လမ်းပတ်

January 27, 2021

အကယ်ဒမီထွက် ကစားသမားများကို မြေတောင်မြှောက်ပေးနိုင်ခဲ့သဖြင့် ဂုဏ်ယူဟု လမ်းပတ်ပြော

အကယ်ဒမီထွက်ကစားသမားတွေ ထွက်ပေါ်လာအောင် လုပ်ဆောင်နိုင်ခဲ့တဲ့အပေါ် ဂုဏ်ယူတယ်လို့ ချဲလ်ဆီး နည်းပြရာထူးကနေ ထုတ်ပယ်ခံလိုက်ရတဲ့ ဖရန့်လမ်းပတ်က ပြောပါတယ်။

နည်းပြလမ်းပတ်ဟာ ဝိုင်ကွမ်ဘီကို ၃ ဂိုး ၁ ဂိုးနဲ့ အနိုင်ရခဲ့တဲ့ အက်ဖ်အေဖလားပွဲစဉ်အပြီးမှာ ရာထူးကနေ ထုတ်ပယ်ခံခဲ့ရတာ ဖြစ်ပါတယ်။

အသင်းပိုင်ရှင် အေဗရာမိုဗစ်ကတော့ မဖြစ်မနေ ပြောင်းလဲမှုလုပ်ဆောင်ရမယ့် အခိုက်အတန့်ကြောင့်သာ လမ်းပတ်နဲ့ လမ်းခွဲလိုက်တာဖြစ်ပြီး အသင်းအပေါ် စွမ်းဆောင်ခဲ့မှုတွေကို ကျေးဇူးတင်ကြောင်းနဲ့ အသင်းရဲ့ စံပြကစားသမားအဖြစ် အမြဲတမ်းကြိုဆိုနေမှာဖြစ်ကြောင်း သတင်းထုတ်ပြန်ခဲ့ပါတယ်။

နည်းပြလမ်းပတ်ကလည်း အသင်းနဲ့ပရိသတ်တွေအပေါ် ကျေးဇူးတင်စကားဆိုခဲ့ပြီး ပြီးခဲ့တဲ့ ၁၈ လ ကာလတာအတွင်းမှာ အားပေးခဲ့ကြတာကို ကျေးဇူးတင်တယ်လို့ ပြောပါတယ်။ ဒါ့အပြင် သူလုပ်ဆောင်ခဲ့တာတွေအတွက် ဂုဏ်ယူပြီး အထူးသဖြင့် အကယ်ဒမီက လူငယ်တွေကို အသင်းကြီးဆီ ပို့ဆောင်ပေးပြီး မြေတောင်မြှောက်ပေးခဲ့တဲ့အပေါ် ဂုဏ်ယူတယ်လို့လည်း လမ်းပတ်က ပြောပါတယ်။

နည်းပြလမ်းပတ်ဟာ မေဆန်မောင့်၊ ရီဆီဂျိမ်းစ်၊ တိုမော်ရီ၊ ဂီလ်မော၊ ဟန်ဆန်အိုဒွိုင်း အစရှိတဲ့ ကစားသမားတွေကို ပွဲထွက်ခွင့်ပေးခဲ့တဲ့ နည်းပြတစ်ဦး ဖြစ်ပါတယ်။

5 months Ago

January 26, 2021

ရာထူးမှ ထုတ်ပယ်ခံရသည့်အပေါ် စိတ်ပျက်ဟု နည်းပြ လမ်းပတ်ပြော

ချဲလ်ဆီးအသင်းကို ဆက်လက်တာဝန်ယူခွင့် ငြင်းပယ်ခံခဲ့ရခြင်းအပေါ် စိတ်ပျက်မိတယ်လို့ ဖရန့်လမ်းပတ်က ပြောပါတယ်။

