လယ်သမား

December 9, 2022

ကန့်ဘလူတွင် လယ်သမား ၂ ဦးကို စစ်တပ်က ပစ်ခတ်၊ မီးရှို့ခံခဲ့ရသည့် ဒီပဲယင်းဒေသခံ အကူအညီ လိုနေ

စစ်ကိုင်းတိုင်း၊ ကန့်ဘလူမြို့နယ်၊ ကံကြီးရွာက စပါးရိတ်နေတဲ့ လယ်သမားတွေကို ဒီဇင်ဘာ ၈ ရက် မနက် ၁၀ နာရီမှာ စစ်တပ်က ပစ်ခတ်ခဲ့တာကြောင့် လယ်သမား ၂ ဦး ဒဏ်ရာရရှိခဲ့တယ်လို့ ကန့်ဘလူမြို့နယ် ဒေသခံတွေက ပြောပါတယ်။

ခမရ-၃၆၉ စစ်ကောင်စီတပ်က ပစ်ခတ်ခဲ့တာကြောင့် အသက် ၃၀ အရွယ်အမျိုးသား တယောက်က  ခါးနဲ့ လက်မောင်းမှာ ဒဏ်ရာရရှိခဲ့ပြီး  နောက် ၄၂ နှစ်အရွယ် အမျိုးသားကတော့ ညာဘက်ခြေထောက် ကျည်ဆန်မှန်ပြီး ခြေထောက် ကျိုးသွားခဲ့ကာ အသက်အန္တရာယ်ကတော့ မစိုးရိမ်ရဘူးလို့ ကန့်ဘလူမြို့နယ် ဒေသခံရွာသားတဦးက ပြောပါတယ်။

“စခတွေက မနက်ခင်း ၈ နာရီလောက်က ချပ်သင်းရွာကနေ ဝက်သအင်းရွာဘက်ကို စစ်ကြောင်းထိုးလာတယ်။ မနက် ၁၀ နာရီခွဲအချိန်ခန့်ကြာ‌ေတာ့ ဝက်သအင်းနဲ့ ပုဏ္ဏားရွာကြားမှာ စပါးရိတ်နေတဲ့ လယ်သမားတွေကို လက်နက်ငယ်တွေနဲ့ စပစ်တယ်။ အကုန်လုံး ကြောက်ပြီး ထွက်ပြေးကြရတယ်ဗျ။ နှစ်ယောက်ကတော့ ကျည်ထိမှန်ပြီး ဒဏ်ရာရရှိထားတယ်။ ဒဏ်ရာရရှိတဲ့သူ နှစ်ယောက်လုံးက ကံကြီးရွာက လယ်သမားတွေပါဗျ။” 

စစ်ကောင်စီစစ်ကြောင်းဟာ အင်အား ၈၀ လောက်ရှိပြီး ပုဏ္ဏားကြီးရွာအတွင်း ဝင်ရောက်ရှာဖွေကာ ဒေသခံအမျိုးသမီး ၃ ဦးနဲ့ အမျိုးသား ၁ ဦးကိုလည်း ညက ဖမ်းဆီးခေါ်ဆောင်သွားခဲ့ပါတယ်။ အဲဒီစစ်ကြောင်းဟာ လက်ရှိအချိန်မှာ ဝက်သအင်းကျေးရွာမှာ စခန်းချ ညအိပ်နေထိုင်နေတယ်လို့လည်း ဒေသခံတွေက ပြောပါတယ်။

စစ်ကိုင်းတိုင်း၊ ဒီပဲယင်းမြို့နယ်မှာတော့ နိုဝင်ဘာ ၃၀ ရက်ကစပြီး ဒီဇင်ဘာ ၈ ရက်နေ့အထိ ကျေးရွာပေါင်း ၁၂ ရွာကို စစ်ကောင်စီတပ်က မီးရှို့ဖျက်ဆီးခဲ့ရာ စစ်ဘေးမီးဘေးသင့်ပြည်သူ ၁၀,၀၀၀ ကျော် စားဝတ်နေရေး အခက်အခဲ ဖြစ်နေတယ်လို့ ဒီပဲယင်းမြို့နယ် ညီနောင်များအဖွဲ့ တာဝန်ခံက ပြောပါတယ်။

“အခုဆို စစ်ကြောင်းဝင်လာတဲ့နေ့ကရောဆို ၁၀ ရက်ရှိပြီ။ စစ်ရှောင်တွေ ကူညီရေးလည်း နေရာအစုံ မျှဝေကူညီနေရတော့ ခက်ခဲလာခဲ့ပြီ။ ရွာတွေလည်း ပြာကျနေရပြီ။”

နိုဝင်ဘာ ၃၀ ရက်က ရေဦးဘက်ကနေဝင်လာကာ ၁ ရက်နေ့ကစပြီး ရေဦး၊ ဒီပဲယင်းနယ် အစပ်က ပျော်ဘွယ်ရွာနဲ့ မစိုးရိမ် ၂ ရွာကို စရှို့ခဲ့လို့ အိမ်ခြေ ၂၀ လောက် မီးလောင်ဆုံးရှုံးသွားတယ်လို့ ဆိုပါတယ်။

