ရခိုင်ပြည်နယ်၊ စစ်တွေမြို့မှာ အခုရက်ပိုင်းအတွင်း စစ်ကောင်စီက တပ်အင်အားတိုးချနေပြီး နေအိမ်တချို့ကို ဝင်ရောက်စစ်ဆေး ရှာဖွေဖမ်းဆီးတာတွေ ပြုလုပ်နေတယ်လို့ ဒေသခံတွေက ပြောပါတယ်။

“ဟုတ်တယ်။ သင်္ကြန်ကို အကြောင်းပြပြီး စစ်ကောင်စီက စစ်တွေမြို့ပေါ်မှာ အင်အားတိုးချနေတယ်။ လမ်းသွားလမ်းလာတွေရဲ့ ဆိုင်ကယ်တွေကို စစ်တယ်။ နေအိမ်တချို့ကို ရှာဖွေ စစ်ဆေးတယ်။ ဖမ်းဆီးမှုတွေပါ လုပ်နေကြတာရှိတယ်” လို့ စစ်တွေဒေသခံတဦးက ပြောပါတယ်။

စစ်တွေမြို့တွင်းမှာ ဧပြီ ၁၀ ရက်နေ့ကစပြီး စစ်ကောင်စီတပ် အင်အားအများအပြား တိုးချဲ့ချထားပြီး မီးစက်ကြီးခွဆုံအနီးနဲ့ ပြည်နယ်ရဲတပ်ဖွဲ့မှူးရုံးရှေ့တွေမှာ လမ်းသွားလမ်းလာ ဒေသခံတွေရဲ့ ဆိုင်ကယ်ဘောက်တွေကို ရှာဖွေစစ်ဆေးနေတယ်လို့ စစ်တွေဒေသခံတွေက ပြောပါတယ်။

ဧပြီ ၉ ရက်နေ့ကလည်း စစ်တွေမြို့၊ ငပွန်းချေကျေးရွာ မွတ်ဆလင်ရာအိမ်မှူး ဦးဆီးဒီးအာမတ်နဲ့ ဦးအာဒူးရှုးကူး တို့နှစ်ဦးကို အေအေနဲ့ဆက်သွယ်တယ်ဆိုပြီး ဖမ်းဆီးသွားတယ်လို့ ဆိုပါတယ်။

စစ်တွေမြို့၊ တောကန်ကျေးရွာရှိ အေအေနဲ့ပတ်သက်တဲ့ နေအိမ်တအိမ်ကိုလည်း ရဲတပ်ဖွဲ့ဝင် ၄ ဦးနဲ့ စစ်တပ်အင်အား ၂၀ ဦးလောက်က ဝင်ရောင်ရှာဖွေပြီး မှတ်တမ်းဓာတ်ပုံတွေပါ ရိုက်ယူသွားတယ်လို့ ကျေးရွာဒေသခံတွေက ပြောပါတယ်။

“ရာအိမ်မှူး ၂ ဦးက အေအေနဲ့ ဆက်သွယ်တယ်ဆိုပြီး လာဖမ်းသွားတာ။ အခုထိ အဆက်အသွယ်မ မသေးပါဘူး။ တောကန်ကျေးရွာမှာ အေအေက တရားစစ်ဆေးတဲ့ နေအိမ်တစ်လုံးကိုလည်း စီးနင်းရှာဖွေပြီး မှတ်တမ်းဓာတ်ပုံတွေ ရိုက်သွားတာတွေ ရှိတယ်”လို့ ဒေသခံတစ်ဦးက ပြောပါတယ်။

စစ်ကောင်စီတပ်ဖွဲ့ဝင်တွေဟာ ဝါဘိုကျေးရွာနဲ့ တောကန်ကူးတို့ဆိပ်မှာ လက်ရှိ တပ်စွဲထားတာကြောင့် ကျေးရွာ ဒေသခံတွေ စိုးရိမ်နေကြပါတယ်။

လူဦးရေ ၇၀၀ လောက်ရှိတဲ့ ငပွန်းကျေးရွာမှာလည်း ရာအိမ်မှူ ၂ ဦး ဖမ်းဆီးသွားတာကြောင့် အနီးအနား ကျေးရွာဒေသခံတွေက စိုးရိမ်နေကြတယ်လို့ သိရပါတယ်။

မနေ့ညက ရန်ကုန်တိုင်း ခရမ်းမြို့မှာ ပေါက်ကွဲ ပစ်ခတ်တာတွေ ဖြစ်ပြီးနောက် ဒီနေ့မှာတော့ စစ်ကောင်စီတပ်တွေ အင်အားတိုးလာပြီး စစ်ဆေးတာတွေလုပ်နေတယ်လို့ ဒေသခံတွေက ပြောပါတယ်။

“ဒီမနက်ပိုင်းမှာ သုံးခွကနေ စစ်ကား ၂ စီးနဲ့ လူ ၃၀ ထပ်ရောက်လာတယ်။ မြို့အဝင်အထွက် အားလုံးကို စစ်နေတယ်။ အလယ်ရွာ စာသင်ကျောင်းမှာ တပ်စွဲလို့ ရွာသားတချို့လည်း ရှောင်နေကြရတယ်” လို့ ဒေသခံတယောက်က ပြောပါတယ်။

ခရမ်း-မောင်းမ-ဖားကူး-သပြေကုန်း-သန်လျင် စတဲ့ လမ်းကြီးတွေအပါအဝင် မြို့ဝင် မြို့ထွက်ကိုလည်း ပိတ်ဆို့ထားပြီး နှာခေါင်းစည်းစစ်တာ၊ လက်ကိုင်ဖုန်းစစ်တာတွေ လုပ်သလို ကားတွေကိုလည်း စစ်ဆေးနေတာလို့ ဆိုပါတယ်။

စစ်ကောင်စီတပ်တွေဟာ ခရမ်းချောင်းလမ်းအတိုင်း စက်လှေတွေနဲ့ ရွာတွေဘက်ကို သွားတာလည်း ရှိတယ်လို့ ဒေသခံတွေက ပြောပါတယ်။

မနေ့ညက ခရမ်းမြို့ အားကစားရုံမှာ ပေါက်ကွဲပြီးနောက် စစ်ကောင်စီတပ်တွေနဲ့ ခရမ်း ပြည်သူ့ကာကွယ်ရေးတပ်တို့ ပစ်ခတ်တာတွေ ဖြစ်ခဲ့တယ်လို့ ဆိုပါတယ်။

PDF ဘက်က ကျဆုံးသူ ၃ ယောက်ရှိတယ်လို့ သိရပြီး ဒီထဲက တယောက်ဟာ အထွေထွေအုပ်ချုပ်ရေး ဦးစီးဌာနက CDM ဝန်ထမ်းဖြစ်တယ်လို့ သိရပါတယ်။