လူ့အခွင့်အရေး

September 21, 2021

မြန်မာ့ဒီမိုကရေစီနှင့် လူ့အခွင့်အရေးကို အားပေးထောက်ခံရန် အမေရိကန်သမ္မတကို တိုက်တွန်း

အမေရိကန်သမ္မတဂျိုးဘိုင်ဒန်ဟာ စက်တင်ဘာ ၂၁ ရက်မှာ ကုလသမဂ္ဂ အထွေထွေညီလာခံမှာ နိုင်ငံခြားရေး မူဝါဒတွေနဲ့ပတ်သက်ပြီး ပထမဆုံးအကြိမ် မိန့်ခွန်းပြောဖို့ ရှိနေပြီး မြန်မာနိုင်ငံရဲ့ ဒီမိုကရေစီနဲ့လူ့အခွင့်အရေးကို အားပေးထောက်ခံဖို့ လိုအပ်တယ်လို့ ဖို့ဘ်စ်မဂ္ဂဇင်းမှာ ရေးသား ဖော်ပြပါတယ်။

ထရမ့်အစိုးရကြောင့် ဆိုးဆိုးရွားရွား ကျဆင်းနေတဲ့ အမေရိကရဲ့  ကမ္ဘာလုံးဆိုင်ရာရပ်တည်မှုကို ပြန်လည်ရယူဖို့က သူ့ရဲ့ဦးစားပေးကိစ္စဖြစ်တယ်လို့ ပြောဆိုထားပါတယ်။ ဆယ်စုနှစ်ချီ ရက်စက်ကြမ်းကြုတ်တဲ့ စစ်အုပ်ချုပ်ရေးနဲ့ လူ့အခွင့်အရေးတွေကို စနစ်တကျ ချိုးဖောက်ခြင်းခံရတဲ့ မြန်မာနိုင်ငံ အပါအဝင် ကမ္ဘာတဝန်း အာဏာရှင်ဆန်မှုတွေ မြင့်တက်နေတဲ့ကြားမှာ ဒီမိုကရေစီကို ခုခံကာကွယ်မယ်လို့လည်း  ကတိပေးထားပါတယ်။ 

ကုလသမဂ္ဂမှာ ကမ္ဘာ့ခေါင်းဆောင်တွေကို မိန့်ခွန်းပြောကြားဖို့ စင်မြင့်ပေါ် တက်နေချိန်မှာ သမ္မတဘိုင်ဒန်အနေနဲ့ ပြတ်ပြတ်သားသားလုပ်ဖို့ လိုအပ်တဲ့ မြန်မာနိုင်ငံမှာ လက်ရှိဖြစ်ပွားနေတဲ့ လူ့အခွင့်အရေးအကျပ်အတည်းကို ရှုတ်ချဖို့ လိုအပ်တယ်လို့ဆိုပါတယ်။

ဒါ့အပြင် ဘိုင်ဒန်နဲ့ သူ့အစိုးရအဖွဲ့ဟာ မြန်မာနိုင်ငံက တရားမ၀င်စစ်ခေါင်းဆောင်တွေကို ကုလသမဂ္ဂကိုယ်တိုင်က သံတမန်ရေးအရ အသိအမှတ်ပြုခြင်းကို ငြင်းပယ်ထားကြောင်းကိုလည်း သေချာဖို့လိုအပ်တယ်လို့လည်း ဆိုပါတယ်။

ကုလသမဂ္ဂဆိုင်ရာ မြန်မာကိုယ်စားပြု သံတမန်နေရာအတွက် ဒီမိုကရေစီနည်းကျ ရွေးကောက်တင်မြှောက်ထားတဲ့ အမျိုးသားညီညွတ်ရေးအစိုးရ (NUG)မှ ကိုယ်စားလှယ်တဦး၊ စစ်ကောင်စီဘက်က ကိုယ်စားလှယ်တဦးတို့  အပြိုင်တင်ပြထားတာပါ။

မြန်မာစစ်တပ်ကို တရုတ်အစိုးရက ကာလကြာရှည် ထောက်ခံထားတာကြောင့် NUG ကိုယ်စားလှယ်ကို ပေကျင်းအစိုးရက ပိတ်ပင်ထားပါတယ်။

မြန်မာကိုယ်စားလှယ်နေရာ အပြိုင်တင်သွင်းမှုရှိလာတာကြောင့် အမေရိကန်အနေနဲ့ လက်ရှိ နေရာရထားတဲ့ NUG ကိုယ်စားလှယ် ဦးကျော်မိုးထွန်းကို ဆက်လက်ထောက်ခံပေးဖို့ လိုအပ်ပြီး ကုလအထွေထွေညီလာခံရဲ့ ဆွေးနွေးချက်တွေမှာလည်း လွတ်လွတ်လပ်လပ် ပါဝင်ခွင့်ပြုဖို့ လိုတယ်လို့ ဆိုပါတယ်။

