့ ပြည်ထောင်စု မြန်မာနိုင်သားများအသင်း(ဂျပန်)ဥက္ကဋ္ဌ ဦးသန်းဆွေနဲ့ မြန်မာ့အရေးဆောင်ရွက်နေတဲ့ ကုလသမဂ္ဂ UNHCR ပြည်သူ့ဆက်ဆံရေးကိုယ်စားလှယ် Shibuya ဇာနည်တို့က လက်ရှိ မြန်မာနိုင်ငံမှာ အာဏာသိမ်းစစ်အုပ်စုက  နေ့စဉ်ပြည်သူတွေကို အကြမ်းဖက်သတ်ဖြတ်နေတာ ၅၀၀ ကျော်ရှိနေကြောင်း တင်ပြဆွေးနွေးခဲ့ပြီး CRPH ကိုသာ ဂျပန်အစိုးရ အနေနဲ့ အသိအမှတ်ပြု ဆက်ဆံဖို့ ပြောဆိုခဲ့ကြတာကိုလည်း တွေ့ရပါတယ်။

တင်ပြဆွေးနွေးခဲ့သူနောက်တဦးဖြစ်တဲ့ Shibuya ဇာနည် ကတော့ အခုမကြာခင် ဂျပန် ဝန်ကြီးချုပ် ဆုဂ က အမေရိကန်သွားပြီး သမ္မတ ဘိုင်ဒန်နဲ့ နိုင်ငံတကာလူ့အခွင့်အရေးဆိုင်ရာ အခြေအနေတွေ ဆွေးနွေးရာမှာ မြန်မာနိုင်ငံအကြောင်းလည်း ပါဝင်မှာမို့ ဒီနေ့ပွဲမှာ တင်ပြခွင့်ရတာ မြန်မာနိုင်ငံအတွက် အရမ်းကံကောင်းလှတယ်လို့လည်း ဒီဗွီဘီကိုပြောပြခဲ့ပါတယ်။

လူ့အခွင့်အရေးဆိုင်ရာ သံတမန်ဆက်ဆံရေးကို ပြန်လည်သုံးသပ်ဆွေးနွေးတဲ့ ပါတီပေါင်းစုံမှ ပါလီမန်အမတ်များအသင်းအဖွဲ့လို့ အမည်ပေးထားပြီး ပထမဆုံးအကြိမ် အစည်းအဝေးဖြစ်ကာ၊ ဂျပန်နိုင်ငံမှာ နိုင်ငံရေးဩဇာကြီးမားပြီး အာဏာရ LDP ပါတီခေါင်းဆောင်မစ္စတာအိချီဘ၊ ဂျပန် မြန်မာပါလီမန်အမတ်များ ချစ်ကြည်ရေးအဖွဲ့ဥက္ကဋ္ဌ မစ္စတာ အအိဆဝ၊ ကာကွယ်ရေး ဝန်ကြီးဟောင်း မစ္စတာ နခတန်နီ၊ အစိုးရ ရှေ့နေချုပ်ဟောင်း မစ္စယမအို ချီအိုရီတို့ပါတက်ရောက် ဦးဆောင်ဆွေးနွေးခဲ့ကြပါတယ်။

1 week Ago
Up