ချဲလ်ဆီးအသင်းရဲ့ ဂန္ထဝင်တစ်ဦးဖြစ်တဲ့ လမ်းပတ်ဟာ တနင်္လာနေ့မှာ နည်းပြရာထူးကနေ ထုတ်ပယ်ခံလိုက်ရပါပြီ။ တာဝန်ယူပြီး ၁၈ လအကြာမှာ ထုတ်ပယ်ခံလိုက်ရတာပဲ ဖြစ်ပါတယ်။ 

ကစားသမားဘဝတုန်းက အသင်းရဲ့ ထိပ်တန်းဂိုးသွင်းရှင်တစ်ဦး ဖြစ်ခဲ့ပေမဲ့ နည်းပြဘဝမှာတော့ လမ်းပတ်ဟာ အသင်းပိုင်ရှင်ရဲ့ ခန့်လိုက်၊ ထုတ်လိုက်ပုံစံကို မကျော်လွှားနိုင်ခဲ့ပါဘူး။

အခုရာသီအစပိုင်းမှာ ချဲလ်ဆီးအသင်းဟာ အမှတ်ပေးဇယား ထိပ်အထိ ရောက်ခဲ့ပေမဲ့ ‌နောက်ပိုင်း ခြေစွမ်းကျဆင်းလာခြင်းနဲ့အတူ အဆင့် ၉ အထိ ဆင်းခဲ့ကာ ဒီအခြေအနေက လမ်းပတ်ကို အသင်းနဲ့ လမ်းခွဲစေခဲ့ပါတယ်။

လမ်းပတ်ကို ရာထူးကနေ ထုတ်ပယ်ခြင်းနဲ့ပတ်သက်လို့ အသင်းပိုင်ရှင် အီဗရာမိုဗစ်က ကြေညာချက်တစ်စောင် ထုတ်ပြန်ခဲ့ပါတယ်။ ဒီကြေညာချက်မှာ သူဟာ နည်းပြဟောင်းနဲ့ ပုဂ္ဂိုလ်ရေးဆိုင်ရာ ကောင်းမွန်တဲ့ ဆက်ဆံရေးရှိနေဆဲဖြစ်ပြီး သူ့ကို အသင်းထံပြန်လာဖို့ အမြဲတမ်း နွေးနွေးထွေးထွေး ကြိုနေပါ့မယ်လို့ ပြောပါတယ်။

ရာထူးကနေ ထုတ်ပယ်ခံရပြီးနောက် ပထမဆုံးအဖြစ် လမ်းပတ်ကလည်း တနင်္လာနေ့ ညနေပိုင်းမှာ သူ့အင်စတာဂရမ်မှာ အခုလို ရေးသားခဲ့ပါတယ်။ 

“ကျနော့်ဘဝရဲ့ ကာလရှည်အစိတ်အပိုင်းတစ်ခုလို ဖြစ်နေတဲ့ ချဲလ်ဆီးအသင်းမှာ နည်းပြခွင့်ရခဲ့တာက ဂုဏ်ယူစရာပါ။ ပထဆုံးအနေနဲ့ ကျနော့်ကို ပြီးခဲ့တဲ့ ၁၈ လအတွင်း ပေးခဲ့တဲ့ ပရိသတ်တွေရဲ့ မယုံကြည်နိုင်လောက်စရာ ထောက်ခံမှုတွေအတွက် ကျေးဇူးတင်တယ်လို့ ပြောချင်ပါတယ်။ ဒါဟာ ကျနော့်အတွက် ဘယ်လောက်အဓိပ္ပာယ်ရှိလဲဆိုတာကို သိစေချင်ပါတယ်။”

နည်းပြဟောင်း ဆာရီကို ရာထူးကနေ ထုတ်ပယ်ပြီး လမ်းပတ်ကို အစားထိုးချိန်မှာ ချဲလ်ဆီးအသင်းဟာ အပြောင်းအရွှေ့ အပိတ်ခံရမှုနဲ့ ရင်ဆိုင်နေရပြီး အသင်းရဲ့ အဓိက ကစားသမား ဟာဇက် ထွက်ခွာသွားချိန်လည်း ဖြစ်ပါတယ်။ 

