လက်ကမ်းစာစောင်

May 8, 2021

စစ်အာဏာရှင်၏အကြမ်းဖက်ရက်စက်မှု ဂျပန်ပြည်သူများသိစေရန် လက်ကမ်းစာစောင်များ ဝေငှ

မြန်မာစစ်အာဏာရှင်ရဲ့ အကြမ်းဖက်ရက်စက်တာတွေကို ဂျပန်ပြည်သူတွေ သိအောင် ဂျပန်နိုင်ငံ၊ တိုကျိုမြို့၊ ကီချီဂျိုဂျီဘူတာမြောက်ဘက်ဝင်ပေါက်မှာ မေလ ၈ ရက်နေ့မနက်ပိုင်းက ဂျပန်ရောက်မြန်မာလူငယ်တွေ လက်ကမ်းစာစောင်ဝေငှခဲ့ပါတယ်။

အကြမ်းဖက်စစ်ကောင်စီရဲ့ ရက်စက်မှုတွေနဲ့ မြန်မာပြည်သူတွေရဲ့အခက်အခဲတွေကို ဂျပန်နဲ့ တကမ္ဘာလုံးက ပိုပြီးသိနိုင်အောင် ဂျပန်ရောက်မြန်မာလူငယ်တွေက ကြိုးစားနေတာပါ။

ဂျပန်နယ်မြေရဲစခန်းရဲ့ ခွင့်ပြုချက်နဲ့ အခုလို လက်ကမ်းစာစောင်တွေဝေတာဖြစ်ပြီး CDM ဝန်ထမ်းတွေနဲ့ CRPH တို့ကို ပံ့ပိုးနိုင်ဖို့ အလှူငွေတွေလည်း ကောက်ခံခဲ့ပါတယ်။ ရရှိတဲ့ အလှူငွေတွေကို ယုံကြည်စိတ်ချရတဲ့ ရင်းမြစ်တွေကတဆင့် လှူဒါန်းမယ်လို့ မြန်မာလူငယ်တွေက ပြောပါတယ်။

လက်ကမ်းစာစောင်ဝေပြီး အလှူငွေကောက်ခံတာ၊ ငြိမ်းချမ်းစွာဆန္ဒပြတာတွေကို ဂျပန်ရောက်လူငယ်တွေက အပတ်စဉ် စနေနေ့တိုင်းဆောင်ရွက်နေတာ ဖြစ်ပါတယ်။

Photo/News သီဟဖေအောင်

4 days Ago

April 7, 2021

စစ်အုပ်စု၏သင်္ကြန်ပွဲတွင် မပါဝင်ကြရန် ပုသိမ်လူငယ်များက လက်ကမ်းစာစောင်လိုက်ဝေနှိုးဆော်

ပုသိမ်မြို့မှာ အကြမ်းဖက်စစ်ကောင်စီက စီစဉ်ကျင်းပမယ့် သင်္ကြန်ပွဲကို မပါဝင်ကြဖို့အတွက် လူငယ်တွေကဦးဆောင်ပြီး ဧပြီ ၇ ရက်နေ့က စျေးတွေမှာ လက်ကမ်းစာစောင်လိုက် ဝေခဲ့တယ်လို့ သိရပါတယ်။

စစ်ကောင်စီရဲ့ သင်္ကြန်ပွဲမှာ မပါဝင်ဖို့အတွက်  မေတ္တာရပ်ခံစာကို ဧပြီ ၆ ရက်နေ့ကလူမှုကွန်ရက်မှာတင်ခဲ့ပြီး  လူစည်ကားရာ စျေးတွေမှာ မနက်ပိုင်းက မြို့ခံလူငယ်တွေက လိုက်လံဖြန့်ဝေခဲ့တာပါ။

သင်္ကြန်ပွဲတော်မှာ မပါဖို့အတွက် မေတ္တာရပ်ခံတဲ့ လက်ကမ်းစာစောင်ကို ပုသိမ်မြို့ကစျေးတွေမှာ စောင်ရေ ၄၀၀ နဲ့ ပုသိမ်တဘက်ကမ်းရှိ ရပ်ကွက်တွေမှာ အစောင်ရေ ၂၀၀ ဖြန့်ဝေခဲ့တယ်လို့ သိရပါတယ်။

မေတ္တာရပ်ခံထုတ်ပြန်ချက်မှာတော့ ဒီနှစ်ကျရောက်မယ့် နွေဦးသင်္ကြန်ကာလ ပြည်သူအများအပြား စိတ်ဒုက္ခရောက်ရှိခဲ့ပြီး စစ်အာဏာမတရား လုယူထားတဲ့ကာလဖြစ်လို့ နှစ်သစ်ကူး ရေမကစားကြဖို့  မေတ္တာရပ်ခံရေးသားထားတာတွေ့ရပါတယ်။

1 month Ago
Up