ရွှေဘို

November 5, 2021

ရွှေဘိုမြို့နယ်က နေအိမ် ၁၅ လုံးခန့်ကို ချိပ်ပိတ်၊ စိုက်ပျိုးပြီးဧက ၁၅၀ ခန့် လုပ်ခွင့်ပိတ်ခံရ

စစ်ကိုင်းတိုင်း ရွှေဘိုမြို့နယ်၊ ပလိုင်း(ပန်းလှိုင်)ရွာနေ ရွာသား ၁၅ ဦးရဲ့ နေအိမ်တွေကို PDF နဲ့ ဆက်သွယ်ထောက်ပံ့တယ်လို့ဆိုကာ နိုင်ငံပိုင်သိမ်းဆည်းခဲ့တဲ့အပြင် သူတို့ ပိုင်ဆိုင်တဲ့ စိုက်ပြီးသား လယ်ဧက ၁၅၀ ခန့်ကိုပါ လုပ်ခွင့် ပိတ်လိုက်တယ်လို့ ဒေသခံတွေက ပြောပါတယ်။

“ပလိုင်းကို စစ်တပ်စွဲတော့ နွေဦးတော်လှန်ရေးတက်ကြွလှုပ်ရှားသူတွေနဲ့ NLD ထောက်ခံသူတွေရဲ့ လယ်တွေ မစိုက်ရဘူးလို့ တားတယ်။ ကောက်စိုက်မတွေ မစိုက်ရဲလို့ တက်ပြေးကြရတယ်။ နောက် စိုက်ပျိုးရေးဌာနက မဖြစ်မနေ စိုက်ရမယ်ဆိုလို့ လယ်ပိုင်ရှင်တွေက အလုပ်သမားတွေငှား ပျိုးတွေ ဝယ်ပြီး စိုက်ကြတာပေါ့။ အခုစိုက်ပြီးလို့ သီးနှံပေါ်ခါနီးမှ ရေသွင်း ရေထုတ်ပေါက် မတ်တပ်ရပ်ရင်ကို ထောင် ၇ နှစ်ချမယ်ဆိုပြီး စစ်ကောင်စီခန့် အုပ်ချုပ်ရေးမှူးက နေ့စဉ်ကြေညာနေတာ စိုက်ထားတဲ့ တောင်သူတွေ အခက်အခဲဖြစ်တာပေါ့။ မြေဆီကျွေး ချိန်မကျွေးရနဲ့ ဒီအတိုင်းပြစ်ထားကြရ တာ” လို့ ဒေသခံတစ်ဦးက ပြောပါတယ်။

ပလိုင်းကျေးရွာမှာ စစ်ကောင်စီက ချိပ်ပိတ်ထားတဲ့ နေအိမ် ၁၅ လုံးခန့်ရှိပြီး သူတို့ပိုင်ဆိုင်တဲ့ စိုက်ပျိုးပြီးသား လယ်ဧက ၁၅၀ လောက်ပါ လယ်လုပ်ခွင့် ပိတ်ပင်ခဲ့တာဖြစ်ပါတယ်။

ရွှေဘိုမြို့နယ် ပလိုင်းကျေးရွာကို ဇူလိုင်လက စပြီး စစ်တပ်က တပ်စွဲခဲ့ကာ ကျေးရွာအတွင်းက ဆိုင်ကယ် အစီး ၅၀ ခန့်နဲ့ စပါးတင်း တစ်သောင်းခန့်ကိုလည်း စစ်ကောင်စီတပ်တွေရဲ့ မတရားယူ ခံခဲ့ရတာဖြစ်ပါတယ်။

စစ်ကိုင်းတိုင်း တန့်ဆည်မြို့၊ မဟာမြိုင်ရပ်ကွက် အ.ထ.က ၂ နားမှာ နိုဝင်ဘာ ၅ ရက် မနက်ပိုင်းက စစ်ကောင်စီတပ်ရဲ့ ပစ်ခတ်မှုကြောင့် နေအိမ်အတွင်းမှာ နေထိုင်နေတဲ့ အသက် ၂၅ နှစ်အရွယ် မမေဇင်ကျော် ကျည်ထိမှန်ပြီး သေဆုံးသွားတယ်လို့ ဒေသခံတွေက ပြောပါတယ်။

“မနက် ၈ နာရီခွဲလောက်က အထက ၂ နား ဗုံးပေါက်တယ်။ အဲဒါနဲ့ပတ်သက်ပြီး စစ်တပ်က ရမ်သမ်းပစ်ခတ်တာတွေ လုပ်တယ်။ အနီးအနားအိမ်က အမျိုးသမီးတစ်ဦးကို ဝင်မှန်လို့ သေသွားတယ်” လို့ မြို့ခံတစ်ဦးက ပြောပါတယ်။

အ.ထ.က ၂ နားမှာ ကျောင်းဖွင့်ရက် လာစောင့်တဲ့ အကြမ်းဖက်စစ်တပ်ကို TaZe Tiger အဖွဲ့က မိုင်းနှစ်လုံးခွဲ တိုက်ခိုက်ခဲ့တာဖြစ်ပါတယ်။

