လက်နက်ကိုင်အဖွဲ့

September 26, 2022

စစ်အုပ်စု၏ ဆွေးနွေးပွဲများမတက်ရန် တိုင်းရင်းသားလက်နက်ကိုင်အဖွဲ့များကို တောင်းဆို

အကြမ်းဖက်စစ်အုပ်စုဟာ ငြိမ်းချမ်းရေးအတွက် နိုင်ငံရေးဆွေးနွေးဖက်အဖြစ် မထိုက်တန်တာကြောင့် တိုင်းရင်းသားတော်လှန်ရေးအဖွဲ့အစည်းတွေအနေနဲ့ စစ်ကောင်စီရဲ့ ဆွေးနွေးပွဲတွေကို ဘယ်လိုနည်းနဲ့မှမတက်ကြဖို့ အရပ်ဘက်အဖွဲ့အစည်း ၆၀၀ လောက်က ဒီနေ့ တောင်းဆိုလိုက်ပါတယ်။

စစ်အုပ်စုက ဦးဆောင်ပြုလုပ်နေတဲ့ ငြိမ်းချမ်းရေး ဆွေးနွေးပွဲဆိုတာဟာ သူတို့ရဲ့ နိုင်ငံရေး၊ စစ်ရေးနဲ့ စီးပွားရေး အကျပ်အတည်းက ထွက်ပေါက်ရှာဖို့အတွက် ကြားခံအသုံးချတဲ့ အတုအယောင်ဆွေးနွေးပွဲပဲဖြစ်သလို စစ်အုပ်စုဟာလည်း နိုင်ငံတွင်းမှာရော နိုင်ငံတကာမှာပါ လုံးဝ တရားမဝင်တဲ့ အကြမ်းဖက်အဖွဲ့အစည်းပဲဖြစ်တယ်လို့ သူတို့ရဲ့ ထုတ်ပြန်ချက်မှာ ပြောဆိုပါတယ်။

စစ်အုပ်စုဟာ ပြည်သူတွေတင်ထားတဲ့ အစိုးရကိုဖမ်းဆီးခဲ့သလို ရွေးကောက်ပွဲရလဒ်ကို ငြင်းပယ်ပြီး  အာဏာသိမ်းဖို့ ကြိုးစားတဲ့ အကြမ်းဖက်အဖွဲ့အစည်းဖြစ်တယ်လို့ ဆိုပါတယ်။ ပြီးတော့ ဒီမိုကရေစီလမ်းစဉ်အရ ငြိမ်းငြိမ်းချမ်းချမ်းဆန္ဒပြကြတဲ့ ပြည်သူတွေကို ရက်ရက်စက်စက် ဖမ်းဆီး နှိပ်စက်သတ်ဖြတ်နေတဲ့ စစ်အုပ်စုဟာ ပြည်တွင်းဥပဒေတွေအရရော နိုင်ငံတကာ သတ်မှတ်ချက်တွေအရပါ အကြမ်းဖက်အဖွဲ့အစည်းဖြစ်တယ်လို့လည်း ဆိုပါတယ်။

ပြီးတော့ စစ်ရာဇဝတ်မှုတွေ၊ လူသားမျိုးနွယ်စုအပေါ် ကျူးလွန်တဲ့ ရာဇဝတ်မှုတွေကို နေ့စဉ် ကျူးလွန်နေတဲ့အဖွဲ့အစည်းဖြစ်ပြီး အာဆီယံဦးဆောင် သဘောတူထားတဲ့ ဘုံသဘောတူညီချက် ၅ ရပ်ကို ပြောင်ပြောင်တင်းတင်း ချိုးဖောက်ထားသလို ကုလသမဂ္ဂအပါအဝင် နိုင်ငံတကာ အစိုးရတွေ၊ အဖွဲ့အစည်းတွေရဲ့ အသိအမှတ်ပြုတာကိုလည်း မရတဲ့အဖွဲ့ဖြစ်တယ်လို့ ဆိုပါတယ်။

ဒါ့အပြင် အာဆီယံထိပ်သီးညီလာခံတွေနဲ့ ဝန်ကြီးတွေရဲ့ အစည်းအဝေးမှာ တက်ရောက်ခွင့်မရဘဲ ဖယ်ကြဉ်ခံထားရပြီး ပိုအားကောင်းလာတဲ့ ပြည်သူလူထုရဲ့ ခုခံတွန်းလှန်မှုကို အန်မတုနိုင်တော့တဲ့ အခြေအနေမှာ ပြည်သူနဲ့ အာဆီယံပါအဝင် နိုင်ငံတကာကို လှည့်စားဖို့အတွက် တိုင်းရင်းသား လက်နက်ကိုင်တော်လှန်ရေး အဖွဲ့အစည်းတွေကို အသုံးချပြီး အတုအယောင်ငြိမ်းချမ်းရေး ဆွေးနွေးပွဲကို ဟန်ပြလုပ်နေတာပဲဖြစ်တယ်လို့လည်း အရပ်ဘက်အဖွဲ့အစည်းတွေက ထုတ်ပြန် ပြောဆိုထားပါတယ်။

