ရွှေဘိုခရိုင်

November 24, 2022

ရွှေဘိုခရိုင်ရှိ နေအိမ်မီးရှို့ဖျက်ဆီးခံရသည့် ပြည်သူများ စောင်နှင့်အနွေးထည် အရေးပေါ်လိုအပ်နေ

စစ်ကိုင်းတိုင်း၊ ရွှေဘိုခရိုင်အတွင်း စစ်ကောင်စီတပ် မီးရှို့ဖျက်ဆီးတာကြောင့် နေအိမ်တွေ ဆုံးရှုံးခဲ့ရတဲ့ ပြည်သူ နှစ်ထောင်ကျော် နေစရာ အခတ်အခဲရှိနေပြီး စောင်နဲ့ အနွေးထည်တွေ အရေးပေါ်လိုအပ်နေတယ်လို့ S&C မီးဘေး၊ စစ်ဘေး ပညာရေးကူညီစောင့်ရှောက်ရေးအဖွဲ့ဆီ သိရပါတယ်။

အဆိုပါ ကျေးရွာကို ပြီးခဲ့တဲ့ ဩဂုတ် ပထမပတ်မှာ စစ်ကောင်စီတပ်ဖွဲ့ဝင်တွေက ပြည်သူ့ကာကွယ်ရေးတပ်ဖွဲ့ PDF တွေ ရှိတယ် အထင်နဲ့ ရွာလုံးကျွတ်မီးရှို့ဖျက်ဆီးခဲ့တာဖြစ်ပြီး အိမ်ခြေ ၇၀၀ နီးပါး မီးလောင်ပျက်စီးကာ လူဦးရေ နှစ်ထောင်ကျော် အိုးမဲ့အိမ်မဲ့ ဖြစ်ခဲ့ရတာပါ။

S&C မှ တာဝန်ရှိသူက “အတော်ဆိုးဆိုးဝါးဝါးဖြစ်ထားတော့ သူတို့အရမ်းကြောက်နေကြတာ။ ရွာမှာကအိမ်ခြေ ၁၀၀၀ ကျော်ရှိတယ်။ အိမ်ခြေ ၆၀၀ နီးပါးက မီးထဲပါသွားတာ။ လက်နှီးစုတ်တောင်မကျန် မီးရှို့ဖျက်ဆီးခံလိုက်ရတဲ့အထိ ဖြစ်သွားခဲ့တာပါ။ အခု အိမ်တအိမ်ကို ၂ သိန်းနဲ့ အလှူခံပြီးပြန်ဆောက်ပေးနေတယ်။ လောလောဆယ်အိမ်ခြေ ၅၀ ပြီးပြီ။ တိုက်တွေ ကားတွေနဲ့ နေခဲ့သူတွေက ခုချိန်မှာ ၂ သိန်းတန် ထန်းရွက်မိုး ဝါးထရံကာ အိမ်တလုံးထဲမှာ စုပေါင်းနေထိုင်နေကြရတယ်” လို့ ဒီဗွီဘီကိုပြောပါတယ်။

မီးဘေးသင့် ပြည်သူများလိုအပ်နေတဲ့ နေစရာအတွက် S&C အဖွဲ့က အိမ်တလုံး ကျပ် ၂ သိန်းနှုန်းနဲ့ နေအိမ် ၅၀ ဆောက်ပေးထားနိုင်ပြီး အိမ်ခြေ ၅၀၀ ကျော်ကို ဆက်လက်ဆောက်ပေးနိုင်ဖို့ ငွေကြေးလိုအပ်နေသလို ဆောင်းတွင်းကာလ ဖြစ်တာကြောင့် စောင်နဲ့ အနွေးထည်တွေလည်း လိုအပ်နေတယ်လို့ ဆိုပါတယ်။

မီးဘေးသင့်ပြည်သူတွေကို ထောက်ပံ့လှူဒါန်းလိုသူများအနေနဲ့ S&C မီးဘေးစစ်ဘေး ပညာရေး စောင့်ရှောက်ရေးအဖွဲ့ရဲ့ တရားဝင် ဖေ့စ်ဘွတ်ခ် page မှာ အသေးစိတ်အချက်အလက်တွေကို ဆက်သွယ်မေးမြန်းနိုင်ပါတယ်။

2 weeks Ago

October 24, 2022

ရွှေဘိုခရိုင်ရှိ CDM ကျောင်း စာရေးကိရိယာနှင့် စာရေးခုံများ လိုအပ်

စစ်ကိုင်းတိုင်း ရွှေဘိုခရိုင်အတွင်း S&C မီးဘေး ၊ စစ်ဘေး၊ ပညာရေး  ကူညီစောင့်ရှောက်မှုအဖွဲ့ရဲ့ ဦးဆောင်မှုနဲ့ ဒုတိယမြောက် CDM ကျောင်းကို ဖွင့်လှစ်ထားပြီး စာရေးခုံ နဲ့စာရေး ကိရိယာတွေ လိုအပ်နေတယ်လို့ S&C မှ ကိုစိုးမိုးအောင်က ပြောပါတယ်။

ဒုတိယမြောက် CDM စာသင်ကျောင်းမှာ မူလတန်းကနေ ၁၀ တန်းအထိ ပညာသင်ကြားပေး နေပြီး ကျောင်းသား၊ ကျောင်းသူ အယောက် ၄၀၀ ကျော် နဲ့ ဆရာ၊ ဆရာမ ၃၈ ယောက် ရှိတယ်လို့ ဆိုပါတယ်။ 

S&C မှ တာဝန်ရှိသူ ကိုစိုးမိုးအောင်က "ကျောင်းမှာ လိုအပ်တာတွေအများကြီးရှိနေပါတယ်။ စာသင်ခုံတွေ လိုအပ်ပါတယ်။ ကလေးတွေ မြေကြီးပေါ်မှာ စာသင်နေရတာ။ ခုလက်ရှိ ၂ ကျောင်း နဲ့ကို ငွေအတော်လေးကုန်တယ်။ ခုဆိုကျောင်း ၂ ကျောင်းပေါင်းရင် ဆရာ ဆရာမပေါင်း  ၆၀ ကျော်ရှိပြီ။ ၂ ကျောင်းကို ကျောင်းသူ ကျောင်းသားပေါင်း ၆၀၀ ကျော်ရှိတယ်။ ဆရာ၊ ဆရာမ တွေကိုလည်း ကျနော်တို့က လှူတဲ့ငွေလေးတွေနဲ့ မျှဝေပြီး လစာ ပေးနေပါတယ်”လို့  ပြောပါတယ်။ 

ဒါ့အပြင် S&C ရဲ့ ပထမဆုံး CDM ကျောင်းကို ပြီးခဲ့တဲ့ ဇူလိုင်က ရှမ်းပြည်နယ်တောင်ပိုင်း မဘိမ်းမြို့နယ်ရှိကျေးရွာ တရွာမှာ ကျောင်းသား၊ ကျောင်းသူ ၁၃၀ ဦး၊ CDM ဆရာ၊ ဆရာမ ၁၂ ဦး၊ စေတနာ့ဝန်ထမ်း ၆ ဦးတို့နဲ့  စတင်ဖွင့်လှစ်ခဲ့တာဖြစ်ပါတယ်။

2 months Ago
More News
Up