ရှမ်းပြည်နယ်ဝန်ကြီးချုပ်

January 28, 2022

ရှမ်းပြည်နယ်ဝန်ကြီးချုပ်နှင့် စီမံ/ဘဏ္ဍာဝန်ကြီးတို့ကို နှစ်ရှည်ထောင်ဒဏ်များ ချမှတ်

ရှမ်းပြည်နယ် ဝန်ကြီးချုပ် ဒေါက်တာလင်းထွဋ်နဲ့ စီမံ/ဘဏ္ဍာ ဝန်ကြီး ဦးစိုးညွန့်လွင်တို့ကို တောင်လေးလုံးအကျဥ်းထောင်တရားရုံးမှာ ဇန်နဝါရီ ၂၈ ရက်က အဂတိတိုက်ဖျက်ရေးအမှုတွေနဲ့  ထောင်ဒဏ် ၁၆ နှစ်စီ အမိန့်ချမှတ်လိုက်ပါတယ်။ 

“ဝန်ကြီးချုပ်ဒေါက်တာလင်းထွဋ်ကတော့ အဂတိတိုက်ဖျက်ရေးအမှုနံပါတ် ၁၊ ၂၊ ၃၊ ၄ နဲ့ ဝန်ကြီး ဦးစိုးညွန့်လွင်ကိုတော့ အဂတိတိုက်ဖျက်ရေးအမှုနံပါတ် ၁၊ ၃၊ ၄၊ ၅ ဖြစ်တယ်။ အမှု ၄ မှုမှာ ၄ နှစ်စီ ချလိုက်တာပါ" လို့ ဝန်ကြီးနဲ့နီးစပ်သူက ပြောပါတယ်။

တောင်လေးလုံးအကျဥ်းထောင်မှာ ဖမ်းဆီးထိန်းသိမ်းခံရတဲ့ ဝန်ကြီးချုပ် ဒေါက်တာလင်းထွဋ်ကို အဂတိအမှု ၄ မှုနဲ့ တစ်မှုကို ၄ နှစ်စီ စုစုပေါင်း ထောင်ဒဏ် ၁၆ နှစ် အမိန့်ချလိုက်တာ ဖြစ်ပါတယ်။

အလားတူ စီမံ/ဘဏ္ဍာဝန်ကြီးကို အဂတိ တိုက်ဖျက်ရေးအမှုနဲ့ ၄ မှုစီ တရားစွဲဆိုထားပြီး အမှုတစ်မှုကို ၄ နှစ်စီနဲ့ စုစုပေါင်း ၁၆ နှစ်ထောင်ဒဏ်ချမှတ်ခဲ့တာပါ။

ဦးစိုးညွန့်လွင်ကတော့ ပြီးခဲ့တဲ့ ဒီဇင်ဘာ ၃၀ ရက်နေ့က နိုင်ငံတော်ပုန်ကန်မှု ပုဒ်မဖြစ်တဲ့ ပုဒ်မ ၁၂၂ (၁) ထောင်ဒဏ်အနှစ် ၂၀၊ ပုဒ်မ ၁၂၄ (က) ထောင်ဒဏ် ၇ နှစ်နဲ့ ငွေဒဏ် တစ်သိန်း၊ ပုဒ်မ ၁၂၄ (ဃ) ထောင် ဒဏ် ၇ နှစ်နဲ့ ငွေဒဏ် တစ်သိန်း၊ ပုဒ်မ ၅၀၅(က) အမှု နှစ်မှုကို ထောင်ဒဏ် ၂ နှစ်စီ သီးခြားကျခံရတဲ့အတွက် စုစုပေါင်း ၃၈ ​နှစ် နဲ့ ငွေဒဏ် ၂ သိန်းတို့ကိုလည်း အမိန့်ချမှတ်ခံခဲ့ရပြီး ဖြစ်ပါတယ်။ 

ရှမ်းပြည်နယ် ဝန်ကြီးချုပ်နဲ့ စီမံ/ဘဏ္ဍာ ဝန်ကြီးတို့ဟာ စစ်တပ်အာဏာသိမ်းပြီးနောက်ပိုင်း ဖမ်းဆီးခံခဲ့ရတာလည်း ဖြစ်ပါတယ်။

1 year Ago

February 11, 2021

ရှမ်းပြည်နယ်ဝန်ကြီးချုပ်နှင့် အန်အယ်လ်ဒီပါတီအလုပ်အမှုဆောင်များကို ဖမ်းဆီး

ရှမ်းပြည်နယ်ဝန်ကြီးချုပ်ဒေါက်တာလင်းထွဋ်ကို အာဏာသိမ်း စစ်အစိုးရက ဖေဖော်ဝါရီ  ၁၀ ရက် ညပိုင်းမှာ  နေအိမ်မှာလာရောက် ဖမ်းဆီးခေါ်ဆောင်သွားတယ်လို့ ရှမ်းပြည်နယ် အမျိုးသားဒီမိုကရေစီအဖွဲ့ချုပ်က အတည်ပြုပြောကြားပါတယ်။

ဒါ့အပြင် ရှမ်းပြည်နယ်မြောက်ပိုင်း အန်အယ်လ်ဒီပါတီ  အောင်နိုင်ရေးအဖွဲ့ခေါင်းဆောင် ဦးမျိုးနိုင်ဦး(ခ)ကိုမျိုး၊ "ဝ"ကိုယ်ပိုင်အုပ်ချုပ်ခွင့်ရတိုင်း၊ ဟိုပန်မြို့က အန်အယ်လ်ဒီပါတီ မြို့နယ်ဥက္ကဋ္ဌ  ဦးဆိုင်ခွက်၊ အတွင်းရေးမှူးဦးအောင်ကိုဝင်း၊ လားရှိုးမြို့နယ်ရွေး ကောက်ပွဲကော်မရှင်ဥက္ကဋ္ဌ ဦးစိုင်းဇော်မင်း၊ လားရှိုးမြို့နယ်အုပ်ချုပ်ရေးမှူးဦးအာကာလင်း၊ မြန်မာရတနာရွှေခေတ်ကုမ္ပဏီပိုင်ရှင် ဦးစိုင်းဘိုဘိုကိုလည်း  စစ်အစိုးရက ထိန်းသိမ်းထားပါတယ်။

လက်ရှိရှမ်းပြည်နယ်အတွင်းက တခြားနိုင်ငံရေးတက်ကြွလှုပ်ရှားသူတွေကို ဖမ်းဆီးထိန်းသိမ်း ထားတာတွေရှိနေပြီး စစ်အာဏာသိမ်းတာကို ဆန့်ကျင်ကြောင်း ဆန္ဒထုတ်ဖော်နေကြတဲ့ သူတွေကိုလည်း ဖမ်းဆီးထိန်းသိမ်းဖို့ဆောင်ရွက်တာတွေရှိနေတာကြောင့် တိမ်းရှောင်နေရသူတွေလည်းရှိနေပါတယ်။

2 years Ago
Up