လူနာတင်ယာဉ်

A d v e r t i s e m e n t With Us

November 24, 2020

နောင်ချိုတွင် ကိုဗစ်-၁၉ လူနာများလာသဖြင့် လူနာတင်ယာဉ်နှင့် စေတနာ့ဝန်ထမ်းအင်အား လိုအပ်နေ

ရှမ်းပြည်နယ်မြောက်ပိုင်း၊ နောင်ချိုမြို့နယ်ရှိ ခြေမြစ်ပင်စစ်ဆေးရေးဂိတ်မှာ ကိုဗစ်-၁၉ ပိုးတွေ့ လူနာတွေ နေ့စဉ်တိုးလာနေပြီး ကုန်တင်ကားသမားတွေသာမက ဒေသခံတွေထဲမှာပါ ပိုးတွေ့လူနာတွေ များလာတာကြောင့် လူနာတင်ယာဉ်၊ စေတနာ့ဝန်ထမ်းအင်အားနဲ့ ရန်ပုံငွေပါ အခက်အခဲ တွေရှိလာနေပါတယ်။ စေတနာမွန်လူမှုကူညီရေးအသင်းက ကိုမြတ်မိုးအောင်က “အရင်က ကားသမားပဲ ပိုးတွေ့ခဲ့တာပါ။ ခု ဒေသခံတွေပါ ပိုးတွေ့လာပြီဆိုတော့ လူနာတင်ဖို့ကော ထိတွေ့သူတွေကို တင်ဆောင်ဖို့ လူနာတင်ယာဉ်အခက်အခဲရှိလာပါတယ်။ စေတနာ့ဝန်ထမ်းအင်အားလည်း မလုံလောက်တော့ဘူး။ ကွာရန်တင်းစင်တာမှာလည်း လူ ၁၂၉ ယောက်ရှိလာတော့ ကျွေးဖို့ ရန်ပုံငွေပါ အခက်အခဲရှိနေပါတယ်။”လို့ ပြောပါတယ်။ နောင်ချိုဟာ နယ်မြို့လေးတစ်မြို့ပေမယ့် ရှမ်းမြောက်တခုလုံးရဲ့ တာဝန်ကိုယူထားရတော့ ဝန်နဲ့အား မမျှဘူးဖြစ်လာပါတယ်။ ဒါကို ပြည်နယ်အစိုးရက လိုအပ်တာဖြည့်တင်းပေး စေချင်တယ်လို့လည်း ပြောပါတယ်။ နောင်ချို့မြို့နယ် ပြည်သူ့ဆေးရုံမှာ လက်ရှိ  ကိုဗစ်-၁၉ ပိုးတွေ့လူနာ ၈ ယောက်  တက်ရောက် ဆေးကုသမှုခံယူနေပြီး နေ့စဉ်ပိုးတွေ့ လူနာတိုးလာတာကြောင့် ဆေးရုံမှာလည်း နေရာ အခက်အခဲရှိလာနိုင်တယ်လို့ နောင်ချို ပြည်သူ့ကျန်းမာရေးဦးစီးဌာနက ဒေါက်တာ နိုင်ဝင်းအောင်က ပြောပါတယ်။ နောင်ချိုဆေးရုံဟာ ကိုဗစ်-၁၉  လူနာအများဆုံး ၁၀ ယောက်သာ  လက်ခံနိုင်ပြီး လူနာအရမ်းများလာလို့‌ နေရာမဆန့်ရင် ကျောက်မဲခရိုင်ဆေးရုံကိုပို့ဆောင်ရမှာဖြစ်သလို ကုသရေး ဆရာဝန်နဲ့ သူနာပြုအင်အားနည်းလို့ လူနာတိုးလာရင် အခက်အခဲရှိလာနိုင်တယ်လို့လည်း ပြောပါတယ်။ နောင်ချိုမှာ ကိုဗစ်-၁၉ ပိုးတွေ့လူနာ ၁၆ ယောက်ရှိပြီး ၈ ယောက်က ဆေးရုံမှာ တက်ရောက် ဆေးကုသမှုခံယူနေကြတာပါ။ ကျောက်မဲခရိုင်ဆေးရုံမှာတော့ လက်ရှိ ပိုးတွေ့လူနာ ၄ ယောက်ရှိပြီး  လူနာ အများဆုံး ၁၂ ယောက်အထိ  လက်ခံကုသနိုင်တယ်လို့ သိရပါတယ်။ နောင်ချို ခြေမြစ်ပင်စစ်ဆေးရေးဂိတ်မှာ ရှမ်းပြည်နယ်အဝင်အထွက် ယာဉ်မောင်းနဲ့ ယာဉ်နောက်လိုက် အယောက်  ၂၀၀ ကျော်ကို ကိုဗစ်-၁၉ ပိုးရှိမရှိ သက်ဆိုင်ရာက  နေ့စဉ် စစ်ဆေးပေးနေပါတယ်။ သတင်း- နန်းစပယ် ဓာတ်ပုံ- ဖြူစင်မေတ္တာလူမှုကူညီရေးအသင်း
2 months Ago

