လားရှိုးမြို့နယ်

A d v e r t i s e m e n t With Us

October 27, 2020

လားရှိုးမြို့နယ်၌ အသက် ၆၀ ကျော်အရွယ်များ ကြိုတင်မဲ စပေးနေ 

ရှမ်းပြည်နယ်မြောက်ပိုင်း၊ လားရှိုးမြို့နယ်မှာ အသက် ၆၀ ကျော်အရွယ် မဲဆန္ဒရှင်တွေ စတင် ကြိုတင်မဲလာပေးနေ ကြပါတယ်။ ရပ်ကွက်မဲရုံတွေမှာ မဲဆန္ဒရှင်တွေအတွက် ကိုဗစ်-၁၉ ကပ်ရောဂါ ကာကွယ်ရေးအတွက် လက်ဆေးရန်ဘေစင်၊ ဟန်းဂျယ်လ်တွေ အပြင် mask မတပ်လာသူတွေအတွက်  mask တွေ ပြင်ဆင်ထားတာတွေ့ရပါတယ်။ ဒါပေမဲ့ မိုးရွာနေတဲ့အတွက်  မိုးကာတဲအတွင်း သက်ကြီးရွယ်အိုတွေ ခြောက်ပေမခြားပဲ မိုးခိုနေကြတာကို တွေ့ရသလို   မဲရုံဝန်ထမ်းတွေဟာ မဲလက်မှတ်တွေနဲ့ စာအိတ်တွေ  မိုးရေစိုမှာစိုးရိမ်နေကြပြီး၊ မဲလက်မှတ်တွေ အဆင်သင့်မဖြစ်သေးတာတွေ့ရပါတယ်။ သက်ကြီးရွယ်အိုတွေ  မဲရုံသို့မလာရောက်နိုင်ပါက ရပ်ကွက်ရွေးကောက်ပွဲမရှင်သို့ လာရောက် အကြောင်းကြားရင်  မဲရုံဝန်ထမ်းနှစ်ယောက်လွှတ်ပြီး မဲထည့်ဖို့စီစဉ်ပေးမှာဖြစ်တယ်လို့ လားရှိုးမြို့၊ ရပ်ကွက် ၁ ရွေးကောက်ပွဲကော်မရှင် အတွင်းရေးမှူးက ပြောပါတယ်။ လားရှိုးမြို့နယ် ရွေးကောက်ပွဲကော်မရှင် ဥက္ကဋ္ဌ ဦးစိုင်းဇော်မင်းကတော့ နိုဝင်ဘာ ၈ ရက် ရွေးကောက်ပွဲအတွက် ကိုဗစ် ကာကွယ်ရေးပစ္စည်း တွေဖြစ်တဲ့ mask၊ hand gel၊  လက်အိတ်၊ faceshield တွေနဲ့ မဲလက်မှတ်တွေအားလုံး ဖြန့်ဝေမထားရသေးဘူးလို့ ပြောပါတယ်။  ပြည်ထောင်စုရွေးကောက်ပွဲကော်မရှင်ရုံးက အောက်တိုဘာ ၂၉ မှသာ ကြိုတင်မဲ စတင်မယ် လို့ ကြေညာထားပေမဲ့ အောက်တိုဘာ ၂၄ နေ့က ရုတ်တရက်ကြီး ၂၅ နေ့စတင်ဖို့ ညွှန်ကြားခဲ့လို့ အလောတကြီး စီစဉ်ရတယ်လို့ဆိုပါတယ်။  ကိုဗစ်-၁၉ ရောဂါ ကာကွယ်ရေးပစ္စည်းတွေ မန္တလေးကို ဆင်းယူနေဆဲဖြစ်ပြီး ခရိုင်၊ မြို့နယ်၊ ရပ်ကျေး ရွေးကောက်ပွဲကော်မရှင်တွေက မိမိတို့ရှိတာနဲ့ စတင်နေကြတာဖြစ်တယ် လို့ ပြောပါတယ်။ သတင်း - နန်းစံပယ်
3 months Ago

