လူစုလူဝေး

October 4, 2020

အဖွဲ့အစည်းနှင့်ပါတီများ လူစုလူဝေးမလုပ်ကြရန် ကယားကျန်းမာရေးဦးစီးမှူး မေတ္တာရပ်ခံ

နိုင်ငံတော်ဖွံ့ဖြိုးတိုးတက်ရေးအတွက် ဦးဆောင်မှုပေးနိုင်တဲ့ ပါတီရွေးချယ်တဲ့နေရာ ရွေးကောက်ပွဲဟာ အရေးကြီးပေမယ့် လတ်တလောဖြစ်ပွားနေတဲ့ ကိုဗစ်-၁၉ ရောဂါ ကူးစက်ပြန့်ပွားမှု မရှိအောင် လူစုလူဝေး လုပ်ဆောင်တာတွေကို ရှောင်ရှားစေချင်တယ်လို့ ကယားပြည်နယ်ပြည်သူ့ကျန်းမာရေးဦးစီးဌာနမှူး ဒေါက်တာဌေးလွင်က ပြောပါတယ်။  “ဘယ်အဖွဲ့အစည်း၊ ဘယ်ပါတီပဲဖြစ်ဖြစ် လူစုလူဝေးနဲ့ လုပ်တဲ့ကိစ္စတွေ တတ်နိုင်သမျှ မဆောင်ရွက်ကြဖို့ ကျနော့်အနေနဲ့ မေတ္တာရပ်ခံချင်ပါတယ်။ ဒီတိုင်းပဲ ကျနော်တို့ မဲဆွယ်တာ ဘယ်သူပဲဖြစ်ဖြစ် ကျနော်တို့ ရွေးကောက်ပွဲကလည်း နီးလာပြီဆိုတော့ လုပ်တာလည်း လုပ်စေချင်ပါတယ်။ ဒါပေမဲ့ ဒီရောဂါကြီးက အဓိကဆိုတဲ့ဟာကို ပြောချင်ပါတယ်။ နောက်ဆုံး ပြောချင်တာက ဒီရောဂါ ကူးစက်ပြန့်ပွားခဲ့ရင် မဲတောင်မပေးလိုက်ရဘဲနဲ့ ဒုက္ခရောက်မယ့်ဟာတွေ မဖြစ်စေချင်တာပါ။ ကျနော်တို့ နိုင်ငံကြီး ဖွံ့ဖြိုးတိုးတက်ဖို့အတွက်ကို ဦးဆောင်မှုကောင်းကောင်းပေးနိုင်တဲ့ ပါတီတခုခု အစိုးရအဖွဲ့ဖွဲ့စည်းနိုင်ဖို့ ရွေးကောက်ပွဲကလည်း အရေးကြီးပါတယ်။ သို့သော် လတ်တလောဖြစ်နေတဲ့ ရောဂါကြီးနဲ့ ကူးစက်ပြန့်ပွားမှုမရှိအောင် အားလုံးလိုက်နာပေးကြပါလို့ ကျနော် ဒီနေရာကနေ တိုက်တွန်းလိုပါတယ်။ ” ၂၀၂၀ အထွေထွေရွေးကောက်ပွဲနီးလာတာနဲ့အမျှ ပါတီက မဲဆွယ်စည်းရုံးမှုတွေ လုပ်ဆောင်နေကြသလို တချို့ပါတီစည်းရုံး လှုံ့ဆော်မှုတွေမှာ လူထောင်နဲ့ချီ ပါဝင်နေတာ တွေ့ရပါတယ်။ ကိုဗစ်-၁၉ ကူးစက်ပြန့်ပွားမှု တနေ့တခြား မြင့်တက်လာချိန်မှာ လူ ၉၀ ထက် ပိုမစုဖို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပေမယ့် ပါတီစည်းရုံးမှုတွေ လုပ်ဆောင်ရာမှာ လူထောင်ချီပါဝင်နေတာဖြစ်ပါတယ်။  ကယားပြည်နယ်မှာ ကိုဗစ်-၁၉ အတည်ပြုလူနာ မတွေ့ရသေးပေမယ့် ဒီလူအစုလိုက်ထဲမှာ ပိုးပါလာခဲ့ရင် ထိန်းမနိုင်တဲ့ အခြေအနေရောက်သွားမှာကို စိုးရိမ်ကြောင်းလည်း ဒေါက်တာဌေးလွင်က ပြောပါတယ်။  “ကျနော်တို့ဆီမှ အခု ပိုးမတွေ့ဘူးဆိုတာ၊ ထိုင်းတွေ နိုင်ငံခြားပြန်တွေလည်း လာကြတယ်။ ကျနော်တို့ ပြည်တွင်းကနေလည်း လာကြတယ်။ ရန်ကုန်၊ မန္တလေး၊ နေပြည်တော်တွေ ရှိပါတယ်။ အခုချိန်မှာ မတွေ့သေးဘူးဆိုတာ လာတဲ့ထဲမှာ အင်မတန်ကံကောင်းနေလို့ ပိုးပါတဲ့လူမရှိသေးလို့ ကံကောင်းတာ။ အကယ်၍များ ဒီထဲမှာ တယောက် နှစ်ယောက်သော်လည်းကောင်း မဲဆွယ်စည်းရုံးရင်း၊ သွားရင်းလာရင်းနဲ့ တယောက်ယောက်ကနေ ကူးစက်ခဲ့မယ်ဆိုရင် အများကြီး ကူးစက်သွားမှာ ဖြစ်ပါတယ်။ ကျနော်တို့ ရောဂါကူးစက်ပြန့်ပွားမှု အဲဒီအချိန်ကျရင် ထိန်းသိန်းဖို့ တော်တော်ခက်မှာ ဖြစ်ပါတယ်။ ဒါကြောင့်မို့လို့ ကျန်းမာရေးနဲ့အားကစားဝန်ကြီးဌာနက ထုတ်ထားတဲ့ ညွှန်ကြားချက်တွေကို စနစ်တကျ လိုက်နာစေချင်ပါတယ်။ လူစုလူဝေးနဲ့ လုပ်တဲ့ဟာတွေကို တတ်နိုင်သမျှ ရှောင်စေချင်ပါတယ်လို့ ကျနော့်အနေနဲ့ ပြောလိုပါတယ်။” ကျန်းမာရေးနဲ့ အားကစားဝန်ကြီးဌာနကတော့ နိုင်ငံရေးပါတီတွေအနေနဲ့ ရွေးကောက်ပွဲဆိုင်ရာ စုဝေးဟောပြော မဲဆွယ် စည်းရုံးလုပ်ဆောင်ရာမှာ  လူ ၅၀ ဦးထက် မပိုစေဘဲ လုပ်ဆောင်ကြဖို့ စက်တင်ဘာ ၆ ရက်နေ့စွဲနဲ့ ထုတ်ပြန်ကြေညာထားပါတယ်။
1 year Ago