ဒီဇင်ဘာ ၁ ရက်ကနေ စတင်မီးရှို့ခဲ့တာ ရွာ ၁၂ ရွာ ဘုန်းကြီးကျောင်း ၃ ကျောင်း မီးလောင်ပြာကျခဲ့ပြီး စစ်ဘေးရှောင် ၁၀,၀၀၀ ကျော်လောက်ရှိနေကာ စားဝတ်နေရေး အခက်အခဲ အကျပ်အတည်းတွေ ဖြစ်နေတယ်။

စစ်ဘေးရှောင်ပြည်သူတွေဟာ နီးစပ်ရာ ဘုန်းကြီးကျောင်း၊ စာသင်ကျောင်းတွေမှာ ခိုလှုံနေကြပြီး ဆောင်းရာသီဖြစ်တဲ့အတွက် နေထိုင်စရာခက်ခဲကာ မြို့နယ်အတွင်းက ကူညီထောက်ပံ့ပေးနေရတယ်လို့ ဒီပဲယင်းမြို့နယ် ညီနောင်များ တာဝန်ခံက‌ ပြောပါတယ်။

“စစ်ရှောင်တွေ မီးဘေးသင့်တွေအတွက် တတ်နိုင်သလောက် အကူအညီပေးကြဖို့သာ မေတ္တာရပ်ခံချင်ပါတယ်။ အရင်မီးရှို့ခံရတာတွေ ကူညီလို့ မပြီးသေးခင် မီးထပ်ရှို့နေတော့ ဆက်ကူညီဖို့ ပိုခက်ခဲသွားတယ်” လို့ ဒီပဲယင်းမြို့နယ်ညီနောင်များတာဝန်ခံက‌ ပြောပါတယ်။

ပြီးခဲ့တဲ့လပိုင်းတွေက စစ်ဘေးရှောင်နဲ့ စစ်ကောင်စီက မီးရှို့လို့ မီးဘေးသင့်ပြည်သူတွေကို ‌မြို့နယ်အတွင်းရှိ ပြည်သူတွေရဲ့ အလှူငွေနဲ့ အခြေခံစားသောက်ကုန်နဲ့ ငွေအနည်းငယ်ဆီ ကူညီထောက်ပံ့ပေးခဲ့တယ်လို့ ဒီပဲယင်းမြို့နယ်ညီနောင်များအဖွဲ့က ဆိုပါတယ်။

2 months Ago

December 2, 2022

စပါးအထွက်နှုန်းကျဆင်းနေသဖြင့် ရခိုင်က လယ်သမားများ အရှုံးပေါ်

ရခိုင်ပြည်နယ်မှာ အခုနှစ် စိုက်ပျိုးရာသီမှာ စပါးအထွက်နှုန်းတွေ ကျဆင်းနေတာကြောင့် ရခိုင်ပြည်နယ်မြို့နယ် အသီးသီးက လယ်သမားတွေ အရှုံးနဲ့ ရင်ဆိုင်နေကြရတယ်လို့ လယ်သမားတွေနဲ့ လယ်ယာလုပ်ငန်း အဖွဲ့အစည်းတာဝန်ရှိသူတွေက ပြောပါတယ်။

ရခိုင်ပြည်နယ်မှာ အခုနှစ်စိုက်ပျိုးရာသီအတွင်းမှာ မိုးခေါင်မှုတွေကြောင့် လယ်​ယာမြေအများအပြား ပျက်စီးခဲ့သလို အောက်တိုဘာလအတွင်းက မုန်းတိုင်းဒဏ်ကြောင့်လည်း ဆားတက်ပြီးတော့ လယ်ယာမြေတွေ ပျက်စီးခဲ့ကြရပါတယ်။

ရခိုင်ပြည်နယ်မှာ အခုနှစ် စပါးအထွက်နှုန်ဟာ အရင်နှစ်တွေထက် ထက်ဝတ်နှုန်းလောက် ကျဆင်းခဲ့လို့ အများစုက အရှုံးပေါ်နေတယ်လို့ ပုဏ္ဏားကျွန်းမြို့နယ်က လယ်သမား ဦးအောင်လှသံက ပြောပါတယ်။

"ဒီနှစ်စပါး အထွက်နှုန်းက ပြီးခဲ့တဲ့နှစ်တွေထက် တဝက်လောက်ကျသွားတယ်။ ပြီးခဲ့တဲ့ နှစ်တွေတုန်းက လယ်တစ်ဧက စပါးတောင်း ၂၀၀ လောက်ထွက်ပေမယ့် ဒီနှစ်မှာ ၁၀၀ လောက်သာ ထွက်တော့တယ်။ ၁၀၀ အောက်ရောက်သွားတဲ့ သူတွေလည်းရှိကြတယ်။ ကျနော်တို့မှာ ဓာတ်မြေသြဇာဖိုးနဲ့ စက်သုံးဆီဖိုးနဲ့ လုပ်အားခတွေ နုတ်လိုက်ရင် အရှုံးပေါ်တဲ့ သူတွေကြီးပဲ။ ငွေကြေးတတ်နိုင်တဲ့ သူကခံနိုင်ပေမယ့် ငွေကြေးမတတ်နိုင်တဲ့ သူတွေကတော့ အကြွေးတင်သွားကြရပြီ။”