တကယ်လို့ အမေရိကန်ဟာ မြန်မာနိုင်ငံက အာဏာရှင်စနစ်ကို ဆန့်ကျင်တယ်ဆိုရင် သမ္မတရဲ့ ပြောစကားတွေမှာ မြန်မာစစ်တပ်ကို လူ့အခွင့်အရေး ချိုးဖောက်နေခြင်းတွေကနေ အရေးယူမခံရဘဲ ပြစ်ဒဏ်ကင်းလွတ်နေတာကို ကြာရှည်လွှတ်ထားတော့မှာမဟုတ်ဘဲ အခုထက်ပိုပြီး ဖယ်ကြဉ်ခံရမယ်ဆိုတာကို ရှင်းလင်းပြတ်သားတဲ့ သတင်းစကား ပေးပို့မှာဖြစ်တယ်လို့လည်း ဆိုထားပါတယ်။

မြန်မာနိုင်ငံဟာ ဘိုင်ဒန်ရဲ့ဒီမိုကရေစီ အစီအစဉ်အတွက် အရေးကြီးတဲ့စမ်းသပ်မှုတစ်ခု ဖြစ်ပြီး ပိုမိုကျယ်ပြန့်တဲ့ နိုင်ငံတကာအသိုက်အဝန်းအတွက် အားဖြည့်ပေးထားတဲ့ အခြေခံမူတွေ ဖြစ်တယ်လို့ ဆိုပါတယ်။

2 days Ago

August 26, 2021

မြန်မာနိုင်ငံရှိ လူသားအားလုံး၏ လူ့အခွင့်အရေးနှင့် လူ့ဂုဏ်သိက္ခာကို ကာကွယ်ရန် အမေရိကန် တိုက်တွန်း

ရိုဟင်ဂျာတွေအပါအဝင် မြန်မာနိုင်ငံရှိ လူသားအားလုံးရဲ့ လူ့အခွင့်အရေးနဲ့ လူ့ဂုဏ်သိက္ခာကိုကာကွယ်ဖို့ အမေရိကန်ပြည်ထောင်စုက  ရခိုင်ပြည်နယ်အရေး  လေးနှစ်ပြည့်အထိမ်းအမှတ် ဩဂုတ် ၂၄ ရက်နေ့စွဲနဲ့ ထုတ်ပြန်တိုက်တွန်းလိုက်ပါတယ်။

နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် နက်ပရိုက်စ်က ပြောကြားရာမှာ လွန်ခဲ့တဲ့ ၄ နှစ်က မြန်မာစစ်တပ်ဟာ ရခိုင်ပြည်နယ်မြောက်ပိုင်းရှိ ရိုဟင်ဂျာတွေအပေါ် ကြောက်မက်ဖွယ် လူမျိုးတုံးသတ်ဖြတ်မှုကို စတင်လိုက်ပြီး အဲ့ဒီနေ့မှာပဲ စစ်တပ်ရဲ့ရက်စက်ကြမ်းကြုတ်မှုတွေကို နိုင်ငံတကာအသိုင်းအဝိုင်းက ထိတ်လန့်သိရှိခဲ့ရပါတယ်။

ရိုဟင်ဂျာတွေဟာ လူ့အခွင့်အရေးချိုးဖောက်မှုတွေကို ဆယ်စုနှစ်ချီခံစားခဲ့ရပြီး ယနေ့ထိ လည်း ဆက်လက်ကျူးလွန်ခံနေရဆဲ ဖြစ်ပါတယ်။ 

ဖေဖော်ဝါရီ ၁ ရက်က အာဏာသိမ်းလိုက်တဲ့ စစ်ခေါင်းဆောင်တွေကပဲ ဒီမိုကရေစီ လိုလားတဲ့ လှုပ်ရှားတက်ကြွသူတွေ၊ နိုင်ငံတစ်ဝန်းက တိုင်းရင်းသား၊ ဘာသာရေးလူမျိုးစုတွေ အပေါ် အခုအချိန်အခါမှာ မတရားမှုတွေကျူးလွန်နေကြသလို ရိုဟင်ဂျာလူမျိုးတွေအပေါ် ၂၀၁၇ ခုနှစ်တုန်းက အကြမ်းဖက်ခဲ့ကြတဲ့ ခြေမြန်တပ်ဖွဲ့တွေကပဲ အာဏာသိမ်းပြီးချိန်ကစလို့ ဒီမိုကရေစီ လိုလားတဲ့ ဆန္ဒပြသူတွေကို ရက်ရက်စက်စက် အကြမ်းဖက်ပြီးဒုက္ခပေးနေကြတာပါ။ 

