လားရှိုးမြို့

May 17, 2022

လားရှိုးမြို့တွင် ဈေးဆိုင် ၃ ဆိုင် ဖောက်ထွင်းခံရ

ရှမ်းပြည်နယ်မြောက်ပိုင်း၊ လားရှိုးမြို့၊ အမှတ်(၁)ရပ်ကွက်၊ ဗျူဟာလမ်းမှာရှိ အဝတ်အထည်နဲ့ ဖန်စီပစ္စည်းအရောင်းဆိုင် ၃ ဆိုင်  မေလ ၁၆  ရက်က ဖောက်ထွင်းခံရပြီး ပစ္စည်းတွေ ခိုးယူခံခဲ့ရတယ်လို့ ဒေသခံတွေထံက သိရပါတယ်။

ဖောက်ထွင်းခံရတဲ့ ဆိုင်တွေကတော့ Vantage- flannel collection အထည်ဆိုင်၊ Nang Lao Kham အထည်ဆိုင်နဲ့ Fancy ဆိုင်တို့ဖြစ်ပါတယ်။ 

“ကျနော်တို့ ဆိုင်ပြတင်းပေါက်ကို ဓားနဲ့ ကလန့်ဖွ့င်ပြီး အထည်တွေအပြင် ဂစ်တာနဲ့ ဆိုင်တာဝန်ခံ ညီမလေးရဲ့ မှတ်ပုံတင်၊ ငွေသားတွေ ယူသွားတယ်” လို့ Vantage- flannel collection ဆိုင်က ပြောပါတယ်။

ဒီဖောက်ထွင်းမှုနဲ့ ပတ်သက်ပြီး သက်ဆိုင်ရာရဲစခန်းမှာ အမှုဖွင့်ထားပေမယ့် ပြစ်မှုကျူးလွန်သူကို လက်ရှိအချိန်ထိ ဖမ်းဆီးရမိတာ မရှိသေးပါဘူး။

စစ်အာဏာသိမ်းပြီးနောက်ပိုင်း ဒုတိယပြည်နယ်ရဲတပ်ဖွဲ့မှူး ရုံးစိုက်ရာ ရှမ်းပြည်နယ်မြောက်ပိုင်းရဲ့ မြို့တော် လားရှိုးမြို့မှာ မူးယစ်ဆေးဝါး၊ လောင်းကစားဝိုင်း၊ ဂိမ်းရုံ၊ ကေတီဗီ၊ နိုက်ကလပ်တွေ၊ ပေါများလာသလို လုယက်မှု၊ ဖောက်ထွင်းမှု၊ ခိုးမှုတွေနဲ့ ဒုစရိုက်မှုတွေ ပိုမိုများပြားလာနေတယ်လို့ မြို့ခံတွေက ပြောပါတယ်။

1 month Ago

November 22, 2021

လားရှိုးမြို့တွင် ပစ်ခတ်တိုက်ခိုက်မှုများဖြစ်ပွား

ရှမ်းပြည်နယ်မြောက်ပိုင်း၊ လားရှိုးမြို့ပေါ်ရပ်ကွက်တချို့မှာ  မနေ့ည သန်းခေါင်းကျော်  နိုဝင်ဘာ ၂၂ ရက် မနက် အစောပိုင်းက  ပေါက်ကွဲမှုတွေနဲ့  ပစ်ခတ်တိုက်ခိုက်မှုတွေ ဖြစ်ပွားခဲ့တယ်လို့ မြို့ခံတွေကပြောပါတယ်။

"မနေ့ည တစ်နာရီခွဲက ပေါက်ကွဲသံအကျယ်ကြီး ငါးချက်လောက်ကြားရတယ်၊ အိမ်တွေပါတုန်ပြီးတော့ နှစ်နာရီ‌ ကျော်လောက်မှာ လက်နက်ငယ် ပစ်ခတ်သံတွေ ထပ်ကြားရတယ်" လို့ မြို့ခံတွေကဆိုပါတယ်။

ပစ်ခတ်မှုကြောင့် လူတွေထိခိုက်ဒဏ်ရာရတဲ့ သတင်းတွေကတော့ မရရှိသေးပါဘူး။ တိုင်းရင်းသားလက်နက်ကိုင်တွေစခန်းချနေတယ်လို့ ထင်မြင်ယူဆရတဲ့ နေရာတွေကို စစ်တပ်အတွင်းကနေ လက်နက်ကြီးနဲ့ လှမ်းပစ်တာဖြစ်နိုင်တယ်လို့ စစ်တပ်နဲ့ နီးစပ်သူတစ်ဦးက ပြောပါတယ်။