လမ်းပတ်က “ကျနော် ဒီရာထူးကို ရယူတဲ့အချိန်မှာ ဒီအသင်းမှာရှိနေတဲ့ စိန်ခေါ်မှုတွေကို သဘောပေါက် နားလည်ပါတယ်။ ကျနော်တို့ ရခဲ့တဲ့ အောင်မြင်မှုတွေအပြင်၊ အကယ်ဒမီကနေ အသင်းကြီးကို ရောက်ရှိလာတဲ့ ကစားသမားတွေအတွက်လည်း ဂုဏ်ယူမိပါတယ်။ သူတို့ဟာ အသင်းရဲ့ အနာဂတ်တွေပါ။ ဒါပေမဲ့ အသင်းကို နောက်ထပ်အဆင့်တစ်ခုအထိ ရောက်ဖို့ ရှေ့ဆက် လုပ်ဆောင်ခွင့်မရှိတော့တဲ့အပေါ်မှာတော့ စိတ်ပျက်မိပါ တယ်။ အသင်းပိုင်ရှင်၊ ဘုတ်အဖွဲ့၊ ကစားသမားတွေ၊ နည်းပြအဖွဲ့တွေနဲ့ အသင်းမှာရှိတဲ့လူတိုင်းကို အထူးသဖြင့် ကြိုတင်ခန့်မှန်းလို့မရတဲ့ စိန်ခေါ်မှုများတဲ့အချိန်တွေမှာ ကြိုးစားပေးခဲ့မှုအတွက် ကျေးဇူးတင်ပါတယ်။ ချဲလ်ဆီးအသင်း အနာဂတ်မှာ အောင်မြင်စေဖို့လည်း ဆုတောင်းပေးပါတယ်” လို့ ရေးသားထားပါတယ်။

လမ်းပတ်ကို ရာထူးကနေ ထုတ်ပယ်လိုက်ပြီးနောက် ချဲလ်ဆီးအသင်းဟာ ဒေါ့မွန်နဲ့ ပီအက်စ်ဂျီနည်းပြဟာင်း သောမတ်စ်တူချယ်ကို သူ့နေရာမှာ အစားထိုးသွားဖို့ ရှိနေပါတယ်။ 

အသက် ၄၇ နှစ်အရွယ် တူချယ်ကို အခုသီတင်းပတ်ထဲမှာတင် အပြီးသတ် ခေါ်ယူသွားနိုင်တယ်လို့လည်း သိရပါတယ်။

5 months Ago

ချဲလ်ဆီးမှ ထုတ်ပယ်ခံရသည့် နည်းပြလမ်းပတ်ကို ဂွါဒီယိုလာက အားပေးစကားပြော

လော့ဒေါင်းကာလ ပြီးဆုံးချိန်မှာ နည်းပြ လမ်းပတ်နဲ့ ညစာအတူ စားနိုင်ဖို့ မျှော်လင့်တယ်လို့ မန်စီးတီးနည်းပြ ဂွါဒီယိုလာက ပြောပါတယ်။

လမ်းပတ်ဟာ ချဲလ်ဆီးနည်းပြရာထူးကနေ တနင်္လာနေ့က ထုတ်ပယ်ခံခဲ့ရပြီး နည်းပြ ဂွါဒီယိုလာက လမ်းပတ်ကို အားပေးစကားဆိုခဲ့တာပါ။ 

ရလဒ်ကောင်းအောင် မစွမ်းဆောင်နိုင်ခဲ့ရင် အစားထိုးခံရမှာဖြစ်ပြီး အသင်းရဲ့ ဆုံးဖြတ်ချက်အပေါ် လေးစားကြောင်း၊ လော့ဒေါင်းကာလ ပြီးဆုံးချိန်မှာ လမ်းပတ်နဲ့ စားသောက်ဆိုင်မှာ တွေ့ချင်သေးကြောင်း နည်းပြ ဂွါဒီယိုလာက ပြောခဲ့တာပါ။ 