ဒီဆွေးနွေးပွဲတွေဟာ နွေဦးတော်လှန်ရေးအင်အားစုတွေ၊ ပြည်သူတွေနဲ့ တိုင်းရင်းသား လက်နက်ကိုင်တော်လှန်ရေး အင်အားစုတွေအကြား ခွဲထုတ်ဖြိုခွင်းဖို့ ရည်ရွယ်ချက်သက်သက်နဲ့ လုပ်နေတာလို့လည်း ဆိုပါတယ်။

ဒီဆွေးနွေးပွဲတွေကို တက်ရောက်မယ်ဆိုရင် အကြမ်းဖက်စစ်အုပ်စုကို တရားဝင်သယောင် ဖြစ်စေသလို တကယ့်ငြိမ်းချမ်းရေးနဲ့ ဖက်ဒရယ်ဒီမိုကရေစီ တည်ထောင်းရေး ပိုပြီး ကြန့်ကြာစေမယ်လို့လည်း ဆိုပါတယ်။ အဆိုးဆုံးကတော့ အကြမ်းဖက်စစ်အုပ်စုက လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေကို ဆက်ကျူးလွန်ဖို့ အားပေးသလို ဖြစ်စေမယ်လို့လည်း ထောက်ပြထားပါတယ်။

ဒီလိုအကြောင်းတွေကြောင့် အကြမ်းဖက်စစ်အုပ်စုဟာ ငြိမ်းချမ်းရေးအတွက် နိုင်ငံရေး ဆွေးနွေးဖက်အဖြစ် မထိုက်တန်ဘဲ သူတို့ကို မြန်မာ့နိုင်ငံရေးလောကကနေ အပြီးတိုင် ဖယ်ရှားပစ်ဖို့လိုတယ်လို့လည်း ဆိုပါတယ်။

ဒါကြောင့် ဒီမိုကရေစီအရေး၊ ဖက်ဒရယ်အရေးနဲ့ ငြိမ်းချမ်းရေးအတွက် ဂုဏ်သိက္ခာရှိရှိနဲ့ ကာလရှည်ကြာရပ်တည်လာတဲ့ တိုင်းရင်းသားလက်နက်ကိုင် တော်လှန်ရေးအဖွဲ့တွေအနေနဲ့ အကြမ်းဖက်စစ်အုပ်စုက ဖိတ်ခေါ်တဲ့ ဆွေးနွေးပွဲတွေကို လူသိရှင်ကြားဖြစ်ဖြစ်၊ လျှို့ဝှက်ပြီးတော့ဖြစ်ဖြစ် မတက်ရောက်ဘဲ ပြည်သူတွေနဲ့အတူ ပူးပေါင်းတိုက်ပွဲဝင်ကြဖို့ အရပ်ဘက်အဖွဲ့အစည်းတွေက တိုက်တွန်း တောင်းဆိုထားပါတယ်။

3 days Ago

September 22, 2022

ကရင်ပြည်နယ်အတွင်း ပဋိပက္ခချုပ်ငြိမ်းရေး လက်နက်ကိုင်လေးဖွဲ့ ပေါင်းစည်းရန် တိုက်တွန်း

ကရင်ပြည်နယ်အတွင်း ဖြစ်ပွားနေတဲ့ လက်နက်ကိုင်ပဋိပက္ခတွေ ချုပ်ငြိမ်းဖို့ တိုင်းရင်းသား လက်နက်ကိုင်လေးဖွဲ့ အမြန်ဆုံးပြန်လည်ပေါင်းစည်းဖို့ ကရင်လူငယ်တွေနဲ့ ကျောင်းသား ကျောင်းသူတွေက ကမ္ဘာ့ငြိမ်းချမ်းရေးနေ့မှာ တိုက်တွန်း တောင်းဆိုလိုက်ပါတယ်။

ကရင်ပြည်နယ်၊ ပိုင်ကျုံမြို့နယ်၊ တာကရားကျေးရွာမှာ စက်တင်ဘာ ၂၁ ရက်က ပြုလုပ်တဲ့ ကမ္ဘာ့ငြိမ်းချမ်းရေးနေ့မှာ ပဋိပက္ခနယ်မြေအတွင်းက ဒေသခံ ကရင်လူငယ်တွေနဲ့ ကျောင်းသား ကျောင်းသူတွေက စုပေါင်းတိုက်တွန်း တောင်းဆိုလိုက်တာပါ။

လက်ရှိဖြစ်ပေါ်နေတဲ့ နိုင်ငံရေးအကျပ်အတည်းကာလအတွင်း ကရင်အချင်းချင်း စည်းလုံးညီညွတ်ပြီး ကိုယ့်ဒေသ၊ ကိုယ့်လူမျိုးကို ပြန်ကာကွယ်နိုင်ဖို့နဲ့ ကရင်အမျိုးသားသမိုင်းမှာ အရုပ်ဆိုး အကျည်းတန်လွန်းတဲ့ မကောင်းတဲ့အမွေအစား ကရင်လူငယ်တွေကို ကောင်းတဲ့အမွေတွေကိုပဲ ပေးခဲ့စေချင်တယ်လို့ ဒေသခံ ကရင်လူငယ်တယောက်က ပြောပါတယ်။

