လုယက်မှု

A d v e r t i s e m e n t With Us

July 5, 2020

ကျောက်ထုမြို့၌ နေအိမ်ဈေးဆိုင်အတွင်း ဝင်ရောက် လုယက်မှုဖြစ်

မကွေးတိုင်း ကျောက်ထုမြို့၊ ကုံငုံရပ်ကွက်ရှိ နေအိမ်ဈေးဆိုင်မှာ ဇူလိုင် ၄ ရက်၊ မွန်းတည့်ပိုင်းက ဆိုင်ကယ်စီးနင်းလာတဲ့ အမျိုးသား ၂ ဦးက ဆိုင်ပိုင်ရှင် အမျိုးသမီးကို ထိုးနှက်ပြီး ၂ ကျပ်သား ရွှေဆွဲကြိုးကို ဖြတ်ယူ လုယက်မှု ဖြစ်ပွားခဲ့တယ်လို့ ဆောမြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်မြင့်က ပြောပါတယ်။ “အလုပ်မဲ့ကလေးတွေက ကျနော့်အိမ်ရှေ့ မျက်နှာချင်းဆိုင် လက်ဖက်ရည်ဆိုင်၊ အလုအယက်ခံရတဲ့အိမ်နဲ့ မျက်စောင်းထိုး လက်ဖက်ရည်ဆိုင်မှာ ထိုင်နေပုံရတယ်။ ဒီအိမ်မှာလည်း မိသားစု သုံး လေးဦး ရှိတယ်။ သူ့ရဲ့ အဘွား၊ သမီးနဲ့ သမက်တွေက ဆိုင်ကယ်နဲ့ ထွက်သွားချိန်မှာ ဒီကလေးနှစ်ယောက်က ဆိုင်ကယ်နဲ့ ဝင်လိုက်တာ။” လုယက်ခံရတဲ့ ဈေးဆိုင်နဲ့ မျက်စောင်းထိုးရှိ လက်ဖက်ရည်ဆိုင်ကနေ ဆိုင်ကယ်နဲ့ထွက်လာတဲ့ လူငယ်နှစ်ဦးဟာ ဈေးဆိုင်ရှေ့မှာ ဆိုင်ကယ်ရပ်ပြီး အိမ်ထဲကိုဝင်လာကာ အိမ်ရှေ့ဈေးဆိုင်မှာ ခင်းကျင်းထားတဲ့ ကြက်သွန်ကို မယူဘဲ နေအိမ်တွင်းရှိ ကြက်သွန်ကို ယူမယ်လို့ ပြောဆိုပါတယ်။ အိမ်ထဲက ကြက်သွန်တွေက ရေစိုနေလို့ မကောင်းကြောင်းပြောတဲ့အခါ ခရမ်းချဉ် ၅၀ ကျပ်သား ယူမယ်ပြောလို့ ခရမ်းချဉ် ချိန်နေစဉ် လည်ကုပ်ကို ကိုင်ပြီး နေအိမ် မီးဖိုဆောင်ထဲ ဆွဲခေါ်လုယက်ခဲ့တာလို့ အသက် ၅၀ နှစ်အရွယ် ဆိုင်ပိုင်ရှင် ဒေါ်မိုးခိုင်က ပြောပါတယ်။ “လည်ကုပ်ကို ဆုပ်ဆွဲပြီးတော့မှ မီးဖိုထဲကို ဆွဲသွားပြီးတော့ ကိုယ်ပေါ်ကနေ ကားယားခွပြီးတော့ လည်ပင်းကိုညှစ်၊ မျက်နှာ၊ နှာခေါင်းကို ထိုးတော့ ကျမက တအားအော်တာ။ တစ်ယောက်က ပါးစပ်ကို အုပ်ထားတာ။ သူတို့က အလေးနဲ့ ထုမယ်လုပ်တော့ မထုခင်လေးမှာ အိမ်မှာမွေးထားတဲ့ခွေးက ကျမအပေါ် ခွစီးထားတဲ့ လူကို လုံးတယ်။ ကျမဆွဲကြိုးကို ဆောင့်ဆွဲယူတော့ လည်ပင်းတွေ ပြတ်ရှနေခဲ့တာ။ ဆိုင်ကယ်ပေါ် တက်ပြေးတာ ကျောက်ထုမြို့ဘက်ကို။” အဲဒီအမျိုးသား ၂ ဦးကို ကျောက်ထုမြို့ရဲစခန်းက ရာဇသတ်ကြီးပုဒ်မ ၄၅၂/၃၈၂ နဲ့ အမှုဖွင့်ကာ တရားခံဖမ်းဆီးနိုင်ရေး ဆောင်ရွက်နေတယ်လို့ ကျောက်ထုမြို့ရဲစခန်းမှူး ကျော်ကျော်မင်းလွင်က ပြောပါတယ်။ သတင်း - ကိုလင်း(ချောက်)၊ ဓာတ်ပုံ - ဦးကျော်မြင့်
8 months Ago

