လူဝံ

March 8, 2018

လူလို ဆေးလိပ် အားပါးတရ ဖွာရှိုက်နေသည့် လူဝံကြီးရုပ်သံ ထွက်ပေါ်

အင်ဒိုနီးရှားနိုင်ငံ တိရစ္ဆာန်ရုံတခုမှာ လူဝံကြီး ဆေးလိပ်သောက်တာကို ရုပ်သံရိုက်ခွင့်ပြုခဲ့တဲ့ ဝန်ထမ်းတွေကို တိရစ္ဆာန်အခွင့်အရေး လှုပ်ရှားသူတွေက ရှုတ်ချဝေဖန်လိုက်ပါတယ်။ ဘန်ဒေါင်းတိရစ္ဆာန်ရုံက လူဝံရုံထဲကို လာရောက်လည်ပတ်သူတဦးက စီးကရက်တလိပ် ပစ်သွင်းလိုက်ချိန် အသက် ၂၂ နှစ်အရွယ် အိုဒွန်ဆိုတဲ့ လူဝံကြီးက စီးကရက်ကို ကောက်ပြီး မပြတ်ဖွာနေပါတယ်။ အဲဒီမြင်ကွင်းရုပ်သံ ထွက်ပေါ်လာခဲ့ပြီးနောက် ဒီရုပ်သံက လူမှုကွန်ရက်ပေါ်မှာ အမြန် ပျံ့နှံ့သွားတယ်လို့ ဆိုပါတယ်။ တိရစ္ဆာန်ရုံဝန်ထမ်းတွေကတော့ အစောင့်ရဲ့ အားလပ်ချိန်မှာ ဒီလိုဖြစ်သွားတာလို့ ပြောပါတယ်။ အင်ဒိုနီးရှားနိုင်ငံဟာ ကမ္ဘာပေါ်မှာ ဆေးလိပ်သောက်နှုန်းမြင့်တဲ့ နိုင်ငံတွေထဲက တနိုင်ငံဖြစ်ပြီး တိရစ္ဆာန်တွေ ကာကွယ်ပေးရေးမှာလည်း ညံ့ဖျင်းတယ်လို့ မှတ်တမ်းရှိကြောင်း သိရပါတယ်။ တိရစ္ဆာန်ရုံရဲ့ ပြောရေးဆိုခွင့်ရှိသူ စူလန်က ဒီလိုပုံစံတွေမဖြစ်ဖို့ တိကျတဲ့ ဆောင်ရွက်ချက်တွေ ရှိတယ်လို့ ပြောလိုက်ပြီး “အဲဒီနေရာမှာ လာရောက်လည်ပတ်သူတွေအနေနဲ့ တိရစ္ဆာန်တွေကို အစားအစာနဲ့ စီးကရက်တွေ ပေးခွင့်မပြုဘူးလို့ ရေးထားတဲ့ ဆိုင်းဘုတ်တွေ ထားထားပါတယ်” လို့ ပြောပါတယ်။ အင်ဒိုနီးရှားနိုင်ငံ တိရစ္ဆာန်အခွင့်အရေး လှုပ်ရှားမှုအဖွဲ့တခုဖြစ်တဲ့ Indonesia Animal Welfare Society တည်ထောင်သူ မာရီဆန်ဂူစီရာနိုက ထိန်းသိမ်းမှုအားနည်းလို့ဆိုပြီး တိရစ္ဆာန်ရုံရဲ့ စီမံခန့်ခွဲမှုကို ဝေဖန်တိုက်ခိုက်လိုက်သလို တိရစ္ဆာန်ရုံတွေမှာ တိရစ္ဆာန်တွေအတွက် ကောင်းမွန်တဲ့ နေထိုင်မှုအဆင့်အတန်း မရှိဘူးလို့လည်း ပြောလိုက်ပါတယ်။ “လှောင်အိမ်တွေကစပြီး တိရစ္ဆာန်တွေ ကျန်းမာဖို့ လိုအပ်တဲ့ အစားအသောက် ကျွေးတာအထိ တိရစ္ဆာန်ရုံ အားလုံးလိုလိုက အခြေအနေ ဆိုးရွားနေတယ်” လို့ မာရီဆန်က ပြောပါတယ်။ ဘန်ဒေါင်းတိရစ္ဆာန်ရုံထဲက ဝက်ဝံတွေ ပိန်ပြီး အလည်လာသူတွေဆီက အစားအစာတောင်းတဲ့ရုပ်သံ လူမှုကွန်ရက်ပေါ် ထွက်ပေါ်လာပြီးတဲ့နောက် မြို့တော် ဂျကာတာရဲ့ အရှေ့တောင်ဘက် ၉၃ မိုင်အကွာမှာရှိတဲ့ ဒီတိရစ္ဆာန်ရုံကို ပိတ်ပစ်လိုက်ဖို့ တိရစ္ဆာန်အခွင့်အရေး ကာကွယ်ရေးသမားတွေက ၂၀၁၇ ခုနှစ်ကတည်းက တောင်းဆိုခဲ့ကြတယ်လို့လည်း ဘီဘီစီသတင်းမှာ မတ်လ ၇ ရက်နေ့က ဖော်ပြထားပါတယ်။
3 years Ago

