လူကျွံဘော

September 26, 2021

ဗီလာ၏အနိုင်ဂိုး လူကျွံဘောဖြစ်ကြောင်း မန်ယူနိုက်တက်နည်းပြဆိုးလ်ရှား ဝေဖန်

အက်စတွန်ဗီလာသွင်းယူခဲ့တဲ့ အနိုင်ဂိုးဟာ လူကျွံဘောဖြစ်ကြောင်း မန်ယူနိုက်တက်နည်းပြဆိုးလ်ရှားက ဝေဖန်လိုက်ပါတယ်။ 

မန်ယူအသင်းဟာ ဗီလာနဲ့ပွဲမှာ တစ်ဂိုးဂိုးမရှိနဲ့ ရူံးနိမ့်ခဲ့ပြီး ၈၈ မိနစ်မှာသွင်းယူခဲ့တဲ့ ဗီလာနောက်ခံလူ ကော့နေးဟက်စ်ရဲ့ဂိုးက လူကျွံနေတယ်လို့ နည်းပြ ဆိုးလ်ရှားက ဝေဖန်ခဲ့တာပါ။ 

“သူတို့ရသွားတဲ့ဂိုးက လူကျွံနေတာကြောင့် စိတ်ပျက်စရာဖြစ်ခဲ့တယ်ဆိုတာ ထင်ရှားပါတယ်။  ဒိုင်ရဲ့ဆုံးဖြတ်ချက်က ကျနော်တို့ကို ဆန့်ကျင်ခဲ့တဲ့အတွက် ကံမကောင်းခဲ့ပါဘူး” လို့ ပွဲအပြီးမှာ ဆိုးလ်ရှားက ပြောပါတယ်။ 

ဆက်လက်ပြီး ဘရူနိုင်ဖာနန်ဒက်စ် ပင်နယ်တီမဝင်ခဲ့တာနဲ့ ပတ်သက်ပြီး ဘောလုံးမှာဖြစ်တတ်ကြောင်း၊ ဘရူနိုဟာ ပင်နယ်တီကန်သွင်းမူမှာ ထူးချွန်သူဖြစ်ပြီး ခရစ္စတီယာနို ရော်နယ်ဒိုဟာလည်း ကမ္ဘာ့ဘောလုံးလောကမှာ ပင်နယ်တီဂိုးအများဆုံး သွင်းယူနိုင်သူဖြစ်လို့ ထူးချွန်သူဖြစ်ကြောင်း၊ ထူးချွန်သူ ၂ ဦးရှိပေမယ့် လွဲချော်ခဲ့တဲ့အပေါ်မှာတော့ စိတ်ပျက်မိကြောင်း နည်းပြ ဆိုးလ်ရှားက မှတ်ချက်ပေးခဲ့ပါတယ်။ 

ဘရူနိုဖာနန်ဒက်စ်ဟာ ယူနိုက်တက်အတွက် ပင်နယ်တီကန်သွင်းမှု ၂၃ ကြိမ်မှာ ဒုတိယအကြိမ်မြောက်လွဲချော်ခဲ့တာဖြစ်ပြီး ၂၀၂ဝ ပြည့်နှစ် အောက်တိုဘာလက ကစားခဲ့တဲ့ နယူးကာဆယ်နဲ့ပွဲမှာလည်း ပင်နယ်တီလွဲချော်ခဲ့ဖူးပါတယ်။

