လက်ဘနွန်

October 28, 2022

လက်ဘနွန်နှင့် ရေကြောင်းနယ်နိမိတ်ဆိုင်ရာ သဘောတူညီချက် အစ္စရေးသဘောတူ

ဝန်ကြီးချုပ်ယာအာလာပစ် ဦးဆောင်တဲ့ အစ္စရေးအစိုးရဟာ အောက်တိုဘာ ၂၇ ရက်က  အစိုးရအဖွဲ့ အစည်းအဝေး ခေါ်ယူပြီးနောက်မှာ အမေရိကန် ကြားဝင်အကျိုးဆောင်ပေးတဲ့ လက်ဘနွန်နဲ့ ရေကြောင်းနယ်နိမိတ်ဆိုင်ရာ သဘောတူညီချက်ကို အတည်ပြုခဲ့ကြောင်း ဝန်ကြီးချုပ်ရုံးက ထုတ်ပြန်ပါတယ်။

မနက်ပိုင်းတုန်းက လက်ဘနွန်သမ္မတ မိုက်ကယ်အွန်းဟာ အထင်ကရ အမေရိကန် အကျိုးဆောင်တဲ့ သဘောတူညီချက်ကို အတည်ပြုပေးတဲ့ စာတစောင်ကို လက်မှတ်ရေးထိုးခဲ့ပါတယ်။

ဒါဟာ အစ္စရေးနိုင်ငံနဲ့ အစ္စရေးအစိုးရအတွက် ကြီးမားတဲ့ အောင်မြင်မှုတခုပါလို့ ဝန်ကြီးချုပ် လာပစ်က ပြောပါတယ်။

အစ္စရေးနိုင်ငံဟာ လုံခြုံရေး၊ စီးပွားရေး၊ သံတမန်ရေးနဲ့ စွမ်းအင်တို့မှာ အောင်နိုင်ခဲ့ပြီလို့လည်း ပြောပါတယ်။

ဒီသဘောတူညီချက်ဟာ ကမ်းလွန်ပင်လယ်ပြင်မှာ စွမ်းအင်ရှာဖွေရေးအတွက် လမ်းဖွင့်ပေးထားပြီး အစ္စရေးနဲ့ အီရန် ကျောထောက်နောက်ခံပြု လက်ဘနွန်အဖွဲ့ ဟစ်ဇ်ဘိုလာတို့ကြား ဖြစ်ပေါ်လာနိုင်တဲ့ ပဋိပက္ခတွေရဲ့ အရင်းအမြစ်တခုကို ဖယ်ရှားပေးတဲ့အပြင် လက်ဘနွန်ရဲ့ စီးပွားရေးအကျပ်အတည်းကို သက်သာစေနိုင်တယ်လို့ ရိုက်တာသတင်းမှာ ဖော်ပြထားပါတယ်။

သမိုင်းဝင်အောင်မြင်မှုအဖြစ် ပါတီသုံးခုလုံးက ချီးကျူးခဲ့ကြတဲ့ ဒီသဘောတူညီချက်ကို အစ္စရေးဝန်ကြီးချုပ်က ဂျေရုဆလင်မှာ အစိုးရအဖွဲ့ အစည်းအဝေးအပြီး သီးခြားစီ လက်မှတ်ရေးထိုးမှာ ဖြစ်ပါတယ်။

1 month Ago

October 13, 2022

လက်ဘနွန်နှင့် အစ္စရေး နှစ်နိုင်ငံရေပိုင်နက် နယ်နိမိတ် သတ်မှတ်ရေး သဘောတူ

လက်ဘနွန်နဲ့ အစ္စရေးတို့ကြား ရေပိုင်နက်နယ်နိမိတ်သတ်မှတ်ရေး သမိုင်းဝင် သဘောတူညီချက် ရယူနိုင်ခဲ့ပြီးနောက် “သံတမန်ရေးအရ အလွန်အောင်မြင်မှု”လို့ အမေရိကန် နိုင်ငံခြားရေးဝန်ကြီး အန်တိုနီ ဘလင်ကန်က အောက်တိုဘာ ၁၁ ရက်မှာ ပြောလိုက်ပါတယ်။

လာမယ့်လတွေအတွင်း နှစ်နိုင်ငံစလုံးကို အမေရိကန်က ဆက်ပံ့ပိုးသွားမယ်လို့ ဘလင်ကန်က ပြောပါတယ်။

အပြီးသတ်သဘောတူညီချက်ဟာ စစ်ပွဲနဲ့ ရန်လိုမှုသမိုင်းရှိတဲ့ အိမ်နီးချင်းနှစ်နိုင်ငံအကြား သိသာထင်ရှားတဲ့ အပေးအယူလုပ်မှုတခုဖြစ်ပြီး ကမ်းလွန် စွမ်းအင်ရှာဖွေရေး လမ်းဖွင့်ပေးထားပါတယ်။

“ဒါဟာ အစ္စရေးရဲ့ လုံခြုံရေးကို အားကောင်းစေမယ့် သမိုင်းဝင် အောင်မြင်မှုဖြစ်ပြီး မြောက်ပိုင်းနယ်စပ် တည်ငြိမ်မှုကို သေချာစေမယ့် သမိုင်းဝင် အောင်မြင်မှုတခုပါ” လို့ အစ္စရေးဝန်ကြီးချုပ် ယဲ လာပစ်က ထုတ်ပြန်ချက်ထဲမှာ ပြောပါတယ်။

လက်ဘနွန်သမ္မတ မီရှဲလ် အာဝင်က နောက်ဆုံး အမေရိကန် အဆိုပြုချက်ရဲ့ စည်းကမ်းချက်တွေက ကျေနပ်စရာကောင်းပြီး သဘောတူညီချက်ကို တတ်နိုင်သမျှ အမြန်ဆုံး ထုတ်ပြန်ဖို့ မျှော်လင့်တယ်လို့ ပြောပါတယ်။

အမေရိကန်သမ္မတ ဂျိုးဘိုင်ဒန်က အာဝင်နဲ့ လာပစ်တို့ကို ချီးကျူးဂုဏ်ပြုဖို့ အင်္ဂါနေ့က ဖုန်းခေါ်ခဲ့တာပါ။

သဘောတူညီချက်ဟာ သဘာဝဓာတ်ငွေ့ရှာဖို့ ရည်မှန်းထားတဲ့ လက်ဘနွန်နိုင်ငံ အရှေ့ဘက် မြေထဲပင်လယ်ထဲက အငြင်းပွားနေတဲ့ နယ်မြေပိုင်ဆိုင်မှုကို ဖြေရှင်းဖို့ ရည်ရွယ်ထားပါတယ်။ အစ္စရေးဟာ အဲဒီနေရာအနားက လယ်ကွင်းတွေကနေ သဘာဝဓာတ်ငွေ့ကို ထုတ်နေပါတယ်။

2 months Ago
More News
Up