လိင်ပိုင်းဆိုင်ရာ နှောင့်ယှက်မှု

January 20, 2023

လိင်ပိုင်းဆိုင်ရာ နှောင့်ယှက်မှုများအတွက် ပြင်သစ်ဘောလုံးအဖွဲ့ချုပ် ဥက္ကဋ္ဌ အမှုဖွင့်ခံရ

ပြင်သစ်ဘောလုံးအဖွဲ့ချုပ် (FFF) ဥက္ကဋ္ဌ နိုအယ်လွေဂရပ်ကို အကျင့်စာရိတ္တနဲ့ လိင်ပိုင်းဆိုင်ရာ နှောင့်ယှက်မှုတွေအတွက် စုံစမ်းစစ်ဆေးဖို့ အမှုဖွင့်ခဲ့တယ်လို့ အစိုးရရှေ့နေရုံးက ပြောပါတယ်။

လိင်ပိုင်းဆိုင်ရာ နှောင့်ယှက်မှု စွပ်စွဲချက်တွေကို အရင်က ငြင်းဆိုခဲ့တဲ့ လွေဂရပ်ဟာ ပြီးခဲ့တဲ့သီတင်းပတ်က သူ့တာဝန်ကနေ နုတ်ထွက်ခဲ့ပြီး ဖိလစ်ပ်ဂျယ်လိုက ယာယီဥက္ကဋ္ဌအဖြစ် တာဝန်ယူခဲ့တယ်လို့ FFF က ပြောပါတယ်။

ဒီကိစ္စနဲ့ပတ်သက်လို့ လွေဂရပ်ကို မှတ်ချက်ပေးဖို့ အင်္ဂါနေ့ထိ ဆက်သွယ်လို့ မရသေးပါဘူး။ လွေဂရပ်က အမျိုးသမီးဝန်ထမ်း အများအပြားကို နှောင့်ယှက်ခဲ့တယ်လို့ စွပ်စွဲထားတဲ့အကြောင်း အစီရင်ခံခဲ့တဲ့ So Foot မဂ္ဂဇင်းကို အသရေဖျက်မှုနဲ့ တရားစွဲမယ်လို့ FFF က ပြောခဲ့အပြီး အားကစားဝန်ကြီးဌာနက စစ်ဆေးဖို့ ပြည်ထောင်စုစစ်ဆေးရေးအဖွဲ့ကို စက်တင်ဘာလက ညွှန်ကြားခဲ့ပါတယ်။

အသက် ၈၁ နှစ်အရွယ် လွေဂရပ်ဟာ ၁၉၉၈ ကမ္ဘာ့ဖလားဆုရှင် ပြင်သစ်ဘောလုံးသမား ဇီနက်ဒီဇီဒန်းကို ဝေဖန်မှုအတွက် ဘောလုံးသမားတွေနဲ့ နိုင်ငံရေးသမားတွေရဲ့ ပြစ်တင်ရှုတ်ချတာကိုလည်း ခံနေရပါတယ်။

FFF အကြီးအကဲအဖြစ် သူ့သက်တမ်းကုန်ဆုံးပြီးတဲ့နောက် ၂ နှစ်အကြာ ၂၀၂၆ ခုနှစ်အထိ ပြင်သစ်နည်းပြ ဒီဒီယာဒက်စ်ချမ့်ရဲ့ စာချုပ်ကို သက်တမ်းတိုးခဲ့တဲ့အတွက်လည်း သူဟာ ဝေဖန်ခံခဲ့ရပါတယ်။

2 months Ago

January 28, 2020

2.8K

လိင်ပိုင်းဆိုင်ရာ နှောင့်ယှက်မှု ဆန့်ကျင်ရေး ဟောလိဝုဒ်ဒရာမာရုပ်ရှင်-The Assistant(နမူနာ)

