ရွှေ့ပြောင်းနေထိုင်သူ

December 13, 2022

ရွှေ့ပြောင်းနေထိုင်သူ ၁,၅၀၀ ခန့် အမေရိကန်-မက္ကဆီကိုနယ်စပ်တွင် စောင့်ဆိုင်းနေ

မက္ကဆီကိုနိုင်ငံကနေ ရီယိုဂရန်ဒီမြစ်ကို ညတွင်းချင်း ဖြတ်ကျော်လာခဲ့တဲ့ ရွှေ့ပြောင်းနေထိုင်သူ ၁,၅၀၀ လောက်ဟာ ဒီဇင်ဘာ ၁၃ ရက်မှာ အမေရိကန်ပြည်ထောင်စုရဲ့ တက္ကဆက်ပြည်နယ် အယ်လ်ပါဆိုမြို့ နယ်နိမိတ်စည်းရိုးအနီးကို ရောက်ရှိလာခဲ့ပြီး အမေရိကန် နယ်ခြားအာဏာပိုင်တွေဆီ မှတ်ပုံတင်ဖို့ စောင့်ဆိုင်းနေကြပါတယ်။

အမေရိကန်-မက္ကဆီကိုနယ်စပ်မှာ ပိတ်ဆို့ထားတဲ့ ကပ်ရောဂါ အမိန့်သက်တမ်းမကုန်မီ ဧရိယာအတွင်း ရွှေ့ပြောင်းဝင်ရောက်မှု တိုးလာနေတာလို့ ရိုက်တာသတင်းမှာ ဖော်ပြပါတယ်။

အမေရိကန် အကောက်ခွန်နဲ့ နယ်စပ်ကာကွယ်ရေး (CBP) ဟာ ဒီဇင်ဘာ ၁၁ ရက်က  အယ်လ်ပါဆိုနယ်မြေထဲကို ဝင်ရောက်ဖို့ ကြိုးစားနေတဲ့ ရွှေ့ပြောင်းနေထိုင်သူ ၂,၄၀၀ လောက်ကို ကြုံတွေ့ခဲ့ရကြောင်း အယ်လ်ပါဆိုမြို့က ထိန်းသိမ်းထားတဲ့ ဝက်ဘ်ဆိုက်အရ သိရပါတယ်။

CBP ဟာ နိုဝင်ဘာလအတွက် သူ့ရဲ့ကိုယ်ပိုင်စာရင်းတွေကို မထုတ်ပြန်သေးပေမဲ့ စက်တင်ဘာနဲ့ အောက်တိုဘာလတွေက အယ်လ်ပါဆိုမှာ ရွှေ့ပြောင်းအခြေချသူတွေနဲ့ ထိပ်တိုက်တွေ့မှုတွေက မနှစ်ကထက် သိသိသာသာ တိုးလာခဲ့ပါတယ်။

ဒီလိုတိုးလာရတဲ့ အကြောင်းရင်း အတိအကျကို မဆုံးဖြတ်နိုင်ပေမဲ့လည်း အမိန့်စာက သက်တမ်းကုန်ဆုံးတော့မှာဖြစ်လို့ အမေရိကန် အာဏာပိုင်တွေဟာ ဒီဇင်ဘာ ၂၁ ရက်ကစပြီး ရွှေ့ပြောင်းဝင်ရောက်မှုတွေ နောက်ထပ် တိုးလာနိုင်မှုတွေအတွက် ပြင်ဆင်နေပါတယ်။

ဒီအမိန့်ဟာ ကိုဗစ်-၁၉ ပြန့်ပွားမှုကို ဟန့်တားဖို့ အမိန့်ထုတ်ထားတာဖြစ်ပြီး ဒီအမိန့်ကြောင့် အာဏာပိုင်တွေဟာ နယ်စပ်မှာဖမ်းမိထားတဲ့ ရွှေ့ပြောင်းနေထိုင်သူတွေကို အမေရိကန်မှာ ခိုလှုံခွင့်တောင်းဆိုဖို့ အခွင့်အရေးမပေးဘဲ မက္ကဆီကို သို့မဟုတ် တခြားနိုင်ငံတွေကို ပြန်ပို့ခွင့်ပြုထားပါတယ်။

