လက်နက်ကိုင်

October 8, 2022

လက်နက်ကိုင်များ၏တိုက်ခိုက်မှုကြောင့် မက္ကဆီကိုရှိ ဌာနေတိုင်းရင်းသားများ နေရပ်စွန့်ခွာ

မက္ကဆီကိုတောင်ပိုင်း ချီယာပတ်စ်ပြည်နယ်မှာ ဆန်တာမားရ်တာမြို့ခံတွေကို လက်နက်ကိုင်အဖွဲ့ တွေက တိုက်ခိုက်ခဲ့ပြီးနောက် အောက်တိုဘာ ၆ ရက်မှာ ဌာနေတိုင်းရင်းသား ဒါဇင်နဲ့ချီပြီး နေရပ် စွန့်ခွာ ထွက်ပြေးခဲ့ကြရပါတယ်။ 

လက်နက်ကိုင်အဖွဲ့တွေဟာ အိမ်တွေ မြေတွေကို အသည်းအသန် ပြန်သိမ်းယူဖို့ ကြိုးပမ်းရာမှာ စက်တင်ဘာလ ကတည်းက တင်းမာမှုတွေ မြင့်တက်လာခဲ့ပါတယ်။ 

ဒေသခံတွေနဲ့ ထိပ်တိုက်တွေ့ပြီး အနည်းဆုံး နေအိမ်တစ်ဒါဇင်လောက် မီးလောင် ဆုံးရှုံးခဲ့ရကြောင်း ဒေသတွင်း သတင်းမီဒီယာတွေမှာ ဖော်ပြချက်အရ သိရပါတယ်။

အိမ်နီးချင်းကျေးရွာ မာဂျိုမတ် ရွာကို ရောက်ရှိလာတဲ့ စစ်ဘေးရှောင် အိုးမဲ့အိမ်မဲ့ မိသားစုတွေဟာ နေရာထိုင်ခင်း ရှာဖွေနေကြရပြီး အစိုးရ၊ ဆေးမှူးတွေ ကြက်ခြေနီအဖွဲ့တွေဆီမှ အကူအညီကို စောင့်ဆိုင်းနေကြပါတယ်။

ဆန်တာမားရ်တာ အိုးအိမ်စွန့်ပြေး ဒုက္ခသည် အသိုင်းအဝိုင်းမှ ပြောရေးဆိုခွင့်ရှိသူ ရေနယ်လ်ဒို ပီရက်ဇ်က“မနေ့က မိသားစု ခုနစ်စု ဒီကို ရောက်လာကြောင်း၊ ဒါပေမဲ့ ရာသီဥတု အခြေအနေနဲ့ မိုးရွာတာကြောင့် စစ်ဘေးရှောင်တွေ နေဖို့နဲ့ ဖျားနာသူတွေကို ထားဖို့ နေရာရှာနေကြောင်း၊ ဒါပေမဲ့ အခုလောလောဆယ်မှာ ဆေးမှူး၊ ကြက်ခြေနီနဲ့ အစိုးရဘက်က ဘယ်သူမှ မလာဘူး”လို့ ပြောပါတယ်။

ရိုက်တာမှ ရိုက်ကူးထားတဲ့ ဗီဒီယိုတစ်ခုမှာ အိုးမဲ့အိမ်မဲ့ ဇော့ထ်ဇေးလ် ဌာနေတိုင်းရင်းသားတွေ ဒါဇင်နဲ့ချီပြီး ပလပ်စတစ်တဲတစ်ခုအောက်မှာ မိုးခိုနေကြတာကို ပြသခဲ့ပါတယ်။ 

ပြည်သူတွေကို အကာအကွယ်ပေးမယ့် လက်နက်ကိုင် တပ်ဖွဲ့တွေက ကြာသပတေးနေ့မှာ ရောက်ရှိလာပါတယ်။ ချီယာပတ်စ်ပြည်နယ် အစိုးရရှေ့နေက တိုက်ပွဲတွေအတွင်း ဌာနေတိုင်းရင်းသားတစ်ဦး သေဆုံးမှုအတွက် စုံစမ်းစစ်ဆေးမှုတစ်ခု ဖွင့်လှစ်ခဲ့ပါတယ်။   

4 months Ago

August 12, 2022

ရေးမြို့တွင် ဆရာဝန်ဇနီးမောင်နှံနေအိမ်ကို လက်နက်ကိုင်များဝင်ရောက်ပြီး ငွေကျပ် သိန်း ၅၀ ယူသွား

