ရွှေ့ပြောင်းလုပ်သား

August 21, 2021

ရွှေလီဘက် ပိတ်မိနေသည့် ရွှေ့ပြောင်းလုပ်သား ၄၀၀ ကျော် မြန်မာနိုင်ငံ ပြန်ခွင့်ရ

တရုတ်-မြန်မာနယ်စပ် ရွှေလီဘက်မှာ ပိတ်မိနေတဲ့ မြန်မာရွှေ့ပြောင်းလုပ်သား ၄၀၀ ကျော် ဩဂုတ် ၂၁ ရက်မှာ နန်းတော်ဂိတ်ကနေ ပြန်ခွင့်ရခဲ့တယ်လို့ မြန်မာဘက် လွှဲပြောင်း လက်ခံသူတွေဆီက သိရပါတယ်။

ဩဂုတ် ၂၁ ရက်က အမျိုးသား ၂၃၅ ဦး၊ အမျိုးသမီး ၂၂၆ ဦး စုစုပေါင်း ၄၆၁ ဦး ပြန်လည်ဝင်ရောက်လာတယ်လို့ မြန်မာဘက်က လွှဲပြောင်းလက်ခံရာမှာ ပါဝင်သူတဦးက ပြောပါတယ်။

“မနက်ဖြန်လည်း မပိတ်လောက်ပါဘူး။ ဖွင့်မယ်လို့ သိရတယ်။ မနက်ဖြန်တော့ ဖွင့်ဖို့ သေချာတယ်။ လူတွေ ကျန်သေးတယ်။ မနေ့က စာရင်းသွင်းထားတဲ့သူ‌တွေ မပြန်ရတဲ့သူတွေရှိ ပါသေးတယ်။ နောက်ရက်တွေတော့ မသိဘူး။” 

ပုံမှန် မြန်မာစံတော်ချိန် မနက် ၈ နာရီမှ ၁၂ နာရီအထိ သတ်မှတ်ထားပေမဲ့ မွန်းလွဲ ၁ နာရီခွဲ အထိ ဂိတ်ပေါက်ဖွင့်ပေးတယ်လို့ သူက ပြောပါတယ်။

ကပ်ရောဂါ ကူးစက်ပြန့်ပွားမှုအခြေအနေကြောင့် မြန်မာနဲ့ တရုတ် နယ်စပ်တလျှောက် တရုတ်အစိုးရအနေနဲ့ တင်းတင်းကျပ်ကျပ် ကာကွယ် ထိန်းချုပ်ကုသနေတာကြောင့် လော့ခ်ဒေါင်း ကာလ ကြာရှည်လာတဲ့အပြင် လုပ်ငန်းတွေလည်ပတ်မှု မရှိတော့လို့ မြန်မာလုပ်သားများ အလုပ်လက်မဲ့ဖြစ်ကာ စရိတ်ပြတ် ခက်ခဲနေတာကြောင့် ပြန်ကြရတာလို့ ပြန်လာသူတွေက ပြောပါတယ်။ 

တရုတ်အစိုးရအနေနဲ့ တစ်ပတ် တစ်ကြိမ် ခက်ခဲသူတွေအားလုံးကို ဆန်၊ ဆီ၊ ခေါက်ဆွဲတွေ ထောက်ပံ့ပေးပေမယ့် အများစုက Lockdown ကာလ ကြာရှည်လာတာနဲ့အမျှ အလုပ်အကိုင်နဲ့ ဝင်ငွေမရှိတော့သလို အခန်းခလည်း ပေးစရာ ခက်ခဲနေတာကြောင့် မြန်မာရွှေ့ပြောင်းလုပ်သား တချို့ကို အိမ်ရှင်တွေနဲ့ အလုပ်ရှင်တွေက လက်မခံချင်ကြတော့ဘူးလို့ ဆိုပါတယ်။

ဒါကြောင့် ရဲစခန်းရှေ့မှာ မြန်မာလုပ်သား ၁၀၀ ကျော်ဟာ ဩဂုတ် ၁၉ ရက်မနက်ကစ အထုပ်အပိုးတွေနဲ့ လမ်းဘေးမှာအိပ်ပြီး မြန်မာနိုင်ငံပြန်နိုင်ဖို့ တောင်းဆိုခဲ့ကြရတယ်လို့ ပါဝင်ခဲ့သူ တစ်ဦးက ပြောပါတယ်။

တရုတ်-မြန်မာ နယ်စပ်ရောက် မြန်မာနိုင်ငံသားတွေအား တရုတ်ဘက်ကနေ ဇူလိုင် ၂၆ ရက်မှ ဩဂုတ်လ ၁၀ ရက်နေ့အထိ နန်းတော် တရားဝင် ဂိတ်ပေါက်ကနေ မြန်မာဘက်ကို ၁၆ ရက် ဆက်တိုက် လွှဲပြောင်းခဲ့ပါတယ်။