September 26, 2020

လူစုလူဝေးဖြင့်ပါတီဝန်းရံသူများ ခေတ္တရပ်တန့်ပေးရန် ဝက်လက်မြို့နယ်ဆရာဝန်ကြီး မေတ္တာရပ်ခံ

ဝက်လက်မြို့နယ်အတွင်း လူစုလူဝေးနဲ့ ပါတီဝန်းရံ ထောက်ခံကြသူတွေအနေနဲ့ ခေတ္တရပ်တန့်ထားပေးဖို့ မြို့နယ်ဆရာဝန်ကြီးက မေတ္တာရပ်ခံလိုက်ပါတယ်။ စစ်ကိုင်းတိုင်း၊ ဝက်လက်မြို့နယ်အတွင်းမှာ ကျေးရွာတွေက ပြည်သူတွေဟာ ကိုယ့်အစီအစဉ်နဲ့ကိုယ် ကား၊ ဆိုင်ကယ်၊ ထော်လာဂျီတွေနဲ့ နေ့စဉ်လိုလို ပါတီကို ဝန်းရံ ထောက်ခံနေကြတာတာပါ။ ဒီလို ဝန်းရံထောက်ခံနေကြတဲ့အတွက် ကိုဗစ်-၁၉ ကူးစက်မှာ စိုးရိမ်မှုရှိနေလို့ မြို့နယ်ဆေးရုံ ဆရာဝန်ကြီး ဒေါက်တာသန့်ဇင်လတ်က လူမှုကွန်ရက်ကနေပြီး ဝန်းရံထောက်ခံပွဲတွေ ခဏ ရပ်တန့်ပေးကြဖို့ မေတ္တာရပ်ခံလိုက်တာပါ။ “ကိုဗစ်ကူးစက်ခံရတဲ့ ဦးရေဟာ တရက်ထက်တရက် များလာတယ်။ ဒီလို လူစုလူဝေးကြီးထဲမှာ ကိုဗစ်ရှိတဲ့ လူတစ်ဦး ပါလာမယ်ဆိုရင် မတွေးရဲလောက်အောင် ကူးစက်ခံရမှာ။ ဒါကြောင့် ကျနော့်အနေနဲ့ အမုန်းခံပြီး ခဏရပ်တန့်ပေးဖို့ မေတ္တာရပ်ခံရတာပါ။”  ဝက်လက်မြို့နယ်အတွင်းမှာ ခရီးသွားရာဇဝင်လည်း မရှိ၊ အတည်ပြုလူနာနဲ့လည်း ထိတွေမှုမရှိတဲ့ ဘယ်ကနေ ကူးစက်မှန်းမသိတဲ့ ကိုဗစ်အတည်ပြုလူနာတစ်ဦး ရှိနေတဲ့အတွက်ကြောင့် ဒီရောဂါပိုးဟာ အချိန်မရွေး ကိုယ့်ဘေးမှာ ရှိနေသလို ခံစားနေရတဲ့အတွက်ကြောင့် စိုးရိမ်မိတယ်လို့လည်း ဆရာဝန်ကြီးက ဆိုပါတယ်။ NLD ပါတီက ပြည်သူ့လွှတ်တော်ကိုယ်စားလှယ်၊ ၂၀၂၀ ကိုယ်စားလှယ်လောင်လည်း ဖြစ်တဲ့ ဦးမြင့်သိန်းက “ကျနော်တို့အနေနဲ့ ကိုဗစ်ရောဂါကြောင့် မဲဆွယ်စည်းရုံးရေး တပတ်နားပြီးပါပြီ၊ ဒီနေ့ စပြီး စည်းရုံးရေးဆင်းတာပါပဲ။ ကျနော်တို့အစီအစဉ်နဲ့ ကား ၄ စီးကို လူသုံးဆယ် ကျော်လောက်လေးနဲ့ လှည့်ပြီး ကိုဗစ်-၁၉ စည်းကမ်းနဲ့အညီ စည်းရုံးတာပါ။ ဝန်းရံထောက်ခံသူတွေ ဆိုတာက ကျေးရွာတွေက သူတို့သဘောနဲ့ လုပ်ကြတာဆိုတော့ ကျနော်တို့အနေနဲ့ တားဆီးဖို့ ခက်ပါတယ်” လို့ ပြောပါတယ်။ ဝက်လက်မြို့နယ်အတွင်းမှာ စက်တင်ဘာ ၁၆ ရက်နေ့ကစပြီး လက်ဖက်ရည်ဆိုင်နဲ့ စားသောက်ဆိုင်တွေ ပါဆယ်စနစ်နဲ့ ရောင်းဖို့၊ ဘာသာရေး ပွဲလမ်းသဘင်နဲ့ ဝတ်ပြုဆုတောင်းမှုတွေ မလုပ်ဖို့၊ ခရီးသည်တင်ယာဉ်လိုင်းတွေ ယာယီပိတ်သိမ်းထားဖို့ ဒေသန္တရအမိန့်တွေလည်း ထုတ်ပြန်ထားတာ ဖြစ်သလို စစ်ကိုင်းတိုင်း ကိုဗစ်ကော်မတီကလည်း လူ ၃၀ ထက်ပိုပြီး စုဝေးခွင့်မပြုကြဖို့ ထုတ်ပြန်ထားပြီး ဖြစ်ပါတယ်။ မြန်မာနိုင်ငံအတွင်းမှာတော့ စက်တင်ဘာ ၂၅ ရက် ည ၈ နာရီအထိ ကိုဗစ်-၁၉ ကူးစက်ခံရသူ ဦးရေဟာ ၉၁၁၂ ဦးရှိပြီး သေဆုံးသူ ၁၇၄ ဦးရှိကာ၊ သက်သာပျောက်ကင်းလို့ ဆေးရုံက ဆင်းခွင့်ပြုသူပေါင်း ၂၅၁၇ ဦး ရှိတယ်လို့ သိရပါတယ်။ သတင်း - အောင်စံလင်း
1 year Ago
More News
Up