October 22, 2020

ရန်ကုန်မှပြန်လာသူများကို လိုက်ပို့သည့် လူနာတင်ယာဉ် ကျုံမငေးမြို့အဝင်ဂိတ်၌ စစ်ဆေးတွေ့ရှိ

ဧရာဝတီတိုင်း၊ ဝါးခယ်မမြို့နယ်၊ ကျုံမငေးမြို့မှာ အောက်တိုဘာ ၂၀ ရက်နေ့က ရန်ကုန်မှ ပြန်လာသူတွေကိုလိုက်ပို့တဲ့ လူနာတင်ယာဉ်တစ်စီးကို စစ်ဆေးတွေ့ရှိတယ်လို့  အုပ်ချုပ်ရေးမှူးက ပြောပါတယ်။ ကျုံမငေးမြို့မှာ နေထိုင်သူ ၄ ဦးကို ရန်ကုန်တိုင်းကနေ ပြန်လည်ခေါ်ဆောင်လာတဲ့ လူနာတင်ကားကို ကျုံမငေးမြို့အဝင်စစ်ဆေးရေးဂိတ်မှာ စစ်ဆေးတွေ့ရှိခဲ့တာဖြစ်တယ်လို့ ကျုံမငေးမြို့ အုပ်ချုပ်ရေးမှူး ဦးဇော်လင်းအောင်က ဒီဗွီဘီကိုပြောပါတယ်။ "လောလောဆယ်တော့ နေရပ်ပြန်လာတဲ့ ၄ ဦးကို ကွာရန်တင်းထားပါတယ်။ ယာဉ်မောင်းနဲ့ အကူ ၂ ယောက်ကို တခြားကွာရန်တင်းမှာ ထားပါတယ်။ လောလောဆယ်တော့ အရေးယူတာ မရှိပါဘူး"လို့ ပြောပါတယ်။ ရန်ကုန်တိုင်းက ပြန်လာတဲ့ အမျိုးသား ၂ ဦးနဲ့ အမျိုးသမီး ၂ ဦးဟာ စက်ရုံအလုပ်သမားတွေ ဖြစ်ပြီး ခေါ်လာတဲ့ယာဉ်က ပုသိမ်မြို့က လူနာတင်ယာဉ်ဖြစ်ပါတယ်။ အဆိုပါလူနာတင်ယာဉ်ဟာ အောက်တိုဘာ ၁၀ ရက်နေ့က ရန်ကုန်တိုင်းက ပြန်လာသူ တွေကို ခေါ်ဆောင်ဖို့ပြုလုပ်ပေးထားတဲ့ ထောက်ခံစာကို မိတ္တူကူးပြီး ခုလို ပို့ဆောင်တာတွေပြုလုပ်နေတာလို့ ပုသိမ်ပြည်သူ့ ဆေးရုံအုပ်ကြီး ဒေါက်တာ သန်းမင်းထွဋ်က ဒီဗွီဘီကိုပြောပါတယ်။ "ဆရာက ရန်ကုန်ပြန်တွေအတွက် အဲ့နေ့ တစ်ရက်စာပေးလိုက်တာ၊ အဲ့တာကို တစ်သက်လုံး အတွက်ထင်ပြီး စီးပွားရှာနေတာသိရတော့ စိတ်မကောင်းဘူး၊ ပေးတဲ့ထောက်ခံစာမှာတော့ ရက်စွဲပါတယ်၊ ခုထောက်ခံစာမှာ ရက်စွဲမပါဘူး၊ စေတနာတကယ်မှန်တယ်ဆို ကွာရန်တင်းစင်တာ တွေကို လိုက်ပို့သင့်ပါတယ်" လို့ ပြောပါတယ်။ ကိုဗစ်-၁၉ ရောဂါကာကွယ်ထိန်းချုပ်နိုင်ဖို့အတွက် တာဝန်ရှိသူတွေက ဆောင်ရွက်နေချိန်မှာ ခုလိုမျိုး ထောက်ခံစာကို မိတ္တူပွားပြီး ရန်ကုန်က ပြန်လာသူတွေကို နေအိမ်အရောက် လိုက်ပို့နေတာဟာ ရပ်ကွက် ကျေးရွာထဲ ဗုံးထောင်တာနဲ့ အတူတူဖြစ်နေတယ်လို့လည်း ဆိုပါတယ်။ သတင်း - မင်းထက်မုန်း (ပုသိမ်)
3 months Ago
Up