တန့်ဆည်မြို့နယ်အတွင်းမှာ အောက်တိုဘာ ၂၂ ရက်ကလည်း ကံထူးမရဲစခန်းအနီး ဗုံးပေါက်ကွဲပြီးနောက် စစ်တပ်က ပစ်ခတ်ခဲ့လို့ ကြက်ဆူကန်ရွာသားတစ်ဦး ကျည်ထိ မှန်သေဆုံးခဲ့ဖူးပါတယ်။

2 months Ago

November 4, 2021

မင်းကင်း၊ ရွှေဘိုတို့တွင် အပြစ်မဲ့ပြည်သူနှင့် NLD ထောက်ခံသူများ မတရားဖမ်းဆီးခံနေရ

စစ်ကိုင်းတိုင်း ရွှေဘိုနဲ့ မင်းကင်းမြို့နယ်တို့မှာ အပြစ်မဲ့ပြည်သူတွေနဲ့ NLD ထောက်ခံသူတွေကို စစ်ကောင်စီတပ်က မတရားဖမ်းဆီးနေတာကြောင့် ဒေသခံတွေ စိုးရိမ်နေကြပါတယ်။

မင်းကင်းမြို့နယ် တောင်တွင်းဒေသ တောင်စာရေးရွာက ကိုဟိန်ကိုနဲ့ ကိုအောင်ဟိန်းတို့ နှစ်ဦး ရွာဘေးကချောင်းမှာ ငါးမျှားနေစဉ် နိုဝင်ဘာ ၃ ရက်နေ့ မနက် ၁၁ နာရီလောက်မှာ  စစ်ကောင်စီတပ်တွေက လာရောက်ဖမ်းဆီးခေါ်ဆောင်သွားတယ်လို့ ဒေသခံတစ်ဦးက ပြောပါတယ်။

"ရွာဘေးကချောင်းမှာ ငါးမျှားနေတုန်း လာဖမ်းသွားတယ်လို့တော့သိ ရတယ်ဗျ။ ဘယ်ကြောင့်ဖမ်းစီးသွားတယ်ဆိုတာ မသိရဘူး။”

ရွှေဘိုမြို့နယ်က အပြစ်မဲ့ပြည်သူတွေနဲ့ NLD ထောက်ခံသူတွေကို လက်နက်တွေနဲ့ဓာတ်ပုံရိုက်ပြီး စစ်ကောင်စီကနေ PDF နဲ့ PDF ထောက်ပံ့သူတွေဆိုပြီး မတရားစွပ်စွဲဖမ်းဆီးနေတယ်လို့ ဒေသခံတစ်ဦးက ပြောပါတယ်။

“နိုဝင်ဘာ ၁ ရက်နေ့နဲ့ ၂ ရက်နေ့တို့မှာ အောင်ဇေယျာလူမှုကူညီရေးအသင်းကိုဝင်စီးပြီး အသင်းသားအချို့ကိုလည်း PDF လို့ စွပ်စွဲတယ်။ ကူတို့ဆိပ်ရွာက NLD ဥက္ကဋ္ဌ တစ်ဦးနဲ့ သာမာန်ပြည်သူတစ်ဦးကိုည်း PDF ဆိုပြီး စွပ်စွဲခံရပြန်တယ်။ တကယ်လုပ်နေတဲ့သူတွေဖမ်းလို့ မမိတော့ သာမာန်ပြည်သူတွေနဲ့ NLD နဲ့ပတ်သက်သူတွေကို ပစ်မှတ်ထားပြီး စွပ်စွဲ ပုဒ်မတပ်နေကြတယ်။”

အလားတူ ရန်ကုန်ကို အလုပ်သွားလုပ်မယ့် ခင်ဦးမြို့နယ်က လူငယ် ၄ ဦးကိုလည်း အထောက်အထားပြပေမယ့် PDF သင်တန်းဆင်းလာတယ်လို့ဆိုပြီး ကားဂိတ်မှာ ဖမ်းဆီးသွားတယ်လို့ ဆိုပါတယ်။

မင်းကင်းမြို့နယ်မှာ စစ်တပ်အာဏာသိမ်းပြီးနောက် အသတ်ခံရသူ ၂၀ ကျော်နဲ့ ဖမ်းဆီးချုပ်နှောင်ခံရသူပေါင်း ၁၀၀ ကျော်၊ ရွှေဘိုမြို့နယ်မှာတော့ အောက်တိုဘာ ၂၂ ရက်နေ့ကစပြီး PDF နဲ့ ဆက်နွှယ်သူ၊ PDF ထောက်ပံ့သူ၊ PDF လို့ပြီး အပြစ်မဲ့ပြည်သူနဲ့ NLD ထောက်ခံအားပေးသူ ၃၀ လောက် ဖမ်းဆီးခံထားရတယ်လို့ သိရပါတယ်။

Photo-စစ်လော်ဘီ Page ။

3 months Ago
More News
Up