လက်နက်ကြီးကျည်ကျရောက်

March 18, 2020

မကွေးတိုင်းအတွင်း စက်ရုံပေါ်လက်နက်ကြီးကျည်ကျရောက်ပြီး အမျိုးသမီး၁ ဦးဒဏ်ရာရ

မကွေးတိုင်းဒေသကြီး၊ မကွေးမြို့အနီး ဆားတိုင်ကန်ကျေးရွာမှာ မတ်လ ၁၇ ရက် မနက်ပိုင်းက လက်နက်ကြီးကျည် မတော်တဆ ကျရောက် ပေါက်ကွဲပြီး နှမ်း​လှော်ဖို စက်ရုံအမိုးပျက်စီးကာ  အမျိုးသမီးတဦး အနည်းငယ် ထိခိုက်ဒါဏ်ရာရရှိသွားပါတယ်။ စက်ရုံပိုင်ရှင် ကိုအာကာမင်း က " မနက်ပိုင်း ၇ နာရီကျော်လောက်က စက်ရုံပေါ်ကို ကျရောက်ပေါက်ကွဲခဲ့တာပါ။ စက်ရုံ ဝန်ထမ်းအမျိုးသမီးတစ်ဦး အနည်းငယ် ထိခိုက်ဒါဏ်ရာရပြီး အမိုးတချို့ပျက်စီးခဲ့ပါတယ်။ ဖြစ်ပြီး မကြာခင်မှာဘဲ မကွေးလေတပ်စခန်း ဌာနချုပ်က အရာရှိ၊ ဝန်ထမ်း ၁၅ ဦး လောက်ရောက်လာပြီး မတော်တဆ ကျည်ထွက်သွားတယ်လို့ပြောပါတယ်။ စက်ရုံ အတွင်း လက်ရှိ လက်နက်ကြီး ကျည်စတွေကို ရှင်းလင်းမှုတွေ လုပ်ဆောင်ကာ ပြန်လည်ပြုပြင်ပေး မယ်လို့ ပြောပါတယ်။ ဒဏ်ရာ အနည်းငယ်ရရှိတဲ့ အမျိုးသမီးကိုတော့ ဆေးခန်းလိုက်ပို့ ပြီးတာဝန်ယူမှုတွေ လုပ်ဆောင်ပေးပါတယ်"လို့ ဒီဗွီဘီကိုပြောပါတယ်။ ယခုသတင်းနဲ့ ပတ်သတ်လို့ အတည်ပြုချက် မရရှိသေးဘဲ စုံစမ်းနေတယ်လို့ မကွေးမြို့နယ်ရဲတပ်ဖွဲ့မှူး ရဲမှူးမြင့်လွင်က ပြောပါတယ်။ ဆားတိုင်ကန်ကျေးရွာ ဒေသခံတစ်ဦးဖြစ်တဲ့ ကိုသန်းနိုင်ကတော့ "ပေါက်ကွဲတဲ့ အသံကြားရတော့ အထိတ်တလန့်ဖြစ်တာပေါ့။ ပြည်သူတွေ ထိခိုက်ဒဏ်ရာရသေဆုံးမှု မရရှိတာ ကံကောင်းတယ်လို့ ပြောရမယ်။ စစ်တပ်က အရာရှိတွေကတော့ လေယာဉ်မှာတပ်ဖို့ လက်နက်တပ်ဆင်တဲ့ အချိန်မှာ မ​တော်တဆရှော့ဖြစ်ပြီး ထွက်သွားတာလို့ပြောတယ်လို့"ဆိုပါတယ်။ ပြီးခဲ့တဲ့ ၂၀၁၈ ခုနှစ် အောက်တိုဘာလ ၁၆ ရက်ကလည်း မကွေးလေတပ်စခန်းဌာနချုပ်မှ တိုက်လေယာဉ် ၂ စင်း မင်းဘူး စကုမြို့နယ်ထဲမှာ ပေါက်ကွဲပျက်ကျလို့ ပဉ္စမတန်းကျောင်းသူတဦး သေဆုံးခဲ့ပါတယ်။ သတင်း-မင်းထီး
2 years Ago
Up