လက်စတာနည်းပြ ရော်ဂျာကတော့ လမ်းပတ်အတွက် စိတ်မကောင်းဖြစ်မိပြီး အသင်းဘက်က အခုထက် အချိန်ပိုပေးသင့်ကြောင်း သုံးသပ်ပါတယ်။

အလားတူ ခရစ္စတယ်ပဲလေ့နည်းပြ ရွိုင်းဟော့ဆန်နဲ့ အာဆင်နယ်နည်းပြ အတီတာတို့ကလည်း လမ်းပတ်ကို အချိန်တစ်ခုပေးသင့်ကြောင်း သုံးသပ်ကြပါတယ်။

5 months Ago

ပြောင်းလဲမှုလုပ်ရန် လမ်းပတ်ကို ထုတ်ပယ်ခဲ့ခြင်းဖြစ်ဟု ချဲလ်ဆီး အသင်းပိုင်ရှင်ပြော

ချဲလ်ဆီးအသင်းကို မဖြစ်မနေ ပြောင်းလဲမှုလုပ်ရမယ့်အချိန်ဖြစ်လို့ နည်းပြလမ်းပတ်ကို ရာထူးကနေ ထုတ်ပယ်ခဲ့တာဖြစ်ကြောင်း အသင်းပိုင်ရှင် အေဗရာမိုဗစ်က ပြောပါတယ်။

ချဲလ်ဆီးအသင်းဟာ ပရီးမီးယားလိဂ်နောက်ဆုံး ၈ ပွဲမှာ ၂ ပွဲသာအနိုင်ရခဲ့ပြီး ၅ ပွဲရှုံး ၁ ပွဲသရေကျခဲ့လို့ အမှတ်ပေးဇယားမှာ အဆင့် ၉ နေရာ အထိ ကျဆင်းသွားခဲ့ရပါတယ်။ 

ဒါကြောင့် နည်းပြလမ်းပတ်ကို ရာထူးကနေ ထုတ်ပယ်ခဲ့တာဖြစ်ပြီး လမ်းပတ်နဲ့ ပုဂ္ဂိုလ်ရေးအရ အလွန်ခင်မင်မှုရှိပေမယ့်လည်း ပြောင်းလဲရမယ့်အခြေအနေကြောင့် လမ်းခွဲဖို့ ဆုံးဖြတ်ခဲ့တာဖြစ်ကြောင်း ဗရာမိုဗစ်က အသင်းရဲ့ ထုတ်ပြန်ချက်မှာ ထည့်သွင်းရေးသားခဲ့တာပါ။

ဒါ့အပြင်  လမ်းပတ်ရဲ့ စွမ်းဆောင်ခဲ့မှုတွေအတွက် ကျေးဇူးတင်ကြောင်း၊ အသင်းရဲ့ စံပြကစားသမားအဖြစ် ဆက်ရှိနေမှာဖြစ်ကြောင်းနဲ့ အချိန်မရွေး အသင်းဆီ ပြန်လာနိုင်ကြောင်း အေဗရာမိုဗစ်က ထုတ်ပြန်ချက်မှာ ထည့်သွင်းပြောခဲ့တာပါ။ 

အသက် ၄၂ နှစ်ရှိ အင်္ဂလန်နည်းပြလမ်းပတ်ဟာ ၂၀၁၉ ခုနှစ်က ဒါဘီကနေ ချဲလ်ဆီးနည်းပြ အဖြစ် ခန့်အပ်ခံခဲ့ရတာပါ။ လစ်လပ်သွားတဲ့ နည်းပြရာထူးအတွက် ပီအက်စ်ဂျီ နည်းပြဟောင်း သောမတ်စ်တူချယ်ကို ခေါ်ယူမယ်လို့ သတင်းထွက်ပေါ်နေပါတယ်။

5 months Ago
More News
Up