ရခိုင်ပြည်နယ်က လယ်သမားတွေအရှုံးပေါ်လို့ လာမယ့် စိုက်ပျိုးရာသီအတွက် လယ်ယာကို စွန့်ခွာဖို့ရှိတယ်လို့ ဓညဝတီတောင်သူလယ်သမားဖွံ့ဖြိုးတိုးတက်ရေးအသင်းဥက္ကဋ္ဌ ဦးစိုးနိုင် ကပြောပါတယ်။

" ဒီနှစ်က စပါးအထွက်နှုန်းက တော်တော်လေးကို ကျသွားတော့ လယ်သမားတွေ အကုန်လုံးက အရှုံးပေါ်နေကြရတယ်။ တချို့တွေဆိုရင် နောက်နှစ်မှာ စပါးပျိုးဖို့ အရင်းနှီးမရှိတော့တဲ့ အခြေအနေဖြစ်သွားပြီး လယ်တွေကို အခုကတည်းကနေ စွန့်ဖို့ပြောနေကြပြီ။”

ရခိုင်ပြည်နယ်မှာ အနှစ်အတွင်းမှာ စပါးအထွက်နှုန်း ကျဆင်းနေတာကြောင့် ပြည်သူ ၃ သန်းရဲ့ စားနပ်ရိက္ခာဖုံလှုံမှု အပြည့်မရနိုင်ဘူးလို့ ရခိုင်ပြည်လုံးဆိုင်ရာ တောင်သူလယ်သမားသမဂ္ဂ ဥက္ကဋ္ဌ ဦးကျော်ဇံကပြောပါတယ်။

"အစိုးရရဲ့ စာရင်းတွေ အရစိုက်ပျိုးဧကက ၁၀ သိန်း ၄ သောင်းကျော်ရှိတယ်လို့ပြောတယ်။ ဒါပေမဲ့ မြေပြင်မှာ ကျနော်တို့ ကောက်ယူထားတဲ့ စာရင်းအရ ၈ သိန်းခွဲပဲ ရှိနေတယ်။ ဧက ၂ သိန်းလောက်ကွာနေကြတယ်။ နောက်အစိုးရရဲ့ ထုတ်ပြန်ချက်အရ တစ်ဧက စပါးထွက်နှုန်းက ၆၅ တင်းလောက်ထွက်တယ်လို့ဆိုထားတယ်။ အဲဒီစာရင်းအရဆိုရင်တော့ စပါးတင်းသန်းပေါင်း ၇၂၀ ကျော်ထွက်တယ်လို့ဆိုထားတယ်။ အဲဒီအထွက်နှုန်းအရဆိုရင် ရခိုင်ပြည်နယ်ရဲ့ လူဦးကျော် ၃ သန်းကျော်အတွက် လိုအပ်တဲ့ စားနပ်ရိက္ခာက စပါးတင်းသန်းပေါင် ၅၂၀ လောက်ဆိုရင် လုံလောက်ပါတယ်။ ဒါပေမဲ့ ကျနော်တို့ ကောက်ယူထားတဲ့ မြေပြင်စာရင်းတွေအရဆိုရင် တစ်ဧက ၄၅တင်းပဲ ထွက်ကြတော့ ဧက ၇ သိန်းခွဲက စပါးတင်းသန်းပေါင် ၃၄၀ ကျော်လောက်ပဲထွက်တယ်။ ဆိုတော့ ပြည်သူ ၃ သန်းရဲ့ စားနပ်ရိက္ခာဖုံလှုံဖို့အတွက်က နောက်ထပ် စပါးတင်းသန်းပေါင်း ၁၇၀ လောက်လိုအပ်မှုတွေရှိနေသေးတယ်။”

ရခိုင်ပြည်လုံးဆိုင်ရာ တောင်သူလယ်သမားသမဂ္ဂရဲ့ စာရင်းတွေအရ ရခိုင်ပြည်နယ်မှာ လယ်စိုက်ပျိုးဧက ၈ သိန်းခွဲခန့်ရှိခဲ့ပြီး မိုးခေါင်မှုနဲ့ ဆားတက်မှုတွေကြောင့် ပျက်စီးဧက ၁ သိန်းခွဲ ရှိခဲ့တယ်လို့ ဆိုထားပါတယ်။

ရခိုင်ပြည်နယ်မှာ စစ်ကောင်စီနဲ့ ရက္ခိုင့်တပ်တော်(အေအေ)တို့အကြား ၄ လကြာ တိုက်ပွဲဖြစ်ပွားပြီးနောက် လူသားချင်းစာနာမှုဆိုင်ရာ ယာယီအပစ်အခတ်ရပ်ထားချိန်မှာ အေအေ တပ်ဖွဲ့တွေက ပြည်သူတွေနဲ့ စစ်ဘေးရှောင်တွေရဲ့ လယ်ယာတွေကို ကူညီရိတ်သိမ်းပေးနေ ကြပါတယ်။

2 months Ago
More News
Up