လူနာအမှတ် ၁၉၁

June 3, 2020

ပုသိမ်မြို့က ကိုဗစ်-၁၉ လူနာအမှတ် ၁၉၁ နှစ်ကြိမ်ဆက်တိုက် ရောဂါပိုးမတွေ့ 

ဧရာဝတီတိုင်း၊ ပုသိမ်မြို့မှာ ကိုဗစ်-၁၉ ရောဂါ ပထမဆုံးစတင်တွေ့ရှိခဲ့တဲ့ လူနာအမှတ် ၁၉၁ ကို ဇွန်လ ၁ ရက်က  ဒုတိယအကြိမ်စစ်ဆေးခဲ့ရာမှာ  ရောဂါပိုးမတွေ့ရှိဘူးလို့ သိရပါတယ်။ လူနာအမှတ် ၁၉၁ ကို ဇွန်လ ၁ ရက်နေ့က ဓာတ်ခွဲ စစ်ဆေးမှု ဒုတိယအကြိမ် ပြုလုပ်ခဲ့တာဖြစ်ပြီး ဇွန်လ ၂ ရက်ည ဓာတ်ခွဲရလဒ်မှာ ရောဂါပိုးမတွေ့ဘူးဆိုတဲ့ အဖြေထွက်လာတာလို့ ပုသိမ်ပြည်သူ့ဆေးရုံအုပ်ကြီး ဒေါက်တာသန်းမင်းထွဋ်က ဒီဗွီဘီကို ပြောပါတယ်။ “ဒုတိယအကြိမ်စစ်တာတော့ ပိုးမတွေ့ဘူး အဖြေထွက်တယ်။ လူနာကတော့ ကျန်းမာရေးကောင်းတယ်။ ဖျားတာနာတာ မရှိဘူး။ တတိယအကြိမ်တော့ ထပ်စစ်သွားဦးမယ်” လို့ ပြောပါတယ်။ လူနာအမှတ် ၁၉၁ ဟာ မလေးရှားနိုင်ငံက ပြန်လာသူဖြစ်ပြီး မေလ ၁၉ ရက်နေ့က ရောဂါစတင်တွေ့ရှိခဲ့သူဖြစ်ကာ မေလ ၂၉ ရက်နေ့ ထပ်စစ်ချိန်မှာ ပိုးမတွေ့ပေမဲ့ စိတ်ချရအောင် ဇွန်၁ ရက်နေ့က စစ်ဆေးခဲ့တာဖြစ်ပြီး တတိယအကြိမ် ထပ်မံစစ်ဆေးသွားဖြစ်တယ်လို့ ဆိုပါတယ်။ လက်ရှိ ဧရာဝတီတိုင်းအတွင်း မလေးရှားနိုင်ငံကပြန်လာသူ နှစ်ဦး ကိုဗစ်-၁၉ ရောဂါပိုး ကူးစက်ခံထားရပြီး နှစ်ဦးစလုံးကို ပုသိမ်ပြည်သူ့ဆေးရုံကြီးရှိ သီးခြားကုသဆောင်မှာ ဆေးကုသပေးနေပါတယ်။ မင်းထက်မုန်း (ပုသိမ်)
1 year Ago

May 30, 2020

အတည်ပြုလူနာ အမှတ် ၂၀၇ မလေးရှားထောင်တွင် လူနာအမှတ် ၁၉၁ နှင့် အတူနေထိုင်ခဲ့သူဖြစ်

ဒုတိယအကြိမ် ဓာတ်ခွဲစစ်ဆေးရာမှာ ရောဂါပိုး တွေ့ရှိခဲ့တဲ့ အတည်ပြုလူနာသစ် အမှတ် ၂၀၇ ဟာ မလေးအကျဉ်းထောင်မှာ လူနာအမှတ် ၁၉၁ နဲ့အတူ နေထိုင်ခဲ့သူ ဖြစ်တယ်လို့ ပုသိမ်မြို့ ခုတင် ၅၀၀ ဆံ့ ဆေးရုံအုပ်ကြီး ဒေါက်တာသန်းမင်းထွဋ်က ပြောပါတယ်။ “Case 191 နဲ့ Case 207 က မလေးရှား အကျဉ်းထောင်မှာ အတူနေခဲ့တယ်။ လူက ကောင်းနေတယ်။ Contact တွေရှိတဲ့အခါကျတော့ swab ယူလိုက်တဲ့အခါကျတော့ ဒီနေ့ပဲ ရောဂါပိုးရှိတာ သိရပါတယ်။” အသွားအလာ ကန့်သတ်ထားတဲ့ လူနာအမှတ် ၂၀၇ ကို မေလ ၂၉ ရက်နေ့ညမှာ ပုသိမ်ဆေးရုံကို ပြောင်းရွှေ့ထားတယ်လို့ ဆိုပါတယ်။ “လူနာက ကျနော်တို့ ဧရာဝတီတိုင်းအတွက် ဒုတိယမြောက်လူနာ ဖြစ်ပါတယ်။ သူက မလေးရှားပြန်ပါပဲ။ မလေးရှားက ပြန်လာတာ ၁၁ ရက်နေ့က ကျနော်တို့ဆီ ရောက်ပါတယ်။ လေဆိပ်ကနေ ဆင်းတာနဲ့ ကားပေါ်တင်တက်ပြီး ပုသိမ်ကို ရောက်လာတာဖြစ်ပါတယ်။ ပုသိမ် Facility Quarantine ရောက်နေတာ ဖြစ်ပါတယ်။”  လူနာအမှတ် ၂၀၇ ဟာ မော်လမြိုင်ကျွန်းကဖြစ်ပေမယ့် မော်လမြိုင်ကျွန်းက လူတွေနဲ့ ထိတွေ့ထားတာ၊ မော်လမြိုင်ကျွန်းကို ပြန်ထားတာလည်း မရှိဘူးလို့ သိရပါတယ်။ လူနာအမှတ် ၂၀၇ ဟာ လက်ရှိအချိန်မှာ ဖျားနာတာ၊ ချောင်းဆိုးတာ၊ လည်ချောင်းနာတာ မောတာညောင်းတာ မရှိဘဲ လူကောင်းအတိုင်းပဲလို့ ဆေးရုံအုပ်ကြီးက ပြောပါတယ်။ လူနာအမှတ် ၂၀၇ ကို မေ ၁၈ ရက်နေ့မှာ ပထမအကြိမ် ဓာတ်ခွဲနမူနာ စစ်ဆေးခဲ့ပြီး ဒုတိယအကြိမ် မေ ၂၇ ရက်နေ့က ဒုတိယအကြိမ် ထပ်မံစစ်ဆေးခဲ့ရာမှာ ရောဂါပိုးတွေ့ရှိခဲ့တာပါ။ ဧရာဝတီတိုင်းကို မလေးရှားနိုင်ငံက ပြန်လာသူတွေ မေ ၁၁ ရက်နေ့က ရောက်ရှိခဲ့ပြီး ပုသိမ်တက္ကသိုလ် တေဇဆောင် Facility Quarantine မှာ ထားရှိပြီး စောင့်ကြည့်နေတာပါ၊
1 year Ago
Up