May 12, 2020

ပဲခူးမြို့တွင် လုယက်မှု၊ ခိုးမှုများ ခပ်စိပ်စိပ်ဖြစ်လာသဖြင့် ဒေသခံများစိုးရိမ် 

COVID-19 ကပ်ရောဂါဘေးကာလ ပဲခူးမြို့မှာ လုယက်မှု၊ ခိုးမှုတွေ ခပ်စိပ်စိပ် ဖြစ်လာတဲ့အပြင် မေလ ၁၁ ရက် နေ့လယ်ပိုင်းက ရွှေဆိုင်တဆိုင် လုယက်ခံ လိုက်ရပါတယ်။ မနေ့ နေ့လယ်ပိုင်းက ပဲခူးမြို့ သနပ္ပင်လမ်း ဘုရားဈေးနဲ့ မျက်နှာချင်းဆိုင်မှာရှိတဲ့ ယု ရတနာရွှေဆိုင်တဆိုင်မှာ လုယက်မှု ဖြစ်ပွားခဲ့ပါတယ်။ အဲဒီအရင် ရက်ကလည်း ပဲခူးမြို့အထွက် ကလိ မီးရထားသံလမ်းကုန်းနားမှာ ကားသမားတွေကို မနက် ၄ နာရီမထိုးခင်းအချိန်လောက်မှာ ရိုက်နှက်ပြီး ငွေကျပ် ၁၅ သိန်းလောက် အလုအယက်ခံလိုက်ရသေးတယ်လို့ ပဲခူးတိုင်း ဒေသကြီးလွှတ်တော် ပဲခူးမြို့နယ် မဲဆန္ဒနယ်မြေအမှတ် ၁  လွှတ်တော်ကိုယ်စားလှယ် ဦးညွှန့်ရွှေက ပြောပါတယ်။ ဒါ့အပြင် ဆိုင်ကယ်အခိုးခံ ရတာတွေလည်းဒီရက်ပိုင်းမှာ အများအပြား ဖြစ်နေပါတယ်။ ဒီလုယက်သူတွေဟာ ပြည်သူတွေ လိုက်လံဖမ်းဆီးတဲ့အခါ လမ်းကြောင်း ကျွမ်းကျင်ပြီး ပျောက်သွားတဲ့အတွက် ဒီလူတွေက ခိုးဆိုးနှိုက်ဂိုဏ်းကဖြစ်နိုင်သလို ဒေသခံလည်း ဖြစ်နိုင်တယ်လို့ မြို့ခံ‌တွေက ပြောပါတယ်။      ယု ရွှေဆိုင်ပိုင်ရှင်ရဲ့ ညီမဖြစ်သူ ဒေါ်နွယ်နီ က “မေလ ၁၁ ရက်နေ့ နေ့လည်က အမည်မသိ လူတယောက်က ဆိုင်ကယ်စက်မသတ်ပဲ ဆိုင်ရှေ့ရောက်လာပြီး ဆိုင်ဘယ်အချိန်ပိတ်လည်းလို့ မေးပြီး သူ့ရဲ့အင်္ကျီထဲမှာ အသင့်ပါလာတဲ့ ရဲတင်းနဲ့ ရွှေရောင်းဖို့ထည့်ထားတဲ့ မှန်ပေါင်ကို ထုခွဲပြီး ဝင်လုသွားခဲ့တာ”လို့ ပြောပြပါတယ်။ အဲဒီလုယက်သူမှာ ဆိုင်ရှင်ရဲ့ညီမနဲ့ လုံးထွေးသတ်ပုတ်စဉ် မှန်ပေါက်ကွဲရှလို့ သူ့ရဲ့လက်မှာ ဒဏ်ရာရသွားပြီး ရွှေကတော့ တမတ်သားဝန်းကျင် ရွှေဆွဲကြိုး ၃ ကုံး နဲ့ ဆွဲသီးတခု ပါသွားတယ်လို့ သိရပါတယ်။  အဲဒီလုယက်သူကို ပဲခူးမြို့ မြို့မရဲစခန်းက ရာဇသက်ကြီး ဥပဒေပုဒ်မ ၃၈၂ နဲ့ အမှုဖွင့်ထားပြီး ဖမ်းဆီးရမိရေး ဆောင်ရွက်နေပါတယ်။  ပဲခူးတိုင်း ဒုတိုင်းရဲတပ်ဖွဲ့မှူး ရဲမှူးကြီး ဇော်မင်းအောင်က “ရဲတပ်ဖွဲ့အနေနဲ့ကတော့ ပဲခူး တတိုင်းလုံးမှာရှိတဲ့ မြို့ပေါ်လူပြတ်တဲ့ နေရာတွေမှာ လှည့်ကင်း ဝပ်ကင်းတွေလုပ်ဖို့ ဈေးတွေက ရွှေဆိုင်တွေနားမှာဆိုရင်လည်း အရပ်ဝတ်နဲ့ လူမသိအောင် ရပ်ကင်းတွေလည်း ချထားပြီး တတိုင်းလုံးက မြို့တွေမှာ အရပ်ဝတ်တွေနဲ့ ရပ်ကင်းဝပ်ကင်းတွေ ချထားကာ လုံခြုံရေးကို အထူးဆောင်ရွက်နေတယ်”လို့  ပြောပါတယ်။ ပဲခူးမြို့ပေါ်မှာ အခုလို လုယက်မှုတွေ ခိုးမှုတွေ နေ့ခင်းကြောင်တောင် ရွှေဆိုင်တွေ အလုခံရတဲ့ အခြေအနေ အထိ ဖြစ်လာတဲ့အတွက် လုံးခြုံမှု မရှိတော့ဘူးဆိုပြီး ဒေသခံတွေကြားမှာ စိုးရိမ်နေပါတယ်။   သတင်း - အောင်စိုးမိုး 
10 months Ago
More News
Up