2 months Ago

December 1, 2022

နိုင်ဂျီးရီးယားမှ သင်္ဘောခိုးစီးလာသည့် ရွှေ့ပြောင်းနေထိုင်သူ ၃ ဦးကို စပိန်ကမ်းခြေစောင့်တပ် ကယ်တင်

နိုင်ဂျီးရီးယားနိုင်ငံကနေ ကနေရီကျွန်းစုကို ရောက်ရှိလာတဲ့ ရေနံနဲ့ဓာတုသင်္ဘော အလီသီနီ -၂ ရဲ့ တက်မပေါ်မှာ ပုန်းခိုလိုက်ပါလာတဲ့ ရွှေ့ပြောင်းနေထိုင်သူ ၃ ဦးကို စပိန်ကမ်းခြေစောင့်တပ်က နိုဝင်ဘာ ၂၈ ရက်မှာ ကယ်ဆယ်ခဲ့ကြောင်း ကမ်းခြေစောင့်တပ်ဖွဲ့က တွစ်တာမှာ ပို့စ်တင်ထားပါတယ်။

မော်လ်တိစ်အလံ လွှင့်ထားပြီး ၁၈၃ မီတာ ရှည်လျားတဲ့ သင်္ဘောဟာ နိုဝင်ဘာ ၁၇ ရက်က နိုင်ဂျီးရီးယားနိုင်ငံ လာဂို့စ်မြို့ကနေ အနောက်အာဖရိက ကမ်းရိုးတန်းကို လမ်းကြောင်းလှည့်ပြီးနောက်မှာ ဂရန်ကနေရီယာရှိ လာစ် ပါးလ်မာစ်ကို ရောက်ရှိခဲ့ကြောင်း ရေကြောင်းသွားလာမှုအရ သိရပါတယ်။

သင်္ဘောဟာ နိုင်ဂျီးရီးယားကနေ ၁၁ ရက်စောပြီး ရွက်လွှင့်လာခဲ့ကြောင်း သင်္ဘောကပ္ပတိန်က ကြက်ခြေနီကို အတည်ပြုခဲ့ပါတယ်။

သင်္ဘောခိုးစီးလာသူတွေဟာ နိုင်ငံတကာ အကာအကွယ်ကို လျှောက်ထားခြင်းမရှိဘူးဆိုရင် ဒါမှမဟုတ် သူတို့မှာ ကျန်းမာရေးဆိုင်ရာ ခြွင်းချက်တခုခုရှိရင် သူတို့ကို ဂရုစိုက်ပေးဖို့က သင်္ဘောရဲ့ အော်ပရေတာအပေါ်မှာ မူတည်ကြောင်း ကနေရီကျွန်းစု ရွှေ့ပြောင်းနေထိုင်ရေး အကြံပေး ဇဲမာ ဆန်တာနာက ရိုက်တာကို ပြောကြားခဲ့ပါတယ်။

ဒီသင်္ဘာကိုပိုင်ဆိုင်တဲ့ Astra Ship Management ကတော့ မှတ်ချက်တောင်းခံဖို့ ဖုန်းခေါ်ဆိုမှုတွေကို ချက်ချင်းတုံ့ပြန်ခြင်း မရှိပါဘူး။

ရွှေ့ပြောင်းနေထိုင်သူတွေကို နိုဝင်ဘာ ၂၈ ရက် ဒေသစံတော်ချိန် ည ၇ နာရီလောက်မှာ ကမ်းခြေစောင့်ရေယာဉ်နဲ့ ကယ်ဆယ်ခဲ့ကြောင်း ကြက်ခြေနီအဖွဲ့က ပြောပါတယ်။

သ‌ေင်္ဘာခိုးစီးလာသူတွေမှာ အလယ်အလတ် ရေဓာတ်ခန်းခြောက်မှုနဲ့ အပူလွန်ကဲမှုတွေအတွက် ကုသပေးနေကြောင်း ကနေရီကျွန်းများ အရေးပေါ်ဝန်ဆောင်မှု အဖွဲ့နဲ့ ကြက်ခြေနီအဖွဲ့တို့က ပြောကြားခဲ့ပါတယ်။ သူတို့ထဲက တဦးဟာ အခြေအနေ ဆိုးရွားလို့ ကျွန်းပေါ်က ဆေးရုံကို ပို့ဆောင်လိုက်တယ်လို့လည်း ဆိုပါတယ်။

2 months Ago
More News
Up