လူသားချင်းစာနာမှုအကူအညီ

January 21, 2022

လူသားချင်းစာနာမှုအကူအညီပေးရန်နှင့် လေယာဉ်မပျံသန်းရဇုန် သတ်မှတ်ပေးရန် KNU၊ KNPP နှင့် CNF တောင်းဆို

မြန်မာနိုင်ငံမှာ လူသားချင်းစာနာမှုအကူအညီအရေးတကြီးပေးဖို့ ကုလသမဂ္ဂ အထူးကိုယ်စားလှယ်ရဲ့ အဆိုပြုချက်ကို ကြိုဆိုထောက်ခံကြောင်းနဲ့ လေယာဉ်မပျံသန်းရဇုန် သတ်မှတ်ပေးဖို့တောင်းဆိုကြောင်း စစ်ကောင်စီနဲ့ တိုက်ပွဲဖြစ်ပွားနေတဲ့ တိုင်းရင်းသားလက်နက်ကိုင် အဖွဲ့ ၃ ဖွဲ့က ပူးတွဲ ထုတ်ပြန်လိုက်ပါတယ်။

ကရင်အမျိုးသားအစည်းအရုံး (ကေအန်ယူ)၊ ကရင်နီအမျိုးသားတိုးတက်ရေးပါတီ(ကေအန်ပီပီ) နဲ့ ချင်းအမျိုးသားတပ်ဦး (စီအန်အက်ဖ်) တို့က ဇန်နဝါရီ ၂၀ ရက်စွဲနဲ့ ပူးတွဲထုတ်ပြန်လိုက်တာဖြစ်ပြီး စစ်ကောင်စီတပ်တွေရဲ့ အကြမ်းဖက်မှုတွေကိုလည်း ရှုတ်ချထားပါတယ်။

ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးသံကိုယ်စားလှယ် မစ္စနိုလင်းဟေဇာဟာ ပြီးခဲ့တဲ့ ဇန်နဝါရီ ၁၃ ရက်က အာဆီယံ အလှည့်ကျဥက္ကဋ္ဌ ကမ္ဘောဒီးယားဝန်ကြီးချုပ် ဟွန်ဆန်နဲ့ တွေ့ဆုံပြီးနောက် မြန်မာနိုင်ငံမှာ လူသားချင်းစာနာမှုအကူအညီတွေ အရေးတကြီး ပေးနိုင်ဖို့အတွက် နိုင်ငံတကာလူသားချင်းစာနာထောက်ထားမှုအစီအစဉ်တွေနဲ့ ချဉ်းကပ်ဆောင်ရွက်မှု နည်းလမ်းတွေကိုပါ အဆိုပြုထားတာဖြစ်ပါတယ်။  

မြန်မာနိုင်ငံမှာ အာဏာသိမ်းစဉ်ကတည်းကစပြီး နိုင်ငံတဝန်း မြင့်တက်နေတဲ့ အကြမ်းဖက်မှုတွေ၊ ပစ်ခတ်တိုက်ခိုက်မှုတွေကြောင့် ပြည်သူလူထု ၃ သိန်းခွဲကျော် စစ်ဘေးရှောင်နေရကြတယ်လို့ ကုလသမဂ္ဂအေဂျင်စီ UNHCR က ထုတ်ပြန်ထားပြီး သူတို့အတွက် အရေးပေါ် လူသားချင်းစာနာထောက်ထားမှု အကူအညီတွေ  လိုအပ်နေတာပါ။

လူသားချင်း စာနာထောက်ထားမှုအကူအညီတွေ အရေးကြီးလိုအပ်နေတဲ့နေရာတွေဖြစ်တဲ့ မြန်မာနိုင်ငံအတွင်းပိုင်းရှိ ချင်း၊ ကချင်၊ ကရင်၊ ကရင်နီ၊ ရှမ်း၊ စစ်ကိုင်းနဲ့ မကွေးတိုင်းတို့က ပြည်သူတွေဆီ အကူအညီရောက်ရှိဖို့  ချဲ့ထွင်ဆောင်ရွက်ဖို့ လိုအပ်ကြောင်းလည်း တိုင်းရင်းသားလက်နက်ကိုင် ၃ ဖွဲ့က ထောက်ပြထားပါတယ်။

လက်ရှိ လူသားချင်းစာနာထောက်ထားမှုအကျပ်အတည်းအတိုင်းအတာဟာ မြန်မာပြည်သူတွေ ရင်ဆိုင်နေရတဲ့ နိုင်ငံရေးအကျပ်အတည်းနဲ့ ထပ်တူကျနေတဲ့အတွက် အရပ်သားပြည်သူတွေ တိုက်ခိုက်ခံရခြင်းကနေ ကာကွယ်နိုင်ရေးနဲ့ လူသားချင်းစာနာထောက်ထားမှု အကူအညီတွေ ပံ့ပိုးနိုင်ရေး မြန်မာနိုင်ငံမှာ စစ်ရေးအရ လေယာဉ်မပျံသန်းရဇုန် ကြေညာပြီး လိုက်နာမှုရှိအောင် နိုင်ငံကာက စောင့်ကျပ်ပေးဖို့လည်း တောင်းဆိုထားပါတယ်။

