လုံးခင်း

December 19, 2021

လုံးခင်းတွင် သံဘေလီတံတားပေါ် ၁၂ ဘီးယာဉ်ဖြတ်မောင်းစဉ် ထက်ပိုင်းကျိုးကျ

ကချင်ပြည်နယ်၊ ဖားကန့်မြို့၊ လုံးခင်းဒေသမှာ ဒီဇင်ဘာလ ၁၈ ရက်နေ့ညက ဘိလပ်မြေအိတ်တွေ တင်ဆောင်လာတဲ့ ၁၂ ဘီးကားတစီး ဖြတ်သန်းစဉ် တံတားကျိုးကျပြီး ဥရုချောင်းထဲကို ပြုတ်ကျသွားတယ်လို့ သိရပါတယ်။ 

ဒီဖြစ်စဉ်မှာ ယဉ်မောင်းနဲ့ ယာဉ်နောက်လိုက် အပါအဝင် လူတဦးတယောက်မျှ ပြင်းထန်တဲ့ ထိခိုက်ဒဏ်ရာတစုံတရာ မရှိဘူးလို့ ဒေသခံတွေက ပြောပါတယ်။

အခုကျိုးကျတဲ့ သံဘောင်ဘေလီတံတားကြီး သက်တမ်းရင့် ဆွေးမြည့်လာတာကြောင့် ကုန်တင်ယာဉ်နဲ့ အကြီးစားမော်တော်ယာဉ် ဖြတ်သန်းခွင့် မပြုထားပါဘူး။ 

ဒါ့အပြင် ကွန်ကရစ် သံကူ ဘေလီတံတားတစ်စင်းကို ၂၀၁၀ နောက်ပိုင်း ဆောက်လုပ်ပြီးစီးခဲ့ပြီး အိမ်သုံးနဲ့ လုပ်ငန်းသုံးယာဉ်အများစုက ကွန်ကရစ်ဘေလီတံတားမှာ သွားလာနေကြတာပါ။

ဒါပေမဲ့ ကြီးကြပ်စိစစ်မယ့်သူ မရှိသလို ညအချိန်တွေမှာ တံတားဟောင်းကို ကုန်တင်ကားတွေ အလွယ်တကူ ဖြတ်မောင်းတာကြောင့် အခုလို ကျိုးကျတာဖြစ်ပြီး ဒီဖြစ်စဉ်နဲ့ ပတ်သက်လို့ တစုံတရာ အရေးယူမှု မကြားသေးဘူးလို့ လို့ ဒေသခံတစ်ဦးက ပြောပါတယ်။ 

ဒီတံတားကို လုံးခင်ကျေးရွာအုပ်စုအတွင်းက ကလေးငယ်တွေ ကျောင်းသွားဖို့ အဓိက အသုံးပြုခွင့်ပေးထားခဲ့တာ ဖြစ်ပေမယ့် ကုန်တင်ကားတွေ အလွယ်တကူ ဖြတ်သန်းသွားတာကြောင့် မကြာခဏ ပြင်ဆင်မှုတွေ လုပ်နေရတယ်လို့ ဆိုပါတယ်။

အဲ့ဒီတံတားဟာ နှစ်ပေါင်း ၅၀ ထက်မနည်း သက်တမ်းရင့် သံဘောင်ဘေလီအမျိုးအစား ဖြစ်ပြီး ၂၀၁၉ ခုနှစ်ကလည်း အသေးစား ပြုပြင်မွမ်းမံထားပါတယ်။

ဥရုချောင်းဖြတ်ကျော် တည်ဆောက်ထားပြီး တချိန်က ဖားကန့်မြို့ကို မြန်မာပြည် အရပ်ရပ်က မော်တော်ယာဉ်တွေ ဖြတ်သန်းသွားလာကြရတဲ့ တံတားလည်း ဖြစ်ပါတယ်။ 

အခု ကျိုးကျပျက်စီးခဲ့တဲ့ တံတားရဲ့ တဘက်ကမ်းမှာ ကျောက်တူးဖော်ရေးဌာနရုံးနဲ့ လုံးခင်းကျေးရွာ အ.ထ.က ကျောင်းလည်း တည်ရှိနေတာကြောင့် မရှိမဖြစ်လိုအပ်တဲ့ တံတားလို့‌ ဒေသခံတွေက ပြောပါတယ်။

11 months Ago

July 1, 2021

ဖားကန့် လုံးခင်းကျေးရွာက ရဲ ၃ ဦးကို သေနတ် လက်လုပ်မိုင်းများနှင့်အတူ KIA ဖမ်းမိ

ကချင်ပြည်နယ်၊ ဖားကန့်မြို့၊ လုံးခင်းကျေးရွာအုပ်စုရဲစခန်းက ရဲအရာရှိ ၁ ဦးအပါအဝင် ရဲ ၃ ဦးကို ဇွန်လ ၃၀ ရက်နေ့က သေနတ် ၃ လက်၊ လက်လုပ်မိုင်းတွေနဲ့အတူ KIA က ဖမ်းမိခဲ့တယ်လို့ သိရပါတယ်။

လုံးခင်းကနေ ဖားကန့်မြို့ကို သွားတဲ့လမ်းရှိ ညီနောင်တံတားအနီးမှာ ညနေ ၄ နာရီလောက် ကားကို KIA က တားစစ်ဆေးရာကနေ ရဲတွေမှန်းသိလို့ ဖမ်းဆီးခဲ့တာလို့ ဒေသခံတွေက ပြောပါတယ်။

KIA တပ်သားတွေက ဖားကန့်မြို့အနီးတဝိုက်မှာ ရှိနေတတ်ပေမယ့် ခုလိုစစ်ဆေးတာမျိုး သိပ်မရှိသလို သတင်းအရ စစ်ဆေးတာမျိုးဖြစ်နိုင်ပြီး ဘယ်ကိုဖမ်းဆီးခေါ်ဆောင်သွားတယ်ဆိုတာတော့ မသိရသေးဘူးလို့ ဆိုပါတယ်။

လုံးခင်းကျေးရွာက ရဲ ၃ ဦးကို KIA ရဲ့ တပ်ရင်း ၄၄ က ဖမ်းဆီးခေါ်ဆောင်သွားတာလို့ ပြောဆိုမှုများရှိနေပေမယ့် DVB အနေနဲ့ သီးခြားအတည်ပြုနိုင်ခြင်း မရှိသေးပါဘူး။

ကချင်ပြည်နယ်၊ မြစ်ကြီးနားမြို့မှာ ဇွန်လ ၂၉ ရက်နေ့က ၂၁ မိုင်ဂိတ်ကို KIA ဘက်က ဝင်တိုက်ခဲ့ပြီးနောက်ပိုင်း စစ်ရဟတ်ယာဥ်တွေနဲ့ လာရောက်ပစ်ခတ်ခဲ့သလို ဒီကနေ့ မနက်ပိုင်းမှာလည်း နန့်ယားအခြေစိုက် အကြမ်းဖက်စစ်တပ်က KIA ဘက်ကို လက်နက်ကြီးတွေနဲ့ ပစ်ခတ်တာတွေ ပြုလုပ်နေတယ်လို့ ဒေသခံတွေက ပြောပါတယ်။

1 year Ago
Up