September 15, 2017

မှောင်ခိုတင်သွားလာသည့် လူဝံလေး ၂ ကောင်ကို ထိုင်းက ထိန်းသိမ်းထား

တရားမဝင် မှောင်ခိုတင်သွင်းလာတဲ့ အသက် ၂ နှစ်သား စူမားတြား လူဝံလေး ၂ ကောင်ကို ထိုင်းနိုင်ငံအလယ်ပိုင်း ရပ်ခ်ျဘူရီခရိုင်ထဲက ခေါင့်ပရာတဘ်ချန် သားရိုင်းပျိုးထောင်ရေးဌာနမှာ စက်တင်ဘာ ၁၃ ရက်နေ့က ထိန်းသိမ်းထားပါတယ်။ လူဝံအထီးအမတစုံကို ဇွန်လက ပဒန်ဘေဆာ အကောက်ခွန် စစ်ဆေးရေးရုံးမှာ တခြား သားရိုင်းတိရစ္ဆာန်တွေနဲ့အတူ မှောင်ခိုသွင်းလာခဲ့တာလို့ ထိုင်းမီဒီယာတွေက အစီရင်ခံပါတယ်။ ဒီအမှုနဲ့ပတ်သက်ပြီး အသက် ၆၃ နှစ်အရွယ် မလေးရှားနိုင်ငံသားတယောက်ကို ဖမ်းထားပါတယ်။ လူဝံလေးတစုံဟာ ခုတော့ မွေးမြူရေးဌာနမှာ တခြား လူဝံပေါက်လေး ၂ ကောင်နဲ့အတူ ရှိနေပါတယ်။ “ဒီလူဝံတွေကို တရားရုံး အမှုပြီးတဲ့အထိ ဒီဌာနမှာ ထားမယ်၊ လူဝံတွေကို ပြန်ပို့စေချင်သလား ဆိုတာနဲ့ ပတ်သက်ပြီး အင်ဒိုနီးရှား အာဏာပိုင်တွေနဲ့ အဆက်အသွယ်ရတဲ့အထိ စောင့်မယ်" လို့ ဌာနဆိုင်ရာညွှန်မှူး ဘန်ပေါ့ မာလီးဟွမ်က ပြောပါတယ်။ သစ်ပင်တက်နိုင်တဲ့ ကမ္ဘာ့အကြီးဆုံး နို့တိုက်သတ္တဝါ လူဝံတွေဟာ မျိုးသုဉ်းမယ့်ဘေးနဲ့ အကြီးအကျယ် ရင်ဆိုင်နေရတဲ့ မျိုးစိတ်အဖြစ် အဆင့်သတ်မှတ်ခံထားရပါတယ်။ မျိုးသုဉ်းမယ့်ဘေးနဲ့ ရင်ဆိုင်နေရတဲ့ မျိုးစိတ်တွေ ကုန်ကူးမှုတားဆီးရေး နိုင်ငံတကာအဖွဲ့က ခုလို သတ်မှတ်ထားတာပါ။ ဒီလူဝံတွေဟာ အင်ဒိုနီးရှားနဲ့ မလေးရှားနိုင်ငံတွေမှာ သဘာဝအတိုင်း နေထိုင်ကျက်စားပါတယ်။ စူမားတြားလူဝံတွေဟာ တောနက်ထဲမှာ အကောင်ရေ ၆၆၀၀ ပဲ ကျန်တယ်လို့ ကမ္ဘာ့ သားရိုင်းတိရစ္ဆာန် ရန်ပုံငွေအဖွဲ့က ခန့်မှန်း ပြောဆိုပါတယ်။
4 years Ago
Up