ဒါ့အပြင် နိုင်ငံတကာအာမခံမှုနဲ့ အရပ်သားပြည်သူတွေအတွက် အကာအကွယ်ပေးတဲ့ လုံခြုံသော နေရာတွေ(Safe Zone) သတ်မှတ်ပြီး ထောက်ပံ့ပေးရေး လိုအပ်တဲ့ ကျေးရွာတွေ၊ ပြည်တွင်းနေရပ်စွန့်ခွာသူ စစ်ဘေးရှောင် စခန်းတွေ၊ ဆေးရုံ၊ ဆေးခန်းနဲ့ စာသင်ကျောင်းကဲ့သို့သော နေရာကို တိတိကျကျသတ်ကြေညာဖို့လည်း တောင်းဆိုထားပါတယ်။

ဒါ့အပြင် နိုင်ငံတကာအတိုင်းတာနဲ့ ညှိနှိုင်းထားတဲ့ လူသားချင်းစာနာထောက်ထားမှုဆိုင်ရာ စင်္ကြံတွေ (Negotiated Humanitarian corridors) ကို ကြေညာပေးဖို့၊ အဲဒီနေရာဟာ ပိတ်ပင်တားဆီးခြင်းမရှိပဲ အကူအညီ လက်ခံရယူနိုင်တဲ့နေရာာတွေ ဖြစ်လာမှာဖြစ်ပါကြောင်းလည်း ဖော်ပြပါတယ်။

အဆိုပါ ထိုစင်္ကြံမှတဆင့် နယ်စပ် ဖြတ်ကျော် ဒါမှမဟုတ် နိုင်ငံတွင်း အဓိက ကျတဲ့နေရာတွေကတဆင့်  အကူအညီပေးရေးအဖွဲ့အစည်းတွေအနေနဲ့ အလိုအပ်ဆုံးဖြစ်တဲ့ နေရာကို သွားရောက်ပံ့ပိုးပေးပို့နိုင်မှာဖြစ်တယ်လို့လည်း ပူးတွဲကြေညာချက်မှာ ဖော်ပြထားပါတယ်။

5 days Ago

January 12, 2022

အာဖဂန်ကို လူသားချင်းစာနာထောက်ထားမှုအကူအညီ ဒေါ်လာ ၄ ဒသမ ၄ ဘီလီယံ ကုလပေးအပ်

အာဖဂန်နစ္စတန်နိုင်ငံရဲ့ လူသားဆိုင်ရာအကျပ်အတည်းကို တားဆီးဖို့ ကုလသမဂ္ဂက အကြီးမားဆုံးသော လူသားချင်းစာနာထောက်ထားမှုအကူအညီ ဒေါ်လာ ၄ ဒသမ ၄ ဘီလီယံ အစီအစဉ် ဇန်နဝါရီ ၁၁ ရက်မှာ စတင်ခဲ့ပါတယ်။

ကုလသမဂ္ဂက လက်ထောက်အတွင်းရေးမှူးချုပ် မာတင်ဂရစ်ဖင်စ်က “၂၀၂၂ အာဖဂန်နစ္စတန်အတွက် အကြီးမားဆုံး လူသားချင်းစာနာထောက်ထားမှုအကူအညီ စတင်တာပါ။ ကုလသမဂ္ဂအနေနဲ့ နိုင်ငံတနိုင်ငံကို အဲဒီလောက် များပြားတဲ့ပမာဏကို ပုံအောကူညီတာ ဒါ ပထမဆုံးပါ” လို့ ပြောပါတယ်။

ကုလသမဂ္ဂ ဒုက္ခသည်ဆိုင်ရာမဟာမင်းကြီး ဖိလစ်ပိုဂရန်ဒီကလည်း “အဓိက ဦးတည်ချက်ကတော့ ပြည်တွင်းရွှေ့ပြောင်းနေထိုင်နေရသူတွေကို ကူညီဖို့နဲ့ အခြေအနေတွေ တည်ငြိမ်စေဖို့ပါ။ ဒုက္ခသည်တွေ ပြည်ပမထွက်ခွာအောင် တားဆီးဖို့လည်း ရည်ရွယ်ပါတယ်” လို့ ပြောပါတယ်။

“တာလီဘန်နဲ့ ယခင်အစိုးရတွေကြားက ပဋိပက္ခ ပြီးဆုံးသွားပါပြီ။ အခု လုံခြုံရေး တိုးတက် ကောင်းမွန်လာတာက၊ ကျaeာ်တို့ ကူညီဖို့ အခွင့်အလမ်းပါပဲ။ လူသားချင်းဆိုင်ရာ အကူအညီတွေကတဆင့်  နိုင်ငံ့စီးပွားရေးကိုလည်း အထောက်အကူဖြစ်စေပါမယ်” လို့ ကုလမဟာမင်းကြီးက သတင်းစာရှင်းလင်းပွဲမှာ ပြောခဲ့ပါတယ်။

2 weeks Ago
More News
Up