September 2, 2020

လားရှိုးမြို့နယ်တွင် အဓမ္မတပ်သားသစ်စုဆောင်းမှုကြောင့် ရွာသားများထွက်ပြေးတိမ်းရှောင် 

ရှမ်းပြည်နယ်မြောက်ပိုင်း၊ လားရှိုးမြို့နယ်၊ နောင်ဖော့ကျေးရွာအုပ်စုအတွင်းက ကျေးရွာတွေမှာ တိုင်းရင်းသားလက်နက်ကိုင်တပ်ဖွဲ့တစ်ဖွဲ့က အဓမ္မတပ်သားသစ်စုဆောင်းနေလို့ အဲ့ဒီကျေးရွာတွေက ပြည်သူလူထုတွေ အိုးအိမ်စွန့် ခွာထွက်ပြေးလာပြီး လားရှိုးမြို့ဘက်ကို စက်တင်ဘာ ၁ ရက်နေ့  ညပိုင်းက တိမ်းရှောင်လာကြပါတယ်။ တိမ်းရှောင်လာသူဦးရေဟာ လားရှိုးမြို့နယ်၊ နမ့်မော်စွန်းကျေးရွာ၊ ပန်ခန်ကျေးရွာနဲ့ ပန်စန်ကျေးရွာတွေက ရွာသူရွာသား ၂၀၀ ကျော်ရှိပြီး လက်ရှိ လားရှိုးမန်ဆူရှမ်းကျောင်းတိုက်မှာ ခိုလှုံနေကြပါတယ်။ အဓမ္မတပ်သားသစ်စုဆောင်းမှုကြောင့် အိုးအိမ်စွန့်လာတဲ့ မိသားစုတွေကို မန်ဆူရှမ်းကျောင်းတိုင်ဆရာတော်က နေရာထိုင်ခင်းနဲ့ စားသောက်စရာတွေ ထောက်ပံ့ထားပြီး ဌာနဆိုင်ရာတွေ အရပ်ဘက်လူမှုအဖွဲ့အစည်းတွေကလည်းဝိုင်းဝန်း ကူညီနေကြပါတယ်။ ရှမ်းပြည်နယ်မြောက်ပိုင်းအတွင်းရှိတဲ့ မြို့နယ်အသီးသီးက ကျေးရွာတွေမှာနေထိုင်ကြတဲ့ လူငယ်လူရွယ်တွေကို နီးစပ်ရာ တိုင်းရင်းသားလက်နက်ကိုင်တပ်ဖွဲ့တွေက အဓမ္မ တပ်သားသစ်စုဆောင်းတာတွေ ဆက်တိုက်ရှိနေပါတယ်။ တပ်သားသစ်မပေးလို့ ရွာသူကြီးနဲ့ ရွာသားတချို့ကို သတ်ပစ်လိုက်တဲ့ ဖြစ်စဉ်တွေရှိနေတာကြောင့် ရွာလုံးကျွတ်ရွေ့ ပြောင်းလာပြီး လားရှိုးမြို့အနီးမှာ ရွာသစ်တည်ကာ အခြေချနေထိုင်နေကြတာတွေလည်းရှိပါတယ်။ ရှမ်းပြည်မြောက်ပိုင်းအတွင်းက စစ်ရေးပဋိပက္ခနယ်မြေအတွင်းမှာ ရှမ်းပြည်တိုးတက်ရေးပါတီ (SSPP/SSA)၊ တအာင်း အမျိုးသားလွတ်မြောက်ရေးတပ်မတော်(PSLF/ TNLA)၊ ကချင်လွတ်လပ်ရေးတပ်မတော်(KIA)၊ ရှမ်းပြည်ပြန်လည်ထူထောင်ရေးကောင်စီ (RCSS/SSA) နဲ့ MNDAA (ကိုးကန့်တပ်)တွေ လှုပ်ရှားနေကြပါတယ်။
5 months Ago
More News
Up