လပွတ္တာ

June 6, 2022

လပွတ္တာ အထက်တန်းကျောင်းများတွင် ဆရာမလုံလောက်သဖြင့် ပြင်ပဆရာငှားရန် ငွေကောက်ခံ

ဧရာဝတီတိုင်း၊ လပွတ္တာမြို့နယ်က အထက်တန်းကျောင်းတွေမှာ ဆရာ၊ ဆရာမ အင်အား မလုံလောက်တာကြောင့် ပြင်ပကနေ ဆရာ၊ ဆရာမ ငှားဖို့အတွက် ကျောင်းသား ကျောင်းသူတွေထံက လစဉ် ကျပ် ၃၀၀၀ ကျပ်ကောက်ခံနေတယ်လို့ ကျောင်းသားမိဘတွေထံက သိရပါတယ်။ 

မြို့ပေါ်စာသင်ကျောင်းတွေမှာ ဆရာ ဆရာမအင်အား လုံလောက်ပေမယ့် ကျေးရွာတွေက အထက်တန်းကျောင်းတွေမှာ အထက်တန်းသင်ဖို့ ဆရာ၊ ဆရာမ လုံလောက်မှုမရှိတာကြောင့် ခုလိုမျိုး ဆရာ ဆရာမ ငှားဖို့ အတွက် မြို့နယ်မှူးအစီအစဉ်နဲ့ ငွေကြေးကောက်ခံတာလို့ ကျောင်းကော်မတီဝင်တဦးက ပြောပါတယ်။ 

“ အမှန်ပြောရရင် ဖိအားပေးပြီးသာ မဖြစ်မနေကျောင်းဖွင့်ဖို့ မဖြစ်မနေကျောင်းတက်ဖို့လုပ်နေတာ မြို့ပေါ် လောက်မှာသာ ဆရာ ဆရာမ အင်အားကများတာ ကျနော်တို့ ရွာဘက်မှာ မရှိတော့ဘူး အထက်တန်းပြဖို့ အဲ့တော့ အစည်းဝေးလုပ်ပြီး တင်ပြတော့ မြို့နယ်မှူးက အပြင်ကနေ ခဏခေါ်ပြီး ထိန်းထားပေးဖို့ပြောတာ ပိုက်ဆံကျထုတ်မပေးဘူး”လို့ ပြောပါတယ်။ 

လပွတ္တာမြို့နယ်အတွင်းမှာရှိတဲ့ ကျေးရွာတွေက အထက်တန်းကျောင်းတွေမှာ အနည်းဆုံး အထက်တန်း ကျောင်းသား ၃၀၀ လောက်ရှိပြီး စာသင်ဖို့အတွက် ကျောင်းတကျောင်းကို အနည်းဆုံး အထက်တန်းပြ ဆရာ ဆရာမ ၃ ဦးလောက် ငှားဖို့လိုအပ်မှာ ဖြစ်ပါတယ်။ 

အထက်တန်းပြဆရာ ဆရာမလိုအပ်ချက်တွေကြောင့် ကျောင်းသားတွေကို ဇွန်လက စတင်ကာ တဦးကို ကျပ်  ၃၀၀၀ နှုန်းနဲ့ ကောက်ခံသွားမှာဖြစ်တယ်လို့ သိရပါတယ်။ 

စစ်ကောင်စီရဲ့ ပြန်ကြားရေးဒုဝန်ကြီးကတော့ အခုစာသင်နှစ်မှာ ကျောင်းအပ်တဲ့ ကျောင်းသူ ကျောင်းသား အရေအတွက် ၅၂ သိန်းကျော်ရှိသလို စာသင်မယ့် ဆရာ ဆရာမလည်း လုံလောက်မှုရှိတယ်လို့ သတင်းစာရှင်းလင်းပွဲမှာ ပြောဆိုထားပါတယ်။

6 months Ago

May 4, 2022

လပွတ္တာတွင် သက်ကြီးရွယ်အို စစ်မှုထမ်းဟောင်းများကို နေ့စားခပေးပြီး ဂိတ်စောင့်ခိုင်းနေ

ဧရာ၀တီတိုင်း၊ လပွတ္တာမြို့မှာ စစ်ကောင်စီက သက်ကြီးရွယ်အို စစ်မှုထမ်းဟောင်းတွေကို လက်နက်တပ်ဆင်  နေ့စားခ ကျပ်ငွေ ၁၀,၀၀၀ ပေးပြီး လုံခြုံရေးဂိတ်တွေမှာ စောင့်ဖို့အတွက် ခေါ်ယူနေတယ်လို့ ဒေသခံတွေက ပြောပါတယ်။ 

စစ်မှုထမ်းဟောင်းတွေကို လုံခြုံရေးစောင့်ဖို့  နယ်ဝေးဆိုရင် ကျပ် ၁၀,၀၀၀ နဲ့ မြို့တွင်း ၇,၀၀၀  ပေးမယ်ဆိုပြီး စစ်ကောင်စီတပ်သားတွေက စည်းရုံးခေါ်ယူနေတာလို့ဆိုပါတယ်။ 

ဒေသခံတဦးက  “ပိုက်ဆံ ဘယ်လောက်ပေးတယ် ဆိုတာတော့ သေချာမမြင်ရတော့ မပြောတတ်ဘူး။  တသောင်းပေးတယ်လို့ ကြားတယ်။ ဒီဘက်မှာက အလုပ်ရှားတော့ တချို့လည်း လုပ်ကြတာရှိတယ်။ ဂိတ်တွေမှာ စောင့်ခိုင်း တာများတယ်” လို့ ပြောပါတယ်။

စစ်ကောင်စီက နေ့စားစရိတ်ပေးပြီး ခေါ်လို့ရလာတဲ့ စစ်မှုထမ်းဟောင်းတွေကို မြို့တွင်းစစ်ဆေးရေးဂိတ်တွေနဲ့ မြို့ပြင်စစ်ဆေးရေးဂိတ်တွေမှာ လက်နက်တပ်ဆင်ပေးပြီး စစ်ကောင်စီတပ်သားတွေ ရဲတွေနဲ့အတူ  တာဝန်ချထားလေ့ရှိတယ်လို့ ဆိုပါတယ်။ 

နိုင်ငံအနှံ့တိုက်ပွဲတွေဖြစ်နေတာအပြင် စစ်ကောင်စီတပ်ထဲမှာ အကျအဆုံးနဲ့ တပ်ပြေးအင်အားများလာတာကြောင့် ခုလိုမျိုး စစ်မှုထမ်းဟောင်း ဝန်ထမ်းတွေကို အထိုင်လုံခြုံရေးဂိတ်တွေမှာ ခေါ်ယူအသုံးပြုနေရတာမျိုး ဖြစ်နိုင်တယ်လို့ စစ်တပ်အရာရှိဟောင်းအချို့က သုံးသပ်ပြောပါတယ်။

7 months Ago
More News
Up