နန်းတော်တရားဝင် ဂိတ်ပေါက်ကို တရုတ်ဘက်က ဩဂုတ် ၁၁ ရက်ကစပြီး ယာယီ ပြန်ပိတ်လိုက်ပြီး မြန်မာရွှေ့ပြောင်းလုပ်သားတွေကို ဩဂုတ် ၁၆ ရက်မှာ  တစ်သုတ်၊ ဩဂုတ် ၂၁ ရက်မှာ တစ်သုတ် နှစ်နိုင်ငံ နယ်စပ်အစိုးရများ ညှိနှိုင်းကာ ပြန်လည်လွှဲပြောင်း လက်ခံခဲ့ကြတာ ဖြစ်ပါတယ်။

နန်းတော် တရားဝင်ဂိတ်မှ ဇူလိုင် ၂၆ ရက်မှ ဩဂုတ် ၂၁ ရက်အထိ နှစ်နိုင်ငံ လွှဲပြောင်း လက်ခံခဲ့တဲ့ တရုတ်နယ်စပ်ကနေ မြန်မာနိုင်ငံ ပြန်လာသူ ၅၃၃၅ ဦးရှိပြီး တရားမဝင် နယ်စပ် ခိုးဝင်ပေါက်ကနေ ပြန်လာရသူတွေလည်း အများအပြား ရှိပါတယ်။

2 months Ago

August 17, 2021

မဲဆောက်တွင် မြန်မာရွှေ့ပြောင်းလုပ်သားများကို ကိုဗစ်-၁၉ ကာကွယ်ဆေး စထိုးပေး

ထိုင်း-မြန်မာနယ်စပ်၊ တာ့ခ်ခရိုင်၊ မဲဆောက်မြို့မှာ ရွှေ့ပြောင်းအလုပ်သမားတွေအတွက် ထိုင်းအစိုးရက  ကိုဗစ်-၁၉ ကူးစက်ရောဂါကာကွယ်ဆေးကို ဩဂုတ် ၁၇ ရက် ဒီကနေ့မနက်မှာ ပထမဆုံးအကြိမ်အဖြစ် စတင်ထိုးပေးနေပါတယ်။

မဲဆောက်မြို့ အာရှလမ်းမကြီးပေါ်ရှိ ရော်ဘင်ဆန်ကုန်တိုက်နားမှာ  မနက် ၈ နာရီခွဲမှ ညနေ ၅ နာရီထိ ထိုးနှံပေးမှာဖြစ်တယ်လို့  အဆိုပါနေရာကို သွားရောက်ကြည့်ရှုခဲ့သူ မဲဆောက်အခြေစိုက် မြန်မာပြည်သားများအရေးပူးတွဲလှုပ်ရှားမှုကော်မတီ JACBA ဥက္ကဋ္ဌ ဦးမိုးကြိုးက ဒီဗွီဘီကို ပြောပါတယ်။

“ဒီနေ့ကတော့ ကျနော်တို့ မြန်မာရွှေ့ပြောင်းလုပ်သားတွေ ပထမဆုံး ကာကွယ်ဆေးစထိုးရတဲ့ နေ့ပေါ့ခင်ဗျာ၊ ကျနော်သွားကြည့်တဲ့အချိန် လူကတော့သိပ်မများပါဘူး။ တစ်ဦးနဲ့ တစ်ဦးလည်း ၆ ပေခွာခွာတန်းစီနေကြတယ်၊ ဒီမတိုင်ခင် နာမည်ကြိုပေးထားတဲ့သူတွေကို ထိုးပေးနေတာပါခင်ဗျ၊  စက်ရုံဆိုလည်း စက်ရုံအလိုက်၊ အဖွဲ့အစည်းက ဆိုရင်လည်းအဖွဲ့အလိုက် စာရင်းပေးထားသူတွေပေါ့။  တနေ့ကို ၂၀၀ ကနေ ၃၀၀ ထိ ထိုးပေးမယ်လို့ သိရတယ်။”

ကာကွယ်ဆေးထိုးခွင့်ရတဲ့ မြန်မာရွှေ့ပြောင်းလုပ်သားတွေဟာ ထိုင်းနိုင်ငံမှာ တရားဝင် နေထိုင်ခွင့်အထောက်အထားပြည့်စုံ သူတွေဖြစ်ကြပါတယ်။ အခုပထမအကြိမ်ထိုးပေးရာမှာ စျေးဆိုင်ခန်းတွေ၊ အလှပြင်ဆိုင်တွေ၊ စားသောက်ဆိုင်တွေ စတဲ့ လူများနဲ့ ဆက်ဆံရတဲ့နေရာတွေမှာ အလုပ်လုပ်ကိုင်ကြတဲ့ ရွှေ့ပြောင်းလုပ်သားတွေကို အဓိက ဦးစားပေးပြီး ထိုးပေးနေတာဖြစ်ပါတယ်။