"တော်လှန်ရေးတပ်ဖွဲ့တွေ စခန်း‌နေချတယ်လို့ ယူဆတဲ့နေရာတွေကို လားရှိုးစစ်တပ်က လက်နက်ကြီးနဲ့လှမ်းထုတာလို့‌ကြားတယ်၊ တပ်က ဒရုမ်းနဲ့  ပတ်ကြည့်တယ်၊ မသင်္ကာတဲ့ နေရာကို ထုတယ်။”

လားရှိုးမြို့နယ်မှာ  အကြမ်းဖက်စစ်ကောင်စီတပ်စစ်ကြောင်းတွေနဲ့ MNDAA ကိုးကန့်တပ်ကြား ပစ်ခိုက် တိုက်ခိုက်မှုတွေ ဖြစ်ပွားခဲ့တာရှိခဲ့ပါတယ်။

"ဒီလပိုင်းအတွင်း လားရှိုးနဲ့ ၁ဝ မိုင်လောက်ဝေးတဲ့ စစ်တပ်စိုက်ပျိုးရေးအနီး ဘုံမွန်နားမှာ MNDAAတပ်နဲ့ တိုက်ပွဲနှစ်ကြိမ်းလောက်ဖြစ်တာရှိတယ်။ ပြည်ထောင်စုလမ်းမကြီးဘေးမှာဖြစ်လို့ ခရီးသွားကားတွေ ရပ်စောင့်ရတာတွေရှိခဲ့တယ်။ လားရှိုးမြို့နယ်ထဲက မိုင်းယော်တိုက်နယ်ဘက်မှာလည်း တိုက်ပွဲဖြစ်တာတွေရှိခဲ့တယ်" လို့ ဒေသခံက ပြောပါတယ်။

မြို့နယ်အလိုက် ဖွဲ့စည်းထားတဲ့ ပြည်သူ့ကာကွယ်ရေးတပ်(PDF) ကလည်း စစ်အာဏာရှင် စနစ်ကို ခုခံတွန်းလှန်သွားမယ်လို့ ထုတ်ပြန်ထားပြီး လားရှိုးမြို့ပေါ်ရှိ စစ်ကောင်စီလက်အောက် ခံဌာနဆိုင်ရာရုံးတချို့ တိုက် ခိုက်ခံရတာတွေလည်းရှိနေပါတယ်။

လားရှိုးအခြေစိုက် စစ်ကောင်စီတပ်ရင်း (၂) ခု၊ မြို့နယ်ရဲတပ် ဖွဲ့မှူးရုံး၊ အမှတ်(၅) ရပ်ကွက်အုပ်ချုပ်ရေးမှူးရုံး၊ မြို့နယ်လဝကရုံး၊ ယာဉ်ထိန်းရုံးနဲ့ စစ်တပ်သတင်းပေးလို့ သတ် မှတ်ခံရသူ တယောက်ရဲ့ နေအိမ်တို့ကို တိုက်ခိုက်ခံရတာဖြစ်ပါတယ်။

လားရှို့မြို့ခံတဦးက "ဒီလအတွင်းမှာပဲ လဝကရုံးနဲ့ ယာဉ်ထိန်းရုံး ဗုံးပစ်ခံရတယ်။ ပြီးခဲ့တဲ့ရက်ကလည်း မြို့ပေါ်မှာ သေနတ်ပစ်ဖောက်တာတွေရှိခဲ့တယ်၊ ဘယ်အဖွဲ့ကလု ပ်တာလည်းတော့ မသိဘူး" လို့ ပြောပါတယ်။

လားရှိုးမြို့မှာ စစ်အာဏာသိမ်းတာကို ဆန့်ကျင်တဲ့အနေနဲ့ ငြိမ်းချမ်းစွာဆန္ဒထုတ်ဖော်ခဲ့ကြတဲ့ ပြည်သူတွေကို စစ်ကောင်စီတပ်တွေက ကျည်အစစ်သုံးကာ ပစ်ခတ်သတ်ဖြတ်ဖြိုခွင်းတာတွေ ရှိခဲ့ပါတယ်။

7 months Ago
More News
Up