အာဏာသိမ်းမှုနဲ့ စစ်တပ်ရဲ့ နောက်ဆက်တွဲ ဖိနှိပ်ဖြိုခွင်းမှုတွေကြောင့် ရိုဟင်ဂျာအပါအဝင် မြန်မာနိုင်ငံတစ်ဝန်းက ထိခိုက်လွယ်ပြည်သူတွေအတွက် နဂိုကတည်းက ယိုင်နဲ့နဲ့ ဖြစ်နေတဲ့ အခြေအနေကို ပိုပြီးဆိုးရွားစေခဲ့ပါတယ်။

မြန်မာနိုင်ငံအတွင်းမှာ အကူအညီလိုအပ်နေတဲ့ ပြည်သူတွေအားလုံးဆီကို လူသားချင်းစာနာမှု အကူအညီတွေ အဟန့်အတားမရှိ ရောက်ရှိဖို့ လိုအပ်တဲ့အကြောင်း အမေရိကန်ပြည်ထောင်စုက ဆက်လက်ပြီး အထူးအလေးထားပြောကြားပါတယ်လို့လည်း ဆိုပါတယ်။

မေလက ရိုဟင်ဂျာ လူသားချင်းစာနာထောက်ထားမှု အကျပ်အတည်းအတွက် ၂၀၂၁ ပူးတွဲတုံ့ပြန်မှုအစီအစဉ်ကို စတင်တဲ့အခါ အမေရိကန်ဟာ ဘင်္ဂလားဒေ့ရ်ှရှိ ရိုဟင်ဂျာ ဒုက္ခသည်တွေနဲ့ ပြည်တွင်းနေရပ်စွန့်ခွာသူများနဲ့ တခြားထိခိုက်နစ်နာသူများကို ကူညီပံ့ပိုးဖို့ ဒေါ်လာ ၁၅၅ သန်းနီးပါး အကူအညီသစ်တွေကို ကြေညာခဲ့ပါတယ်။ 

ရခိုင်ပြည်နယ်ရှိ ငြိမ်းချမ်းရေးတည်ဆောက်မှုနဲ့ လူမှုစည်းလုံးညီညွတ်ရေး လုပ်ငန်းတွေကို ပံ့ပိုးဖို့နဲ့ ပူးတွဲတုံ့ပြန်မှုအစီအစဉ်မှာပါဝင်ဖို့ နိုင်ငံတကာအသိုင်းအဝိုင်းကိုလည်း တိုက်တွန်း ထားပါတယ်။

အမျိုးသားညီညွတ်ရေးအစိုးရ NUG နဲ့ မြန်မာနိုင်ငံရှိ ဒီမိုကရေစီလိုလားတဲ့အဖွဲ့များက မျှော်မှန်းထားတဲ့ အားလုံးပါဝင်နိုင်တဲ့ ရှေ့ဆက်လမ်းကြောင်းကို ကြိုဆိုပါကြောင်းနဲ့ ရိုဟင်ဂျာ အခွင့်အရေးနဲ့ တခြားတိုင်းရင်းသားလူနည်းစုတွေရဲ့ အခွင့်အရေးတွေကို ကာကွယ်ဖို့ရည်ရွယ်တဲ့ လုပ်ဆောင်ချက်တွေထဲက ၁၉၈၂ နိုင်ငံသားဥပဒေကိုပြုပြင်ပြောင်းလဲဖို့ ကတိကဝတ်တွေကိုလည်း ကြိုဆိုကြောင်း ဖော်ပြထားပါတယ်။

အမေရိကန်ပြည်ထောင်စုဟာ ငြိမ်းချမ်းရေးနဲ့တရားမျှတမှု၊ အရေးတကြီးဖြစ်တဲ့ လူသားချင်း စာနာထောက်ထားမှုအကူအညီတွေ၊ ဒီမိုကရေစီလမ်းကြောင်းကိုပြန်ရောက်ဖို့နဲ့ လူ့အခွင့်အရေးနဲ့ အခြေခံလွတ်လပ်ခွင့်တွေကိုလေးစားပြီး အားပေးထောက်ခံကူညီဖို့ မြန်မာပြည်သူတွေနဲ့ ဆက်ပြီးလက်တွဲသွားမှာဖြစ်တယ်လို့လည်း ထုတ်ပြန်ကြေညာချက်ထဲမှာ ရေးသားထားပါတယ်။

4 weeks Ago
More News
Up