2 months Ago

December 30, 2019

လူကျွံဘော စည်းမျဉ်း ပြောင်းလဲသင့်ဟု ဂရေမီဆောင်းနက် ပြော

စူပါဆန်းဒေးမှာ ကစားခဲ့တဲ့ လီဗာပူးနဲ့ ဝုဗ်အသင်းတို့ရဲ့ ပွဲစဉ်အပြီး VAR နဲ့ ပတ်သက်တဲ့ အငြင်းပွားမှုတွေ ပိုမိုထွက်ပေါ်လာချိန်မှာ လူကျွံဘော စည်းမျဉ်းတွေကို ပြောင်းလဲသတ်မှတ်သင့်တယ်လို့ ဂရေမီဆောင်းနက်စ်က ပြောဆိုလိုက်ပါတယ်။ ဒီဇင်ဘာ ၂၉ ရက် ပွဲစဉ်မှာ လီဗာပူးအသင်းဘက်က ရရှိခဲ့တဲ့ဂိုးကို ကွင်းလယ်ဒိုင်က လက်ထိဘောအဖြစ် သတ်မှတ်ခဲ့ပေမယ့် VAR နဲ့ စစ်ဆေးပြီးချိန်မှာတော့ ဂိုးအဖြစ် ခွင့်ပြုခဲ့ပါတယ်။ ပထမပိုင်း ပြီးခါနီးမှာ ဝုဗ်အသင်းရဲ့ နက်တိုက ချေပဂိုး တဂိုး ပြန်သွင်းခဲ့ပေမယ့် ခန္ဓာကိုယ်အစိတ်အပိုင်းတခု အနည်းငယ် လူကျွံနေခဲ့တာကြောင့် ဒီဂိုးကို လူကျွံဘောအဖြစ်သာ ပြောင်းလဲသတ်မှတ်ခဲ့ပါတယ်။ “ဒီစနစ်ကို နားကိုမလည်နိုင်တော့ဘူး။ ကျနော်တို့ ဘောလုံးပွဲတွေက ဖျော်ဖြေမှုပေးတဲ့ လုပ်ငန်းတခု ဖြစ်ပေမယ့် အခု ကျနော်တို့ လုပ်နေတာတွေက လူတွေကို ပျော်ရွှင်မှုဖြစ်စေမယ့် ဂိုးတွေကို ငြင်းပယ်နေတာမျိုး ဖြစ်နေပါတယ်။ ကျနော်တို့ လုပ်သင့်တာကတော့ တိုက်စစ်မှူးရဲ့ ခန္ဓာကိုယ်အစိတ်အပိုင်းတခုခုကြောင့် လူကျွံဘောဖြစ်ရတယ် ဆိုတာကြီးကို ‌ပြောင်းလဲပစ်လိုက်ဖို့ပါပဲ” လို့ အားကစားအစီအစဉ်တင်ဆက်သူ ဆောင်းနက်စ်က ပြောပါတယ်။ “ကျနော်တို့ ဒီပုံအတိုင်း ဆက်သွားလို့မရပါဘူး။ အခုဆိုရင် ဒီစနစ်အပေါ် စိတ်ပျက် ဒေါသထွက်မှုတွေ ပိုပိုများလာပါပြီ” လို့လည်း သူက ပြောပါတယ်။ ဆောင်းနက်စ်ရဲ့ အဆိုကို လီဗာပူး ကစားသမားဟောင်း ဂျမီကာရေဂါကလည်း ထောက်ခံခဲ့ပြီးတော့ “VAR ကြောင့် ဂိုးတွေ ဆုံးရှုံးနေရပြီ” လို့ သုံးသပ်ပါတယ်။ VAR စနစ်ကို စတင်အသုံးပြုချိန်ကတည်းက အငြင်းပွားမှုများစွာ ဖြစ်ခဲ့ရတာပါ။ လက်ရှိ ပရီးမီးယားလိဂ်မှာ ခန္ဓာကိုယ်အစိတ်အပိုင်းတခုခု မသိမသာ အရှေ့ထွက်သွားလို့ လူကျွံဘောအဖြစ် သတ်မှတ်ခံရတဲ့ ဂိုးပေါင်းဟာလည်း ၂၂ ဂိုးအထိ ရှိခဲ့ပြီဖြစ်ပါတယ်။ ဒီဇင်ဘာ ၂၉ ရက်နေ့ ပွဲစဉ်မှာ နက်တိုရဲ့ဂိုးသာ ခွင့်ပြုခံခဲ့ရမယ်ဆိုရင် ပွဲပြီးရလဒ်ဟာ တမျိုးတဖုံ ပြောင်းလဲသွားဖို့ရှိခဲ့ပေမယ့် လူကျွံဘောအဖြစ်သာ သတ်မှတ်ခဲ့တာကြောင့် လီဗာပူးအသင်းဟာ ၁ ဂိုး ဂိုးမရှိဆိုတဲ့ ရလဒ်နဲ့ အောင်ပွဲခံနိုင်ခဲ့ပါတယ်‌။ “ဒီစနစ်က ရယ်စရာကြီးပါပဲ၊ တကယ်လည်း အလုပ်မဖြစ်ဘဲနဲ့ ဆုံးဖြတ်ချက်တွေဟာ ကျနော်တို့ကို သတ်နေသလိုပါပဲ။ VAR စနစ်က ဘောလုံးပွဲတွေကို ဆိုးကျိုးဖြစ်စေပြီးတော့ ဘယ်သူကမှလည်း ဒီစနစ်ကိုမကြိုက်ပါဘူး” လို့ ဝုဗ်အသင်းခေါင်းဆောင် ကော်နာကိုအာဒီက ပြောပါတယ်။ ဝုဗ်အသင်း နည်းပြ နူနိုကလည်း VAR စနစ်ကို ပျစ်ပျစ်နှစ်နှစ် ဝေန်ခဲ့ပြီးတော့ “ကွင်းထဲက ဆုံးဖြတ်ချက်တွေကို ကွင်းနဲ့ မိုင်ပေါင်းများစွာဝေးတဲ့နေရာ‌မှာရှိတဲ့ လူတွေက တီဗွီ စခရင်တခုကို ကြည့်ပြီး ချမှတ်ပေးနေပါတယ်။ တကယ်တော့ သူတို့မှာ ကွင်းထဲက ပြိုင်ပွဲအပေါ် ဘာခံစားမှုမှ ရှိမနေပါဘူး” လို့ ပြောဆိုခဲ့ပါတယ်။ လီဗာပူးနည်းပြ ယာဂန်ကလော့ကလည်း VAR အကြောင်း ဆွေးနွေးခဲ့သူစာရင်းမှာ ပါဝင်ခဲ့ပြီး “VAR ကို ဆုံးဖြတ်ချက်ချမှတ်ဖို့ အသုံးပြုနေကြတာပါ။ ကွင်းထဲက ဒိုင်အနေနဲ့ ကွင်းဘေးမှာ တပ်ဆင်ထားတဲ့ စခရင်ကို သွားကြည့်ပြီး ဆုံးဖြတ်တာက ပိုကောင်းမယ်လို့ ကျနော် ထင်ပေမယ့် ဒီလိုမျိုးသွားလုပ်တာမျိုး မတွေ့မိပါဘူး။ ဘာကြောင့်လဲ ဆိုတာတော့ ကျနော်လည်း သိပါဘူး” လို့ ပြောပါတယ်။ လီဗာပူးနဲ့ ဝုဗ် ပွဲစဉ်ဟာ VAR ကြောင့် အငြင်းပွားမှုကို ဖြစ်စေတဲ့ အခုသီတင်းပတ်ပွဲစဉ်တွေထဲက တခုသာ ဖြစ်ပြီးတော့ ခရစ္စတယ်ပဲလေ့စ်နဲ့ ဆောက်သမ်တန်၊ ဘရိုက်တန်နဲ့ ဘုန်းမောက်၊ နော့ဝှစ်နဲ့ စပါး၊ မန်စီတီးနဲ့ ရှက်ဖီးယူနိုက်တက်တို့ ပွဲစဉ်တွေမှာလည်း အငြင်းပွားဖွယ် ဆုံးဖြတ်ချက်တွေနဲ့ ဂိုးပယ်ဖျက်ခံရမှုတွေ ရှိခဲ့တယ်လို့ သိရပါတယ်။
2 years Ago
Up