မွန်ပြည်နယ်၊ ရေးမြို့နယ်က ကလေးအထူးကုဆရာဝန်နဲ့ သားဖွားမီးယပ်အထူးကု ဆရာဝန် ဇနီးမောင်နှံနေအိမ်ကို အမည်မသိ သေနတ်သမားတွေက ဝင်ရောက်ရှာဖွေခဲ့ပြီး ငွေကြေးတွေ ယူသွားတယ်လို့ ဒေသခံတွေက ပြောပါတယ်။

အခုလိုမဖြစ်ပွားခင် ဩဂုတ် ၃ ရက်က ရေးမြို့နယ် လဝကရုံးမှာ ရေးဘီလူးအဖွဲ့ ဝင်ရောက် တိုက်ခိုက်ခဲ့အပြီး အဲဒီညမှာပဲ ကလေးအထူးကုဆရာဝန်ကို စစ်ကောင်စီတပ်ဖွဲ့တွေက လာရောက်ခေါ်သွားခဲ့ပါတယ်။

စစ်ကောင်စီတပ်က ကလေးအထူးကုဆရာဝန်ကို စစ်ကြောရေးခေါ်သွားပြီး ၂ ရက်အကြာမှာပဲ ပြန်လည်လွှတ်ပေးခဲ့ပြီး ရက်ပိုင်းအတွင်းမှာပဲ အဲဒီဆရာဝန်မိသားစု နေအိမ်ကို အမည်မသိ လက်နက်ကိုင်အဖွဲ့တွေက ဝင်ရောက်စစ်ဆေးဖို့ဆိုပြီး အိမ်တံခါးတွေကို အတင်းဖျက် ရောက်လာခဲ့တာလို့ အနီးဝန်းကျင်မှာ နေထိုင်သူတွေက ပြောပါတယ်။

အမည်မသိ သေနတ်သမားတွေက အိမ်တံခါးကို ညပိုင်းဝင်ဖျက်နေတဲ့အချိန် အိမ်ရှင်ဆရာဝန် မိသားစုက ရဲစခန်းနဲ့ စစ်ကောင်စီတပ်ဖွဲ့တွေဆီ ဖုန်းဆက်ခဲ့ပေမဲ့ ဘယ်သူမှ ရောက်မလာဘဲ အဲဒီ လက်နက်ကိုင်ထားတဲ့သူတွေက ငွေကျပ် သိန်း ၅၀ လောက် ယူသွားတယ်လို့ နီးစပ်သူတွေက ဆိုပါတယ်။

အဲဒီလို လက်နက်ကိုင်ပြီး ငွေကြေးယူသွားတဲ့အဖွဲ့က စစ်ကောင်စီဘက်ကလူတွေ ဖြစ်ပေမဲ့ ဆရာဝန်မိသားစုက ခြိမ်းခြောက်ခံထားရပြီး လုံခြုံရေးအခြေအနေအရ ဘေးပတ်ဝန်းကျင်ကို ထုတ်မပြောပြတာ ဖြစ်တယ်လို့ ဆရာဝန်မိသားစုနဲ့ နီးစပ်သူတွေက ပြောပါတယ်။

အဲဒီဖြစ်စဉ်တွေ ဖြစ်ပွားပြီးတဲ့နောက် ဆရာဝန်မိသားစုက စိုးရိမ်ပြီး နေအိမ်ကနေ ထွက်ခွာသွားလို့ ရေးမြို့နယ်ထဲက ကလေးတွေအတွက် ကျန်းမာရေးပြသဖို့ အခက်အခဲ ဖြစ်နေကြတယ်လို့ ကလေးမိဘတွေက ပြောပါတယ်။

ရေးမြို့နယ်ထဲမှာ စစ်ကောင်စီက လုံခြုံရေးတင်းကျပ်ထားပြီး ညမထွက်ရအမိန့် ထုတ်ပြန်ထားပေမဲ့ ညပိုင်း အခုလို အမည်မသိ လက်နက်ကိုင်တွေက နေအိမ်ထဲကနေ ပိုက်ဆံယူသွားတဲ့အပေါ် ဒေသခံတွေအကြား ဝေဖန်မှုတွေ မြင့်တက်နေပါတယ်။

6 months Ago
More News
Up