လစာတိုးမြှင့်မှု

April 19, 2018

ဝန်ထမ်း လစာတိုးမြှင့်မှု မှားယွင်းတွက်ချက်ခဲ့ကြောင်း  စီမံဘဏ္ဍာထုတ်ပြန်

နိုင်ငံ့ဝန်ထမ်းတွေကို လစာတိုးမြှင့်ပေးမယ့် အစီအစဉ်နဲ့ပတ်သက်လို့ အမှုထမ်းတဦးရဲ့  အနည်းဆုံး လစာကို မှားယွင်းတွက်ချက်ပေးခဲ့တယ်လို့ စီမံကိန်းနှင့် ဘဏ္ဍာရေးဝန်ကြီးဌာန အမှားပြင်ဆင်ချက် ထုတ်ပြန်လိုက်ပါတယ်။ “နိုင်ငံတော်သမ္မတ ဦးဝင်းမြင့် ပြောကြားခဲ့သည့် နှစ်သစ်ကူး နှုတ်ခွန်းဆက်စကားမှာ  မိမိတို့ဝန်ကြီးဌာန၏ မှားယွင်းတွက်ချက်မှုအရ ‘အမှုထမ်းတဦး၏ အနည်းဆုံးလစာ ၁၂၀,၀၀၀ ကျပ်မှ ၁၃၈,၀၀၀ ကျပ်အထိ တိုးမြှင့်သွားမည်’ ဟု ဖော်ပြပါရှိခဲ့ပါသည်။ ယင်းဖော်ပြချက်အစား တွက်ချက်မှု အမှန်ဖြစ်သည့် ‘အမှုထမ်းတဦး၏ အနည်းဆုံးလစာမှာ ၁၂၀,၀၀၀ ကျပ်မှ ၁၄၄,၀၀၀ ကျပ်အထိ တိုးမြှင့်သွားမည်’ဟု ပြင်ဆင်ဖတ်ရှုပေးပါရန် မေတ္တာရပ်ခံအပ်ပါသည်။”လို့ အမှား ပြင်ဆင်ချက်မှာ ရေးသားဖော်ပြပါတယ်။ ဧပြီ ၁၇ ရက်၊ နှစ်ဆန်း ၁ ရက်နေ့က  နိုင်ငံတော်သမ္မတ ဦးဝင်းမြင့်က မြန်မာ့ရိုးရာ  နှစ်သစ်ကူး နှုတ်ခွန်းဆက်စကား ပြောကြားရာမှာ အလုပ်သမားတဦးရဲ့ တနေ့အတွက် အနည်းဆုံး အခကြေးငွေ ၄၈၀၀ ကျပ်နှုန်းနဲ့ လိုက်လျောညီထွေဖြစ်စေဖို့ အမှုထမ်း လစာများ အားလုံးကို ၂၀ ရာခိုင်နှုန်း တိုးမြှင့်ပေးပြီး အရာထမ်း လစာများကို ၁၀ ရာခိုင်နှုန်း တိုးမြှင့်ပေးနိုင်ရန် ပြည်ထောင်စုအစိုးရအဖွဲ့အနေနဲ့ စီစဉ်တွက်ချက်ပြီး ဖြစ်တယ်လို့ ပြောကြားခဲ့တာပါ။ အဆိုပါတွက်ချက်မှုအရ အမှုထမ်းတဦးရဲ့ အနည်းဆုံးလစာမှာ ၁၂၀၀၀၀ ကျပ်မှ ၁၃၈၀၀၀ ကျပ်အထိ တိုးမြှင့်သွားမှာဖြစ်ပြီး အရာထမ်းတဦးရဲ့ အများဆုံးလစာမှာ ၅၀၀၀၀၀ ကျပ်မှ ၅၅၀၀၀၀ ကျပ်သို့ တိုးမြှင့်သွားမယ်လို့ သမ္မတက ပြောကြားခဲ့တာပါ။
3 years Ago
Up