ဟောလိဝုဒ်ဒရာမာရုပ်ရှင်ကားတကားဖြစ်တဲ့ The Assistant ကို လာမယ့် ဇန်နဝါရီလ ၃၁ ရက်နေ့မှာ ရုံတင်ပြသသွားဖို့ ရှိနေပါတယ်။ ဒီရုပ်ရှင်ကိုတော့ ဟောလိဝုဒ်အမျိုးသမီးရုပ်ရှင်ဒါရိုက်တာ Kitty Green က ရိုက်ကူး ပုံဖော်ပေးထားတာဖြစ်ပြီး Bleecker Street ရုပ်ရှင်ထုတ်လုပ်ရေးက ဖြန့်ချိပေးသွားမှာ ဖြစ်ပါတယ်။ #MeToo လှုပ်ရှားမှုလို့ ပြောလိုက်တာနဲ့ ပရိသတ်တွေက အမျိုးသမီးတွေကို လုပ်ငန်းခွင်ထဲ လိင်ပိုင်းဆိုင်ရာ ထိပါးနှောင့်ယှက်မှုကို ဆန့်ကျင်တဲ့ လှုပ်ရှားမှုအဖြစ် သိကြပြီး ဖြစ်မှာပါ။ ဒီကားထဲမှာတော့ Jane ဆိုတဲ့ ကောင်မလေးတယောက်ဟာ ကောလိပ်ကနေ သိပ်မကြာသေးခင်ကမှ ကျောင်းပြီးထားခဲ့ပြီး ရုပ်ရှင်ထုတ်လုပ်သူတယောက် ဖြစ်လာဖို့ မျှော်မှန်းထားခဲ့တာပါ။ အဲဒီနောက်တော့ သူဟာ Assistant တယောက်အနေနဲ့ လုပ်ငန်းခွင်ထဲ ဝင်ရောက်ခဲ့ချိန်မှာတော့ တခြားသော Assistant တွေ နည်းတူ ရုံးထဲမှာ ကူညီလုပ်ကိုင်ပေးရတဲ့ အလုပ်တွေအပြင် ထင်မှတ်မထားတဲ့ အလွဲသုံးမှုတွေ၊ လိင်ပိုင်းထိပါးနှောက်ယှက်မှုတွေ၊ ခွဲခြားဆက်ဆံမှုတွေနဲ့ တခြားဘက်ခြမ်းကို တွေ့လာခဲ့ရချိန်မှာတော့ ဘာတွေ ကြုံတွေ့လာရမလဲ။ ဘာတွေ ဆက်ဖြစ်လာမလဲ။ ဒီအခြေအနေ အဖြစ်အပျက်တွေနဲ့အတူ အနိမ့် အမြင့်၊ အတက်အကျ ဇာတ်လမ်းဇာတ်ကွက်တွေနဲ့ ဘယ်လိုပုံဖော်ထားမလဲ ဆိုတာကိုတော့ ဒီကားထဲမှာ ရှုစားကြရမှာ ဖြစ်ပါတယ်။ ဒီကားထဲမှာ အမေရိကန်သရုပ်ဆောင်မင်းသမီး Julia Garner က ခေါင်းဆောင် ပါဝင်ထားခဲ့ပြီး သူနဲ့အတူ တခြားနာမည်ကြီးသရုပ်ဆောင်တွေ ဖြစ်ကြတဲ့ Matthew Macfadyen ၊ Kristine Froseth ၊ Makenzie Leigh နဲ့ Noah Robbins တို့က လည်း ပါဝင်ထားကြတာ ဖြစ်ပါတယ်။ ကြာမြင့်ချိန် ၈၅ မိနစ်ရှိတဲ့ ဒီကားထဲမှာ ပါဝင်တဲ့ ကြမ်းတမ်းတဲ့ တချို့ဇာတ်ဝင် ခန်းမြင်ကွင်းတွေ၊ ပြကွင်းပြကွက်တွေနဲ့ ပြောစကား Dialog တွေက အသက် ၁၇ နှစ အောက် ကလေးငယ်တွေ ကြည့်ရှုဖို့ မသင့်တော်တာမို့ ဒီကားကို ကြည့်မယ်ဆိုရင်တော့ မိဘအုပ်ထိန်းသူ ခွင့်ပြုချက် Guideline နဲ့မှ ကြည့်ရှုသင့်တဲ့ Restricted R အဆင့် သတ်မှတ်ထားပါတယ်။ နာမည်ကျော်ရုပ်ရှင်ဝေဖန်ရေးဝက်ဘ်ဆိုက်ဒ်တခုဖြစ်တဲ့ National Review မှာတော့ ဒီရုပ်ရှင်ကားဟာ သရုပ်ဆောင်မင်းသမီးတွေကို လိင်ပိုင်းဆိုင်ရာ မဖွယ်မရာ ပြုကျင့်မှုတွေ၊ အနိုင်ကျင့်စော်ကားမှုတွေနဲ့ စွပ်စွဲခံခဲ့ရတဲ့ နာမည်ကျော် ရုပ်ရှင်ထုတ်လုပ်သူတဦးဖြစ်တဲ့ ဟာဗေးဝိန်းစတိန်းအကြောင်းရုပ်ရှင်ဖြစ်တယ်လို့ ခေါင်းစီးတပ် ဖော်ပြထားပါတယ်။

3 years Ago