“အခုက တပ်မဟာ ၁၊ တပ်မဟာ ၅၊ တပ်မဟာ ၆ နယ်မြေတွေမှာ စစ်ကောင်စီနဲ့ပူးပေါင်းပြီး နယ်ခြားစောင့် BGF တပ်တွေက သွားရောက်ထိုးစစ်ဆင်တာမျိုးတွေက ကရင်အချင်းချင်း ပြန်တိုက်ခိုက်နေတဲ့ အနေအထားမျိုးမှာ ကရင်အမျိုးသားသမိုင်းမှာ အရုပ်ဆိုး အကျည်းတန်လွန်းတယ်။ ကျနော်တို့ လူငယ်မျိုးဆက်သစ်တွေကို ကောင်းတဲ့အမွေတွေကိုပဲ ပေးခဲ့စေချင်တယ်။”

စစ်ကောင်စီက ကရင်ပြည်နယ်မှာရှိတဲ့ နယ်မြေတွေအထိ ကျူးကျော်ပြီး ကရင်လူမျိုး ကျေးရွာတွေကို လက်နက်ကြီးနဲ့ ရမ်းသန်းပစ်ခတ်တာ၊ သေနတ်နဲ့ပစ်ခတ်မှုတွေကြောင့် နေအိမ်အဆောက်အအုံတွေ ပျက်စီးခဲ့သလို ကရင်လူငယ်တွေ၊ ကျောင်းသားကျောင်းသူတွေ၊ မိဘပြည်သူတွေ ထိခိုက်ဒဏ်ရာရ သေဆုံးမှုတွေ ရှိခဲ့ပါတယ်။

လက်ရှိဖြစ်ပွားနေတဲ့ တိုက်ပွဲတွေအတွင်းမှာ ဒီမိုကရေစီအကျိုးပြု ကရင်တပ်မတော် (DKBA) အနေနဲ့ စစ်ကောင်စီဘက်က ရပ်တည်ကာကွယ်ပေးနေပြီး ကေအန်ယူနယ်မြေတွေအထိ စစ်ကောင်စီက ကျူးကျော်ဝင်ရောက်လာတဲ့အတွက် ဒေသခံပြည်သူတွေ နေအိမ်စွန့်ခွာပြီး ထွက်ပြေး တိမ်းရှောင်နေရပါတယ်။

DKBA အနေနဲ့ ကရင်အမျိုးသား အကျိုးစီးပွားအတွက် ရည်ရွယ်ပြီး ဖွဲ့စည်းထားတဲ့ အဖွဲ့ဖြစ်ရင် ကရင်အမျိုးသားအကျိုးစီးပွားကိုပဲ ရှေ့တန်းတင်ပြီး အကြမ်းဖက်ခံရတဲ့ ကိုယ့်ရဲ့ တိုင်းရင်းသားတွေဘက်က ရပ်တည်တဲ့ ကေအန်ယူနဲ့ ပြန်လည်ပေါင်းစည်းဖို့ အချိန်ကောင်း အခါကောင်း ဖြစ်သလို ကိုယ့်လူမျိုးကို အကြမ်းဖက်သတ်ဖြတ်၊ နေအိမ်တွေကို မီးရှို့ဖျက်ဆီးနေတဲ့ စစ်ကောင်စီနဲ့ လုံးဝလက်မတွဲဖို့နဲ့ ရပ်တန်းကရပ်ပြီး ကိုယ့်ရဲ့ အမျိုးသားအချင်းချင်း ပြန်လည်ပေါင်းစည်းဖို့ ကရင်လူငယ်တွေက တိုက်တွန်း တောင်းဆိုထားပါတယ်။

ကေအန်ယူ ထိန်းချုပ်နယ်မြေတွေအတွင်း တပ်မဟာ ၇ ကလွဲရင် ကျန်နယ်မြေတွေမှာ တိုက်ပွဲတွေ နေ့စဉ်ဖြစ်ပွားနေတဲ့အတွက် တပ်မဟာ ၃ နယ်မြေ ညောင်လေးပင်ခရိုင်၊ တပ်မဟာ ၅ နယ်မြေ ဖာပွန်(မူတြော်)ခရိုင်နဲ့ တပ်မဟာ ၆ နယ်မြေ ဒူးပလာယာခရိုင်တွေမှာ စစ်ဘေးရှောင်ပြည်သူ အရေအတွက် အများဆုံးဖြစ်ပြီး စစ်ဘေးရှောင်ပြည်သူ စုစုပေါင်း ၃၅၀,၀၀၀ ကျော်ရှိတယ်လို့ ကေအန်ယူက ထုတ်ပြန်ထားပါတယ်။

1 week Ago
More News
Up