ကိုဗစ်ကာကွယ်ဆေးလာထိုးတဲ့ အလှပြင်ဆိုင်က အလုပ်သမတဦးက “ကျမတို့ အလုပ်သမားတွေဟာ အန္တရယ်ရှိတဲ့ နေရာမှာအလုပ်လုပ်ရတယ်၊ အလှပြင်ဆိုင်ဆိုတော့ပိုဆိုးတာပေါ့။ ဒီနေ့မှာ ကိုဗစ် ကာကွယ်ဆေး လာထိုးပေးရတဲ့အခါ အတိုင်းမသိဝမ်းသာတယ်။ ဒါမှ ကိုယ့်အတွက်ရော တခြားသူအတွက်ပါ ကိုဗစ် မကူးစက်တော့ဘူးလေ။”လို့ ပြောပါတယ်။

မြန်မာလုပ်သားတွေ ခုလို ကိုဗစ်ကာကွယ်ဆေးထိုးခွင့်ရတဲ့ အပေါ် ထိုင်းနိုင်ငံသားအလုပ်ရှင်တစ်ဦးကလည်း “ဝမ်းသာစရာပါ။ ဒါက ထိုးသင့်တဲ့ ကာကွယ်ဆေးပဲ။ သူတို့(အလုပ်သမားတွေ) ကိုဗစ်ကူးစက်ရင် ကျတော်တို့ကိုပါ အန္တရာယ်ပေးတယ်လေ။ ဒါကြောင့်လာထိုးပေးတယ်။ သူတို့လည်း လူပဲလေ။ ဖြစ်နိုင်ရင်တော့ မဲဆောက်မှာ နေထိုင်တဲ့  ထိုင်း၊ မြန်မာလူမျိုး မရွေး အားလုံးကို ထိုးပေးစေချင်တယ်” လို့ ပြောပါတယ်။

ဒါပေမဲ့ ရွှေ့ပြောင်းလုပ်သားတွေအတွက်ထိုးနှံပေးတဲ့ တရုတ်နိုင်ငံထုတ် Sinovac ကာကွယ်ဆေးအပေါ် ယုံကြည်မှုနည်းနေတာကြောင့် ရာခိုင်နှုန်းအနည်းငယ်သာ ထိုးနှံလိမ့်မယ်လို့ ဦးမိုးကြိုးက ပြောပါတယ်။ 

မြန်မာရွှေ့ပြောင်းအလုပ်သမားတွေအတွက်  ကိုဗစ်ကာကွယ်ဆေးထိုးပေးတဲ့ အစီအစဉ်ဖြစ်ပေါ်လာဖို့ ထိုင်းနိုင်ငံအစိုးရ ကျန်းမာရေးဝန်ကြီးဌာနက ပုဂ္ဂိလက အဖွဲ့အစည်းတွေ ပူးပေါင်းဆွေးနွေမှုနဲ့ အကောင်အထည်ဖော်ခဲ့တာဖြစ်ပါတယ်။

မဲဆောက်မြို့မှာ ကိုဗစ်-၁၉ ကူးစက်ပြန့်ပွားမှု လျော့နည်းရလေအောင် ထိုင်း-မြန်မာ မခွဲခြားဘဲ  ကိုဗစ်ကာကွယ်ဆေးကို အားလုံးအတွက် ထိုးပေးသွားမှာဖြစ်ပြီး လက်ရှိထိုးပေးတဲ့ ကာကွယ်ဆေးဟာ အခမဲ့ ဖြစ်ကြောင်းလည်း သိရပါတယ်။

မဲဆောက်မြို့နယ်မှာ မနေ့က ကိုဗစ်-၁၉ ကူးစက်ခံရသူ လူနာသစ် နောက်ထပ် ၉၄ ဦးရှိပြီး ၊  ဇွန်လ ၁ ရက်မှ ဩဂုတ် ၁၆ ရက်ထိ ကိုဗစ် - ၁၉ ကူးစက်ခံရသူစုစုပေါင်း ၃၃၈၂ ဦးရှိပါတယ်။  မဲဆောက်ဆေးရုံကြီးမှာ ၅၀၁ ဦး၊ ပုဂ္ဂလိကဆေး ရုံတွေမှာ ၁၃၀ ဦး၊ ယာယီဖွင့်လှစ်ထားတဲ့ ဆေးရုံမှာ ၂၈၅ ဦးကုသနေပြီး ရောဂါမပြင်းထန်ဘဲ စက်ရုံအလုပ်ရုံတွေမှာ ကွာရန်တင်းဝင်နေရသူ ၅၆၆ ဦးရှိတယ်လို့ မဲဆောက်ဆေးရုံကြီးရဲ့ လူမှုကွန်ရက်စာမျက်နှာမှာ ဖော်ပြထားပါတယ်။

2 months Ago
More News
Up